Read Central Asmat MATIUS 7 Bible Online

MATIUS 7 - Central Asmat bible

MATIUS 7

¹“Caram ow e adosa atakam basakamtiw arapok. Allah e cadosa atakam basakamtiwasin.

²Car ow e adosa atakam asakamtiwcokom, Allah e cadosaam inim cowok asakamtiwcema. Car ow e adosa atakam awut aotawcokom, Allaham e cadosa atakam awut aotawcema.

³Car ponowas kanimnakap, e cajowow ipic manmok aman apormokom. E nat, e camanmok aman balok awap. Caram e balok bapor opok aemamokom. Ucim inimasaram?

⁴E camanmok aman balok awap. E nat, car atakam e cajowow ipic aotawmokom, ‘Dor e omanmok ponowas bwerewosomtam.’ Car inim atakam botaw ucimaram?

⁵Car pir bwe ow ara. E camanmok aman balok batakamerewosomey. Wunam e cajowow ipic manmok ponowas kanimnakap bwerewosomtam, manmok akat atiwcemem.”

⁶“E akat pok, juwur batetam aropok. E camanikmanik akatipicam o bipu biwititam arapok. Ar, e pok, bwey desen ajipirjarcema, wunam sis car aofiratamceman.”

⁷“Janim manimey. Allah masirin, e janim aanimcokomas aemtamceman. Eras bapowporey. Car masirin, e apowporcokomas apowtewcomokom. Jimasap bakakajumey. Allah masirin, e jimasap car apayimtamceman.

⁸E janim aanimames ow takas e janim aanimamesas atewmes. E apowpormes ow, e apowpormesas apowtewmes. Allah e jimasap bakakajum ow, e jimasap apayimtamama.

⁹Car jiwi epcom ow, e cajiwi amos janim car aanimcannew, car ek e jiwi batetam open?

¹⁰Ar enam janim car aanimcannew, car amer e jiwi batetam open?

¹¹Bare, car takas dosa ow ara. Ca nat, e catiperes akat pok batetam camsom ara. Bare, caricipic onam op awap. Aramat ipicam atakas e janim aanimces ow atetamcema araman.”

¹²“Car, ow, asan akat, ca bom akat aemamokomnew, caram asan akat e ow mamomey. E Musa tulis aeapomef Jirmec atakam fweam, e Allah atakam botaw ow tulis aeapomfes atakam fweam, bare inim atakam ara.”

¹³“Car e sat jimasap bafiwey. E neraka bokotpu jimasap, bare afo ara. E bokotpuam umuw ara. E bokotpu acowojarmes ow, bare arke ara.

¹⁴E jiwne batamemapawar asan bokotpu jimasap, bare sat ara. E bokotpu ajarmes owam ajurusemames. E bokotpu apowtewmes ow, bare arke opok ara.”

¹⁵“Car e Allah atakam botaw suw ow pimicima. Ar domba inim cimin car aenawomceman. E nat, e ajak aman ar jokmennakut wasan juwur inim cimin ara.

¹⁶Ca nat, e ow aemamesas aporcokom, car ar suw ow aporcomokom. Ow, anggur eke, fa epcom os kari bakomtew open? Ar, os eke juwas “arā,” fa epcom os kari bakomtew open?

¹⁷E akat os akan takas, eke akat apema. E sakuwe os akan nat, eke pwicak apema.

¹⁸Bare, akat os akan, eke pwicak bwempetep asan opok. Sakuwe os akanam, eke akat bwempetep asan opok.

¹⁹Ow, os, akat eke bape opok aporces, ar e os amatiwcemes. Ar masirin, e os jismak asapimapomcemes.

²⁰Inimas ara, car e ow e aemamesas aporcokom, ar Allah atakam botaw suw ow aporcomokom.”

²¹“Wun ow atakam dor aotawmenes, ‘Tuhan. Tuhan.’ Inim aemes. E nat, e ow takas, e Onam Op Pemerintah Asan, bwemfiw asan opok. E onam op daricipic atakam ji bwe ow cowok, erasan afiwcemes.

²²E jofay aenawcow, ow arkeam atakam dor aotawcemenes, Tuhan. Tuhan. Da e ojuwas ajitewfom, wunam dar oratakam kawey ow aotawfomam, ow ajak aman dat aotewerisimfomam, junum bweas aemfomam, inima. Inim aecemes.

²³Dor masirin, atakam e ow aotawcimin. ‘Car nomsom opok cowok. Car dosa bwemawar ow ara. Caram a do awemcey asan memem arapok. Caram baysosey!’ ” Inim aecimin.

²⁴“Wun ow doratakam jen ajimes, wunam e atakam ji aemes. E ow, bi binip umuton ipic cowok inim cimin ara. E ipic cem aeapomef, ar e fasis e se komkom ajiwar aneyjirimapomefen.

²⁵Te masirin, aneyefen. Wapu bwi awutnakut aemseefen. Fo awutam e cem aapommenamefen. E cem nat, baneyjumtiw opoken. Bare, e cem fasis se komkom aman aememef arawen.

²⁶Wun owam dor atakam jen ajimes. E ow nat, e atakam ji bwe opok aemes. E ow, bi binip opok ipic cowok inim cimin ara. E ipic e acem bisin ton desen aeapomefen.

²⁷Te masirin, aneyefen. Wapu bwiam awutnakut aemseefen. Fo awutam e cem ajujumefen. E cem masirin, aneyjuseefen. Ar daniwisnakut aemamesefen.” Yesus inim aeefen.

²⁸Barem Yesus e atakam aotawkurumefen. E ow arkeam e amememtamef atakam, junum awut aefesen.

²⁹E Yesus atakam amememtamef ara, aram atakam faknakut aotawefen. E owam inimas aporfesen. Ar Yesus e ow arAllah Jirmec mamememtam ow inim cimin atakam mamememtam opok aporfesen.