Read Central Asmat MATIUS 8 Bible Online

MATIUS 8 - Central Asmat bible

MATIUS 8

¹Barewen. Yesus e sikon op ewneyefen. Ow arkenakut masirin, aramat ipic fa asep ajukusirienawfesen.

²Penyakit kusta ipic cowokam aenawefen. Ar aramat ipic bipu jine onok aneyotapefen. “Tuan. Or faknakut ara. Or akat aporcem, or dam akat do batetam araman.” Inim aeefen.

³Yesus masirin, ban ajoromef, wunam e ipic dam ton atatiwefen. “Dor inimas akat ara. Or dam akat ememey.” Inim aeefen. Yesus inim atakam atawef cowok masirin, e penyakit kusta, e ipic bakan asarimjiosefen. Aram dam akat aememefen.

⁴Yesus masirin, “Or aras atakam wun ow botaw arapok. O nat, e Allah atakam mamtaw tugas ipic akan mamakosey. Aramat ipic or baoworporcan. Or, e Musa jirmec ajirimef pok, Allah tetamey. Eras or dam akat aememamem, inim baporomtamas ara.” Inim aeefen.

⁵Yesus kota Kapernaum afiwefen. Afiwef masirin, tentara komandan ipic aramat ipic aenawomefen. Aram janim fak aanimefen.

⁶“Tuan. E dokerja bwemtam ipic cem awames. Ar japow ara. Aram aamesjurusma.” Inim aeefen.

⁷Yesus masirin, “Bare, dor e ipic baworomtam aenawcimin,” inim aeefen.

⁸E tentara komandan ipic nat, “Dor or awcawor opok. Inimas or e docem bwemfiw asan opok. O nat, atakamin atawey. E dokerja bwemtam ipic masirin, ajaworsitcema.

⁹Doram ow jirmec ji aemin, wunam dor e dotentara ow jirmec ajirimamin. Dor wun tentara ipic. ‘Baysosey,’ inim aecey, aramat ipic ajisoscema. Dor wun ipic, ‘Bwenawey,’ inim aecey, aramat ipicam aenawcema. Doram e dokerja bwemtam ipic, ‘Inim pok pwemey,’ inim aecey, bare aramat ipic inim pok aemcema.” Inim aeefen.

¹⁰Yesus e aramat ipic atakam jen ajief ara, aram junum aeefen. Aram atakam e fa asep asoromfes ow aotawefen. “Atakamnak ara, awamec ipic Allah basicim fak ipic ara. Dor e Israel ow aman, awamec ipic awcawor ow bi bapor opokut.

¹¹Ca nat, jakaperey. Ow arke, e capinmiin capinmiin ewinawcemes. Ar e Abrahamam, e Ishakam, e Yakubam, e Onam Op Pemerintah Asan, amos akac aancemes.

¹²E asan bafiwap ji ow, bare Yahudi ow ara. E nat, Allah, Yahudi ow arke, e jiwicnakut asan ajiwosomcema. Erasan ara, ow bwec awutut abweccemes. Aram dam jen ajicemes.” Yesus inim aeefen.

¹³Ar masirin atakam e komandan ipic aotawefen. “Or bare. Cema. Dor e jirey aememas jipu aemamin.” Inim aeefen. Bare, e kerja bwemtam ipic asarimjaworemefen.

¹⁴Barewen. Yesus, Petrus cem afiwemefen. Afiwemef masirin, ar Petrus anapwec dam aemamesef aporefen.

¹⁵Ar e cowoc ban aomopefen. E cowoc masirin, ajufamapefen. E cowocam asitef, wunam amos pok e aramat ipic atetamefen.

¹⁶Porow ara masirin, ow, dat ajak aman ow arke aramat ipicpu atowotnawfesen. Aramat ipic jirmecin e dat ajirima aeefen. Inimas ar e dat ow jak aman aotewerisima aeefen. E dat masirin, ajisosa aefesen. Aramat ipicam e dam ow takas ajaworomtewa aeefen.

¹⁷Ametnak ara, Allah atakam botaw ipic juwas Yesaya, atakam aotawefen. “E aramat ipic e dadam kumitas ajisomoscema. Aram e dadamas ajiwosomcema.” Inim aeefen. E Yesus aemefas, bare e Yesaya atakam jipuas ara.

¹⁸Barewen. Yesus ow arke fumi abwiciremfes aporefen. Ar masirin, e amamkawi ow e poman bajir jirmec ajirimefen.

¹⁹Allah Jirmec mamememtam ipic cowokam, aramat ipic aenawomefen. Aram atakam Yesus aotawefen. “Guru. E asanin asanin jisoscem, doram or ajamkawijarawarcimin araman.” Inim aeefen.

²⁰Yesus masirin, atakam e ipic aotawefen “E wasan juwur, co epcom. E sokam co epcom. E Asmat Anakat Ajaworemef Ipic nat, memames cem opok.” Inim aeefen.

²¹E awun mamkawi ipicam atakam aramat ipic aotawefen. “Tuhan. Dor e doricipic se batakamwuapom.” Inim aeefen.

²²Yesus nat, atakam e ipic aotawefen. “Mamkawican. E damir ow, e wun damir ow se arma bawuapomces.” Inim aeefen.

²³Yesusam ci asawuefen. E amamkawi owam e ci akac asawufesen.

²⁴E jicupum aemsefes, bare jon awutut awumenamefen. Waam awutnakut e ci aman ajawumefen. Aramat ipic nat, isi aemamesefen.

²⁵E mamkawi ow masirin, aramat ipic ameromfes, wunam ajitimfesen. “Tuhan. Ajortewcarowey. Dar bwi damir aafcomom openow.” Inim aefesen.

²⁶Aramat ipic masirin, atakam e ow aotawefen. “Ca nat, ucim omaram? Car do basicim awut opoknakap ow ara.” Inim aeefen. Aramat ipic masirin, asitefen. Ar jirmec e foam, e bwiam, ajirimefen. Bare, e bwiam orom aoemseefen.

²⁷E ow masirin, junum aefesen. “A ucim jipicam? E foam, e bwiam, aratakam ji aemes.” Inim aefesen.

²⁸Barewen. Yesus poman ajirefen. Ar e Gadara ow capinmi ajirtayefen. Jipic jamnukam e awerem asan ewenawfes, wunam aramat ipic bi jamnuk aemamtewfesen. Dat arke, e ipic jamnuk jak aman aemapawirisen. Inimas e ipic jamnuk jokmennakut arawen. Owam erasan bokotpu bwemokorfe asan opoken.

²⁹E ipic jamnukam atakam awut atawfesen. “Or Allah atiw ara. E nat, or ucim pok emcarowem? Allah e dabajurusum jofay, atakam emesakamtiwef. O nat, dar bap bajurusum arapen?” Inim aefesen.

³⁰Erasanam dawon opok inim, o cesa arke bar aemmarfesen.

³¹E datam janim fak Yesus aanimfesen. “Or dar a ipic jamnuk jak aman aotewerisimcarowemnew, dar e o dam aman bawarimfiwtotor, jirmec ajirimcarowey.” Inim aefesen.

³²Aramat ipic masirin, atakam e dat aotawefen. “Bare, baysosey.” Inim aeefen. E dat masirin, e ipic jamnuk jak aman awarimisfes, wunam e o dam aman awarimfiwtotorfesen. E o arke takas masirin, e emtow inim sikon fop akukusayneyfesen. Aram bwi akan aakpua inim aefesen. Aram bwi damir aaffesen.

³³E o cesa manmok batiw ow masirin, omar ajisosfesen. Aram e kota ajisosfesen. Aram erasan e aporfesas takas, atakam aotawfesen. Aram e jak aman dat ow aemfesasam atakam aotawfesen.

³⁴E kota ow takasam, Yesus bi jamnuk bwemamtew ajisfesen. Ar Yesus bi aporfes masirin, ar aramat ipic e acapinmi bakan bajios, janim fak aanimfesen.