Read Central Asmat MATIUS 9 Bible Online

MATIUS 9 - Central Asmat bible

MATIUS 9

¹Yesus ci asawuefen. Aram e poman aojirefen. Poman aojiref masirin, e akota aotayapefen.

²Owam japow ipic tepen emcom Yesus atowocenfesen. Yesusam e ow a basicimnak aporefen. Ar masirin, atakam e japow ipic aotawefen. “Ata Jak faka. Dor e odosa akokoromosomtamamin.” Inim aeefen.

³E wun Allah Jirmec mamememtam ow masirin, bi binip aceceremfesen. “Awamec ipic Allah awcawor arawen. Inimas ar pwicak atakam awut atawma.” Inim aefesen.

⁴Yususam e ow bi binip aceceremfesas amsom arawen. Ar masirin, “Car ucim bi binip pwicak aceceremamokom?

⁵E ton atakam, ucim atakamaramnew? ‘Dor e odosa akokoromosomtamamin,’ inim atakam aranew? ‘Basitey. Oram bajarey,’ inim atakam aranew?

⁶E Asmat Anakat Ajaworemef Ipic, bare awames capinmi ow dosa bakokoromosomtam fakas aomomamar araman. Dor eras car aporomtamamin.” Inim aeefen. Aramat ipic masirin, atakam e japow ipic aotawefen. “Basitey! E otopen batewey! Oram cema!” Inim aeefen.

⁷Bare, e japow ipic asitemefen. Aram e acem ajisosefen.

⁸E ow arkeam inimas aporfes, aram omar aefesen. Allah, inim fakas awut, asmat ow atetamef aporfesen. Inimas ar Allah asicimfesen.

⁹Barewen. Yesus e asan aewjisosef. Ajaref ara, aramat ipic, Matius, e pemerintah uang batawanimtam cem aman emapef aporef. Yesus masirin, “Mamkawican,” inim aeef. Bare, e Matius asitef. Aram aramat ipic ajamkawief.

¹⁰Yesus e Matius cem aman, amos memen aemapef. Pemerintah uang batawanimtam kerja ow arkeam, dosa ow arkeam, aenawfes. Ar e Yesusam, e amamkawi owam, amos akac aanfes.

¹¹Parisi owam eras aporfes. Ar masirin, jonow e Yesus mamkawi ow atowfes. “E caguru, e pemerintah uang batawanimtam kerja owam, e dosa owam, amos akac aanmes. Ucim inimaram?” Inim aefes.

¹²Yesusam inim atakam jen ajief. “Dam akat ow, dokter janim manim opok aemcemes. E dam pwicak ow nat, dokter janim aanimcemes.

¹³Alkitab atakam, ‘Dor, ow, kawey ow serow bajiom, jak aseremomamin. Do nat, ow pok dor bacatitam, jak baseremom opok.’ Inim aema. Bare. Caram baysosey, wunam e atakam, bi binip baceceremey. Dor tarowat ow bayte bapenaw opok. Dor fasi ow bayte aapenawof.” Yesus inim aeef.

¹⁴Jofay ara masirin, Yohanes mamkawi ow, Yesus aenawomfes. “Daram, e Parisi owam, bar arke amos pok amasecomom. E omamkawi ow nat, e join join amos pok aatamanmes. Ucim inimaram?” Inim aefes.

¹⁵Yesus masirin, “Ay petew ipic, e ajowow cowkon aemapmesnew, e ajowow jak pwicak open? Bare, ar jak pwicak opok. Asep jofay nat, ow, e ay petew ipic, e ajowow wasec aemtewcemes. E ajowow masirin, amos pok amasecemes.

¹⁶Ow, ay picin, tarey baju ton bakakamimapomporji opok. Ar ay picin, tarey baju ton akamimapomces, wunam e baju bwi acicikimces, e ay picin, e baju akekemtawcema. E jof terey masirin, awutnakut aotereycema.

¹⁷Owam ay anggur bwi, tarey picin bwi ese aman bowapomporji opok. Ow ay anggur bwi, tarey picin bwi ese aman aowapomces, e picin ese atereycema. E anggur bwiam aokoyameskurumcema. E picin eseam ananasiamescema. E nat, ow ay anggur bwi, ay picin ese aman aowapomcemes. Inimas ara, e bwiam, e eseam, akat aeapawarmes.” Yesus inim aeef.

¹⁸Yesus inim atakam e ow aotawef ara, sembahyang cem kepala ipicam aenawef. Ar aramat ipic bipu bi fop aneyjiapef. “Dopores damir jepen adamirafma. O nat, dey. E oban e cowoc dam ton batatiwey. Ar masirin, aojaworsitcema.” Inim aeef.

¹⁹Yesus masirin, asitef. Aram, e amamkawi owam, e ipic akac aamjarfes.

²⁰Cowoc cowokam, cen es tahun dua belas ajiwar batayu opok aememef. E cowoc e Yesus bak amerjamkawiemef. Ar aramat ipic baju bip ban akurumef.

²¹E cowoc bi binip aceceremef. “Dor e aramat ipic baju akurumcey cowok, dam akat aememcimin.” Inim aeef.

²²Yesusam asamanam ajiwomef. Ar e cowoc aporef. “Ata. Jak faka. Or asicimamenem. Inimas dam akat aememamem.” Inim aeef. Bare, e cowoc dam akat asarimememef.

²³Bare. Yesus e kepala ipic cem afiwemef. Ar suling bam ow aporef. Aram ow jisuwam awut aporef.

²⁴Aramat ipic masirin, “Car baysosey. E cowoc jiwi damir opok. Ar isi pwitamesor.” Inim aeef. E ow nat, Yesus uc aomocfes.

²⁵Yesusam e ow arke e cem aman awarimisimef. Awarimisimef masirin, ar e cowoc jiwi kamar afiwemef. Aram e jiwi ban acapimomef. E jiwi masirin, asitef.

²⁶E capinmi ow takas inim atakam jen ajifes.

²⁷Bare. Yesus erasan aewjisosef. Ajaref ara, manmok kapi ipic jamnuk, aramat ipic fa asatamfes. Aram atakam awut atawa aefes. “Daud urpisa! Saw akat oworporcarowey!” Inim aea aefes.

²⁸Bare, aramat ipic cem afiwef. E manmok kapi ipic jamnukam, e aramat ipic aenawomfes. Yesusam atakam e ow aotawef. “Dor e camanmok bateremtam fakas emcom. Car inim atakam basicim open?” Inim aeef. E ipic jamnuk masirin, “Tuhan. Dar inim atakam asicimamom,” inim aefes.

²⁹Bare, Yesus ban e ow manmok atewapomef. “Car inim atakam asicimamokom. Inimas e camanmok atereyma.” Inim aeef.

³⁰Bare, e jipic jamnuk, manmok atereyfes. Yesusam jirmec fak e ow ajirimef. “Car eras atakam kawey ow botaw arapok.” Inim aeef.

³¹E ow nat, ajisosfes, wunam ar Yesus atakam, e capinmi asanin asanin ow aotawfes.

³²E ow ajisosfes ara, wun ow, okor ipic, Yesuspu atowocenfes. Okor dat e ipic jak aman aemapawirien. Inimas e ipic okor aememawirien.

³³Yesus e dat e ipic jak aman aotewerisimef. E ipic masirin, atakam afasimef. E ow arkeam junum awut aefes. “Dar a Israel capinmi inimas basam bat opokut.” Inim aefes.

³⁴E Parisi owam atakam atawfes, “E dat kepala ipic e fakas ewamec ipic atetamama. Inimas e ipic dat aotewerisimama.” Inim aefes.

³⁵Bare. Yesus e kota takasam e samat takasam, ajitjaref. Ar e asanin asanin sembahyang cem aman atakam amememtama aeef. Ar e Allah Pemerintah Atakam Akat, acacapioma aeef. Aram ow cīncīn damasam, cīncīn dam kumitasam, ajaworomtawa aeef.

³⁶E ow arke, manmok batiw ipic opok domba, inim cimin aemapfes. Aram ajurusemfes dombaam, apacayosfes dombaam, inim cimin aemapfes. Yesusam inimas aporef. Inimas ar e ow sawes akat aoworporef.

³⁷Aramat ipic masirin, atakam e amamkawi ow aotawef. “E cesa pok eke piwi, bare awutut ara. E bakokomtaw ow nat, arke opok.

³⁸Caram janim e cesa pok aramat ipic mamanimey. Ar ow e acesa pok eke bakokomtaw jirmec bajirimcow.” Inim aeef.