Read Central Asmat MARKUS 12 Bible Online

MARKUS 12 - Central Asmat bible

MARKUS 12

¹Barewen. Yesus baposomtew atakam e ow aotawefen. “Jipic cowok anggur kebun atawapomefen. Aram pagar e kebun fumi abwicirimapomefen. Anggur bwi burumwisim asanam akenemefen. Cemam opnakut aeapomefen. Er e kebun manmok batiw ow bemap asan ara. Aram e kebun, kebun kerja bwemtam ow aotasimtitamefen. ‘Car e doranggur kebun kerja aemtamcenokom, dor e wun anggur eke car atatamcimin. E wun masirin, doras ara.’ Inim atayi aeefen. Ar masirin, wun jo capinmi ajisosefen.

²Bare, e anggur eke bakokomtaw bwi aenawefen. E kebun aramat ipic masirin, wun kerja bwemtam ipic cowok, e kebun kerja bwemtam owpu atewosomefen. Ar e ipic e wun anggur eke bataw atewosomefen.

³E kebun kerja bwemtam ow masirin, e kerja bwemtam ipic ban akimomfesen. Aram e ipic omop aaffes, wunam desenkus afasimenemfesen.

⁴E kebun aramat ipic masirin, wun kerja bwemtam ipic erasan aotewosomefen. E kebun kerja bwemtam ow nat, e ipic kus atakamtewfesen. Aram pwicakas e ipic aemfesen.

⁵E kebun aramat ipic masirin, wun kerja bwemtam ipic erasan aotewosomefen. E kebun kerja bwemtam ow nat, e ipic acatiwfesen. E kebun aramat ipicam wun kerja bwemtam ow arke erasan aotawosomefen. E kebun kerja bwemtam ow nat, omop e wun ow aaffesen. Aram e wun ow acatiwfesen.”

⁶“E kebun aramat ipic, wun ipic cowoknakap aomomefen. Er atiw arawen. Aram e atiw damos ajiomefen. Aramat ipicam, ‘Bare, e ow dotiw bwemumiris asan opok.’ Inim aeefen.

⁷E kebun kerja bwemtam ow nat, atakam aramaman aamtawfesen. ‘Awamec ipic, e aricipic pok takas atowomcema. Dey. E ipic bacatiwmoc. Inimas e aricipic pok takas darma baportowom.’ Inim aefesen.

⁸Bare, aram e ipic ban akimomfes, wunam acatiwfesen. Acatiwfes masirin, ar e sumu ipic e kebun asan ewjiwisimfesen.

⁹E anggur kebun aramat ipic nat, ucimas aemcow? Bare, ar e kebun asan ajisoscema, wunam e kebun kerja bwemtam ow acatiwcema. Ar masirin, e kebun, wun kerja bwemtam ow aootasimtitamcema.

¹⁰Caram e Alkitab atakam baca emcaemfokom openow. E Alkitab atakam: ‘E cem bweapom ow, ek cowok pwicak aporfes, wunam e ek aeremtiwfes. E ek nat, cem ek penting awutnakut aemamesef.

¹¹Bare, Tuhan eras aemef. Daram e aemefas akat cowok apormom ara.’ E Alkitab inim aema.” Yesus inim aeefen.

¹²Yesus e baposomtew atakam atawef ara, ar e Yahudi agama kepala ow atakam atawefen. E owam inimas aporfesen. Ar masirin, Yesus ban bakimom aemporfesen. E nat, ar e ow arke omar aefesen. Inimas ar Yesus bakan ajiosfesen.

¹³Bare, e ow, Parisi owam, Herodes mamkawi owam, Yesuspu atewosomfesen. Ar, e ow, aramat ipic salah atakam epen bwempor atewosomfesen.

¹⁴E owam Yesus ameromfes, wunam atakam e aramat ipic aotawfesen. “Guru. Or jipic tarowat apormom ara. Oram ow e atakam atawmesas omar opok. Oram, ‘Wun ow awut. Wun ow awut opok,’ baji opok ara. E nat, or e Allah bokotpu atakam, atakamnak amememtamcemem. Inimas daram jonow o batowpor. Ow e raja Kaisar jirmec ajirimef uang ar atatamces, inimas akat open?

¹⁵Dar e uang Kaisar batatam aranew? Batatam opoknew? Ucimaram?” Inim aefesen. Yesus nat, e ow pir aefes aporefen. Ar masirin, “Car aempormenokom ucimaram? Bare, uang dinar cowok tetamcan. Dor e uang bapores.” Inim aeefen.

¹⁶Bare, ar e uang Yesus atetamfesen. Aramat ipic masirin, jonow e ow atowporefen. “Awap gambar ca biam? Awap asuk wow, ca juwasam?” Inim aeefen. E ow masirin, “A Kaisar bi ara. Aram Kaisar juwas ara.” Inim aefesen.

¹⁷E Yesus masirin, “Bare, car Kaisar pok, Kaisar mamtetamey. Caram Allah pok, Allah mamtetamey.” Inim aeefen. Bare e ow e aramat ipic atawef atakam junum awut aefesen.

¹⁸Barewen. Saduki owam Yesus ameromfesen. E Saduki ow abi binip ara, “Damir aaffes ow bojaworsit opok,” inim bi binip aceceremcemes. Bare, aram jonow e aramat ipic atowporfesen.

¹⁹“Guru. Musa inim jirmec tulis aeapomtamforow. ‘Petew ipic jiwi opok damir aafcow, arewec e damir aafef ipic arem baotewetcow. Ar masirin, jiwi e arepwec bafimtamcow.’ Musa inim aeefen.

²⁰Bare, jipic cowok ower jiwi tujuh ajiwar arawen. E betiw ipic cepes atewetefen. E nat, aramat ipic jiwi bafimat opok damir aafefen.

²¹E abak ipicam e damir aafef ipic arem aotewetefen. E nat, aram jiwi bafimat opok damir aoafefen. E wun abak ipicam inim cowok aemefen.

²²Bare, e ow tujuh ajiwar takas damir aaffesen. Aram jiwi bafimat opok cowok arawen. Asep ara masirin, e cowocam damir aafefen.

²³Bare, e ow tujuh ajiwar e cowoc ateweta aefesen. Inimas ara, e damir aaffes ow aojaworsitces jofay ara, e cowoc ca ipic arem aememcow?” Inim aefesen.

²⁴E Yesus masirin, “Car e Alkitab atakam camsom opok. Caram Allah afakas camsom opok. Inimas car bi binip jiwic awamcokom.

²⁵E damir aaffes ow aojaworsitces, owerow, cepes botewet opok aemcemes. Cepesam ower bojuwut opok aemcemes. E nat, ar e onam op malaikat inim awcawor aememcemes.

²⁶Car e damir ow aojaworsitcesas atakam atawmokom ara. Bare, ametnak ara, Musa e fa epcom os kari jismak komen epcom, atakam tulis aeapomef. Aram e Allah atakam e aramat ipic aotawefas tulis aeapomef. E atakam, ‘Dor Abraham arAllah ara. Doram Ishak arAllah ara. Doram Yakub arAllah ara.’ Allah inim aeef. Caram e atakam baca emcaemfokom openow.

²⁷Bare, Allah, damir ow arAllah opok. E nat, ar tetakay ow arAllah ara. (Inimas e damir aaffes ow aojaworsitcemes apormom ara.) E nat, car bi binip jiwicnakut ow awamcokom.” Yesus inim aeefen.

²⁸Barewen. Allah Jirmec mamememtam ipic cowok erasan ameromefen. Aram e ow e atakam aamtawfesas jen ajiefen. Ar Yesus e ow atep ajitefas akat cowok aporefen. Inimas ar jonow e aramat ipic atowporefen. “Allah jirmec arke atatitamforow. E nat, e awutnak jirmec, ucim jirmecaram?” Inim aeefen.

²⁹E Yesus masirin, “E awutnak jirmec inim ara: ‘Israel owa. A atakam jen foa. Tuhan darAllah ara. Ar cowok Tuhan ara.

³⁰Bare, damos awutnakut e oTuhan Allah mamjiomkurumey. Or e ojak epcomam, e obi binip epcomam, e ofakas takas epcomam, damos e aramat ipic mamjiomkurumey.’ Allah inim aeef.

³¹E wun awut jirmec masirin, inim ara: ‘Damos e ojowow mamjiomey— or damos orma ajiomamem inim awcawora.’ Allah inim aeef.” Yesus inim aeefen.

³²E Allah Jirmec mamememtam ipic masirin, atakam Yesus aotawefen. “E atawmem atakam bare akat ara. Aram atakamnak ara. Bare, Tuhan cowok, Allah ara. Wun ow Allah opok.

³³Owam e ajak epcomam, e abi binip epcomam, e afakas epcomam, damos Allah bajiomkurumces. Aram damos ajowow bajiomces— ar damos arma ajiomames inim awcawora. E takas, bare atakamnak ara. Ow e jirmec jamnuk ji bwe, bare penting awut ara. Ow, pok Allah jis bafamtamnew, pok Allah bacatitamnew, bare penting kanim inim ara.” Inim aeefen.

³⁴Bare, Yesus, e ipic atakam atawefas, akat cowok aporefen. Ar masirin, “Or e Allah Pemerintah Asan bafiw, bare sotopnakap ara.” Inim aeefen. Bare, e jofay ajiwar, ow jonow Yesus bwemotowpor asan opok. Ar omar aefesen.

³⁵Barewen. Yesus e Allah cem aman atakam amememtamefen. “E Allah Jirmec amememtamames ow atakam, ‘E Allah Aeremtewef Ipic, bare Daud urpis ipic ara.’ Inim aemes. Ar inim atakam atawmes nat, ucimaram?”

³⁶Ametnak ara, e Roh Kudus, atakam bi binip, Daud atetamef. E Daud masirin, inim atakam aotawef: Tuhan, atakam e doTuhan aotawef: “Or e doban bo jamam emapey— dor e ojewew ow akumimosomkurumcey jofay ajiwara.” Tuhan inim atakam aotawef. Daud inim aeef.

³⁷“Bare, Daud, e Allah Aeremtewef Ipic, atakam atawef, ‘Ar doTuhan ara.’ Inim aeefen. Inimas ara, e Allah Aeremtewef Ipic, Daud urpis ipic aememef nat, ucimaram?” Yesus inim aeefen. E ow arke e Yesus atawef atakam jen ajifes ara, aram jak akat aememfesen.

³⁸Bare, Yesus wun atakamam amememtamefen. “Car e Allah Jirmec mamememtam ow pimicima. Ar baju jirow ajimomcemes, wunam e pasar asan acowojarcemes. Aram ow, ‘selamato’ a baji jak aserememcemes.

³⁹E sembahyang cem amanam, e pokbwi cem amanam, ar e bap ow asan bemap jak aserememcemes.

⁴⁰Aram tot e fwisma cepes aotcemes, wunam e apok takas osom atatcemes. Janim Allah aanimces, aram janim jirownakut aanimcemes. E nat, er bweyofas cowok ara. Bare, Allah e ow siksa awutut aemcema.” Yesus inim aeefen.

⁴¹Barewen. Yesus, e Allah cem derma uang batawapom asan, bin ajiapefen. Ar ow arke uang e asan atawapomfes aporefen. Aram uang awut ow, uang awut e asan atawapomfes aporefen.

⁴²Pok opok fwisma cowocam aenawefen. Aram uang sen kanim jamnuk e derma asan atewapomefen. E uang sen nat, harga opoknakap arawen.

⁴³Yesusam e amamkawi ow ajateefen. Ar atakam e ow aotawefen. “Atakamnak ara, a ow arke uang awut ara. Aram e wun uang e derma asan atawapomeres. Awamec cowoc nat, pok opok ara. Aram e aruang takas e asan atewapomor. Er e apok baytin uang takas ara. Inimas ara, awamec cowoc uang awut inim e asan atewapomor. E wun ow takas, uang kanim inim atawapomeres.” Inim aeefen.