Read Central Asmat MARKUS 15 Bible Online

MARKUS 15 - Central Asmat bible

MARKUS 15

¹Barewen. Tamnakap ara, e atakam mamsakam ow, atakam asarimsakamfesen. Er e Allah atakam mamtaw tugas ow awutam, e Yahudi ownucur owam, e Allah Jirmec mamememtam owam, inim ow arawen. Ar masirin, e Yesus manam ajikapomfes, wunam atowomosfesen. Ar e aramat ipic e Pilatus aotasimemtamfesen.

²Pilatus masirin, jonow e aramat ipic atowporefen. “Or e Yahudi ow araja ipic aranew?” Inim aeefen. E Yesus araw, “E atawmem atakam, atakamnak ara.” Inim aeefen.

³E Allah atakam mamtaw tugas ow awut masirin, Yesus salah arke, inim atakam aotawfesen.

⁴E Pilatusam inimas aporefen. Ar masirin, jonow Yesus aotowporefen. “Or atep bajit opoknew? Jakaperey. Awamces ow, or salah arke atakam atawmes.” Inim aeefen.

⁵E Yesus nat, atep bajit opokut arawen. Inimas e Pilatus junum aeefen.

⁶Barewen. Tahunin tahunin, e Bakamsow Pokbwi aman, ow e Pilatus, penjara cem aman aemapef ipic cowok bafimisimtam, janim aanima ajimpesen. E Pilatus masirin, e ipic cowok afimisimtama ajimepen.

⁷E jofay ara, ow arke penjara cem aman aemapfesen. E wun ipic cowok juwas. Barabas arawen. Bap ara, e Barabasam, e wun owam, pemerintah owec aamofesen. Aram ow acatiwfesen.

⁸Bare, e pokbwi aman, ow arke e Pilatus bipu ajarewsiemfesen. Aram e Pilatus e aema ajimepas jipu bwemtam, janim aanimfesen.

⁹Bare e Allah atakam mamtaw tugas ow e Yesus icim afesfesen. Inimas bap ara, ar e Yesus e Pilatus aotasimemtamfesen. E Pilatusam e icim afesfesas aporefen. Ar masirin, jonow e abipu ajarewsiemfes ow atowporefen. “Car dor e Yahudi ow araja ipic bafimisimtam akat open?” Inim aeefen.

¹⁰

¹¹E Allah atakam mamtaw tugas ow awut nat, atakam e ow arke aotawfesen. “Car Barabas bafimisim, janim e Pilatus aanimey. Ar Yesus bafimisim arapok.” Inim aefesen. E ow masirin, inimas janim e Pilatus aanimfesen.

¹²E Pilatus masirin, atakam e ow arke aotawefen. “Car atakam, ‘E Yesus, Yahudi ow araja ipic ara,’ inim aemokom. Do nat, e ipic ucimas emcey?” Inim aeefen.

¹³E ow masirin, atakam afakaytawfesen. “E ipic salib os op bacatopomey!” Inim aefesen.

¹⁴E Pilatus araw, “E ipic ucim pwicakas aemef?” Inim aeefen. E ow nat, atakam awutnakut aofakaytawfesen. “E ipic salib os op bacatopomey!” Inim aefesen.

¹⁵Bare, e Pilatus e ow arke jak akat boporemem aemefen. Inimas ar Barabas e ow afimisimtamefen. Aram ow Yesus omop baf jirmec ajirimef, wunam aramat ipic e salib os op bacatopom e ow aotasimemtamefen.

¹⁶Barewen. Tentara ow, Yesus e gubernur cem aman atowomisfesen. Ar masirin, e wun tentara ow takas ajatefesen.

¹⁷E tentaraam baju jirow esakam e Yesus atamwimemfesen. Aram fa epcom sinim atewfes, wunam kus bamapom biwnam asiapomfesen. Ar masirin, e biwnam Yesus kus ajimapomfesen.

¹⁸Aram atakam aramat ipic aotawfesen. “Yahudi ow araja ipic akatenem! Selamato!” Inim aea aefesen.

¹⁹Aram os kanim Yesus kus omop aaffesen. Beseam aramat ipic dam ajiapomfesen. Aram Yesus basicim pas, e aramat ipic bipu jine onok aneyotapfesen.

²⁰Ar Yesus uc aomocfesen. Uc aomockurumfes masirin, ar e baju jirow esakam aofortewfes, wunam arop pakaian e aramat ipic aotamwimemfesen. Ar masirin, Yesus e salib os op bacatopom atowomosfesen.

²¹E bowsec ara, ar Kirene samat ipic juwas Simon biamnuk aemamtewfesen. Aramat ipic, Aleksanderam, Rufusam, aricipic arawen. Ar e kebun asan jepen aewenawefen. Bare, tentara ow, e Simon, e Yesus salib batew aneneyfesen.

²²Ar masirin, Yesus, asan juwas Golgota ajisomosfesen. “Golgota” daratakam juw buwumtew, “Damir Kus Asan,” inim ara.

²³Bap ara, ow anggur bwiam, os capi juwas muram, aartamsemfesen. Aram e bwi Yesus batetam emporfes opoken. Aramat ipic e bwi ban pwicaken.

²⁴Ar masirin, Yesus e salib os op atewtopomfesen. Aram aramat ipic pakaian atewfesen. Wunam ar ek kanim aneyjiwitiwfesen. E ek kanim e aemcesas baporomtamas ara. Inimas ar aramat ipic apakaian, e ek kanim aporomtamefas jipu, sey aseyamatfesen.

²⁵Bare, jam sembilan tam, Yesus salib os op atewtopomfesen.

²⁶Owam, e Yesus salah aeefas tulis aeapomfesen. E atakam, “A ipic, Yahudi ow araja ipic arawen.” Inim tulis aeapomfesen.

²⁷Aram erasan, pok ces bwetaw ipic jamnuk salib os op atewtopomfesen. Ar wun ipic e Yesus bopim jamam arop salib os op atewtopomfesen. Aram e wun ipic e Yesus tamopim jamam arop salib os op atewtopomfesen. [

²⁸E aemfesas, e Alkitab atakam jipu ara. E Alkitab atakam, “Ow, aramat ipic, dosa ipic inim arawen,” inim aema.]

²⁹Erasan aokorfea aefes ow, kus owkasi owkasi aetotora aefesen. Aram cemew atakam Yesus aotawa aefesen. “Or atakam atawfem, ‘Dor e Allah cem ajumtiwcimin, wunam bar mamincop dor e cem aoeapomcimin.’ Inim aefem.

³⁰Bare, or inim fakas aomomamemnew, orma joremporey! E salib os op, inim korneyey!” Inim aefesen.

³¹E Allah atakam mamtaw tugas ow awutam, e Allah Jirmec mamememtam owam, inim cowok aemfesen. Ar aramaman, Yesus uc aomocfesen. “E ipic kawey ow ajortewef. E nat, arma bwemjorem asan opok.

³²Ar e Allah Aeremtewef Ipic arawen. Aram e Israel ow araja ipic arawen. Aram inim ipic aememamarnew, ar e salib os op aynam bakorneycow. Ar inimas aemcownew, dar e aramat ipic asicimcomom.” Inim aefesen. E Yesus salib os op akac aemtepfes ipic jamnukam, atakam pwicak aramat ipic aotawfesen.

³³Barewen. Jok jam dua belas aememfes ara, e capinmi takas jiwic acamtiwefen. Jam tiga masirin, sere aoseremefen.

³⁴Jam tiga ara, Yesus atakam afakaytawefen. “Eloi, Eloi, lama sabaktani!” Inim aeefen. E atakam, daratakam juw buwumtew, “DorAllah! DorAllah! Or bakan ucimas ajiosmenem?” Inim aeefen.

³⁵E wun aememfes owam, e aramat ipic atawef atakam jen ajifesen. Ar masirin, “E atakam jen pajiey. Ar Elia ajatema.” Inim aefesen.

³⁶Jipic cowokam je akukuosef, wunam bwi basirijiw pok atowotnawefen. Ar e pok, asesak anggur bwi asotewefen. Ar masirin, e pok wakan bip aatamsimapomef, wunam ar Yesus e bwi bacocomokop, bweyofpu ajoromtomettemtamefen. Aram atakam ametemotawefen. “Ema. Dar e Elia e ipic basurumnemtam epen batakampormoc.” Inim aeefen.

³⁷Barewen. Yesus atakam awut afakaytawefen. Atakam awut afakaytawef masirin, damir aafefen.

³⁸E Allah cem jimasap kainam op ewkayneyef, wunam acenes ajiwar akayfisefen.

³⁹Tentara komandan ipic cowokam, Yesus biamnuk ajiemefen. Aram e Yesus damir aafefas aporefen. “E ipic Allah atiw araman.” Inim aeefen.

⁴⁰Erasan ara, cepes, manmok batiw, damasan opok inim aememfesen. E ememfes cepes aman ara, Maria Magdalena ara. Salome ara. Yakobus Kanimam, Yosesam, arosowoc juwas Maria ara. Inim cepes arawen.

⁴¹Ametnak ara, Yesus Galilea capinmi aememawiri, e cepes aramat ipic ajamkawiawirisen. Aram pok aramat ipic afafaytamawirisen. Wun cepes arkeam, Yesus, Yerusalem akac ajamenawfesen. E cepesam e Yesus damir aafef asanpu aememfesen.

⁴²Barewen. Jo atiefen. Jo atief ara. Arimatea capinmi ipic juwas Yusuf aenawefen. Aram Yahudi atakam mamsakam ow wun ipic arawen. Ow takasam e aramat ipic asicimfesen. Aramat ipicam e Allah Pemerintah aenawcowas, manmok afeawirien. Bare, e jofay, pok bafafay jofay arawen. Ajofay ara masirin, Ses Ban Jo arawen. Inimas aramat ipic jak fak aememef, wunam Pilatus bipu ameromefen. Ar masirin, Yesus sumu ipic batew, janim Pilatus aanimefen.

⁴³

⁴⁴Pilatus e janim aanimefas jen ajief, ar e Yesus damir sarim inim aafefas, junum awut aeefen. Ar masirin, e tentara komandan ipic ajateef, wunam jonow atowporefen. “E Yesus damir aafor, tarey inim open?” Inim aeefen.

⁴⁵E komandan ipic masirin, “Bare, damir tarey inim emcaafor.” Inim aeefen. Pilatus inim atakam jen ajief ara, ar e Yusuf e Yesus sumu ipic batew, atetamefen.

⁴⁶Bare, Yusuf, kain akat ajititef, wunam ar Yesus sumu ipic cenes asurumnemefen. Ar masirin, e kain e sumu ipic biram ajiktiwefen. Ametnak ara, ar sikon ek jip awerem asiefen. Yusufam e sumu ipic e ek jip aman ajiwtatiwefen. Ek jip aman ajiwtatiwef masirin, wun ek e ek jip imwipu apwepweremocenef, wunam e ek jip imwi akapimapomefen.

⁴⁷E Maria Magdalenaam, e Yosias arosowoc juwas Mariaam, e Yesus sumu ipic ajiwtatiwef asan manmok atiwfesen.