Read Central Asmat MARKUS 3 Bible Online

MARKUS 3 - Central Asmat bible

MARKUS 3

¹Barewen. Yesus sembahyang cem aofiwefen. Erasan ara, poman ban sipi ipic aemapefen.

²Wun erasan owam, “Yesus pwicakas aemama,” inim atakam botaw, jak aserememfesen. Inimas e ow, e Yesus aemefas, manmok fak atiwemfesen. Ar Yesus e ipic Ses Ban Jo dam baworomtew epen baporen.

³Yesusam atakam e ban sipi ipic aotawefen. “Or awamces ow takas bipu basitemey.” Inim aeefen.

⁴Bare, Yesus jonow e erasan aememfes ow atowporefen. “Dar e Ses Ban Jo Jirmec ji aecom, dar ucimas emcom? Dar akatas bwem aranew? Pwicakas bwem aranew? Dar ow bajortew aranew? Ow bacatiw aranew?” Inim aeefen. E ow nat, atep bajit opok cowok arawen.

⁵Yesusam e fumi aamwiciremfes ow bi takas aoworporefen. Aram jak amop aememefen. E nat, ar e ow jen faknakut aporefen. Inimas aram jak pwicak aememefen. Ar masirin, atakam e ban sipi ipic aotawefen. “E ban bajoromey.” Inim aeefen. Bare, aram sop ajoromefen. E ban masirin, akat aememefen.

⁶Bare, e Parisi ow afisfesen. Afisfes masirin, ar e Herodes mamkawi owcin Yesus bacatiw atakam aamsakamfesen.

⁷Barewen. Yesusam, amamkawi owam, e bwi juwas Galilea e jopir aotasiemfesen. Ow arkenakutam Yesus fa asoromfesen. E ow, Galilea capinmi owam, Yudea capinmi owam,

⁸kota Yerusalem owam, Idumea capinmi owam, Yordan jo poman owam, kota Tirusam Sidonam e jamam owam, inim ow arawen. E ow arkenakut e Yesus aemefas, atakam jen ajifesen. Inimas ar Yesuspu asayosfesen.

⁹Yesusam e ow arkenakut aporefen. Inimas ar e amamkawi ow, ci batawkenemsemtam, atakam aotawefen. E ow arkenakut aramat ipic kekenakap bwemasin.

¹⁰E ow, Yesus, dam ow arke ajaworomtawef aporfesen. Inimas e dam ow takas Yesus dam ban bakurumtew aememfesen. Aram aramat ipic kekenakap aememfesen.

¹¹Datam Yesus bi aporfesen. Aporfes masirin, aram aramat ipic bipu bi fop aneyjiapfesen. Aram atakam afakaytawfesen. “Or Allah atiw ara.” Inim aefesen.

¹²Yesusam jirmec fak e dat ajirimefen. “Car, ‘E ipic Allah atiw ara,’ inim atakam wun ow botaw arapok.” Inim aeefen.

¹³Barewen. Yesus sikon op aaptometefen. Aram e aereremtawef ow ajateefen. E ow masirin, Yesuspu aapenfesen.

¹⁴Ar ow dua belas ajiwar aereremtawefen. Aram atakam aotawefen. “Car dor akac mememawar aereremtawmin. Dor masirin, car wun asan bacacapiom atewosomcimin.” Inim aeefen.

¹⁵Aram dat botewerisim fakas, e ow atetamtotorefen.

¹⁶Bare, e Yesus aereremtawef ow dua belas ajiwar, Simon ara. (Yesusam wun juwas Petrus e ipic aamefen.)

¹⁷Yakobusam, arawec juwas Yohanesam, ara. Ar Sebedeus atiperes ara. (Yesusam juwas Boanerges e ipic jamnuk aamefen. “Boanerges” daratakam juw buwumtew, “wir atiperes” ara.)

¹⁸Andreas ara. Filipus ara. Bartolomeus ara. Matius ara. Tomas ara. Alfeus atiw juwas Yakobus ara. Tadeus ara. Simon ara. (Aramat ipic agama fak ipic.)

¹⁹Yudas Iskariot ara. (Ar Yesus e jokmen ow botasimemtam ipic ara.) Yesus inim ow aereremtawefen.

²⁰Barewen. Yesus cem afiwefen. Ow arkenakutam erasan ajarewsiemfesen. Inimas Yesusam, amamkawi owam, amos bweman asan opoken.

²¹Yesus ajowowam inim atakam jen ajifesen. Inimas ar aramat ipic botaw ajisosfesen. “Aramat ipic jayic ara.” Inim aefesen.

²²Barewen. Allah Jirmec mamememtam ow Yerusalem ewenawfesen. Aram atakam aotawfesen. Beelsebul ewamec ipic jak aman awap. E dat kepala ipic, fakas, ewamec ipic atetamama. Inimas ewamec ipic e wun dat aotewerisimama. Inim aefesen.

²³Yesusam e ow arke ajateefen. Ar masirin, baposomtew atakam e ow aotawefen. “Iblis arma botewerisim ucimaram?

²⁴Samat cowok aramaman owen aamoces, aram apacayoscemes.

²⁵Cem owam aramaman owen aamoces, aram apacayoscemes.

²⁶Iblisam, datam, aramaman owen aamoces, aram apacayoscemes. Inimas aemces, aram aanioscemes.”

²⁷“Owam fak ipic cem bafiw, wunam e apok ces bwetew, bare inimas bwemem asan opok. E nat, ar e fak ipic manam atakamjikapomces, ar e acem pok ces bwetew araman.”

²⁸“Atakamnak ara, Allah, ow e aemamesas dosa jukpiri takas, akokoromosomtamcema. Aram ow e cemew atakam atawcesas takas, akokoromosomtamcema.

²⁹E nat, ow cemew atakam Roh Kudus aotawces, Allah e dosa bakokoromosomtam opok cowok aemcema.” Yesus inim aeefen.

³⁰(Bap ara, e wun ow atakam, “Dat ewamec ipic jak aman awap.” Inim aefes. Yesusam inim atakam aporef, wunam a atakam aotawefen.)

³¹Barewen. Yesus arosowocam, arewcewesam, erasan ameromfesen. Aram e cesen aememfes, wunam ar ow Yesus baytetam janim aanimfesen.

³²Ow arkeam Yesus fumi aamwicirapfesen. Wun ow masirin, atakam aotawfesen. “Jakaperey. Orosowocam, orewcewesam, cesen awamces. Aram or apowmenes.” Inim aefesen.

³³E Yesus masirin, “Dorosowoc cam? Dorewcewesam cam?” Inim aeefen.

³⁴Aramat ipicam e afumi aamwicirapfes ow bi aoworporefen. Ar masirin, atakam aotawefen. “Jakaperey. Awapes ow dorisepesam, dorewcewesam, ara.

³⁵E Allah akat apormaras jipu aemames ow, bare e ow dorewcewesam, dotarsepesam, dorisepesam, aememames.” Yesus inim aeefen.