Read Central Asmat MARKUS 6 Bible Online

MARKUS 6 - Central Asmat bible

MARKUS 6

¹Barewen. Yesus e capinmi aemsowefen. Aram arop capinmi aojisosefen. E amamkawi owam akac ajarfesen.

²Ses Ban Jo aenawef ara, aramat ipic e sembahyang cem aman, atakam amememtamefen. E aratakam jen ajifes owam junum awut aefesen. “E aramat ipic e atawmar atakam jen ocenak asan ajief. E aceceremamar bi binip umutonnakut ucimaram? Aram e junum bweas aemamar ucimaram?

³Awap ipic tukang kayu ipic araman. Aram Maria atiw araman. Ar e Yakobusam, Yosesam, Yudasam, Simonam, arepwec araman. E atarsepesam dar akac aemapmom araman.” Inim aefesen. Bare, aman bifan e Yesus afayomfesen.

⁴Yesusam atakam e ow aotawefen. “Kawey ow, Allah atakam botaw ipic asicimcemes. E nat, asamat owam, ajowowam, acem owam, Allah atakam botaw ipic basicim opok aemcemes.” Inim aeefen.

⁵Bare, aramat ipicam, erasan, junum bweas bwemem asan opoken. E nat, ar e aban, dam ow mamincop e dam ton atatiwef, wunam e ow dam ajaworomtawefen.

⁶E erasan ow Yesus basicim opok aemfesen. Aramat ipicam inimas aporefen. Ar masirin, junum awut aeefen. Bare, Yesus e jamam samatin samatin aamwicirijaref, wunam atakam e ow amememtamefen.

⁷Aram amamkawi ow dua belas ajiwar ajateefen. Ajateef masirin, ar e ow atewosomefen. Ar jipic jamnuk wun asan jisosa, jipic jamnuk wun asan jisosa, inim atewosomefen. Aram dat botewerisim fakas e ow atetamtotorefen.

⁸Aram jirmec e ow ajirimefen. “Ajisoscokom, pok batew arapok. Onok pok cowok batewey. E nat, amos pok batew arapok. Eseam batew arapok. Uangam batew arapok.

⁹Bwey nat, sandal bajimomey. Baju jamnukam bajimom arapok. Cowoknakapa.” Inim aeefen.

¹⁰Wunam, “Car cem afiwapcokom, caram inim mamemapey— e capinmi bakan ajisoscokom jofay ajiwara.

¹¹Wun samat car batowomiw opok aporcokomnew, wunam caratakam ji bwe opok aporcokomnew, e ow bakan mamjiosey, wunam atakam e ow mamotawey. ‘Car daratakam ji bwe opok aemamokom. Inimas dosa aemamokom.’ Inim mameey.” Yesus inim aeefen.

¹²Barewen. E Yesus mamkawi ow dua belas ajiwar ajisosfesen. Aram ow dosa takas bak bapayem, inim atakam acacapiomfesen.

¹³Aram dat arke aotewerisimfesen. Aram minyak, dam ow arke e dam ton atatiwfes, wunam e ow ajaworomtawfesen.

¹⁴Bare, Yesus an afufuosefen. Inimas e raja Herodesam e aramat ipic aemefas, atakam jen ajiefen. Wun owam atakam atawfesen. “E Yohanes Bwi Babwim Ipic emeojaworsitef. E Yesus e ipic ara. Inimas ar e junum bweas awut aemama.” Inim aefesen.

¹⁵E wun ow nat, “E aramat ipic, bare Elia ara.” Inim aefesen. Wun ow nat, “E aramat ipic, Allah atakam botaw ipicut ara. Ar e ametnak Allah atakam botaw ipic cowok inim awcawor ara.” Inim aefesen.

¹⁶E nat, e Herodes e atakam jen ajief ara, aram atakam aotawefen. “Aramat ipic e Yohanes Bwi Babwim Ipic ara. Ametnak ara, dor e Yohanes kus asakamof. E nat, aramat ipic aojaworsitef ara openow.” Inim aeefen.

¹⁷Bare, ametnak ara, Herodes, e arewec juwas Filipus arem aotewetefen. Cowoc juwas Herodias arawen. E Yohanesam atakam e Herodes aotawa aeefen. “Or e cowoc aotewetmem, bare Allah Jirmec aopowmem.” Inim aea aeefen. Herodesam inimas aporef masirin, ar ow e Yohanes ban bakimomam, ban manam bajikapomam, penjara cem aman bajiwtewapomam, inim jirmec ajirimefen.

¹⁸

¹⁹E Herodiasam e Yohanes bic baji bi binip awut aceceremefen. Aram e aramat ipic bacatiw akat arawen. E nat, e Herodes e Yohanes, ow akatam, ow tarowatam, inim aporefen. Inimas ar e aramat ipic omar aeefen. Aram ow e aramat ipic manmok fak batiw jirmec ajirimefen. Wun ow e aramat ipic bajurusumasin. Inimas e Herodias e Yohanes bwemcatiw asan opoken. E Herodesam, e Yohanes atakam jen ajia aeef ara, aram jak pwicak aemapa aeefen. E nat, ar e atakam jen bajikurum akat cowok arawen.

²⁰

²¹Asep jofay nat, e Herodias e Yohanes bacatiw asan akat aporefen. Er e Herodes ajispetiwef hari ulang tahun arawen. E Herodes, e apemerintah kerja bwemtam ow awutam, e tentara kepala owam, e Galilea ownucur owam, pokbwi aemtamefen.

²²E Herodias aporesam e pokbwi cem afiwemefen. Aram di adiefen. Herodesam, e jaki owam, eras akat cowok aporfesen. Inimas e Herodes atakam e cowoc aotawefen. “Pok janim dor animcan. Dor e pok o batetam.” Inim aeefen.

²³E aramat ipicam atayi faknakut e cowoc aeefen. “E janim dor aanimcenem pok or atetamcimin araman. Dor e wun awompey pok awutut or atetamcimin araman.” Inim aeefen.

²⁴Bare, e cowocam afisefen. Aram jonow e arosowoc atowporefen. “Dor ucim pok janim aanimcey.” Inim aeefen. Arosowoc masirin, “Oram Yohanes Bwi Babwim Ipic e kus janim manimey.” Inim aeefen.

²⁵E cowocam e raja bipu aosarimapenefen. Aram janim aanimefen. “E Yohanes Bwi Babwim Ipic e kus piring aman aynam tetamcan.” Inim aeefen.

²⁶Barewen. E raja e cowoc janim aanimefas jen ajiefen. Ar masirin, jak pwicak awut aemapefen. E nat, e atayi faknakut aeefas aporefen. Aram e pokbwi jaki ow aporefen. Inimas ar e cowoc janim aanimefas bwemotpem asan opoken.

²⁷Bare, aramat ipic, tentara cowok, e Yohanes kus basakamtew, jirmec asarimjirimefen. E tentara masirin, e penjara cem ajisosef, wunam e Yohanes kus asakamtewefen.

²⁸Aram e kus piring aman atowotnawef, wunam e cowoc atetamefen. E cowoc masirin, e kus arosowoc aotetamefen.

²⁹E Yohanes ajamkawifes ow inim atakam jen ajifes ara, ar e aramat ipic e bini amertewfesen. Aram e bini awerem aman ajiwtatiwfesen. (Ametnak ara, e ow inimas aemfesen. Inimas e Herodes atakam, “Yesus, e Yohanes Bwi Babwim Ipic ara. Ametnak ara, dor e Yohanes kus asakamof. E nat, aramat ipic aojaworsitef ara openow.” Inim aeefen.)

³⁰Barewen. E Yesus atakam botaw atewosomef ow, aramat ipicpu aojarewsienawfesen. Ar e aemfesasam, e amememtamfes atakamam, e aramat ipic afafasimfesen.

³¹Erasanam ow arkenakut juw aucicirifesen. Inimas e Yesus mamkawi owam amos bwememen asan opoken. Aramat ipican inimas aporef, wunam atakam e amamkawi ow aotawefen. “Dey. Cem opok asan darop jisosmoc. Caram erasan ses aaney.” Inim aeefen.

³²Bare, ci anajuwfesen. Aram cem opok asan ajisosfesen.

³³Anajuwfes ara, ow arkeam e ow manmok atiwfesen. Aram e ow bi amsomen. E ow arkeam e kota takas ewsayenawfesen. Aram je akukufes, wunam ar e Yesusam, e akac dajuwfes owam, e asetayces asan, bap a takam amerapfesen.

³⁴Bare, Yesus asetayef ara, ar e ow arke aporefen. Ar e ow desen domba inim cimin aememfes aporefen. E ow, manmok batiwtam ow opok domba, inim cimin aememfesen. Inimas Yesus e ow sawes akat aoworporefen. Ar masirin, atakam arke e ow amememtamefen.

³⁵Porow ara masirin, e Yesus mamkawi ow aramat ipicpu ameromfesen. “Arasan cem opok asan ara. Joam atima.

³⁶Oram e ow e sotop kebun asanam, e sotop cemsanam, baysos jirmec ajirimey. Erasan amos pok bajitinces.” Inim aefesen.

³⁷E Yesus nat, “Car amos pok e ow carma tetamey.” Inim aeefen. E ow masirin, “Dar uang dinar dua ratusut ajiwar e ow amos pok bajittam arapen?” Inim aefesen.

³⁸E Yesus araw, “E awomcokom amos bokor ucim inimaram? Caram baporey.” Inim aeefen. Bare, aram aporfesen. “Dar amos bokor lima ajiwar awomcom. Enamam jamnuk awomcom.” Inim aefesen.

³⁹E Yesus masirin, atakam e ow arke aotawefen. “Car fumin ton, asan cowok aniapa, asan cowok aniapa, inim eey.” Inim jirmec ajirimefen.

⁴⁰Bare, e ow, asan cowok aniapa, asan cowok aniapa, inim aefesen. Ar ow seratus ajiwar asan cowok aniapa, ow lima puluh ajiwar asan cowok aniapa, inim aefesen.

⁴¹Yesus e amos bokor lima ajiwaram, e enam jamnukam, atewefen. Aram manmok op atiwtometemefen. “Diwi. Or a amos pok atetamamarowem. Terima Kasih.” Inim aeefen. Ar masirin, e amos bokor akokomef, wunam e amamkawi ow atetamefen. Er e ow takas sey baseyamtamas ara. Aramat ipicam e enam jamnuk e ow takas sey aseyamtamefen.

⁴²Bare, e ow takas e pok aanfesen. Aram jak anapitaptotorfesen.

⁴³E Yesus mamkawi ow e ow arke anaeremtiwfes amosam, enamam, ese dua belas ajiwar aowapomfesen.

⁴⁴Bare, e amos pok aemenfes ow, ower ow cowok, lima ribu ajiwar arawen.

⁴⁵Barewen. Yesus jirmec e amamkawi ow asarimjirimefen. “Caram banajuwey. E Betsaida capinmi bap ca takam jirtayey. Dor asep bajinaw.” Inim aeefen. Ar masirin, e ow arke, aporsipor cem baysos, jirmec ajirimefen.

⁴⁶“Doram bare.” Inim aeefen. Bare aramat ipic, Allah janim manim, sikon asan ajisosefen.

⁴⁷Barewen. Jo atiefen. Jo atief ara, e ci e jicupum aemseefen. Yesusam e fwikin arop aememefen.

⁴⁸Bare, foam e amamkawi ow ci cimen aotpemefen. Inimas e ow po jiporfes opoken. Yesusam eras aporefen. Iram fak ara masirin, aramat ipic bwi ton ajarefen. Aram e aemsefespu ajarosefen. E nat, aram akpin cimin aeefen.

⁴⁹E amamkawi ow takas nat, e aramat ipic bwi ton ajaref aporfesen. Ar dat inim arawen. Aram omar aefes, wunam jen ajifesen. Aramat ipic masirin, atakam e ow asarimotawefen. “Caram jak faka. Do Yesus ara. Omar arapok.” Inim aeefen.

⁵⁰

⁵¹Bare, Yesusam e ci asawuefen. E fo masirin, atayuefen. Bap ara, Yesus amos kanim, amos awutnakut ajaworomtiwefen. E amamkawi ow nat, e Yesus junum bweas aemefas bi binip umuton bacecerem opok aemfesen. Aram jen fak aememfesen. Inimas e fo atayuef ara, aram junum awut aefesen.

⁵²

⁵³Bare, aram poman aapirfesen. Poman aapirfes masirin, Genesaret capinmi ajirtayfesen. Aram ci cum amotapomfesen.

⁵⁴Asowkufes ara, e capinmi owam atakam asarimtawfesen. “E akunawmar ipic Yesus ara.” Inim aefesen.

⁵⁵E owam e ajawosef samatin samatin takas je akukuosfesen. Aram e dam ow e atepen epcom e Yesuspu atowocena aefesen. Ar, “Yesus inim asan awamec,” inim atakam jen ajifes, ar e dam ow e asan atowocena aefesen.

⁵⁶Aramat ipicam, samat arke acemsanpu ajara aeefen. Aram kota arkepu ajara aeefen. Cem arke opok capinmipuam ajara aeefen. E ajaref asan takas, ow e dam ow e pasar asanpu atowocenfesen. Aram e dam ow e Yesus baju bip ban bakurum, janim fak e aramat ipic aanimfesen. E abaju bip ban akurumfes ow takas masirin, aojaworsitfesen.