Read Central Asmat MARKUS 7 Bible Online

MARKUS 7 - Central Asmat bible

MARKUS 7

¹Barewen. Parisi ow e Yesus bipu ajarewsiemfesen. Wun Allah Jirmec mamememtam owam Yerusalem ewenawfesen. Aram Yesus bipu ajarewsiemfesen.

²Ar e Yesus mamkawi ow amos aemenfes aporfesen. E wun Yesus mamkawi ow amos aemenfes ara, ar e agama Yahudi atakamas jipu bwem opoken. Ar e aban bwi batakamcicikim opoken. E Yesus bipu ajarewsiemfes ow inimas aporfesen.

³Bare, e Parisi owam, e wun agama Yahudi ow takasam, ban bwi bap atakamcicikimcemes, wunam amos asep aancemes. Ar e arafas ow e tayimirtitamfesas jipu aemcemes.

⁴Wunam ar e pasar asan ewenawces, aram bwi bap atakambwicemes, wunam amos asep aancemes. Aram wun arafas atayimirtitamfesas jipu aemcemes. Ar mokam, cerekam, panciam, e atakam jipu bwi acicikimcemes.

⁵E Parisi owam, e Allah Jirmec mamememtam owam, atakam Yesus aotawfesen. “E omamkawi ow, e darafas ow e tayimirtitamforowas, jipu bwem opok. Amos pok aanmes ara, ar e aban bwi batakamcicikim opok aemames. Ar ucim inimaram?” Inim aefesen.

⁶E Yesus masirin, “Car pir bwe ow ara. Ametnak ara, Yesaya e aemcokomas atakam aotawefen: ‘Allah atakam ara, “A ow ewen picin cowok dor asicimamenes. E nat, e jak aman ar dor mamkawi opokut.

⁷Aram desen asicimamenes. E atakam amememtamamesas, bare asmat jirmec cowok ara. Er dojirmec opok.” Allah inim aema.’ Yesaya inim aeefen. Bare, er atakamnak ara.

⁸Car Allah jirmec jen baji opok cimin aememamokom, wunam e asmat atayimirtitamfesas ji cowok aemokom.” Yesus inim aeefen.

⁹Yesusam wun atakam aotawefen. “Car Allah Jirmec aopowmokom, wunam e carafas ow e tayimirtitamfanas jipu aemokom.

¹⁰Ametnak ara, Musa atakam aotawefen. ‘Oricipicam, orosowocam, mamsicimawarey. Ow, cemew atakam, e aricipicnew, arosowocnew, aotawces, e cemew atakam ow mamcatiwey.’ Inim aeefen.

¹¹E nat, caratakam ara, ‘Ow atakam e arisepes aotawtotorces, “Dor e or atetamcimin uang, bare Allah emcatetamof,” inim aetotorces, bare aram asan akat e arisepes bom arapok.’ Inim aemokom.

¹³Inimas car e carafas ow e tayimirtitamfanas jipu aemokom, wunam Allah atakam ajiwosomamokom. Caram wun inimas arke aemamokom.” Yesus inim aeefen.

¹⁴Barewen. Yesus e ow arke aojateefen. Aram atakam e ow aotawefen. “A atawmin atakam jen foa. Bare, a atakam jen pajikurumey.

¹⁵Memen pok, ow e bweyof afiwcow, e pok e ow, dosa bwemas opok. E nat, e bweyof afiscow atakamam, e ow aemamesasam, bare eras e ow, dosa bwemas ara. [

¹⁶Jen fo ow a atakam jen bajices.]” Inim aeefen.

¹⁷Bare, Yesus e ow arke bakan ajiemefen. Aram cem ajiwemefen. Cem ajiwemef masirin, e amamkawi ow e baposomtew atakam jonow aramat ipic atowporfesen.

¹⁸E Yesusam, “Caram e atakam jen bajikurum opoknew? Bare, memen pok takas, ow e bweyof afiwcow, e pok, e ow, dosa bwemas opok. Car inimas camsom opoknew?

¹⁹Bare, e pok jaknak bafiw opok. Ar jak com aman cowok afiwcema, wunam aofiscema.” Inim aeefen. (Yesus inim atakam atawef ara, ar “memen pok takas akat,” inim atakam atawefen.)

²⁰E Yesusam, “Bare, e bweyof afiscow atakamam, e ow aemamesasam, e ow dosa bwemas ara.

²¹E ow e jak amanas, bare pwicak ara. Inimas e ow jursumec bi binip aceceremcemes. Aram jursumecas aemcemes. Osomam aecemes. Dawam, sanawam, aetiwcemes. Cen cemen osomam aecemes.

²²Aram kaweyas asinomcemes. Pwicakasam aemcemes. Suw atakamam atawcemes. Jursumecasam aemcemes. Icimam aemcemes. Cemew atakamam atawcemes. Aram arma atawsicimcemes. Aram jen fak aememcemes.

²³Inim pwicakas takas, ow jak amanas ara. Eras, ow, dosa bwemas ara.” Inim aeefen.

²⁴Barewen. Yesus e asan bakan ajiosefen. Aram kota Tirus jamam ajisosefen. Erasan cem ajiwapefen. Aram arop bajiwap ememefen. Wun ow a bapor arapoken. E nat, ar bwemcukap asan opoken.

²⁵Cowoc cowokam aememefen. Dat e cowoc apores jak aman aemapawirien. E cowocam, “Yesus e cem awap,” inim atakam jen ajiefen. Inim atakam jen ajief masirin, ar aramat ipicpu asarimmeromefen. Aram aramat ipic bipu bi fop aneyjiapefen.

²⁶Aram, Yesus, e apores jak aman dat botewerisim janim aanimefen. Aramat cowoc aratakam, bare Yunani atakam arawen. Asamat nat, Siro Fenisia samat arawen.

²⁷Bare, Yesus atakam e cowoc aotawefen. “E Yahudi samat ow dosamat ara. Dor asan akat e dosamat batakamom akat ara. Dotiperes amos, juwur bajiwitam, bare pwicak ara.” Inim aeefen.

²⁸E cowoc masirin, “Tuan. E atawmem atakam, bare atakamnak ara. E nat, tiperes amos aances, juwuram e meja aman aemapcemes. Aram e tiperes amos bimis aancemes.” Inim aeefen.

²⁹E Yesus araw, “E atawmem atakam bare akat ara. Oram cem jisosey. E dat e opores jak aman emcafisor.” Inim aeefen.

³⁰Bare, e cowoc cem ajisosefen. Aram e apores tepen ton asan akat aemamesef aporefen. E datam emcajisosef aporefen.

³¹Barewen. Yesus e Tirus capinmi ewjisosefen. Aram Sidon capinmi aokorsakayefen. E Dekapolis capinmiam aokorsakayefen. Ar masirin, e Galilea bwipu ajarapefen.

³²Erasan ara, ow, jipic cowok, aramat ipicpu atowocenfesen. E ipic jen biri arawen. Aram okor ipic arawen. E owam janim Yesus aanimfesen. “Oram ban e ipic dam ton batatiwporey.” Inim aefesen.

³³Yesus e erasan aememfes ow, arkenakut aporefen. Inimas ar e ipic arop asan atewefen. Aram banek e ipic jen jof jamnuk ajumumefen. Aram bese ajief, wunam ar ban e ipic komen akurumefen.

³⁴Bare, Yesus manmok apemtometemefen. Aram joses afaytewef, wunam atakam e ipic aotawefen. “Efata.” Inim aeefen. “Efata” daratakam juw buwumtew, “Jen jof bafiosey,” inim awcawor ara.

³⁵Bare, e ipic jen jof asarimfiosefen. E komenam akat aemapefen. Aram atakam akat atawefen.

³⁶Yesusam jirmec e ow takas ajirimefen. “Car eras atakam wun ow botaw arapok.” Inim aeefen. Aram e atakam botaw, acuw aata aeefen. E ow nat, atakam aotawa aefesen.

³⁷Owam junum awutnakut aefesen. “E aramat ipic aemamaras takas, bare akat cowok ara. Ar jen biri ow jen akat aemtamama. Aram okor ow, komen akat aemtamama.” Inim aefesen.