Read Central Asmat MARKUS 8 Bible Online

MARKUS 8 - Central Asmat bible

MARKUS 8

¹Barewen. Asep jofay ara, ow arkenakut aojarewsiapfesen. Aram amos opok aemapfesen. Yesusam inimas aporef, wunam atakam e amamkawi ow aotawefen.

²“Dor awapes ow arke sawes akat aoworpormin. Aram bar mamincop dar akac aemapmom. Aram amos opok aemapmes.

³E wun ow damasan opok aenawfes. Inimas dor e ow, amos memen opok jisomosomcey, aram e bowsec mankes aemamescemes.” Inim aeefen.

⁴E amamkawi ow masirin, “Dar cem opok asan aememamom. Ow, a ow arke jak bapitap amos, ocenak asan atawces?” Inim aefesen.

⁵E Yesus masirin, “E awomcokom amos bokor ucim inimaram?” Inim aeefen. “Dar amos bokor tujuh ajiwar awomcom.” Inim aefesen.

⁶Bare, aramat ipic e ow arke cenes baneyap jirmec ajirimefen. Aram e amos bokor tujuh ajiwar atewefen. Aram terima kasih atakam Allah aotawef, wunam e amos akokomefen. Akokomef masirin, ar e amos e amamkawi ow e ow arke sey baseyetam atetamefen. Bare, aram sey aseyetamfesen.

⁷Aram enam kanim mamincop atowomfesen. Yesusam e enam aporef, wunam terima kasih atakam Allah aotawefen. Aram e amamkawi ow e enam sey baseyetam jirmec ajirimefen.

⁸E ow e pok aanfesen. Aram jak anapitaptotorfesen. Owam empat ribu ajiwar aemapfesen. E Yesus mamkawi owam, e ow arke e anatiwfes amos, ese tujuh ajiwar aowapomfesen. Yesusam e ow arke baysos jirmec ajirimefen.

¹⁰Aramat ipicam, amamkawi owam, ci anajuwfesen. Aram Dalmanuta capinmi ajirtayfesen.

¹¹Parisi owam Yesus ameromfesen. Ar Yesus atakam aamtawfesen. Ar aramat ipic bwemporen. “Yesus. Oram junum bweas emey. Dar, e Allah, fakas, or batetam epen bapor.” Inim aefesen.

¹²Yesus joses awutut afayefen. “A awaniemames ow, junum bweas bapor janim aanimames ucim inimaram? Atakamnak ara, dor junum bweas e ow baporomtam opok.” Inim aeefen.

¹³Bare, Yesus e Parisi ow bakan ajiosefen. Aram ci anajuwef, wunam e poman ajirefen.

¹⁴Barewen. E Yesus mamkawi ow amos pok batowomuw, binip aanimfesen. Ar e ci roti bini cowoknakap atowomuwfesen.

¹⁵Yesusam jirmec e ow ajirimefen. “Jakaperey. Car e Parisi ow e abibit roti pimicima. Caram e Herodes e abibit roti pimicima.” Inim aeefen. E atawef atakam, bare baposomtew atakam ara.

¹⁶E Yesus mamkawi ow, e Yesus atawef atakam, baposomtew atakam opok inim arawen. Inimas ar aramaman atakam aamtawfesen. “Aramat ipic dar amos pok batowomuw opok apormar ara openow. Inimas ar e bibit roti atakam aotawmarow.” Inim aefesen.

¹⁷Yesusam e atakam aamtawfesas aporefen. Ar masirin, “Car amos pok batowomuw opok atakam aamtawmokom ucim inimaram? Car wow ajiwar camsom opoknew? Car jen fak ow aranew?

¹⁸Car manmok epcom. E nat, car manmok bwemtiw asan opoknew? Caram jenmak epcom. E nat, car jen bwemji asan opoknew? Caram binip emeanimfokomnew?

¹⁹Dor e amos bokor lima ajiwar, e ow lima ribu ajiwar akokomtatamof ara, e anatiwfes amos aowapomfokom, ese ucim inimaram?” Inim aeefen. “Dar e anatiwfes amos, ese dua belas ajiwar aowapomfom.” Inim aefesen.

²⁰“Doram e amos bokor tujuh ajiwar e ow empat ribu ajiwar akokomtatamey ara, e anatiweres amos aowapomorokom, ese ucim inimaram?” “Dar e anatiweres amos, ese tujuh ajiwar aowapomorom.” Inim aefesen.

²¹E Yesus masirin, “Ca nat, e atawmin atakam jen bajikurum opoknew?” Inim aeefen.

²²Barewen. Aram Betsaida capinmi asetayfesen. Owam manmok kapi ipic Yesuspu atowocenfesen. Aram Yesus janim fak aanimfesen. “Or a manmok kapi ipic dam ban bakurumey.” Inim aefesen.

²³Yesus masirin, e manmok kapi ipic e cemapem banfe ajimocenefen. Aram bese e ipic manmok atewapomefen. Aram jonow e ipic atowporefen. “E omanmok baterey open?” Inim aeefen.

²⁴E ipicam jimas asuefen. Aram atakam aotawefen. “Dor ow ajarmes apormin. E ow nat, os inim awcawor ara.” Inim aeefen.

²⁵Yesusam ban e ipic manmokpu aotewapomefen. Bare, e ipic manmok acimakamomefen. E amanmok atereyefen. Aram pok takas manmok akat atiwefen.

²⁶Yesusam jirmec e ipic ajirimefen. “Oram cema. Kawey cemsan batukem arapok.” Inim aeefen.

²⁷Barewen. Yesusam, e amamkawi owam, e Kaisarea Filipi jamam samatin samatin ajisosfesen. E bowsec ara, Yesus jonow e amamkawi ow atowporefen. “Do ca ipicam? Ow ucim atakam atawmes?” Inim aeefen.

²⁸E amamkawi ow masirin, “Wun ow atakam, or Yohanes Bwi Babwim Ipic ara. Wun ow masirin, or Elia ara. Wun ow masirin, or Allah atakam botaw ipic ara.” Inim aefesen.

²⁹Yesusam, “Car ara nat, ucim bi binip aceceremamokom? Do ca ipicam?” Inim aeefen. E Petrusam atep ajitefen. “Or e Allah Aeremtewef Ipic ara.” Inim aeefen.

³⁰E Yesus masirin, jirmec fak e ow ajirimefen. “Inim atakam kawey ow botaw arapok.” Inim aeefen.

³¹Yesusam atakam e amamkawi ow amememtamefen. “E Asmat Anakat Ajaworemef Ipic bajurusem awutut aemcema. E ownucur owam, e Allah atakam mamtaw tugas ow awutam, e Allah Jirmec mamememtam owam, e aramat ipic aotpemcemes. Owam e aramat ipic acatiwcemes. Acatiwces masirin, bar mamincop aramat ipic aojaworsitcema.” Inim aeefen.

³²Bare, Yesus inim atakam umuton cowok aotawefen. Petrus nat, e Yesus dam ajimtewef, wunam atakam e aramat ipic aotawefen. “Or inimas arapok.” Inim aeefen.

³³Bare, Yesus afiriefen. Aram e awun mamkawi ow manmok atiwef, wunam atakam Petrus aotawefen. “Iblis. Oram cey. E dobipu memem arapok. E bi binip aceceremamemas, bare asmat desen bi binipas ara. Er Allah bi binip aceceremamaras jipu opok.” Inim aeefen.

³⁴Bare, Yesus e ow arkeam, e amamkawi owam, ajateefen. Aram atakam e ow aotawefen. “Ow dor mamkawi jak aserememces, ar aropas bi binip arapok. Aram arop salib batawtotorces. Wunam dor bajamkawiawarcenes.

³⁵Ow, bajorem jak aserememces, aram bajorem opokut aemcemes. Wun ow nat, kerja dor aemtamcemenes. Aram e Atakam Akat kawey ow amememtamcemes. E ow inim tugas aman damir aafces, aram ajoremcemes.

³⁶Ow awames capinmi pok takas atatkurumcesnew, e nat, aram bajorem opok aemcesnew, bare ar asan akat bwememap asan opok.

³⁷Ow, e ajiwneas aporsipor, pok juw bwemuwumtaw asan opok cowok.

³⁸A awaniemames ow, Alah aotpemames. Ar dosa ow ara. Bare, e ow do namke akayemcesnew, ar doratakam namke akayemcesnew, bare e Asmat Anakat Ajaworemef Ipic e owam namke akayemcema— e aramat ipic aoneycow jofay ara. E jofay, aramat ipic, e aricipic arakatnakutas epcom aneycema. Aram e malaikat tarowat arke akac aneycemes.” Yesus inim aeefen.