Read Central Asmat MARKUS 9 Bible Online

MARKUS 9 - Central Asmat bible

MARKUS 9

¹Yesusam atakam e ow aotawefen. “Allah Pemerintah aenawcema. Aramat ipicam e faknakutas aporomtamcema. Atakamnak ara, wun awamcokom ow, Allah Pemerintah bwenaw aporcomokom. E ow e jofay ajiwar, damir baf opok aemcemes.”

²Barewen. Bar enam ajiwar aemapfesen. Bar enam ajiwar aemapfes masirin, Yesus, e Petrusam, e Yakobusam, e Yohanesam, opnakut sikon arop atowotometefen. Erasan ara, aramat ipic e ow bipu wun bi aojaworemefen.

³E apakaianam den fwesaknakut ajaworemefen. Pakaian bwi bacicikim ow, pakaian inim fwesaknakut, bwi bwemcicikim asan opok.

⁴Musaam, Eliaam, onam op ewneyfes, wunam e ow bipu ajisomfesen. Aram atakam Yesus aamtawfesen.

⁵Petrusam atakam Yesus aotawefen. “Guru. Dar arasan aememamom, bare akat ara. Dar puk cem mamincop bweapom. Wun cowok or. Wun cowok Musa. E wun cowok masirin, Elia.” Inim aeefen.

⁶E Yesus mamkawi ow mamincop omar awutnakut aefesen. Inimas Petrus ucim atakam atawcownew, inim bi binip opoken.

⁷Jak fwesakam erasan aenawefen. Aram e ow apwirimomefen. Atakamam e jak fwesak aman akoreyisimefen. “Awamec ipic dotiw ara. Dor aramat ipic damos ajiomamin. Caram aratakam jen pajiey.” Inim aeefen.

⁸E Yesus mamkawi ipic mamincopam, manmok asarimpepemfesen. Ar wun ow bi bapor opoken. Ar Yesus cowok ar akac aememfes aporfesen.

⁹Barewen. Aram e sikon ewneyfesen. Ewneyfes ara, Yesus atakam e ipic mamincop aotawefen. “Car e apormokomas, atakam kawey ow botaw arapok— e Asmat Anakat Ajaworemef Ipic aojaworsitcow jofay ajiwara.” Inim aeefen.

¹⁰Bare, aram e atakam kawey ow botaw opoken. E nat, aramaman atakam aamtawfesen. “E bojaworsit atakam atawmar, ucimasam?” Inim aefesen.

¹¹Aram jonow Yesus atowporfesen. “E Allah Jirmec mamememtam ow atakam, ‘E Elia bap a atakam aenawcema. E Allah Aeremtewef Ipic masirin, asep aenawcema.’ Inim aemes. E nat, e ow inim atakam ucim inimaram?” Inim aefesen.

¹²E Yesusam, “Bare, e Elia bap a takam araman. Aram atakam takas bafafaytiw bwenaw araman. E nat, e Alkitab atakam, ‘E Asmat Anakat Ajaworemef Ipic bajurusem awutut aemcema. Owam aramat ipic aotpemcemes.’ Inim aema. E Alkitab inim atakam nat, ucim inimaram?

¹³Bare, Elia emcaenawef. Owam e aramat ipic ajurusumfes. Aram e ajak asinomfesas jipu e aramat ipic aomfes. E Elia aomfesas, bare e Alkitab atakam jipu ara.” Yesus inim aeefen.

¹⁴Barewen. Yesusam, e amamkawi ipic mamincopam, e wun Yesus mamkawi ow aememfes asan, ajaremfesen. Aram ow arkenakut e ow fumi aamwiciremfes aporfesen. Ar Allah Jirmec mamememtam owam, e Yesus mamkawi owam, atakam aatawfes aporfesen.

¹⁵E ow arke takas Yesus aporfesen. Aram junum awutnakut asarimefesen. Aram Yesus biamnuk bwemamtew je akukuosfes, wunam selamat atakam e aramat ipic aotawfesen.

¹⁶Yesusam jonow e ow atowporefen. “Car ucim atakam e ow aamtawmokom?” Inim aeefen.

¹⁷E ow arke aman, jipic cowok atep ajitefen. “Guru. Dor e dotiw or atowotnawtamamin. Dat e jiwi jak aman awap. Inimas e jiwi okor ara.

¹⁸E dat e jiwi aomomcow, ar e jiwi aneyjiwitiwcema. E jiwiam bwe basep aaramwisimcema. Sisam akekemtewcema. Aram faco afacoma. Doram e omamkawi ow e dat botewerisim janim aanimof. E nat, ar e dat bwemotewerisim asan opok.” Inim aeefen.

¹⁹E Yesus masirin, “Car do basicim opok awaniemamokom ow ara. Do car akac ucim jofay ajiwar aoememcey? Do jak jirow ca bom, ucim jofay ajiwaram? Bare, e jiwi arasan towotnawey.” Inim aeefen.

²⁰Bare, ar e jiwi Yesuspu atowocenfesen. E datam Yesus bi aporef ara, ar e jiwi jis awutnakut apimefen. Inimas e jiwi cenes aneyjuamesefen. Aram aamespwepwerejarefen. E bweam besep aarsamwisimefen.

²¹Yesusam jonow e jiwi aricipic atowporefen. “E jiwi inimas bwem tarey open?” Inim aeefen. Aricipic masirin, “Ar inimas jiwinokoc ewemef.

²²E dat e jiwi jismak aramsapimapoma aramsapimapoma aeef. Aram e jiwi bwi aramjupuma aramjupuma aeef. Bare, ar e jiwi acatiwpora aeef. E nat, or fak ipic epen, saw akat dar aoworporcarowey. Oram asan akat e jiwi omey.” Inim aeefen.

²³E Yesusam, “‘Or fak ipic epen,’ inim aemenem nat ucimaram? Allah e takas e a basicimnak ow aemtamcema araman.” Inim aeefen.

²⁴E jiwi aricipicam atakam asarimfakaytawefen. “Dor Allah asicimamin. Do nat, Allah basicimkurum opoknew, oram e basicimkurum bi binip tetamcan.” Inim aeefen.

²⁵Bare, Yesus, ow arke erasan je akukuenawfes aporefen. Inimas ar jirmec fak e dat ajirimefen. “Or e jiwi jen biriam, okoram, aemapomfem. Bare, or e jiwi jak aman ewfisey, wunam e ajak aman bofiw arapok.” Inim aeefen.

²⁶Bare, e dat jen ajiefen. Aram e jiwi jis awutnakut apimefen, wunam ar e jiwi jak aman ewfisefen. E jiwiam damir inim cimin aemamesefen. Inimas ow arke atakam atawfes, “A damir ara,” Inim aefesen.

²⁷Yesus nat, e jiwi ban ajimtewef, wunam asumutumefen. Bare, e jiwi asitemefen.

²⁸Bare, Yesus e cem afisefen. Cem afisef masirin, e amamkawi ow, jonow Yesus arop atowfesen. “Dar e dat botewerisim empororom opok, ucim inimaram?” Inim aefesen.

²⁹E Yesusam, “Car janim Allah manim opok aecokom car inim dat bwemotewerisim asan opok.” Inim aeefen.

³⁰Barewen. Yesusam, e amamkawi owam, erasan ewjisosfesen. Ar masirin, Galilea capinmi aofefesen. Aramat ipicam atakam e amamkawi ow amememtamefen. Inimas ar kawey ow e aemapfes asan bapor pwicaken. Bare, Yesus atakam e amamkawi ow aotawefen. “Jipic cowok, e Asmat Anakat Ajaworemef Ipic, jokmen ow aotasimemtamcema. E owam e aramat ipic acatiwcemes. Acatiwces masirin, bar mamincop e aramat ipic aojaworsitcema.” Inim aeefen.

³¹

³²E amamkawi ow nat, e atakam jen bajikurum opoken. E nat, ar Yesus jonow botowpor omar aefesen.

³³Barewen. Aram Kapernaum ajaremfesen. Cem aman aemapfes ara, Yesus jonow e amamkawi ow atowporefen. “E bowsec ajarorom ara, car ucim atakam aamtaworokom?” Inim aeefen.

³⁴E ow nat, e bowsec, atakam aamtawfesen. “Dar awamcom ow aman, ow awutnak ca owaram?” Inim aefesen. Inimas Yesus jonow e ow atowporef, ar jokon cowok ajiapfesen.

³⁵Bare, Yesus cenes aneyapefen. Aram amamkawi ow dua belas ajiwar e abipu bemap ajateefen. Ar masirin, atakam atawefen. “Car ow awut memem jak aserememcokom, bare ow kanim mamememey. Caram e wun ow takas kerja mamememtamey.” Inim aeefen.

³⁶Bare, Yesus jiwi kanim cowok atewefen. Aram e jiwi e ow wasec atewemefen. Ar masirin, e jiwi becer ajipiropef, wunam atakam e ow aotawefen.

³⁷“Ow damos dor ajiomcenes, wunam ar inim jiwi kanim dor atowomiwtamcenes, bare e ow doram atowomiwcemenes. E dor atowomiwcemenes ow, dorop batowomiw opok. Ar e dor atewenamfan ipicam atowomiwcemes.” Inim aeefen.

³⁸Bare, Yohanesam atakam Yesus aotawefen. “Guru. Dar jipic cowok aporfom. Aramat ipic e ojuwas ajitewef, wunam ow jak aman dat aotewerisimef. Dat nat, e ipic dar mamkawi opok aporfom. Inimas dar aramat ipic eras bwem acuw aatfom.” Inim aeefen.

³⁹E Yesus masirin, “Car e ipic eras bwem acuw bat arapok. Ow dojuwas ajitewces, wunam junum bweas aemces, bare aram cemew atakam dor bwemotaw asan opok.

⁴⁰E owen da bamo opok ow, bare dajowow ara.

⁴¹Atakamnak ara, ow car Kristus mamkawi ow aporcan, inimas aram bwi car atetamcan, bare Allah asan akat e ow aomcema araman.”

⁴²“Wun jiwi kanim asicimamenes. Ow inim jiwi cowoknakap dosa bwem ajijimtawces, bare e ow asan pwicaknakut aemapcemes. Wun ow, ek awut e ow fomak manam ajikapomfes, wunam e ow e jicupum bwi ajupumfes, bare inimas bap a takam aemfes ayaw, e ow asan akat inim aemapfes.

⁴³Wunam, e oban or dosa bwem aomcannew, bare e ban mamsakamosomey. Or poman ban cowok aememcemnew, bare asan akat aememcemem. E nat, or ban jamnuk takas aememcemnew, wunam neraka afiwemcemnew, bare asan pwicaknakut aememcemem. E neraka, bare jismak basapi opokut asan ara. [

⁴⁴E neraka e ow dam das aancemar afin, bare damir opokut ara. E jismakam basapi opokut ara.]

⁴⁵Wunam, e obwey or dosa bwem aomcannew, bare e bwey mamsakamosomey. Or poman bwey cowok aememcemnew, wunam jiwnenak aatamemawarcemnew, bare asan akat aememcemem. E nat, or bwey jamnuk takas aememcemnew, wunam Allah or neraka aman ajiwimcannew, bare asan pwicaknakut aememcemem.” [

⁴⁶E neraka, e ow dam das aancemar afin, bare damir opokut ara. E jismakam basai opokut ara.]

⁴⁷E omanmok or dosa bwem aomcannew, bare e manmok mamweremtewey. Or poman manmok cowok aememcemnew, wunam e Allah Pemerintah Asan afiwemcemnew, bare asan akat aememcemem. E nat, or manmok jamnuk takas aememcemnew, wunam Allah or neraka ajiwimcannew, bare asan pwicaknakut aememcemem.

⁴⁸E neraka, e ow dam das aancemar afin, bare damir opokut ara. E jismakam basapi opokut ara.

⁴⁹“Bare, Allah e amamkawi ow takas ajurusumcema. Eras, e ow, akat ow bemapomas ara. E Allah bajurusumas, bare, ow, pok Allah acatitamcemes inim cimin ara. E ow, garam, e pok ton atakamtatiwcemes. E garam, e pok, akat pok aemapomcema.

⁵⁰Garam, bare akat ara. Garam epcom pokam of bwemem asan opok. E nat, garam jema opok aemamescownew, ow e garam jemaas bwemokenemapom asan opok. Bare, caram e akat garam jipuas mamemey. Car pwicak ow mememasin. Inimas caram caramaman damos aamjiomey.” Yesus inim aeefen.