Read Central Asmat LUKAS 1 Bible Online

LUKAS 1 - Central Asmat bible

LUKAS 1

¹Teofilus akatenem. Ow arke, e Allah dawowoc aemawirias, tulis aeapomfes.

²Wun ow, e bapnak aemawiriasam, e jepen aemawiriasam, manmok abwiawiris. Aram, e atakam, wun ow acacapiomfes. E wun atakam jen ajifes ow, e atakam tulis aeapomfes.

³Doram e bapasam, e jepenasam, aoworporkurumof. Inimas ara, dor e atakam tulis or bweapomkurumtam, bi binip aceceremof.

⁴Er, e amememawirim atakam, atakamnak aporkurumcememas ara.

⁵Barewen. E Yudea capinmi ara, raja ipic juwas Herodes aememefen. E jofayam Allah atakam mamtaw tugas ipicam juwas Sakaria aememefen. E Sakaria e Allah atakam mamtaw tugas samat juwas Abia mamkawi ipic arawen. Aremam juwas Elisabet arawen. Aramat cowoc Harun urpis arawen.

⁶Allah e jipicin cowoc tarowatnakut aporefen. Ar Tuhan jirmecam, Tuhan atakamam, ji aefes cowok arawen. Kawey ow e jipicin cowoc, atakam pwicak bwemotaw asan opoken.

⁷Elisabetam ema cowoc aemapefen. Inimas e ow jiwi opoken. E cowocam, jipicam, akmat aemapfesen.

⁸Jofay ara, Sakaria, ar akac Allah atakam mamtaw tugas ow, e tugas afiwfesen. E Allah atakam mamtaw tugas ow, ek kanim aneyjiwitiwtotora ajimpesen. Eras, e wun Allah atakam mamtaw tugas ipic, e Tuhan cem bafiw, wunam pinim akat pok jis bafam, aeremtewa ajimpesen. E jofay, bare Sakaria aeremtewfesen. Inimas ara, aramat ipic, e tugas, Allah bipu aememefen.

⁹

¹⁰E pinim akat pok jis bafam jam ara, e ow arke, janim Allah manim, e cesen aememfesen.

¹¹Bare, Tuhan malaikat cowok e Sakaria bipu ajisomefen. Ar e pinim akat pok jis bafam jowsepu ajisomefen.

¹²E Sakaria e malaikat aporef, wunam ajurusemefen. Aram omar aeefen.

¹³E malaikat nat, atakam aotawefen. “Sakaria. Omar arapok. Allah e janim aanimawirimas jen ajima. E orem Elisabet e otiw ajispetiwcema. Oram aramat ipic juwas Yohanes aamcemem.

¹⁴Oram jak akat aememcemem. Aramat ipic ajisamescow, ow arkeam jak akat aememcemes.

¹⁵Tuhanam aramat ipic ow awut aporcema. E aramat ipic anggur bwiam, wun asesak bwiam, ban opok cowok aememcema. Ar arosowoc jak aman ewomiscow, Roh Kudus, aramat ipic aomomkurumcema.

¹⁶Aramat ipicam, Israel ow arke, Tuhanpu bin afirimtewcema. Tuhan, bare e ow arAllah ara.

¹⁷Aramat ipic bap ajarcema. E Tuhan masirin, asep ajarcema. Amet ara, Elia, Allah Roham, fakasam, aomomefen. Bare, e Yohanes, e Allah Roham, e fakasam, aomomcema. Aramat ipic, e ducur owam, e jiwiam, bi binip cowkon bocecerem amememtamcema. Aram e atakam bopow ow, ow tarowat memem bi binip bacecerem amememtamcema. Aram atakam, Tuhan arow, aotawcema. ‘E Tuhan aenawcowas, manmok mamsirimey.’ Inim aecema.” E malaikat inim aeefen.

¹⁸Sakaria masirin, atakam e malaikat aotawefen. “Dor, e aotawmenemas, atakamnaknew, atakamnak opoknew, baporkurum ucim inimaramnew? Dor akmat ipic araman. Doremam akmat cowoc araman.” Inim aeefen.

¹⁹E malaikat masirin, atep ajitefen. “Dor Gabriel ara. Doram Allah kerja bwemtam ipic ara. Aramat ipic, a atakam akat, or botaw atewnemaman.

²⁰Oram jakaperey. E atawmin atakam, asep jofay, inim jipu aemcema. Or ara nat, e atakam, atakamnak opok inim ara. Inimas ara, or okor aememcemem. Or atakam bwemtaw asan opok aememcemem— e atawmin atakam inim jipu aemcow jofay ajiwara.” E malaikat inim aeefen.

²¹E ow arkeam, Sakaria bajis, manmok tareynakut asirimemfesen. Bare, aramat ipic e Allah cem aman ajiwkamiemefen. Inimas e ow junum aefesen.

²²Aramat ipic masirin, ajisefen. E nat, ar atakam bwemtaw asan opoken. E ow arke masirin, aramat ipic, e Allah cem aman, pok cowok desen aporef aporfesen. Aramat ipicam, ban desen ajojoromefen. Aram okor ipic aememefen.

²³Barewen. Aramat ipic e Allah atakam mamtaw tugas aemkurumef jofay aenawefen. Ar masirin, e acem ajisosefen.

²⁴Asep jofay ara masirin, arem Elisabet jak asuapefen. E Elisabetam pir lima ajiwar cesen bajisow opok arawen. Aram atakam aotawefen.

²⁵“Bare, Tuhan inim asan akat atetamfan. Inimas ow bi do bofayom opok aemcemenes.” Inim aeefen.

²⁶Barewen. E Elisabet pir enam ajiwar jak epcom aemapefen. Allah e malaikat juwas Gabriel e Galilea capinmi kota juwas Nasaret atewnemefen.

²⁷Ar e Gabriel, cemen maman amsom opok cowoc juwas Mariapu, atewnemefen. Aramat cowoc jipic juwas Yusuf bajuwut aememefen. E Yusuf, Daud urpis arawen.

²⁸E malaikatam e Maria cem afiwef, wunam atakam aotawefen. “Selamat. Or Tuhan damos ajiomaman cowoc ara. Aramat ipicam asan akat or aomaman.” Inim aeefen.

²⁹Aramat cowoc nat, inim atakam jen ajief, wunam bi binip arke aceceremefen. “Inim selamat atakam ucimasam?” Inim bi binip aceceremefen.

³⁰E malaikat masirin, atakam aramat cowoc aotawefen. “Maria. Omar arapok. Allah or damos ajiomaman.

³¹Oram jak asuapcemem. Oram ower jiwi ajispetiwcemem. Oram e jiwi juwas Yesus aamcemem.

³²Aramat ipic ow awutut aememcema. Ow, aramat ipic, atakam aotawcemes. ‘Ar e opnakut Allah atiw ara.’ Inim aecemes. Ametnak ara, aramat ipic arafasutmar, raja ipic aememef. Tuhan Allah, aramat ipic inim cimin raja ipic atewemcema.

³³Aramat ipic jirmec, e Yakub urpis aatamjirimawarcema. Aram jirmec bajirim, bakari opok aemcema.” Inim aeefen.

³⁴E Mariaam, atakam e malaikat aotawefen. “E atawmem atakam ucimaram? Dor ower epcom opok.” Inim aeefen.

³⁵E malaikat masirin, atep ajitefen. “E Roh Kudus or aneyomceman. E opnakut Allah afakas or aomomceman. Inimas ara, e ajispetiwcem jiwi, jiwi tarowat aememcema. Owam atakam aotawcemes, ‘E jiwi Allah atiw ara.’ Inim aecemes.

³⁶Oram jakaperey. E orosowoc Elisabet akmat cowoc ara. E nat, ar jipic jiwi jak aman awames. Ow e cowoc ema cowoc atakam atawawiris. E nat, ar pir enam ajiwar jak epcom aemapma.

³⁷Allah, bare e pokin pokin takas aomomkurumamar ara.” E malaikat inim aeefen.

³⁸Maria masirin, atakam aotawefen. “Bare. Dor Tuhan akerja bwemtam cowoc awapey ara. E atakam atawmemas, baemcow.” Inim aeefen.

³⁹Barewen. Asep jofay ara masirin, Maria asitefen. Aram Yudea capinmi sikon kota cowok asarimjarefen.

⁴⁰Erasan ara, ar Sakaria cem afiwef, wunam selamat atakam Elisabet aotawefen.

⁴¹E Elisabet e Maria selamat atakam jen ajief, e ajak aman jiwi aamesninikiefen. E Roh Kudusam e Elisabet aomomkurumefen.

⁴²E Elisabet masirin, atakam awutut e Maria aotawefen. “Allah asan akatnakut or aomaman. Ar e wun cepes takas asan akat kanim inim aomama. Aram e ajispetiwcem jiwi, asan akatnakut aomcema.

⁴³E doTuhan arosowoc aenawomaman. Inimas junum aemin.

⁴⁴Oram, ‘Selamat,’ inim aemenem ara, e dojak aman jiwi, jak akat aemamesma. Inimas ar aamesninikima.

⁴⁵E Tuhan atakam or aotawfanas, inim jipu cowok aemcema. Oram inim atakam asicimfem cowok ara. Inimas or jak akat aememamem.” E Elisabet inim aeefen.

⁴⁶Barewen. Maria atakam atawefen: “Tuhan, bare awutut ara.

⁴⁷Allah doBajortew Ipic ara. Inimas do jak akat ara.

⁴⁸Aramat ipic e akerja bwemtam cowoc kanim, manmok atiwemef. Wow jofay ajiwar emamesor ara, e asmat siin asices ow, dor asan akat cowoc, atakam aotawawarcemenes.

⁴⁹E Faknakut Ipic, awutnakutas aemfan. Aram Tarowat Ipic ara.

⁵⁰Aramat ipic, e arasicimames ow, serow ajiomcema— e asmat siin asimes ow ara.

⁵¹Aramat ipic, afaknakutas aporomtamcema. Aram e arma atawsicimfes ow, apacamosomef.

⁵²Aramat ipic e jirmec fak ow ajumnemcema. Aram e kanim ow op atomettewapomcema.

⁵³Aramat ipic, e jak bapitap opok ow, pok akat jak apitimapomcema. Aram e pok awut ow, desen atewosomcema.

⁵⁴Abrahamam, e arurpisam, darafasutmar ara. Allah, serow e ow batamomawar, atayi aeef. Aramat ipic e atayi aeefas bi binip acomomama. Inimas ara, ar akerja bwemtam Israel ow, akac aemcema.” Maria inim aeefen.

⁵⁵

⁵⁶Bare, e Maria e Elisabet cem pir mamincop ajiwar akac aemapfes, wunam arop cem aofasiefen.

⁵⁷Barewen. E Elisabet jak bapeap jofay aenawefen. Aram jipicut ajispetiwefen.

⁵⁸Tuhan saw akat e cowoc aoworporefen. Acem sotop owam, ajowowam, inim atakam jen ajifesen. Aram e cowoc jak akat akac aemapfesen.

⁵⁹E jiwi ajispetiwef masirin, isi delapan ajiwar aemamesefen. Wunam e ow e jiwi sunat bwem aenawfesen. Aram e jiwi juwas Sakaria, aricipic arwat bam, aememfesen.

⁶⁰Arosowoc nat, atakam aotawefen. “Inim arapok. Ajuwas Yohanes baemamescow.” Inim aeefen.

⁶¹E ow masirin, “E ojowow nat, inim juwas opok cowok.” Inim aefesen.

⁶²E ow masirin, ban e jiwi aricipic ajojoromfesen. Er e jiwi juwas bam jonow batowporas arawen.

⁶³Aramat ipic masirin, batu tulis janim aanimef, wunam inim atakam tulis aeapomefen. “Ajuwas Yohanes ara.” Inim aeefen. Bare, e ow takas junum aefesen.

⁶⁴E Sakariaam atakam akan aotawefen. E akomen atakam aofimtewefen. Aram Allah asicimefen.

⁶⁵E acem sotop ow takas omar aefesen. E Yudea capinmi sikon asan aemapfes ow takasam inim atakam cowok aotawfesen.

⁶⁶Inim atakam jen ajifes ow takasam, e atakam bi binip awut aceceremfesen. Aram atakam aotawfesen. “A jiwi, ucim jiwi ememcow?” Inim aefesen. Ar, Tuhan, asan akat e jiwi aomef aporfes arawen.

⁶⁷Barewen. Roh Kudus e jiwi aricipic juwas Sakaria aomomkurumefen. E Sakaria masirin, Allah atakam aotawefen:

⁶⁸“Dor e Israel ow aTuhan Allah asicimamin. Aramat ipic, arow, akac aemcema. Aram arow ajortewcema.

⁶⁹Aramat ipic, fak Bajortew Ipic atewemtamcemarow. E ipic, akerja bwemtam ipic juwas Daud urpis ara.

⁷⁰Ametnak ara, aramat ipic inim atakam e aratakam botaw ow aotawefen. E ow masirin, e atakam, wun ow aotawfesen.

⁷¹Aramat ipic, e dajewew ow akumimosomcema, wunam dar ajortewcemarow. Aram, dar, e dabifan afayomamarowos ow afakas, asurumtamcemarow. Ar inim atayi aeefen.

⁷²Aramat ipic, e darafasutmar serow bom, atakam aotawefen. Aram e aeef atayi akat, bi binip acomomcema.

⁷³Ar e atayi darafas juwas Abraham faknakut aeefen.

⁷⁴E atayi ara, ar, dar, e dajewew ow afakas asurumtamcemarow. Inimas dar, omar jak opok, aramat ipic kerja bwemtam aemcomom.

⁷⁵Inimasam ara, dar ow tarowatam, ow akatam, aememcomom, wunam e abipu kerja aatamemtamawarcomom.

⁷⁶Ata. Ow, pr e opnakut Allah aratakam botaw ipic memem, atakam aotawcemes. Oram, Tuhan abwey asan bakenemapom, bap ajarcemem.

⁷⁷Or, bi binip, Tuhan arow atetamcemem. ‘Tuhan dar ajortewcemarow,’ inim bi binip e ow atetamcemem. E bajortewas, bare dadosa bakokoromosom ara.

⁷⁸Allah aserowas, bare awutnakut ara. Inimas aramat ipic eras takas aemcema. E Bajortew Ipic, bare e jopok cimin ara. Ar e op e dadampu akorneyemcema.

⁷⁹Aram serenakut, e jiwic aman emapmes ow, aseremapomcema. E ow e damir omar ow ara. Aram e asan akat bokotpu bajar amememtamcemarow.” Sakaria inim aeefen.

⁸⁰Barewen. E jiwi sur aotemefen. Aram jak fak aememefen. Aram e ow opok asan aemapawiri— e Israel ow bipu ajisemef jofay ajiwar ara.