Read Central Asmat LUKAS 10 Bible Online

LUKAS 10 - Central Asmat bible

LUKAS 10

¹Inimas aemfes ara masirin, Tuhan, wun ow tujuh puluh dua ajiwar aereremtawefen. Ar e ow, wun jipic jamnuk wun asan tewosoma, wun jipic jamnuk wun asan tewosoma, inim aeefen. Aramat ipic, e ajisoscow kota takasam, asan takasam, bap baysos, jirmec e ow ajirimefen.

²Aramat ipicam atakam e ow aotawefen. “E cesa pok eke piwi, bare awutut ara. E bakokomtaw ow nat, arke opok. Caram janim e cesa pok aramat ipic mamanimey. Aram ow e acesa pok eke bakokomtaw, jirmec bajirimcow.

³Ca nat, mamjisosey. Car domba jiwi inim cimin ara. Dor, car wasan juwur asan inim cimin atewosomamin.

⁴Caram uang esenew, pok esenew, sandalnew, batew arapok. E bowsecam, ow atakam mamtaw arapok.

⁵Car cem afiwcokom, car inim atakam bap mamotawey: ‘Allah a cem ow, asan akat batetamcow.’ Inim mameey.

⁶Erasan, asan akat bemap jak baseremem ow aemapcesnew, bare Allah asan akat e ow atatamcema. Er e janim aanimcokomas jipu ara. E nat, Allah erasan asan akat bemap jak baseremem ow opok aporcownew, aram asan akat e ow batetam opok aemcema. E owam car eras janim Allah manim opok cimin aemapcemes.

⁷Caram e cem cowok inim emapey. E atetamcan pokam, bwiam, inim mamaney. Bare, ow e kerja bwemtam ow, pok batatamces.

⁸Car kota afiwcokom, wunam e ow car cem atowomiwcan, bare e atetamcan amos pok mamaney.

⁹Caram e kota dam ow mamjaworomtawey. Atakamam e ow mamotawey. ‘E Allah Pemerintah carasan aenawcow jofay, bare sotopnakap asisienawma.’ Inim mameey.

¹⁰Ca nat, kota afiwcokom, wunam e ow car cem batowomiw opok aecan, bare e bwey asan awut jisemey, wunam atakam mamotawey.

¹¹‘Car do batowomiw opok aemamokom. Inimas salah aemamokom. Ca nat, binip manim arapok. E Allah Pemrintah aenawcow jofay, bare sotop ara.’ Inim mameey.

¹²Jakaperey. E Allah, ow siksa jofay aenawcow, e kota Sodom ow ajurusemcesas, bare kanim ara. E car batowomiw opok kota ow ajurusemcesas, bare awut ara.”

¹³“Car kota Korasim ow ajurusapcomokom. Car kota Betsaida owam, ajurusapcomokom. Dor junum bweas awutut carasan aemof. E nat, ow inim junum bweas awutut, e kota Tirusam, e kota Sidonam, aemfes ayaw, bare e ow tareynakut, dosa bak emepayemfes. Aram kus junuk emeakfes. Aram se emefifes,

¹⁴Allah, ow, siksa bwem jofay aenawcow, bare e Tirusam, e Sidonam, kanim inim ajurusemcemes. Ca nat, awutut ajurusemcomokom.

¹⁵Car Kapernaum owa. Allah car asicimcemannew? Opokut. Ar car bifan afayomceman.” Yesus inim aeefen. Yesus masirin, atakam e amamkawi ow aotawefen.

¹⁶“E caratakam jen ajimes ow, doratakamam jen ajimes. E caratakam aopowmes ow, doratakamam aopowmes. Aram e atewenamfan ipic aratakam aopowmes.” Inim aeefen.

¹⁷Barewen. E ow tujuh puluh dua ajiwar, jak akat epcom aofasifesen. Aram atakam aotawfesen. “Tuhan. Dar e ojuwas ajitewmom ara, datam, daratakam ji aemes!” Inim aefesen.

¹⁸Yesus masirin, atakam e ow, aotawefen. “Iblis onam op ewjuneyef— bwer aneycemar cimin ara. Dor inim manmok atiwof.

¹⁹Jakaperey. Dor ameram, anokosam, bwey bajipirem fakas car emetetamfin. Doram e Jewew Ipic bakumimosom fakas car emetetamfin. Bare, pok car bwemjurusum asan opok.

²⁰Datam caratakam ji aemes. Ca nat, eras jak akat bemap arapok. E cajuwas e onam op buku aman awapes. Bare, car eras jak akat emapey.” Inim aeefen.

²¹E jofay cowok, eRoh Kudus, jak akat e Yesus atetamefen. Yesus masirin, atakam Allah aotawefen. “Diwi. Or e onam opam, e capinmiam, aomomamem. O nat, eras e bi binip umuton owam, e amsom owam, acukumomfem. Wunam eras, jiwi kanim aporomtamfem. Oram inimas bwem akat aemfen. Bare, dor terima kasih atakam or aotawmin.” Yesus inim aeefen.

²²Aramat ipic masirin, atakam aootawefen. “Doricipic, bare e aras takas e doban ton atetamfan. Allah atiw amsom ow, bare opok ara. Aricipic cowok e atiw amsom ara. Aricipic amsom owam, bare opok ara. Atiw cowok e aricipic amsom ara. E atiw e aricipic wun ow baporomtam akat aema. E owam aricipic amsom ara.” Inim aeefen.

²³Yesus masirin, e amamkawi ow bin afiromef, wunam atakam e ow arop aotawefen. “Wun ow, e manmok atiwmokomas, manmok atiwmes. E ow, bare asan akat ara.

²⁴Jakaperey. Allah atakam botaw ow arkeam, raja ow arkeam, e manmok atiwmokomas, manmok batiw jak aseremomfes. Ar nat, eras manmok batiw opok arew. Aram e jen ajimokomas jen baji jak aseremomfes. Ar nat, eras jen baji opok arew.” Inim aeefen.

²⁵Barewen. Allah Jirmec mamememtam ipic cowok, Yesus e atakam takas amsom epen bapor asitefen. Aram atakam aotawefen. “Guru. Dor jiwnenak batamemawar akat ara. Inimas dor ucim pok emcey?” Inim aeefen.

²⁶Aramat ipic masirin, “E Allah Jirmec surat ucim atakamam? Or eras ucim atakam baca aemamem?” Inim aeefen.

²⁷E ipic masirin, “Allah Jirmec ara, ‘Damos awutnakut e oTuhan Allah mamjiomkurumey. Or e ojak epcomam, e ofakas takas epcomam, e obi epcomam, damos e aramat ipic mamjiomkurumey. Oram damos ojowow mamjiomey— e damos orma ajiemamem awcawor ara.’ ” Inim aeefen.

²⁸Yesus masirin, atakam e ipic aotawefen. “E atawmem atakam, bare atakamnak ara. Or eras emey. Or masirin, jiwnenak aatamemawarcemem.” Inim aeefen.

²⁹E ipic nat, bi binip aceceremefen. “Yesus dor jipic tarowat ara, inim baporcow.” Inim bi binip aceceremefen. Inimas, jonow Yesus atowporefen. “E dojowow nat, ucim owam?” Inim aeefen.

³⁰Yesus masirin, atep ajitefen. “Jipic cowok Yerusalem ewneyefen. Ar Yeriko jisosefen. E bowsec ara, pok ces bwetaw ow, ban e ipic ajiskimomfesen. E apok takasam ban acirkokomtawfesen. Aram e ipic omop aaffesen. Aram e ipic badamirafken bakan ajifesen.

³¹E jofayam ara, Allah atakam mamtaw tugas ipic, e bokot jof ajarefen. Ar e ipic aporef, wunam e bokot jof poman aofeenefen.

³²Lewi samat ipicam inim cimin aemefen. Aram e asan aenawefen. Ar e ipic aporefen. Aporef masirin, e bokot jof poman aofeenefen.

³³Samaria samat ipicam e asan ajarefen. Ar e ipic sotop inim ajarefen. Aram e ipic aporefen. Aporef masirin, e ipic saw akat aoworporefen.

³⁴Ar e ipic dampu aenefen. Ar minyak bwiam, anggur bwiam, e dosopu takas akukumefen. Ar picin, e doso apwirimapomefen. Ar masirin, e ipic, e akeledai bak ton atomettewapomefen. Aram e ipic pasanggrahan cem atowomosefen. Aram e ipic pok afafayefen.

³⁵To ara masirin, ar uang dinar jamnuk asumtewefen. Asumtewef masirin, e uang, pasanggrahan cem aramat ipic atetamefen. Aram atakam aotawefen. ‘Or e ipic pok bafafaytamey. Or e ipic pok awut bajittam epen, dor afasicey, wun uang or aotetamcimin.’ ” Inim aeefen.

³⁶“E obi binip ara, e pok ces aefes ipic ajowow ipic cam?” Yesus inim aeefen.

³⁷E Allah Jirmec mamememtam ipic masirin, “E saw akat aemef ipic ajowow ipic ara.” Inim aeefen. Yesus masirin, atakam aotawefen. “Bare. Oram baysosey. Oram inim cimin mamemey.” Inim aeefen.

³⁸Barewen. Yesusam, e amamkawi owam, ajarfes ara, aramat ipic wun samat cowok acemsan afiwefen. Cowoc juwas Marta masirin, e aramat ipic e acem atowomiwefen.

³⁹E cowoc aromwes juwas Maria arawen. E Maria e Tuhan bweypu aemapefen. Ar e amememtamef atakam jen ajiefen.

⁴⁰Marta nat, e ow amos bajewtam, kerja awutut aporefen. Aram Yesus sotop aenef, wunam atakam aotawefen. “E amos bajewtam ara, doromwes akac bwem opok. Or saw akat do bwem arapen? Ar, dor akac bwem jirmec ajirimey.” Inim aeefen.

⁴¹Tuhan, nat atakam aotawefen. “Marta. Or pok bwemas arke bi binip jirow aceceremamem. Oram eras jak pwicak aememamem.

⁴²O nat, wun pok cowoknakap bwem opok ara. Bare Maria e akatas bwem aeremtewef. Ow e Maria aeremtewefas bwemotew asan opok.” Inim aeefen.