Read Central Asmat LUKAS 12 Bible Online

LUKAS 12 - Central Asmat bible

LUKAS 12

¹Eras aemfes ara, ow arkenakut ajarewsiemfesen. Aram bwey aramaman aamjipipiremfesen. Yesusam atakam e amamkawi ow, bap aotawefen. “Car e Parisi ow e abibit roti pimicima. E ow e pir aemesas, bare bibit roti inim awcawor ara.

²Bare, ow e bapwirimtiwas takas umuton aoporcemes. Owam e curuw atakam takas jen ajikurumcemes.

³Ar e jiwic aman atawfokom atakam, jokam jen aojicemes. Owam, e kamar aman atawfokom curuw atakam, e ajarewsiapcemes ow bipu atakam aofakaytawcemes.”

⁴“Awapokom owa. Jakaperey. Asmat ow, ow acatiwcemes. E nat, ar ow acatiwces, ar e ow bwemojurusum asan opok. Bare, car asmat ow omar arapok.

⁵Do nat, e car omar bwe ipic atakam car aotawmin. E ipic ow acatiwcow, ar e ow neraka aman biwim fakas epcom. Atakamnak car aotawmin. E ipic omar mameey.

⁶Ow sok kanim lima ajiwar, uang sen jamnuknakas ajititcemes. Allah nat, e sok takas binip manim opok cowok aemcema.

⁷Allah, e cakus fin aporsipor amsom. Inimas ara, car omar arapok. Car penting ara. E sok arke nat, penting opok.”

⁸“Jakaperey. Ow e wun ow bipu atakam aotawcesnew, ‘Dor Yesus mamkawi,’ inim aecesnew, bare e Asmat Anakat Ajaworemef Ipic, Allah amalaikat bipu atakam aotawcema. ‘A ow doras ara,’ inim aecema.

⁹E nat, ow e wun ow bipu atakam aotawcesnew, ‘E Yesus nomsom opok,’ inim aecesnew, bare doram Allah amalaikat bipu atakam aotawcimin, ‘A ow doras opok,’ inim aecimin.

¹⁰Ow, e Asmat Anakat Ajaworemef Ipic atakam aotawces, Allah e dosa akokoromosomcema. E nat, ow cemew atakam Roh Kudus aotawces, bare Allah e dosa bakokoromosom opokut aemcema.

¹¹Ow, car sembahyang cem aman atakam mamsakamtiw ow bipunew, kepala kanim ow bipunew, kepala awut ow bipunew, ajijimtawcan, e atep ajitcokomas, bi binip jirow arapok. E atakam atawcokomasam, bi binip jirow arapok.

¹²E Roh Kudus, bare e jofay cowok, e atakam atawcokomas, bi binip car atetamceman.” Yesus inim aeefen.

¹³Barewen. E ow arke aman, jipic cowok, atakam, Yesus aotawefen. “Guru. E dorepwec, e daricipic damir aafef bakan ajiamesef pok, sey do baseyetam, jirmec bajirimey.” Inim aeefen.

¹⁴Yesus nat, atakam e ipic, aotawefen. “Dor e ca salah atakam basakamtiw ipicnew, e capok baseye ipicnew, catewemfan?” Inim aeefen.

¹⁵Yesus masirin, atakam e ow aotawefen. “Pimicima. Pok sinomcokom. Pok awut momom, bare e pok aramat ipic ow jiwne batamemawaras opok.” Inim aeefen.

¹⁶Bare, aramat ipic baposomtew atakam e ow aotawefen. “Jipic cowok pok arkeen. Aram e akebun pok awutnakuten.

¹⁷Aramat ipic masirin, bi binipin aceceremefen. ‘Dor ucim pok emcey? E dokebun pok batewapom cem, bare awut opok.’ Inim bi binip aceceremefen.

¹⁸Aramat ipic masirin, atakam aotawefen. ‘Dor e dopok batewapom cem takas ajumtiwcimin. Dor masirin cem awut arke aoeapomcimin. Bare, dor e dogandum eke takasam, e dopokam, e cem aman atawapomcimin.

¹⁹Eras aemkurumcey masirin, dor e dojak aman atakam aotawcimin. “Dor pok arke ara. E pok tahuniwin aatamomopawarcimin. Bare, dor ses bapnawar aemin. Dor amos pokam, bwiam, desen bapnawar aemin. Doram jak akat emapawarmin.” Inim aecimin.’ E ipic inim aeefen.

²⁰Allah nat, atakam e ipic aotawefen. ‘Or bi binip opok ipic. Wow iram ara, or damir aafcemem. E akenemawirim pok, ca tewetces?’ Inim aeefen.

²¹Bare, wun ow e arop pok apotomapomcemes. E nat, ar Allah e akat apormaras bapotomapom opok. Inim ow, e baposomtew atakam atawminas awcawor aemcemes.” Yesus inim aeefen.

²²Yesus masirin, atakam e amamkawi ow aotawefen. “Inimas ara, caram jakaperey. E aancokom amos pok, car tetakay mememas ara. E nat, e aancokomas, bi binip jirow arapok. Caram e cadam ajimomcokom pakaian, bi binip jirow arapok.

²³Tetakay memem, bare penting awut ara. Amos pok nat, penting awut opok. Asmat dam penting awut ara. Pakaian nat, penting awut opok.

²⁴E sok juwas onok manmok tiwporey. Ar pok akan batewapom opok. Aram amos bajow opok. Ar gudangnew, wun pok cemnew, bare opok. Allah nat, pok e sok atatamama. Bare, car penting awutut ara. E sok nat, penting awut opok.

²⁵Ow, pok bi binip jirow aceceremcesnew, aram e adamir aafces jofay, bar cowoknakapam bwemotasimenem asan opok.

²⁶Car e kanimnakapas bwemem asan opok apormokomnew, car e wunas ucim bi binip jirow aceceremamokom?

²⁷Caram e tawar esakam manmok batiwporey. Ar kerja opok. Aram pakaian bakekem opok. Ca nat, jakaperey. Raja Salomo, bare akatnakut aememefen. Aramat ipic nat, pakaian e tawar esakam inim akatipic, bajimom opok cowok arawen.

²⁸Bare, e wasan pok, won awamces. Asep jofay masirin, ow e pok jis afamtiwcemes. Allah nat, e pok akatipic aemapomef. Bare, aramat ipic pakaian car atetamceman araman— e ca basicimkurum opok owam ara.

²⁹Caram e aancokomas bi binip awut arapok. Caram eras jak pwicak arapok.

³⁰E Allah amsom opok ow takas, eras bi binip awut aceceremames. E nat, caricipic e aancokomas takasam, e ajimomcokom pakaian takasam, bare amsom ara.

³¹Ca nat, e Allah Pemerintah bi binip awut baceceremey. Allah masirin, e wunas takas car atetamceman.”

³²E dor ajamkawimenokom ow mamincopa. Omar arapok. Caricipic e aPemerintah Asan akatas, ca batetam akat arawen.

³³Car e capok, uang buwumtewetey. Car e uang masirin, e asan pwicak ow mamtetamey. Caram carop jiwne epcom uang ese inim cimin basitotorey. E capok anakat, e onam op cem tawapomattotorey. E pok bwemajimkurum asan opok. Osom owam e pok sotop bwemmesem asan opok.

³⁴Bare, car e capok asan bemap, jak aseremapmokom.

³⁵“Caram manmok cowok inim mamsirimapawarey. E capakaianam inim mamomopawarey. E capelitaam inim batereyapawarces.

³⁶Caram kerja bwemtam ow inim cimin aatamemawarey. E kerja bwemtam ow akerja aramat ipic owersey pokbwi cem ajisosefen. E ow, e aramat ipic bafasi manmok asirimapfesen. Aram afasicow, wunam e jimasap kay kay emcow, e ow masirin, e jimasap asarimpajimtewtamcemes.

³⁷E aramat ipic afasicow, wunam akerja bwemtam ow a manmok basirimap aporcow, bare e ow kerja bwemtam ow asan akat aemapcemes. Atakamnak ara, e aramat ipic, pok batowomattam ipic inim pakaian ajimomcema. Aram e ow amos memen cenes bemap atakam aotawcema. Ar masirin, amos pok e ow atowomattamcema.

³⁸E kerja aramat ipic iramnaknew, iram faknew, inim aenawcow, wunam e akerja bwemtam ow manmok basirimap aporcow, bare e ow asan akat ara.

³⁹Jakaperey. Cem aramat ipic e osom ipic aenawef jam amsom ayaw, aram manmok atiwapef. E osom ipic, e cem jiwi bajumtewasin.

⁴⁰Caram manmok inim sirimapey. Car, ‘E Asmat Anakat Ajaworemef Ipic wow bwenaw opok,’ inim bi binip aceceremcokom jofay, bare e jofay aramat ipic aenawcema.” Yesus inim aeefen.

⁴¹Petrus masirin, “Tuhan. E atawmem baposomtew atakam, daras cowok aranew? Ow takas arasnew?” Inim aeefen.

⁴²E Tuhan masirin, “E anakat kerja bwemtam ipicam, e bi binip epcom kerja bwemtam ipicam, ucim ipicam? E akerja aramat ipic, e ipic, e acem mandor ipic atewemcema. E wun kerja bwemtam ow, amos memen aemapa aeces, e ipicam, amos pok, e ow aseyetama aecema.

⁴³E kerja aramat ipic aenawcow, wunam e akerja bwemtam ipic inimas bwem aporcow, bare e kerja bwemtam ipic asan akat aemapcema.

⁴⁴Atakamnak ara, e kerja aramat ipic, e ipic, e apok takas manmok batiw atewemcema.

⁴⁵E nat, e kerja bwemtam ipic bi binip aceceremcow, ‘E dokerja aramat ipic basarimenaw opok,’ inim bi binip aceceremcow, wunam ar e wun kerja bwemtam owam, kerja bwemtam cepesam, omop aafcow, wunam pok paknam aancow, wunam jokmen bwi jayic ememcow,

⁴⁶bare, e jofay e kerja aramat ipic aofasicema. E kerja bwemtam ipicam bi binip aceceremcema. ‘E kerja aramat ipic wow bofasi opok openow.’ Inim aecema. E nat, e jofay cowok e kerja aramat ipic aofasicema. Aram e kerja bwemtam ipic acatiwcema. Aram e ipic e Allah basicim opok ow asan atewapomcema.

⁴⁷Kerja bwemtam ipic, e kerja aramat ipic atakam jen desen ajicow, wunam ar e pok bakenem opokam, e atakam ji bwe opokam, inim aemcow, bare e kerja aramat ipic e ipic omop awutut aafcema.

⁴⁸E nat, e kerja aramat ipic atakam amsom opok ipic, omop bafas aemcow, bare e kerja aramat ipic, e ipic omop kanim aafcema. Allah, awutas, wun ow atetamama. Bare, aram awutas, janim e ow aoanimama. Allaham manmok batiwas awut wun ow atetamama. Bare, aram eras manmok batiw anakat janim aanimama.”

⁴⁹“Dor a capinmi sos bafamtiw aneyof. E jismak emcaurumef ayaw, bare dor jak akat ara.

⁵⁰Ow dor ajurusumcemenes. E eras aemcenes jofay ajiwar, dor jak pwicaknakut aememcimin.

⁵¹Caram, ‘E Yesus, a capinmi, ow damos mamjiom capinmi bemapom aneyef,’ inim bi binip aceceremamokom openow. Do nat, inimas bwem baney opok. Dor a capinmi, ow atakam mamtaw capinmi, aemapomamin.

⁵²Wow jofay ajiwar emamesor, cem cowok, ow lima ajiwar atakam aamtawcemes. Ow mamincop, e juw jamnuk aoamtawcemes. E juw jamnukam, e ow mamincop aoamtawcemes.

⁵³Aricipicam e atiw aoamtawcema. E atiwam e aricipic aoamtawcema. Arosowocam e apores aoamtawcema. E aporesam e arosowoc aoamtawcema. Asokam e anin aoamtawcema. E aninam e asok aoamtawcema.” Yesus inim aeefen.

⁵⁴Barewen. Yesus atakam e ow arke aootawefen. “Car e jo basapiney asan, jak bwenaw aporcokom, car, ‘Te aneycema,’ inim aecomokom. Bare, aram eras aemcema.

⁵⁵Wunam, car fo e selatan ewfwimenawcow aporcokom, ‘Wow jo amop demawarcema,’ inim aecomokom. Bare, aram eras aemcema.

⁵⁶Car bare, pir bwe ow ara. Car a capinmiasam, e onam opasam, camsom ara. Ca nat, e Allah wow aemamaras camsom opok, ucimaram?”

⁵⁷“Caram akatas bwem, atakam carma basakamtiw opok, ucimaram?

⁵⁸Ow atakam car aporsipor aotawcan, ‘Or inim salah aemfan,’ inim aecannew, wunam ar car pemerintah bipu atowomoscannew, bare car e bowsec e ow damos mamemporey. E ow, car, salah atakam basakamtiw ipic bipu ban bacajimtewasin. E salah atakam basakamtiw ipicam car e polisi ow botasimemtamasin. E polisi owam car e penjara cem bafimimasin.

⁵⁹Bare, car e penjara cem aman aemapawarcomokom— e pok abwitamkurumcokom jofay ajiwar ara.” Yesus inim aeefen.