Read Central Asmat LUKAS 14 Bible Online

LUKAS 14 - Central Asmat bible

LUKAS 14

¹Barewen. Ses Ban Jo ara, Yesus, Parisi kepala ipic cowok acem, amos akac memen, ajisosefen. E erasan aemapfes ow, manmok Yesus asirimopfesen.

²Bare, dam sisipi ipic e Yesus abipu aememefen.

³Yesusam jonow e Allah Jirmec mamememtam owam, e Parisi owam, atowporefen. “Ses Ban Jo, asan pwicak ow dam baworomtam, e Allah Jirmec bopowas aranew? Opoknew?” Inim aeefen.

⁴E ow nat, jokon cowok ajiapfesen. Yesus masirin, e dam sisipi ipic ban ajimomefen. Aram e ipic ajaworomtewefen.

⁵Yesus masirin, atakam e ow aotawefen. “Car takas, e catiperesnew, e casapinew, Ses Ban Jo, sumur bwi deyjusecesnew, bare car ar asarimjimtewcomokom araman.” Inim aeefen.

⁶E ow nat, aratakam atep bwemjit asan opok arawen.

⁷Yesusam, e jaki ow aporefen. Inimas ar baposomtew atakam e ow aotawefen.

⁸“Ow car ower bajuwamat pokbwi akac memen ajatecan, car e ow awut asan bemap arapok. E ajatefan ipic wun ow awut ajateef openow. Car masirin, ow kanim inim ara openow.

⁹E car ajatefan ipic, e cabipu bwenawasin. ‘Or basitey. Awamec ipic arasan baemapcow.’ Ar inim atakam car botawasin. Inim atakam car aotawcan, car e pwicak asan aemapcomokom. Wunam namke akayapcomokom.

¹⁰E nat, ow car pokbwi akac memen ajatecan, e pwicak asan emapey. E cem aramat ipic masirin, atakam car botaw aenawomceman openow. ‘Aya. E ow awut asan emapey.’ ” Inim aeceman openow. Inimas ar car e wun jaki ow takas bipu asicimceman.

¹¹“Allah e arma batawsicim ow namke akamemcema. E nat, ar e arma batawsicim opok ow asicimcema.” Yesus inim aeefen.

¹²Yesusam atakam e amos akac memen ajateef ipic aotawefen. “Or jok pokbwi aemcemnew, iram pokbwi aemcemnew, e ojowow bayte arapok. E orepcewesam, orewcewesam, orowcamwe owam, bayte arapok. E ocem sotop wun ow, pok awut ow ara openow. E owam bayte arapok. E ow or pomatam bojateasin.

¹³Or pokbwi aemcem, e pok opok owam, e japow owam, e ci ci ajijarmes owam, e manmok kapi owam, mamjateey.

¹⁴E ow or pomatam bwemem asan opok. Inimas or asan akat aemapcemem. Ow tarowat aojaworsitces jofay, Allah or pomatam aemceman.”

¹⁵E amos akac aemenef ipic cowok e atakam jen ajief ara, ar atakam Yesus aotawefen. “E Allah Pemerintah Asan amos aances ow, bare asan akat ara.” Inim aeefen.

¹⁶Yesus nat, atakam e ipic aotawefen. “Jofay ara, jipic cowok, pokbwi awutut aemefen. Aram ow arke ajateefen.

¹⁷E pokbwi sotopnakap aporef ara, ar e akerja bwemtam ipic, e ajateef ow atakam botawtam, atewosomefen. ‘Caram dey. Pokbwi pok emcafafaykurumapomorom, inim eey.’ Inim aeefen.

¹⁸E ajateef ow takas nat, pir aomtotorfesen. E bap ipic, atakam e kerja bwemtam ipic aotawefen. ‘Dor capinmi jititof. Dor e capinmi basupor baysos aemin. Dor e pokbwi bwenaw opok arew. Inim mamotawey.’ Inim aeefen.

¹⁹E wun ajateef ipicam atakam aotawefen. ‘Dor sapi sepuluh ajiwar jititof. Dor e sapi boworpor aemin. Dor bwenaw opok arew. Inim mamotawey.’ Inim aeefen.

²⁰E wun ajateef ipicam atakam aotawefen. ‘Dor petew jepen ajiwemamin. Inimas dor bwemenaw asan opok.’ Inim aeefen.

²¹E kerja bwemtam ipic masirin, aofasiefen. Aram inim atakam e kerja aramat ipic aotawefen. E cem aramat ipic masirin, jak amop apwiapefen. Aram atakam e akerja bwemtam ipic aotawefen. ‘Or awames kota e bokot jof awut takasam, e bokot jof kanim takasam, jisosey, wunam e pok opok owam, e japow owam, e manmok kapi owam, e ci ci ajijarmes owam, arasan towotnawey.’ Inim aeefen.

²²E kerja bwemtam ipic aofasief, wunam atakam aotawefen. ‘Tuan. E ataweremas, bare emcaemey. E nat, e ocem, asan fi awames.’ Inim aeefen.

²³E cem aramat ipic masirin, atakam, e kerja bwemtam ipic aotawefen. Oram cey. E kota cesen bokot jofam, e wasan bokot jofam, baysosey. Erasan ow, e docem bafiw, atakam fak botawey. Dor e docem, ow imwinakap bapitiap akat ara.

²⁴Or e doratakam jen pajiey. E bap ajateof ow, e dopokbwi pok memen opok cowok aemcemes. Inim aeefen.” Yesus inim baposomtew atakam aotawefen.

²⁵Barewen. Ow arkenakut e Yesus akac ajarfesen. Aramat ipicam e ow, bin ajiromef, wunam atakam aotawefen.

²⁶“Jipic cowok do mamkawi akat aporcow, aram damos awutnakut bajiomcan. Ar dor aenawomcannew, e nat, ar e aricipicam, e arosowocam, e aremam, e atiperesam, e arepcewesam, e arewcewesam, e atarsepesam, damos kanim inim opok ajiomcownew, bare ar domamkawi ipic bwememem asan opok. Wunam damos arma kanim inim opok aemcow, ar domamkawi ipic, bwememem asan opok.

²⁷Ow arop salib batawtotor opok aemces, wunam dor mamkawi opok aemces, bare ar domamkawi ow bwememem asan opok.

²⁸Bare, car cem awut bweapom aememcokom, car atakamneypwikapcomokom, wunam e cem bweapomkurum pok baytit uang, arke epen atakamporcomokom.

²⁹Car inimas opok aemcokom, wunam e cem fasis ajijirimnemkurumcokom, car e cem bwemeapom asan opok arew. Eras aporces ow masirin, car uc asawuomceman.

³⁰Aram atakam aotawcemes. ‘Ewamec ipic cem fasis emejijirimapomef. E nat, ar e cem bwemeapomkurum asan opok.’ Inim aecemes.

³¹Wunam raja ipic, wun raja ipic owec bamo ememcow, ar atakamneypwikapcema, wunam bi binip aceceremcema. E atentara ow sepuluh ribu ajiwar ara. E owec bamo enawcow raja ipic atentara ow nat, dua puluh ribu ajiwar ara. Inimas aporcow, ar bi binip aceceremcema. ‘Dor e raja bakumimosom aranew? Opoknew?’ Inim bi binip atakamceceremcema.

³²Opok aporcow, ar e wun raja damasan opok aporcow, ar atakam botawpor ow e rajapu atewosomcema. ‘Dor pay bwe akat ara. Dor ucim pok o tetamcey?’ Inim aecema.

³³Inimasam ara, ow e aras takas bakan bajios opok aemces, ar domamkawi ow bwememem asan opok.”

³⁴“Garam bare akat ara. E nat, garam jema opok aemamescow, ow e garam jemaas bwemokenemapom asan opok.

³⁵E pwicak garam, bare pok akan baworomas opok. Aram e wun pok akan baworom pok bartamas opok. Ow e garam ajiwosomcemes. Bare, jen fo ow a atakam jen bajices.” Yesus inim aeefen.