Read Central Asmat LUKAS 15 Bible Online

LUKAS 15 - Central Asmat bible

LUKAS 15

¹Barewen. E pemerintah uang batawanimtam kerja ow takasam, e dosa ow takasam, Yesus aratakam jen baji, aramat ipicpu aenawomfesen.

²E Parisi owam, e Allah Jirmec mamememtam owam, icim afesfesen. “Awamec ipic e dosa ow, ‘Dey! Dey!’ ajitawcema, wunam ar e ow amos akac aemencemes.” Inim aefesen.

³Inimas ara, aramat ipic, inim baposomtew atakam, e ow aotawefen.

⁴“E ca wun ipic cowok, domba seratus ajiwar momomnew, wunam domba cowok apakapioscownew, aram e wun domba sembilan puluh sembilan ajiwar e cem opok asan bakan ajioscema. Ar masirin, e apakapiosef domba bapowpor ajisoscema. Ar e domba apowporkurumcema. Wunam apowtewcow, aofasicema.

⁵E domba apowtewcow ara, sop atatiwcema. Aram jak akat aememcema.

⁶E acem aofasicow, aram e ajowowam, e acem sotop owam, ajatecema. Ar masirin, atakam aotawcema. ‘E dodomba apakapiosor. Do nat, apowtewey. Inimas caram dey. Jak akat ememamoc.’ Inim aecema.

⁷Jakaperey. Inimasam ara, dosa ipic cowoknew, dosa cowoc cowoknew, e adosa bak apayemcow, bare e onam op ow, jak akatnakut aememcemes. Ow tarowat nat, dosa bak bapayem opok ara. E onam op ow, ow tarowat sembilan puluh sembilan ajiwar aporces, bare ar jak akat kanim inim aememcemes.”

⁸“Wunam, cowoc, uang sen sepuluh ajiwar momomnew, wunam cowok apakapioscownew, bare ar e pelita acomsemapomcema, wunam e cem sapu awaramcema. Aram e uang apowkurumcema. Bare, ar ses ban opok. Apowtewcow ara masirin, ses aoancema.

⁹Apowtewcow, aram e ajowowam, e acem sotop owam, ajatecema. Atakamam aotawcema. ‘Dor e apakapiosor uang sen apowtewey. Inimas caram dey. Jak akat ememamoc.’ Inim aecema.

¹⁰Jakaperey. Inimasam ara, dosa ipic cowoknew, dosa cowoc cowoknew, e adosa bak apayemcow, bare e Allah malaikat jak akat aememcemes.” Yesus inim aeefen.

¹¹Yesus masirin, atakam aootawefen. “Jipic cowok, ower jiwi jamnuk arawen.

¹²E aykun ipic atakam e aricipic aotawefen. ‘Diwi. Dor e atowopcey pok batewet. E pok sey seyetamcan.’ Inim aeefen.

¹³Bar mamincop ara masirin, e aykun ipic e apok takas akenemapomef, wunam dawon opok capinmi ajisosefen. Erasan ara, ar jursumecas aemef, wunam e apok takas awumemefen.

¹⁴Aram pok opok aememefen. E jofayam, e capinmi amos kanimnakap arawen. E capinmi owam, amosto awutnakut aemapfesen. E aramat ipicam, amosto damir bafken aemapefen.

¹⁵Ar masirin, erasan capinmi ipic kerja aemtamefen. E ipic, aramat ipic, e aro cesa arke, amos manam kerja, e kebun asan atewosomefen.

¹⁶Aramat ipic, e o cesa aramos bimis, jak bapitimapompor aememefen. Ow nat, e pok ar bwemtetam asan opoken.

¹⁷Wunam e aramat ipic binip umuton aceceremefen. Aram atakam aotawefen. E doricipic kerja bwemtam ow arke, bare amos awut aanmes. Aram amos anaeremtiwmes. Do nat, arasan amosto damir aafmin.

¹⁸Bare, dor asitcimin, wunam e doricipicpu ajisoscimin. Doram aramat ipic atakam aotawcimin. Diwi. Dor dosa or aemfin. Doram dosa Allah aemof.

¹⁹Inimas ara, or, ‘Awamec ipic dotiw ara,’ inim atakam bootaw arapok. Dor inim asan akat, awcawor opok. Dor e okerja bwemtam ipicin inim cimin emcan.” Inim aecimin. Inim aeefen.

²⁰“Bare, aramat ipic asitef, wunam e aricipicpu ajisosefen. Aramat ipic damasan opok ememef, aricipic e atiw aporefen. Aram e atiw saw akat aoworporefen. Aram e atiwpu akukuenef, wunam becer ajipirtewefen. Aram ak afopefen.

²¹E atiw masirin, atakam aotawefen. ‘Diwi. Dor dosa or aemfin. Doram dosa Allah aemof.’ Inimas ara, or, ‘Awamec ipic dotiw ara’, inim atakam bootaw arapok. Dor inim asan akat awcawor opok.” Inim aeefen.

²²“E aricipic nat, atakam e akerja bwemtam ow aotawefen. E akatnakut baju batewey, wunam e dotiw bajimomtamey. Barukam e asop jimapomey. Sandalam e abwey jimapomey. E amos pok anamawirum sapi jiwi batewey, wunam bacatiwey. Sarima. Dar pokbwi emamoc. Jak akat emamoc.

²⁴Dor e dotiw damir emeafef inim ara. E nat, awamec. Ar apakapiosef. E nat, aofasief.” Inim aeefen. Bare, e ow jak akat aememfesen.

²⁵“Barewen. E betiw ipic e kebun cowocemefawen. Aram aofasineyefen. Cem sotop deyemef masirin, emam, di jusuwanam, jen ajiefen.

²⁶Aramat ipic masirin, kerja bwemtam ipic ajateefen. Aram jonow atowporefen. ‘A ucimasam?’ Inim aeefen.

²⁷E kerja bwemtam ipic masirin, ‘Orewec, bare, asan akat afasior. E oricipic inimas aporor masirin, e amos pok anamawirum sapi jiwi acatiwor.’ Inim aeefen.

²⁸E betiw ipic nat, jak amop aememefen. Aram e cem bafiw pwicaken. Aricipic masirin, ajisefen. Aram e ipic, e cem bafiw, janim fak aanimefen.

²⁹E ipic nat, atakam e aricipic aotawefen. ‘Jakaperey. Dor tahun arke, kerja, or aemtamawirin. Doram oratakam bopow opok cowok aemawirin. Or ara nat, dor e dojowow pokbwi bwemtam kambing jiwi cowoknakapam, do batetam opokut.

³⁰E nat, e otiw e tetamfem pok e manam pimar cepes emeajimkurumef. Oram e amos anamawirum sapi jiwi, e ipic acatitamerem!’ Inim aeefen.

³¹Aricipic masirin, ‘Ata. Or dor akac aemawirinim. E dopok takasam oras ara.

³²Dar e orewec damir emeafef inim ara. E nat, awamec. Apakapiosef. E nat aofasief. Inimas ara, dar pokbwi bwemam, jak akat mememam, bare akat ara.’ Inim aeefen.” Yesus inim baposomtew atakam aotawefen.