Read Central Asmat LUKAS 16 Bible Online

LUKAS 16 - Central Asmat bible

LUKAS 16

¹Barewen. Yesus atakam e amamkawi owam aotawefen. “Jipic cowok pok awut arawen. Ar e apok manmok batiwtam ipic atewematefen. Jofay ara, ow, atakam, e pok aramat ipic, aotawfesen. ‘E opok manmok batiwtam ipic e opok apakapimosomama.’ Inim aefesen.

²E pok aramat ipic masirin, e ipic ajateefen. Aram atakam aotawefen. ‘Atakam jen ajief ara, or e dopok apakapimosomamem. Bare, or e dopok manmok bwemotiw asan opok. Inimas ara, or e dopok manmok atiwawirimas takas, atakam botawcan.’ Inim aeefen.

³E pok manmok batiwtam ipic masirin, bi binip aceceremefen. ‘E dokerja aramat ipic e apok manmok batiwtam kerja, dor afimisimaman. Dor ucimas emcey? Kebun kerja ara, bare dor jec awut opok. Dor kawey ow, pok mami dor batetam janim manimam, bare dor namke ara.

⁴Bare, e dor emceyas atakam asakamtiwmin. Inimas e dokerja aramat ipic e kerja afimisimcan, wun ow dor e acem atowomiwcemenes.’ Inim bi binip aceceremefen.

⁵Bap ara, e akerja aramat ipic, pok, ow atetamefen. E ow masirin, pok e aramat ipic asep botetam atakam aamsakamfesen. Bare, e pok manmok batiwtam ipic, e ow aporsipor ajatetotorefen. Aram e bap ajateef ipic jonow atowporefen. ‘Or ucim pok e dokerja aramat ipic aotetamcem?’ Inim aeefen.

⁶E ipic masirin, ‘Dor minyak blek awut seratus ajiwar aotetamcimin.’ Inim aeefen. E pok manmok batiw ipic masirin, ‘Bare. E bon surat jirew. Batewey. Oram bapwikapey, wunam, “blek lima puluh ajiwar,” e surat basarimeapomey.’ Inim aeefen.

⁷Ar masirin, wun ipicam jonow atowporefen. ‘Or ucim pok e dokerja aramat ipic aotetamcem?’ Inim aeefen. E ipic masirin, ‘Dor gandum karung seratus ajiwar aotetamcimin.’ Inim aeefen. E pok manmok batiwtam ipic masirin, ‘Bare. E bon surat jirew. Batewey, wunam “karung delapan puluh ajiwar,” e surat eapomey.’ Inim aeefen.

⁸E kerja aramat ipic e apok manmok batiwtam fasi ipic aemefas, atakam jen ajiefen. Ar masirin, ‘E ipic bi binip foro ara,’ inim aeefen. Bare, awames capinmias jak aserememames ow, e apok atakam aamsakamces, ar bi binip foro pwiciri. E sereas aman aemapmes ow nat, inimas aemces, aram bi binip foro opok pwiciri.

⁹Jakaperey. Awames capinmi pok, kawey ow mamtetamey. E ow masirin, ojowow aememcemes. Inimas e capok atatamkurumcokom, Allah, car e jiwne cem atowomiwceman.

¹⁰Ow pok kanim bwem, tarowat aememces, aram pok awut bwem, tarowat aememcemes.

¹¹Car ow awames capinmi pok manmok batiwtam, wunam ow fasi aememcokom, owam e pok anakat manmok batiwtam e caban ton botasimtitam opok aemceman.

¹²Wunam, car kawey pok manmok batiw, ow fasi ememcokom, ow e caropas car botasimtitam opok aemceman.

¹³Kerja bwemtam ipic, kerja aramat ipic jamnuk, inim kerja bwememtam asan opok. Ar wun ipic bifan afayomcema, wunam e wun ipic damos ajiomcema. Ar e wun ipic ajamkawicema, wunam e wun ipic pwicak aporcema. Car, Allah kerja bwemtamam, awames capinmi pok batewet bi binip awut baceceremam, e jamnuk takas cowkon bwemem asan opok.” Yesus inim aeefen.

¹⁴Bare, e Parisi ow, uang basinom ow arawen. Ar e Yesus atawef atakam jen ajifes, wunam uc e aramat ipic asayomfesen.

¹⁵Yesus nat, atakam e ow aotawefen. “Car ow tarowat cimin, asmat ow bipu aememcomokom. Allah nat, e cajak amanas amsom. Asmat ow, wun pok akat cowok apormes. Allah nat, e pok bifan afayomama.”

¹⁶“Ow, e Musa surat aeapomef Jirmec atakamam, e Allah atakam botaw ow surat atakamam, e Yohanes asitef jofay ajiwar acacapiomawiris. E jofay ewememawiru cowok ara, dor e Allah Pemerintah Atakam Akat acacapiomawiru. Ow takasam e Allah Pemerintah asan bafiw jec awutut awumes.

¹⁷A onam opam, a capinmiam, banios, bare susah kanim pwiciri ara. E nat, e Musa surat aeapomef Jirmec huruf kanimnakapam biwosom, bare susah awutnakut ara.”

¹⁸“Jipic e arem ajiwapomcow, wunam wun cowoc aotewetcow, aram jursumec ipic aememcema. Wunam jipic, wun ipic ajiwapomef cowoc aotewetcow, aram cen osom ipic aememcema.”

¹⁹“Bare. Jipic cowok pok awut ipic aememef. E ipic apakaian takas, bare harga awut pakaian ara. Aram join aatamfafayawiri, pok akatipic anawiri.

²⁰E ajimasappu, pok opok ipic juwas Lasarus aemamesawiri. E dam dosoam arke ara.

²¹E ipic, e pok awut ipic e anaeremtiwawiri amos memen, jak aseremapawiri. Juwuram e ipicpu aenawawiris, wunam e dam doso komen camic aeokopawiris.

²²Jofay ara, e pok opok ipic damir aafef. Malaikatam, e ipic, Abraham dampu atowotometfes. E pok awut ipicam damir aafef. Ow masirin, e ipic se awuapomfes.

²³E ipic e damir ow asan aemapef, ar dam asesak awutut ara. Ar manmok op apemtometemef. Ar e Abraham damasan opok aemapef aporef. Aram Lasarus, e Abrahampu aemapef aporef.

²⁴Atakamam afakaytawef. ‘Diwi. Abraham. Saw akat boworporcan. Dor a jismak komen aman, dam asesak awutnakut aemapmin. Inimas e Lasarus jirmec bajirimey. Ar e ban bi bwi basotcow, wunam e dokomen bafumnemporcan.’ Inim aeef.

²⁵E Abraham nat, atakam aotawef. ‘Ata. Tetakay emapawirim, or asan akatnakut aemawirim. E Lasarus nat, tetakey emapawiri, aram asan pwicak aemapawiri. Eras binip bacomopey. Wow nat, Lasarus jak akat aemapma. Or masirin, dam asesak aemapmem.

²⁶Wunam, e darasanam, e orasanam, e wasec, jof awutnakut awap. Ow bwemokorsakayjinaw asan opok. Arasan ow, e orasan, bwemjinawpor asan opok. Erasan owam, e darasan bwemjinawpor asan opok.’ Inim aeef.

²⁷E ipic masirin, ‘Diwi. Dor janim fak or aanimpormin. Or e Lasarus e doricipic cem batewosomey.

²⁸Dorewcewes lima ajiwar awapes. Lasarus atakam e dorewcewes baotawcow. Ar a dam asesak asan bwemenawfiwapasin.’ Inim aeef.

²⁹E Abraham nat, ‘E ow, e Musa aeapomef suratam, e Allah atakam botaw ow aeapomfes suratam, awompes. Ar e atakam jen bajices.’ Inim aeef.

³⁰E ipic masirin, ‘Diwi. Abraham. Inim arapok. Jipic cowok, a damir ow asan ewjisoscow, wunam e ow ameromcow, e ow dosa bak apayemcemes.’ Inim aeef.

³¹Abraham masirin, atakam e ipic aotawef. ‘Ar e Musa atakamam, e Allah atakam botaw ow atakamam, jen baji opok aemames. Damir ipicam aojaworsitcow, e ow, aratakam basicim opok aemcemes.’ Inim aeef.” Yesus inim atakam aotawefen.