Read Central Asmat LUKAS 17 Bible Online

LUKAS 17 - Central Asmat bible

LUKAS 17

¹Yesus masirin, atakam e amamkawi ow aotawefen. “Dosa bwem bajijimtawas aenawcemes araman. E nat, dosa bwem ajijimtawces ow, asan pwicaknakut aemapcemes.

²Ow, ek awut, e dosa bwem ajijimtawces ow afomak ajiktopomces, wunam ar e ow e jicupum bwi ajupumces, bare e bwi jupuces ow asan akat pwiciri aemapcemes. E nat, e dosa bwem bajijimtaw ow, awamces jiwi cowoknakap dosa bwem ajijimtawces, e ow asan pwicaknakut aemapcemes.

³Caram pimicima. E cajowow ipic dosa aemcow, e ipic jiman aafey. Wunam ar e dosa bak apayemcow, car e ipic e dosa aemefas, binip mamjiwosomey.

⁴E ipic, jofay cowok dosa tujuh ajiwar car aemcannew, wunam ar, bar tujuh ajiwaram, ‘Dor dosa or aemen,’ inim aecannew, bare car e dosa takas binip mamjiwosomey.” Yesus inim aeefen.

⁵E atakam botaw batewosom ow masirin, atakam e Tuhan aotawfesen. “Dar e ofakas jirey bwekurum, inim bi binip tetamcarowey.” Inim aefesen.

⁶E Tuhan masirin, “Sesawi eke bare kanimnakap ara. E nat, car e dofakas, inim kanimnakap jirey aecokomnew, caram atakam a os juwas ‘murbei’ botaw ara, ‘Basuwsitey. E jicowoc bwi jirjirapey.’ Inim atakam a os aotawcokom, bare a os caratakam ji aeceman.”

⁷“Ca wun awapokom ow, kerja bwemtam ipic aomomamokom openow. E kerja bwemtam ipic kebun capinmi ananasimtitamcannew, domba manmok atiwtamcannew, ar inim kerja asan ewenawcema. Ewenawcow ara, car, ‘Dey. Amos batakamemeney,’ inim aecomokom aranew?

⁸Bare, car inim atakam botaw opok. Ca nat, ‘Amos bajewtamcan. Pakaian bajimomey, wunam e amos pok e dobipu batatiwey. Dor amosam, bwiam, aankurumcey, or masirin asep aancemem.’ Inim aecomokom.

⁹Caram e kerja bwemtam ipic e cajirmec ji bwe aporcokom, car, ‘Terima kasih’ atakam a botaw opok aecomokom.

¹⁰Caram Allah kerja bwemtam, bare inim cowok ara. Car, e ajirmec ji aekurumcokom, caram inim atakam mamotawey. ‘Dar pwicak kerja bwemtam ow awamcom ara. Dar, Allah e jirmec ajirimforowasnakas aemfom.’ Inim mameey.” Yesus inim aeefen.

¹¹Barewen. Yesus, Yerusalempu ajarenef ara, ar e Samaria capinmiam, e Galilea capinmiam, e wowoc ajarenefen.

¹²Yesus, samat cowok e acemsan afiwemef ara, penyakit kusta ow sepuluh ajiwar, aramat ipic bi jamnuk aemamtewfesen. Aram damasan opok inim aememfesen.

¹³E ow masirin, atakam afakaytawfesen. “Yesus. Guru. Dar saw akat oworporcarowey.” Inim aefesen.

¹⁴Aramat ipic e ow aporef, wunam atakam aotawefen. “Car e Allah atakam mamtaw tugas ipicpu jisosey. Aramat ipic car baoworporcan.” Inim aeefen. E ow e bowsec aememfes masirin, dam akat aoememfesen.

¹⁵E wun ipic cowok masirin, e adam doso emcakukuamesef aporefen. Ar masirin, aofasiefen. Ar atakam awutnakut Allah asicimefen.

¹⁶Bare, ar Yesus bipu jine onok aneyotapefen. Aram, “Terima kasih” atakam, Yesus aotawefen. E ipic nat, Samaria ipic arawen.

¹⁷Yesusam atakam aotawefen. “Ow sepuluh ajiwar dam akat aoememeresnew? E wun ow sembilan ajiwar nat, ocenakaram?

¹⁸E wun ow Allah basicim bofasi opoknew? A jewey ipic cowok aranew?” Inim aeefen.

¹⁹Yesus masirin, atakam e ipic aotawefen. “Bare, basitey. Cema. Or asicimamenem. Inimas e odam doso akukuamestotorma.” Inim aeefen.

²⁰Jofay ara, e Parisi ow jonow Yesus atowporfesen. “E Allah Pemerintah ucim jofay enawcow? Inim aefesen. E aramat ipic masirin, Car, e Allah Pemerintah bwenaw, manmok bwemtiw asan opok.

²¹Owam atakam, ‘Bare, e Allah Pemerintah arasan ara,’ wunam, ‘E Allah Pemerintah erasan ara,’ ar inim atakam bwemotaw asan opok. Jakaperey. E Allah Pemerintah bare, cawowoc awap.” Inim aeefen.

²²Aramat ipic masirin, atakam e amamkawi ow, aotawefen. “Bare, asep jofay car e Asmat Anakat Ajaworemef Ipic bar cowoknakap car akac boemap, jak aserememcomokom. E nat, aramat ipic car akac bwemoemap asan opok.

²³Owam atakam car aotawceman, ‘Aramat ipic ewamec ara!’ wunam, ‘Aramat ipic awamec ara!’ inim aeceman. Ca nat, baysos arapok. Caram e ow mamkawi arapok.

²⁴Bare, e bwer aran ewparaycema, wunam piri aneyparaytepcema. E Asmat Anakat Ajaworemef Ipic inim umuton ajisemcema.

²⁵Aramat ipic nat, bajurusem awutut atakamemcema. E awanisitmes owam atakam aotawcemes, ‘E ipic pwicak,’ Inim aecemes.

²⁶E Asmat Anakat Ajaworemef Ipic ajiscow jofayas, bare Nuh e ametnak aemapawiri jofayas awcawor aemcema.

²⁷E ow, bare amosam, bwiam, anawiris. Aram cepes atatawiris. Oweram ajuwutawiris. Ar, e Nuh, e ci awut cem epcom ajiwef jofay ajiwar inimas aemawiris. E bwi awut masirin, aenawef. Aram e ow takas asokomef.

²⁸E Lot aemapawiri jofayas, bare inim cowok ara. E ow amosam, bwiam, anawiris. Aram pok ajitameratawiris. Aram pok akan atawapomawiris. Cemam aeapomawiris.

²⁹E nat, e Lot e kota Sodom bakan ajiosef jofay, Allah jismakam, amopnakut jirpeteyasam, atewnemef. E pok masirin, e ow takas asokomef.

³⁰E Asmat Anakat Ajaworemef Ipic ajiscow jofayam, bare inim cimin aemcemes.

³¹E jofay ara, e cem ko aemapces ow, e apok batakamjiwtew arapok. E kebun kerja aememces owam, e bakan ajiosces pok, asamanam baji arapok.

³²E Lot arem aemefas bi binip comomey.

³³Ow, bajorem jak aserememces, aram bajorem opokut aemcemes. E damir aafces ow nat, ajoremcemes.

³⁴Jakaperey. E iram ara, ow jamnuk, tepen cowok ton aamsescemes. Malaikat masirin, ow cowok atewcemes. E wun cowok masirin, bakan ajiemcemes.

³⁵Cepes jamnukam amos akac ajowcemes. Malaikat masirin, cowok atewcemes. E wun cowok masirin, bakan ajiemcemes. [

³⁶Jipic jamnukam kebun asan aememcemes. Malaikat masirin, cowok atewcemes. E wun cowok masirin, bakan ajiemcemes.]” Yesus inim aeefen.

³⁷E ow masirin, jonow Yesus atowporfesen. “Eras ocenak asan emcow?” Inim aefesen. Aramat ipic masirin, “E sok cīncin, e damir pok asan aakopsiawarma.” Inim aeefen.