Read Central Asmat LUKAS 18 Bible Online

LUKAS 18 - Central Asmat bible

LUKAS 18

¹Yesus masirin, baposomtew atakam, e ow aotawefen. E atakam, e ow janim Allah manimawar, wunam jak basakayem arapok, inim bajomtamas ara.

²E atawef atakam ara, “Ow asalah atakam basakamtiw ipic, kota cowok aemapefen. E ipic, Allah omar opok ipic arawen. Aram asmat ow omar opok ipic arawen.

³E kotaam fwisma cowoc aemapefen. E cowok e aramat ipic aenawoma aeefen. Aram atakam aotawa aeefen. ‘Jipic cowokcin aamoworomamom. Or e perkara atakam basakamtiwey.’ Inim aeefen.

⁴Bar arke e salah atakam basakamtiw ipic, e atakam basakamtiw pwicaken. Asep ara masirin, ar bi binip aceceremefen. ‘Dor Allah omar opok. Doram asmat ow omar opok.

⁵E nat, a fwisma cowoc ajurusuma aeman. Inimas ara, dor e aperkara atakam asakamtiwmin. Ar oromin oromin bwenaw, wunam dor namjipi baperemtiwasin.’ Inim bi binip aceceremefen.” Yesus inim aeefen.

⁶Bare, e Tuhan atakam aootawefen. “Ca nat, e salah atakam basakamtiw fasi ipic aratakam jen pajiey.

⁷E Allah aereremtawef ow, jokam iramam, janim fak, e Allah aanimcemes. Allaham, ‘E ow, ow tarowat ara,’ inim atakam aotawcemar araman. Aram e ow asan akat bom, bafafay opok araman.

⁸Jakaperey. Allah, e ow, ow tarowat atakam asarimotawcema. E nat, e Asmat Anakat Ajaworemef Ipic, awames capinmi aofasicow, ar abasicim ow aporcemarnew?” Yesus inim aeefen.

⁹Barewen. Yesus wun baposomtew atakam wun ow aotawefen. E ow ara, “Dar ow tarowat araman,” inim bi binip aceceremfesen. Inimas e ow wun ow bifan afayomfesen.

¹⁰E baposomtew atakam ara: “Jipic jamnuk, janim Allah manim, e Allah cem afiwfesen. E wun ipic Parisi ipic arawen. E wun ipic masirin, pemerintah uang batawanimtam kerja ipic arawen.

¹¹E Parisi ipic emtow asitef, wunam e ajak aman janim Allah aanimefen. ‘Allah. Dor e wun ow cimin arapok. Doram ewamec pemerintah uang batawanimtam kerja ipic cimin arapok. Inimas dor terima kasih atakam or aotawmin. E wun ow bare, osom ow ara. Aram ow fasi ara. Aram cen cemen osom ow ara.

¹²Do nat, e mingguin mingguin, bar jamnuk amos pok amasea ajimop. Doram pok sepuluh ajiwar atewa ajimop, e wun ok cowok Allah atetama ajimop.’ Inim aeefen.

¹³E pemerintah uang batawanimtam kerja ipic nat, damasan opok aememefen. Aram e manmok op bapemtometem opok cowok arawen. Aram jak pwicaknakut aememefen. Aram atakam aotawefen. ‘Allah. Dor dosa ipic awamcey ara. Saw akat oworporcan!’ Inim aeefen.

¹⁴Jakaperey. Allah e ipic jipic tarowat ara, inim atakam atawefen. E ipic masirin, cem ajisosefen. Allah nat, e wun ipic, jipic tarowat atakam bataw opoken. Bare, Allah e arma batawsicim ow takas namke akamemcema. E nat, ar e arma batawsicim opok ow asicimcema.” Yesus inim aeefen.

¹⁵Wun ow e ajiwi kanim Yesuspu atowocenfesen. Ar Yesus e jiwi ban bosompor akat arawen. E Yesus mamkawi ow inimas aporfes, wunam acuw aatfesen.

¹⁶Yesus nat, e jiwi ajateefen. “A jiwi, e dodampu inim baenawces. Acuw bat arapok. A jiwi inim awcawor ow, e Allah Pemerintah Asan aemapcemes.

¹⁷Atakamnak ara, e jiwi inim awcawor memem opok ow, e Allah Pemerintah Asan bwemfiw asan opok.” Yesus inim aeefen.

¹⁸Barewen. Kepala ipic cowokam jonow Yesus atowporefen. “Guru akatenem. Dor jiwnenak batamemawar akat ara. Dor inimas ucim pok emcey?” Inim aeefen.

¹⁹Yesus masirin, “Dor ow akat atakam atawmenem nat, ucimaram? Ow akat, bare Allah cowok ara. Wun ow opok.

²⁰Bare, oram Allah jirmec omsom. ‘Cen osom ecem. Daw catiwcem. Osom ecem. Suw atakam atawcem. Oricipicam, orosowocam mamsicimawarey.’ Allah inim jirmec ajirimama.” Yesus inim aeefen.

²¹E ipic masirin, “Bare, jiwi ewememof, dor eras takas aeawiru.” Inim aeefen.

²²Yesus inim atakam jen ajief ara, ar atakam aramat ipic aotawefen. “Or pok cowoknakap bwem opok aemem. E opok takas uang mamuwumtatey. E uang, e pok opok ow sey mamseyamtamey. Inimas aemcem, asep jofay or e onam op capinmi, pok anakat atowomatcemem. Oram mamofasiey. Do jamkawican.” Inim aeefen.

²³E ipic nat, opok awutut aomomef. Inimas ar inim atakam jen ajief, ar jak pwicaknakut aememefen.

²⁴Yesusam e ipic jak pwicak aporefen. Ar masirin, atakam aotawefen. “Pok awut epcom ow, e Allah Pemerintah Asan bafiw, bare susah awutnakut ara.

²⁵Unta, jarum jof bafiw, bare susah kanim pwiciri ara. Pok awut epcom ow nat, e Allah Pemerintah Asan bafiw, bare susah awutnakut ara.” Inim aeefen.

²⁶E inim atakam jen ajifes ow masirin, atakam aotawfesen. “Inimas ara, e ajoremces ow, ucim owaram?” Inim aefesen.

²⁷E Yesus masirin, “E asmat ow bwemem asan opokas, bare Allah eras aemcemar araman.” Inim aeefen.

²⁸Petrus masirin, “Bare, dar e daras takas bakan ajifom, wunam ajamkawifenom.” Inim aeefen.

²⁹Yesus masirin, atakam e ow aotawefen. “Atakamnak ara, wun ow e acemnew, e acepesnew, e arewcewesnew, e arisarownew, bakan ajifes. Ar eras, e Allah Pemerintah kerja bwemtam, bakan ajifes.

³⁰E bakan ajifesas, bare kanim ara. E ow nat, awames capinmi ememames, bare eras awutnakut aotowopcemes. Wunam e aenawcow jofay, jiwnenak aatamemawarcemes.” Inim aeefen.

³¹Barewen. Yesus e amamkawi ow dua belas ajiwar ajateef, wunam atakam e ow aotawefen. “Jakaperey. Dar Yerusalem ajisosmom. Ametnak ara, e Allah atakam botaw ow, e Asmat Anakat Ajaworemef Ipic aemcowas, surat emcaeapomfes. Bare, e Yerusalem ara, ow eras takas, e surat jipu aemcemes.

³²Ow, aramat ipic, e Yahudi opok samat ow aotasimemtamcemes. E ow masirin, aramat ipic uc aomoccemes. Aram aramat ipic bifan afaycemes. Aram bese e aramat ipic dampu ajicemes.

³³Aram aramat ipic omop aafcemes, wunam acatiwcemes. Bar mamincop ara masirin, aramat ipic aojaworsitcema.” Inim aeefen.

³⁴E ow nat, inim atakam biyof bacomom opok arawen. E atakam umuton opok arawen. Bare, ar e Yesus atawef atakam amsom opoken.

³⁵Barewen. Yesus kota Yeriko sotop inim ajarsisiemef ara, manmok kapi ipic e bokotpuak aemapefen. Ar uang janim manim arawen.

³⁶E ipic, e ow arke erasan bokorfe jen ajief, wunam jonow atowporefen. “A ucimasam?” Inim aeefen.

³⁷Ow masirin, atakam, e ipic aotawfesen. “E Nasaret ipic juwas Yesus aokorfema.” Inim aefesen.

³⁸E ipic masirin, “Yesus! Daud urpis! Saw akat oworporcan!” Inim aeefen.

³⁹E bap ajarfes ow masirin, e ipic jiman aaffesen. “Jokona!” Inim aefesen. E ipic nat, atakam awutut aotawefen. “Daud urpis! Saw akat oworporcan!” Inim aeefen.

⁴⁰Yesus masirin, akutemef, wunam ow e ipic e abipu batowocen jirmec ajirimefen. E ipic sotop aenawef masirin, Yesus jonow e ipic atowporefen.

⁴¹“Dor or ucim pok emtamcen?” Inim aeefen. E ipic masirin, “Tuhan. E domanmok bateremtamcan.” Inim aeefen.

⁴²Yesus masirin, atakam e ipic aotawefen. “E omanmok batereycow. Or asicimamenem. Inimas e omanmok atereyemamem.” Inim aeefen.

⁴³Bare, e ipic manmok asarimtereyefen. Ar masirin, Yesus akac ajarfesen. Aram Allah asicimefen. E ow takasam eras aporfes, aram Allah asicimfesen.