Read Central Asmat LUKAS 19 Bible Online

LUKAS 19 - Central Asmat bible

LUKAS 19

¹Barewen. Yesus kota Yeriko afiwefen. Ar e kota capinmi takan batiwtakay aememefen.

²Erasan ara, jipic juwas Sakeus aemapefen. Ar pemerintah uang batawanimtam kerja ow akepala ipic arawen. Aram pok awut ipic arawen.

³Ar Yesus ca ipicamnew bapor, emporef opoken. Ar ow jipinnakap arawen.

⁴Inimas ara, ar bap je kukuefen. Ar, Yesus erasan aofecow bi bapor, os op aaptometefen.

⁵Yesusam erasan ameremef, wunam manmok op apemtometemefen. Aram atakam e ipic aotawefen. “Sakeus. Basarimkorneyey. Dor wow e ocem jaki bajit aemin ara.” Inim aeefen.

⁶Bare, aramat ipic asarimkorneyefen. Aram jak akat aememef, wunam ar Yesus e acem atowomiwefen.

⁷Inimas aporfes ow takas masirin, atakam atawfesen. “E Yesus dosa ipic cem jaki ajitma.” Inim aefesen.

⁸E Sakeus, bare asitef, wunam atakam Tuhan aotawefen. “Tuhan. Jakaperey. Dor e dowun pok arke, e pok opok ow batetam aemin. Wunam, dor kawey pok osom tewetofnew, bare dor inim pok empat ajiwar e ow atetamcimin.” Inim aeefen.

⁹Yesus masirin, atakam aramat ipic aotawefen. “Or Abraham urpis ara. Inimas dor wow a cem ow ajortewmin.

¹⁰Bare, e Asmat Anakat Ajaworemef Ipic e apakapiosmes ow, bapowporam, bajortewam, aenawef.” Inim aeefen.

¹¹E ow inim atakam jen ajifesen. E ow abi binip ara, “E Allah Pemerintah asarimenawcema.” Inim bi binip aceceremfesen. Yesusam e ow abi binip aporefen. Aram Yerusalem sotop aporefen. Inimas ar baposomtew atakam aotawefen.

¹²“Kepala awut urpis ipic, damasan opok capinmi baysos ememefen. E damasan opok capinmi ow, e ipic, raja ipic batewemen. E ipic atakam, ‘Dor raja ipic ememcey, aofasicimin.’ Inim aeefen.

¹³Aramat ipicam akerja bwemtam ow sepuluh ajiwar ajateefen. Aram uang juwas mina cowok, aporsipor atetamefen. ‘Car a uang pok mamjititey. E pok masirin mamuwumtawa inim mamjiawarey— e aofasicey jofay ajiwara.’ Inim aeefen. Ar masirin, e damasan opok capinmi ajisosefen.

¹⁴E arop capinmi ow nat, e ipic bifan afayomfesen. Ar masirin, ow e damasan opok capinmi atewosomfesen. ‘Caram atakam e capinmi ow mamotawey. Dar e ipic jirmec da bajirim pwicak.’ Inim mameey. Inim aefesen.

¹⁵E ipic nat, raja ipic aememefen. Ar masirin, arop capinmi aofasiefen. Aram jirmec ajirimefen. ‘E uang tetamof kerja bwemtam ow bayte.’ Inim aeefen. Aram e uang akakayimfesnew, bakakayim opoknew, inimas baporen.

¹⁶Bare, e bap kerja bwemtam ipic e aramat ipic bipu aenawomefen. Aram atakam aotawefen. ‘Tuan. E tetamfenem uang mina cowok, bare sepuluh ajiwar aokakayimof.’ Inim aeefen.

¹⁷E aramat ipic masirin, atakam aotawefen. ‘Or kerja bwemtam ipic akat awamcem ara. E aemfemas akatipic. Or pok kanim, tarowat cowok aomomfem. Inimas or kota sepuluh ajiwar aomomcemem.’ Inim aeefen.

¹⁸E asep kerja bwemtam ipicam aenawefen. ‘Tuan. E tetamfenem uang mina cowok, bare lima ajiwar aokakayimof.’ Inim aeefen.

¹⁹E aramat ipic masirin, ‘Bare. Or kota lima ajiwar aomomcemem.’ Inim aeefen.

²⁰Bare, e wun kerja bwemtam ipicam aenawefen. ‘Tuan. E tetamfin uang mina cowok jirew. Dor e uang sapu tangan aman desen tewapomof.

²¹Or atakam fak ipic aporof. Or, e o batewapom opok pok, atewetcemem. Oram, e o batewapom opok pok akan anakatas, atewencemem. Inimas dor or omar aeof.’ Inim aeefen.

²²Aramat ipic masirin, atakam e kerja bwemtam ipic aotawefen. ‘Or kerja bwemtam ipic pwicak awamcem ara. Or dor atakam fak ipic apormem ara. Dor e do batewapom opok pok atewetcimin apormem ara. Doram e do batewapom opok pok akan anakatas atewencimin apormem ara. Inimas ara, dor e osalah, e atawmem atakam jipu, atakam asakamtiwmin.

²³E uang manmok batiw ow, kawey ow uang ateweta aecemes. Asep ara masirin, inim uangam, bokayim uangam, e ow aofasimtama aecemes. O nat, e doruang inim ow batetam opok emfem ucimaram? Or inimas em ayaw, aofasienawof ara, dor e tetamfin uangam, e bokayim uangam aotewof.’ Inim aeefen.

²⁴Aramat ipic masirin, atakam erasan aememfes ow aotawefen. ‘E awomec uang mina cowok botew, wunam e uang, e uang mina sepuluh ajiwar awomec ipic tetamey.’ Inim aeefen.

²⁵E ow masirin, ‘Tuan. E ipic, bare uang mina sepuluh ajiwar tayir!’ Inim aefesen.

²⁶Aramat ipic masirin, ‘Jakaperey. Pok epcom ow, wun pok aotewetcemes. E nat, ow, e pok opok ow apoknakas aotewcemes.

²⁷E do bifan ow, dor jirmec a bajirim pwicaken. E ow arasan batowotnaw, wunam e dobipu bacatiwtotorey.’ ” Inim aeefen. Yesus inim atakam aotawefen.

²⁸Barewen. Yesus inim atakam atawkurumef masirin, e Yerusalem bap ajarefen.

²⁹Aramat ipic, kota Betfageam, kota Betaniaam, sotop asisienawefen. E kota sikon asan juwas Saitun aemamesefen. Yesusam jirmec e amamkawi ipic jamnuk ajirimefen.

³⁰“Car e bap ewames cemsanpu bajarey. E cemsan ajaremcokom, ay keledai manmok apematamcomokom. E keledai cum pok epcom ara. Wow ajiwar, ow e keledai bak ton batometapporji opok. Caram e cum pok mamsurumey, wunam e keledai arasan mamtowotnawey.

³¹Owam jonow car atowporcannew, ‘Car e keledai cumpok ucimas asurumamokom?’ inim aecan, car masirin, ‘Tuhan e keledai bak ton bajaren,’ inim mameey.” Yesus inim aeefen.

³²Bare, e jirmec ajirimef ipic jamnuk, eras e Yesus atawef atakam jipu cowok aporfesen.

³³Aram e ay keledai cum pok basurum ememfes ara, e keledai aramat ow, atakam aotawfesen. “Car e ay keledai cum pok ucimas asurumamokom.” Inim aefesen.

³⁴Ar masirin, “Tuhan e keledai bak ton bajaren.” Inim aefesen.

³⁵Bare, ar e keledai Yesuspu atowocenfesen. Aram e abaju mamincop e keledai bak ton atometmuwtiwfesen. Ar masirin, Yesus e keledai bak ton ban asomtomettewapomfesen.

³⁶Yesus e keledai bak ton acowojaref ara, ow e apakaian e bokotpu amuwtiwa aefesen.

³⁷Bare, e Yesus, e Yerusalem sotop ajarefen. E ajaref asan, ow e sikon Saitun ewneycemes asan arawen. Erasan ara, e amamkawi ow takas jak akat aememfesen. Aram atakam awutnakut Allah asicimfesen. Ar e Yesus aemawiri junum bweas aporfesen.

³⁸“Tuhan, asan akat, e atewenamamar ipic baomcow! Ar raja ipic ara! E onam op capinmi, bare asan akat ara! Daram e opnakut Allah asicimamom.” Inim aefesen.

³⁹E ow arke aman, wun ow Parisi ow arawen. E wun Parisi owam atakam aramat ipic aotawfesen. “Guru. E omamkawi ow, jiman afey.” Inim aefesen.

⁴⁰Aramat ipic masirin, “Jakaperey. Awamces ow jokon ajiemames ayaw, bare awamses ek atakam afakaytawcemes araman.” Inim aeefen.

⁴¹Barewen. Yesus, e Yerusalem sotop ajarefen. Ar e kota aporef ara, ar e kota bwec abwecefen.

⁴²Aram atakam aotawefen. “Allah asan akat car batetam akat arawen. Car wow eras camsom ayaw, bare asan akatipic aemaporokom. Ca nat, eras bwempor asan opok.

⁴³Car Allah e cabajortew jofay camsom opok ara. Inimas asep jofay, e cajewew ow, a kota fumi, capinmi op atawanimapomcemes. Aram car fumi aamwicirimomceman. Aram cīram e asanin asanin asiomceman. E cem os acajimirtiwceman. Aram a cacem ajumkurumtiwcemes. E cem os cowoknakapam boeremem opok aemcemes.” Inim aeefen.

⁴⁴

⁴⁵Barewen. Yesus, Allah cem afiwemefen. Ar masirin, e pok juw buwumamtaw ow aotewerisimefen.

⁴⁶Aram atakam e ow aotawefen. “E Alkitab atakam ara, ‘E docem, janim do manim cem aemamescema. Ca nat, a cem, osom ow barewsiap asan aemapomfokom.’ Inim aema.” Yesus inim aeefen.

⁴⁷Barewen. Yesus e join atamfafayef, e Allah cem aman, atakam amememtamefen. E Allah atakam mamtaw tugas ow awutam, e Allah Jirmec mamememtam owam, e kepala owam, aramat ipic bacatiw aemporfesen.

⁴⁸E nat, ar aramat ipic bwemcatiw asan opoken. E mami ow takas, aramat ipic atakam jen baji akat cowok aporfesen. Inimas e wun ow, aramat ipic bwemcatiw asan opoken.