Read Central Asmat LUKAS 20 Bible Online

LUKAS 20 - Central Asmat bible

LUKAS 20

¹Barewen. Jofay ara, Yesus, Allah cem aman, ow, atakam amememtamefen. Aram e Atakam Akat e ow aotawef ara, e Allah atakam mamtaw tugas ow awutam, e Allah Jirmec mamememtam owam, e Yahudi ownucur owam, erasan aenawfesen.

²Aram atakam aramat ipic aotawfesen. “E aemamemas nat, jirmec ca jirimfan? Atakam botawcarowey.” Inim aefesen.

³Aramat ipic masirin, atakam e ow aotawefen. “Doram jonow ca botowpormin. Caram atakam botawcan.

⁴E Yohanes bwi abwima aeefas jirmec ca jirimef? Allah aranew? Asmat ow aranew?” Inim aeefen.

⁵E ow masirin, eras aramaman atakam aamtawfesen. “Dar atakam aotawcom, ‘Allah e Yohanes jirmec ajirimef,’ inim aecom, aramat ipic masirin, ‘Car e ipic basicim opok nat, ucimaram?’ inim aecemarow.

⁶Dar masirin, ‘Asmat ipic e Yohanes jirmec ajirimef,’ inim aecom, awamces ow takas, ek e dadampu ajimirsamcemarowos. A ow abi binip ara, ‘E Yohanes, Allah atakam botaw ipic ara.’ Inim bi binip aceceremames.” Inim aefes.

⁷Inimas ara, e ow, e Yesus atep ajitfesen. “E Yohanes bwi abwimefas, jirmec ajirimef camnew? Daram namsom opok.” Inim aefesen.

⁸E Yesus masirin, “Bare, doram e aemaminas fakas, atakam car botaw opok.” Inim aeefen.

⁹Aramat ipic masirin, inim baposomtew atakam, e ow aotawefen. “Jipic cowok, anggur kebun atawapomefen. Aram e kebun, kebun kerja bwemtam ow aotasimtitamefen. ‘Car e doranggur kebun kerja aemtamcenokom, dor e wun anggur eke car atatamcimin. E wun masirin, doras ara.’ Inim atayi aeefen. Ar masirin, wun jo capinmi tarey ajisosawirien.

¹⁰E anggur eke bakokomtaw bwiam aenawefen. E kebun aramat ipic masirin, wun kerja bwemtam ipic, e kebun kerja bwemtam owpu atewosomefen. Ar e ipic e aranggur eke janim manim atewosomefen. E ow nat, e ipic omop aaffesen. Aram e ipic desen kus afasimenemfesen.

¹¹E kebun aramat ipic masirin, wun kerja bwemtam ipic atewosomefen. E kebun kerja bwemtam ow masirin, e ipicam omop aaffesen. Aram pwicakas e ipic aemfes, wunam desen kus aofasimenemfesen.

¹²E kebun aramat ipic masirin, wun kerja bwemtam ipicam atewosomefen. E kebun kerja bwemtam ow masirin, e ipic doso atamfes, wunam e kebun aotpepemisimfesen.

¹³E kebun aramat ipic masirin, ‘Dor ucimas emcey? Dor e damos ajiomamin dotiw, atewosomamin. Bare, e ow e dotiw bwemumiris asan opok.’ Inim aeefen.

¹⁴E kebun kerja bwemtam ow nat, e atiw aporfesen. Aram atakam aamtawfesen. ‘Ewamec ipic, a kebun aramat ipic pok atowomatcema. Dey. E ipic bacatiwmoc. Inimas e aricipic pok takas darma boportowom!’ Inim aefesen.

¹⁵Bare, ar e ipic, e kebun aotpepemisimfes, wunam acatiwfesen. E kebun aramat ipic nat, e ow, ucim pok emcow?

¹⁶Aram erasan aencema, wunam e kebun kerja bwemtam ow acatiwcema. Aram e kebun, wun kerja bwemtam ow aootasimtitamcema.” Yesus inim aeefen. E atakam jen ajifes ow masirin, “Ba! Inim arapok!” Inim aefesen.

¹⁷Yesus masirin, manmok e ow atiwefen. Aram atakam aotawefen. “E Alkitab atakam ara: Cem bweapom ow, e ek cowok pwicak aporfes, wunam e ek aeremtiwfes. E ek nat, cem ek penting awutnakut aemamesef. Inim aema. E ayat nat, ucimasaram?

¹⁸Bare, e ek ton aneyjuamesces ow, ananasiamescemes. Wunam e ek, ow aneykamimopcow, ar e ow apetamtiwcema.” Yesus inim aeefen.

¹⁹Yesus, e baposomtew atakam aotawef ara, ar e Allah Jirmec mamememtam owam, e Allah atakam mamtaw tugas kepala owam, e aemawirisas, inim atakam aotawef arawen. E owam inimas aporfesen. Inimas ar e jofay cowok e Yesus ban bakimom aemporfesen. E nat, e ow, e wun ow arke omar aefesen.

²⁰Inimas ara, ar Yesus manmok atiwfesen. Aram pir bwe ow, aramat ipicpu atewosomfesen. E ow, ow tarowat cimin aememfesen. E nat, e Yesus, salah atakam aotawcownew, ar aramat ipic, e gubernur botasimemtam aememfesen. Gubernur, bare e capinmi ow jirmec ipic ara.

²¹E pir bwe ow masirin, atakam, Yesus aotawfesen. “Guru. E aotawcemem atakamam, e amememtamcemem atakamam, atakamnak apormom ara. Oram, ‘Wun ow akat, wun ow pwicak,’ baji opok. E nat, or Allah bokotpu atakam, atakamnak amememtamcemem.

²²Da nat, e Kaisar jirmec ajirimforow uang ar atetamcom, dar e Allah Jirmec bopow open?” Inim aefesen.

²³Yesus nat, e atakam suw atakam aporefen. Ar masirin, atakam e ow aotawefen.

²⁴“Car uang dinar cowok do poromcan. A uang awap gambar ca biam? Awap asuk wowam ca juwasam?” Inim aeefen. E ow masirin, “A Kaisar bi ara. Aram Kaisar juwas ara.” Inim aefesen.

²⁵Aramat ipic masirin, atakam e ow aotawefen. “Bare, car Kaisar pok, Kaisar tetamey. Caram Allah pok, Allah tetamey.” Inim aeefen.

²⁶Bare, e ow, Yesus e ow arke bipu, salah atakam bwemotaw asan opoken. Ar Yesus e atep ajitefas junum aefesen. Aram jokon cowok ajiemfesen.

²⁷Barewen. Wun Saduki owam, Yesus ameromfesen. Saduki ow abi binip ara, “Damir aaffes ow bojaworsit opok ara.” Inim bi binip aceceremames. Aram aramat ipic jonow atowporfesen.

²⁸“Guru. Musa inim jirmec tulis aeapomtamforow. ‘Petew ipic jiwi opok damir aafcow, arewec e damir aafef ipic arem baotewetcow. Ar masirin, jiwi e arepwec bafimtamcow.’ Musa inim aeefen.

²⁹Bare, jipic cowok ower jiwi tujuh ajiwar arawen. E betiw ipic cepes atewetefen. Aram jiwi bafimat opok damir aafefen.

³⁰E abak ipic masirin, e cowoc aotewetefen. Aram jiwi bafimat opok damir aoafefen.

³¹E wun aykun ipicam inimas cowok aoemefen. Wunam e ow tujuh ajiwar, e cowoc ateweta aefesen. Aram takas jiwi bafimat opok damir aafa aefesen.

³²Asep ara masirin, e cowocam damir aafefen.

³³Bare, e ow tujuh ajiwar e cowoc ateweta aefesen. Inimas ara, e damir ow aojaworsitces jofay, e cowoc ca ipic arem aememcow?” Inim aefesen.

³⁴Yesus masirin, atakam e ow aotawefen. “Awames capinmi awapes ow, cepes atewetmes. Cepesam ower ajuwutmes.

³⁵Allah e wun ow, ow tarowat aporcema. E ow damir aafces, asep jofay aram aojaworsitcemes. Aram e onam op capinmi aemapcemes. Erasan ara, ar cepes botewet opok aemcemes. Cepesam ower bojuwut opok aemcemes.

³⁶E ow, malaikat inim awcawor aememcemes. Inimas ar damir boemaf asan opok. Allah e ow aojaworomsumutumcema. Inimas ar Allah atiperes aememcemes.

³⁷Musaam e damir ow aojaworsitcesas, atakam aotawef. E fa epcom os kari atakam ayat ara, Musa, inim atakam aotawefen. ‘Tuhan e Abrahamam, e Ishakam, e Yakubam, arAllah ara.’ Inim aeefen.

³⁸Bare, Allah damir ow arAllah opok. Ar tetakay ow arAllah ara. Aramat ipicam ow takas tetakay aporma.” Yesus inim aeefen.

³⁹E wun Allah Jirmec mamememtam ow, jonow e Yesus botowpor, omar aefesen. Inimas ar atakam aotawfesen. “Guru, e atawmem atakam bare, akat ara.” Inim aefesen.

⁴⁰

⁴¹Yesus nat, jonow e ow atowporefen. “Ow atakam atawmes, ‘E Allah Aeremtewef Ipic, Daud urpis ipic ara,’ inim aemes. E ow nat, inim atakam botaw ucimaram?

⁴²Daud aramat ipic, e Kitab Masmur inim tulis aeef: ‘E Tuhan atakam, e doTuhan aotawef: “Or e doban bo jamam emapey—

⁴³dor e ojewew ow akumimosomkurumcey jofay ajiwara.” Tuhan inim atakam aotawef.’ Daud inim tulis aeef.

⁴⁴Bare, Daud e Allah Aeremtewef Ipic, atakam atawef, ‘Ar doTuhan ara.’ Inim aeef. Inimas ara, e Allah Aeremtewef Ipic, Daud urpis ipic aememef nat, ucimaram?” Yesus inim aeefen.

⁴⁵Yesus atakam e amamkawi ow aotawefen. Erasan aememfes owam e atakam jen ajifesen.

⁴⁶“Car e Allah Jirmec mamememtam ow pimicima. E ow baju jirow bajimom, wunam bacowojar jak aserememames. E pasar asan ara, aram ow ‘selamat’ a baji jak aserememames. Sembahyang cem amanam, ar e bap ow asan bemap jak aserememames. Pokbwiam ara, ar e bap ow asan bemap jak aserememames.

⁴⁷Aram tot e fwisma cepes aotcemes, wunam apok takas osom tatcemes. Janim Allah aanimces, aram janim jirownakut aanimcemes. E nat, er bweyofas cowok ara. Bare, Allah e ow, siksa awutut aemcema.” Yesus inim aeefen.