Read Central Asmat LUKAS 21 Bible Online

LUKAS 21 - Central Asmat bible

LUKAS 21

¹Barewen. Yesus manmok apepemefen. Ar pok awut ow, uang derma e Allah cem derma asan atewapomtotorfes aporefen.

²Aram pok opok fwisma cowoc uang sen kanim jamnuk atewapomef aporefen.

³Aramat ipic masirin, atakam aotawefen. “Atakamnak ara, e ow arke uang awut ara. Aram e awun uang e derma asan atewapomtotormes. Awamec cowoc nat, pok opok ara. Aram e apok baytin uang takasam e derma asan atewapomama. Aram wun uang opok cowok. Inimas ara, awamec cowoc uang awut inim e asan atewapomama. E wun ow takas, uang kanim inim atewapomtotormes.” Inim aeefen.

⁵Wun owam, e Allah cem atakam atawfesen. Ar e cem ek akatipic atakam atawfesen. Ar e cem cosow pokam atakam atawfesen. Ametnak ara, ow e cem cosow pok, Allah basicimas, inim atetamefen. Yesus masirin, atakam aotawefen.

⁶“E apormokomas, bare asep jofay a cem ek amanapor tonapor memames opok cowok aemcemes. Jewew ow nat, e ek takas ajumnemkurumcemes.” Inim aeefen.

⁷E ow masirin, jonow atowporfesen. “Guru. Eras nat, ucim jofay emcow? E jofay sotop enamcow, Allah ucim junum bweas aporomtamcow?” Inim aefesen.

⁸Aramat ipic masirin, “Caram pimicima. Ow tot ca botasin. Ow arke aenawcemes, wunam ‘E Allah Aeremtewef Ipic, bare dor ara,’ inim aetotorcemes. Wunam, ‘Aramat ipic bofasi jofay emcaenawor.’ Inim aecemes.

⁹Car, ow jewew bamoam, ow pemerintah atakam bopowam, inim atakam jen ajicokom, bare omar arapok. Eras bap aemcemes. E asepnak jofay nat, basarimenaw opok aemcema.” Yesus inim aeefen.

¹⁰Aramat ipicam atakam e ow aootawefen. “Wun samat arke jewew e wun samat arke aamoa aecemes. Wun pemerintah arke jewew e wun pemerintah arke aamoa aecemes.

¹¹Ajowam awutut arke asisimtawa aecema. Asan arkeam ow amosto damir aafa aecemes. Ateram asan arke aenawa aecema. Omar bweas awututam, junum bweas awututam, onam op ewneycemes.

¹²Eras takas nat, asep aemcemes. Bap ara, ow car do mamkawi ow aporceman. Inimas ar ban car akimomceman. Ar car ajurusumceman. Aram car e sembahyang cem atakam mamsakam ow aotasimemceman. Aram penjara cem aman ajiwtewapomceman. Aram car raja ow bipuam, gubernur ow bipuam ajijimtawceman.

¹³Inimas ara nat, car e Atakam Akat e ow botaw, asan akat aememcomokom.

¹⁴Caram inim atakam basakamtiwtotorey. ‘Dar e ow atep ajitcomas, bi binip arke batakamcecerem opok aecomom.’ Inim atakam basakamtiwtotorey.

¹⁵Doram bi binip umuton car atetamcimin. Car masirin, atakam akat aotawcomokom. Inimas e casalah atakam aotawces ow, caratakam bwemopow asan opok aemcemes. Aram atep car bwemjit asan opok aemcemes.

¹⁶Carisepesam, carepcewesam, carewcewesam, carowcamwe owam, cajowowam, car e jokmen ow aotasimemtamceman. Aram e ca wun ow acatiwceman.

¹⁷Ow car do mamkawi aporceman. Inimas e ow takas bifan car afayomceman. E nat, car asan akat aemapcomokom.

¹⁸E cakus fin cowoknakapam basuos opok aemcema.

¹⁹Car bakorem opok aemcokom, ajoremcomokom.”

²⁰“Car jewew tentara e Yerusalem fumi bajorom aporcokom, car e kota daniwis memames jofay sotopnakap aporcomokom.

²¹E jofay ara, e Yudea capinmi aemapmes ow, e sikon asanpu omar bajisosces. E kota Yerusalem aemapmes owam bajisosces. E samatin samatin cemsan aemapmes owam, e kota baysos arapok.

²²E jofay, bare Allah e Israel ow siksa bwem jofay ara. Er e Alkitab atakam takas jipuas ara.

²³E jofay, e jak epcom cepesam, e jiwi aw anamces cepesam, asan pwicaknakut aememcemes. E capinmi ow ajurusemcemes. Allah, bare e samat siksa aemcema.

²⁴E wun ow, owec parang ben damir aafcemes. Jewew ow e wun ow taw aatcemes. Ar masirin, e ow e samatin samatin takas acapinmi atowomoscemes. E Yahudi opok owam e Yerusalem daniwis aamtiwkurumcemes— ar e capinmi momom akoremces jofay ajiwar ara.”

²⁵“Jopok junum bweasam, pir junum bweasam, bayar junum bweasam, ajiscemes. Awames capinmi ara, e samatin samatin jak pwicak aememcemes. Aram bi binip arke aceceremcemes. Ar e jicupum wa awutut ajucowas jen ajicemes, wunam omar aecemes.

²⁶Allaham e onam op sereas akokoromcema. Ow masirin, awames capinmi ajurusemcowas, manmok afecemes. Inimas aram omar awutnakut aemcemes, wunam mankes aemamescemes.

²⁷Ow masirin, e Asmat Anakat Ajaworemef Ipic, onam op jak aman aneycow aporcemes. Aramat ipic, faknakutas epcomam, akatnakutas epcomam, aneyomcema.

²⁸Eras takas asuapces, caram mamsitey. Caram bi opa. Allah ca bajortew jofay, bare sotopnakap ara.” Yesus inim aeefen.

²⁹Aramat ipic masirin, baposomtew atakam e ow aotawefen. “Arā osam, e wun os takasam, bi binip baceceremey.

³⁰Car os e jinifas bafis aporcokom, er jusuw bwi sotop aporcomokom.

³¹Inimasam ara, car e atakam atawminas aenawcow aporcokom, car e Allah Pemerintah aenawcow jofay sotop aporcomokom.

³²Atakamnak ara, a capinmi awamces ow, damir baf opok ara, e atakam atawminas takas bap a takam aemkurumcema.

³³A onam opam, a capinmiam, aanioscema. Doratakam nat, inim aatamemamesawarcema.”

³⁴“Ca nat, pimicima. Car pokbwiam, jokmen bwi jayicam, awames capinmi pokam, bi binip bacecerem awut arapok. Caram bi binip jiwic arapok. Tuhan jofay asarimenawcow, car camsom opok bemapasin.

³⁵E jofay aemcowas, awames capinmi bemap ow takas asarimenawomcema. Ar siso o asarimneykamimopcema inim cimin ara.

³⁶Manmok mamtiwapawarey. Janim Allah mamanimawarey. Inimas car e aenawomcesas takas, jak fak aatemcomokom. Caram, e Asmat Anakat Ajaworemef Ipic, bipu memem, jak fak aatemcomokom.” Yesus inim aeefen.

³⁷Barewen. Join aatamfafayef, aramat ipic, Allah cem aman atakam amememtama ajimepen. Iram ara masirin, ar e sikon juwas Saitun op ajisosa ajimep, wunam isi aamsesa ajimepen.

³⁸Tamnakap ara masirin, ow takas asita ajimpesen. Aram Allah cem aman afiwa ajimpesen. Ar, e aratakam jen baji, e aramat ipicpu aenawoma ajimpesen.