Read Central Asmat LUKAS 22 Bible Online

LUKAS 22 - Central Asmat bible

LUKAS 22

¹Barewen. E Bibit Opok Roti Pokbwi jofay sotop aenawefen. E pokbwi wun juwas Bakamsow Pokbwi arawen.

²E Allah atakam mamtaw tugas ow awutam, e Allah Jirmec mamememtam owam, Yesus bacatiw at aetiwfesen. Ar nat, e mami ow omar aefesen.

³Yesus amamkawi ow dua belas ajiwar aman, jipic cowok juwas Yudas aememefen. E Yudas wun juwas Iskariot arawen. Bare, Iblis e Yudas jak aman afiwapefen.

⁴E Yudasam ajisosefen. Ar masirin, e Allah atakam mamtaw tugas ow awutam, e Allah cem manmok batiw komandan owam, atakam aamtawfesen. Ar e Yesus e ow botasimemtam, atakam aamtawfesen.

⁵E owam jak akat cowok aememfesen. Ar Yudascin, uang, e Yudas batetam, atakam aamsakamtiwfesen.

⁶E Yudasam akat aeefen. Ar masirin, Yesus e ow botasimemtam asan akat, apowporefen. Ar e mami ow arke eras bapor arapoken.

⁷Barewen. E Bibit Opok Roti Pokbwi jofay aenawefen. Er e Bakamsow Pokbwi domba jiwi bacatiw jofay arawen.

⁸Yesus masirin, e Petrusam, e Yohanesam, jirmec ajirimefen. “Caram cey. E doBakamsow Pokbwi pok mamkenemey. Dar eras aancomom.” Inim aeefen.

⁹E ow masirin, “Dar e pok ocenak asan akenemcom?” Inim aefesen.

¹⁰Yesus masirin, “Jakaperey. Car e kota afiwcokom, car jipic cowok bwis batowom biamnuk aemamtewcomokom. Car aramat ipic e afiwcow cem akac mamfiwey.

¹¹Car masirin, inim atakam e cem aramat ipic mamotawey. ‘E guru jonow or atowmar ara. “Doram, e domamkawi owam, e Bakamsow Pokbwi memen ucim kamaram?” Inim jonow atowmar ara.’ Inim mameey.

¹²Aramat ipic masirin, op kamar awut e pok takas epcom aporomtamceman. Bare, car e Bakamsow Pokbwi pok erasan mamfafaytiwey.” Yesus inim aeefen.

¹³E ow masirin, ajisosfesen. Ar e pok takas e Yesus atakam atawefas jipu cowok aporfesen. Aram a Bakamsow Pokbwi pok akenemfesen.

¹⁴Barewen. Amos memen sotop aporef ara, Yesus aneypwikapefen. E atakam botaw batewosom owam, akac aneypwikapfesen.

¹⁵Aramat ipic masirin, atakam e ow aotawefen. “Dor a Bakamsow Pokbwi car bap akac memen jak aserememawiru. Asep ara masirin, ajurusemcimin.

¹⁶Jakaperey. Dor eras boemen opok— e Bakamsow Pokbwi anakat aemencey jofay ajiwara. E jofay nat, Allah Pemerintah aenawcow jofay ara.” Inim aeefen.

¹⁷Aramat ipic masirin, gelas anggur bwi epcom atewefen. Aram terima kasih atakam Allah aotawefen. Ar masirin, atakam e owam aotawefen. “A bwi batewey, wunam bantotorey.

¹⁸Jakaperey. Wow ajiwar, dor a anggur bwi boan opok— e Allah Pemerintah aenawcow jofay ajiwara.” Inim aeefen.

¹⁹Aramat ipicam amos atewef, wunam terima kasih atakam Allah aotawefen. Terima Kasih atakam Allah aotawef masirin, ar e amos akokomef, wunam e ow sey aseyetamefen. “Ar dodam das ara. Dor e dodam, car asan akat bomas, atetamamin. Car inimas mamemawarey. Eras car do binip bacomomas ara.” Inim aeefen.

²⁰Amos anakurumfes ara, Yesus gelas inim inim atewefen. Aram atakam aotawefen. “A gelas bwi dores ara. Allah, asmat ow bajortew, ay atayi aeef. E dores airineycow, er e Allah ay atayi aeefas, atakamnak aporomtamcema. E dores ca bajortewas ara.

²¹E nat, jakaperey. E dor aotasimemtamcan ipic, amos dor akac aanmom.

²²Bare, e Asmat Anakat Ajaworemef Ipic damir aafcema. Er e Allah atakam asakamtiwef jipu ara. E nat, e aotasimemtamcow ipic asan pwicaknakut aemapcema!” Inim aeefen.

²³E amamkawi ow masirin, jonow aamtowporfesen. “E daramaman, e Yesus ca otasimemtamcow.” Inim aefesen.

²⁴E owam atakam aamtawfesen. “E dar awamcom ow, awut nat, cam?” Inim aefesen.

²⁵Aramat ipicam atakam e ow aotawefen. “E Allah mamkawi amsom opok samatin samatin raja ow, jirmec awutut e mami ow ajirimcemes. Owam atakam aotawcemes. ‘E kepala ow, ow asan akat momomtam ow ara.’ Inim aecemes.

²⁶Car ara nat, inimas opok. E caramaman ipic awut, e caramaman ipic kanim cimin baememcow. E caramaman kepala ipicam, kerja bwemtam ipic cimin baememcow.

²⁷Jipic awut nat, cam? E amos memen emap ipicnew? E amos batowomattam ipicnew? E amos memen emap ipic, bare jipic awut araman.”

²⁸“Ajurusemawiru ara, car akac aememawirirum.

²⁹Doricipicam dor raja ipic atewemfan. Bare, doram raja ow, car atewemamin.

³⁰Inimas ara, e doPemerintah aenawcow jofay, car amosam bwiam, dor akac aancomom. Caram raja fa bemap asan ton aemaptotorcomokom, wunam e Israel samat dua belas ajiwar, jirmec ajirimcomokom.”

³¹“Simon. Jakaperey. E Iblis or bwemporen. Aram janim Allah aanimef. Allah masirin, ‘Bare, e Simon inim aemporey.’ Inim aeef.

³²Do nat, janim Allah aanimey. Or do basicim bakoremasin. Wunam, or bin dor aofirimcan, or e ojowow jak fak aemapomcemem.” Yesus inim aeefen.

³³Petrus masirin, “Tuhan. Dor orcin penjara cem aman bemapnew, damir bafnew, bare akat ara.” Inim aeefen.

³⁴Yesus masirin, “Petrus. Jakaperey. Wow ara, or atakam bar mamincop bap aotawescemem, ‘Dor e Yesus nomsom opok,’ Inim ajiescemem. E ayam jipic masirin, atakam asep akoreyescema.” Inim aeefen.

³⁵Barewen. Yesusam atakam e ow aotawefen. “Dor car atewosomfin, doram jirmec car ajirimfin. ‘Car uang eseam, pok eseam, sandalam, inim pok batew arapok,’ inim aefin. Car e pok batew opok ajisosfokom, car asan pwicak aememfokomnew?” Inim aeefen. E ow masirin, “Dar asan pwicak memem opok.” Inim aefesen.

³⁶Aramat ipic masirin, “Wow nat, e uang ese epcom ow eras batewces. E pok ese epcom owam eras batewces. E owec parang opok ow, e abaju, owec parang bauwumtewces.

³⁷E Alkitab atakam ara, ‘Ow atakam aotawfes, “Aramat ipic, Allah Jirmec bopow ipic ara.” Inim aefes.’ E Alkitab inim aema. Jakaperey. E atakam, doratakam ara. Owam e atakam jipu aemcemes. E atakam jipu emcesas, bare sotopnakap ara.” Yesus inim aeefen.

³⁸E ow masirin, “Tuhan. Jakaperey. Owec parang jamnuk awompom.” Inim aefesen. Aramat ipic masirin, “Bare, ara.” Inim aeefen.

³⁹Barewen. Yesus e kota ajisefen. Ajisef masirin, e sikon juwas Saitun aapenefen. Bap ara, erasan inim ajisosa ajimepen. E amamkawi owam fa asoromfesen.

⁴⁰Aramat ipic erasan ajaremef ara, aram atakam e ow aotawefen. “Janim Allah mamanimawarey. Iblis car dosa bwem bacajijimtawasin.” Inim aeefen.

⁴¹Aram e ow dasimin pim ameremefen. Ow, ek dasimin amerjiwitiwcemes, inim ajiwar ameremefen. Ar masirin, jine onok aneyotapefen. Aram janim Allah aanimefen.

⁴²“Diwi. Or akat aporcem, dor bajurusem arapok. E nat, e akat aporminas jipu bwem arapok. E akat apormemas jipu cowok emey.” Inim aeefen.

⁴³Malaikat cowokam onam op aewneyefen. Ar aramat ipic bipu ajisomefen. Ar jak fak e aramat ipic atetamefen.

⁴⁴Aramat ipicam jak opok cowok aemapefen. Aram janim Allah faknakut aanimefen. E ajoperes, es awcawor aneypitimtiwefen.

⁴⁵Barewen. Aramat ipic janim Allah aanimkurumefen. Ar masirin asitemefen. Aram e amamkawi ow aofasiomefen. Ar e ow, jak pwicak isi aemamesfes aporefen.

⁴⁶Atakamam e ow aotawefen. “Car ucim isiam? Basitemey. Janim Allah mamanimawarey. Iblis car dosa bwem bacajijimtawasin.” Inim aeefen.

⁴⁷Yesus atakam cowocemtawmepaw, ow arke awarimfisfesen. E jipic juwas Yudas e ow bap ajarefen. Ar e mamkawi ow dua belas ajiwar, wun ipic cowok arawen. Ar e Yesus ak bafop sotop ameromefen.

⁴⁸Yesus nat, atakam aramat ipic aotawefen. “Yudas. Or e Asmat Anakat Ajaworemef Ipic, e ajewew ow botasimemtam, ak aafopmemnew?” Inim aeefen.

⁴⁹E Yesus akac aememfes ow, e ow aemcesas aporfes, wunam atakam aotawfesen. “Tuhan. Dar a ow owec parang basakam arapen?” Inim aefesen.

⁵⁰E Yesus akac aememef ipic cowok masirin, e Allah atakam mamtaw tugas ipic awut akerja bwemtam ipic bo jenmak asakamnemefen.

⁵¹Yesus nat, atakam aotawefen. “Inim arapok.” Inim aeefen. Ar masirin, e ipic jen jof ban akurumefen. Aram e jen ajaworomtewefen.

⁵²E Allah atakam mamtaw tugas ow awutam, e Allah cem manmok batiw komandan owam, e ownucur owam, Yesus batew, erasan aememfesen. Yesusam atakam e ow aotawefen. “Car owec parangam, warim pokam, do batew atowotnawmokom ucimaram? Ca nat, dor pok ces bwetaw ipic, inim aranew?

⁵³Join join dor e Allah cem car akac aemapa aefom. Ca nat, ban do bakimop opokut aema aefenokom. Wow nat, Allah car aemcokomas bwem, asan akat car atetamaman. Wowam e jiwicas momom ipic, apok bwem jofay ara.” Yesus inim aeefen.

⁵⁴Barewen. E ow Yesus ban akimomfesen. Aram aramat ipic atowomosfesen. Aram aramat ipic e Allah atakam mamtaw tugas ipic awut acem atowomiwfesen. Petrusam damasan opok Yesus fa asatefen.

⁵⁵E ow e cemsan jicupum, jismak atowokomtiwfesen. Ar masirin, cowkon aneypwikapfesen. Petrusam e ow cowkon aneypwikapfesen.

⁵⁶Bare, kerja bwemtam cowoc e aramat ipic jismak ak aemapef aporefen. Aram aramat ipic manmok atiwef masirin, atakam aotawefen. “Awap ipicam e Yesus akac aemawiri ipic ara.” Inim aeefen.

⁵⁷Aramat ipic nat, apacinefen. “Ba! Dor e ipic nomsom opok.” Inim aeefen.

⁵⁸Sarim inim ara masirin, wun ipicam e aramat ipic aporefen. “Oram e ow ajowow ipic ara.” Inim aeefen. E Petrus nat, atakam aotawefen. “Ba! Dor arapok.” Inim aeefen.

⁵⁹Jam cowoknew aoemapfes masirin, wun ipicam atakam fak aotawefen. “Awap ipic, e Yesus akac aemawiri ipic araman. Ar Galilea capinmi ipic araman.” Inim aeefen.

⁶⁰E Petrus nat, atakam aotawefen. “E atawmem atakam nomsom opok.” Inim aeefen. E aramat ipic atakam cowocemtawmepaw, ayam jipic atakam asarimkoreyefen.

⁶¹Tuhan masirin, bin afiromefen. Aram Petrus manmok atiwefen. E Petrus masirin, e Tuhan bap atakam atawefas, binip acomomefen. E atakam ara, “Or atakam bar mamincop bap aotawescemem, ‘Dor e Yesus nomsom opok,’ inim ajiescemem. E ayam jipic masirin, atakam asep akoreyescema.” Yesus inim atakam bap aotawef arawen.

⁶²Bare, e Petrus cesen afisefen. Aram bwec awutut abwecefen.

⁶³E Yesus ban akimomfes ow masirin, e aramat ipic uc aomocfesen. Ar aramat ipic omop aaffesen.

⁶⁴Aram aramat ipic manmok apirimomfes, wunam jonow atowporfesen. “Omop ca afan? Atakam otawcarowey.” Inim aefesen.

⁶⁵Aram cemew atakam awut aramat ipic aatfesen.

⁶⁶Barewen. Jo apuamesefen. Jo apuamesef ara masirin, e Yahudi ownucur owam, e Allah atakam mamtaw tugas ow awutam, e Allah Jirmec mamememtam owam, ajarewsiapfesen. E ow, bare atakam mamsakam ow arawen. Ow e Yesus e ow bipu amertowomfesen.

⁶⁷E ow masirin, atakam aramat ipic aotawfesen. “Or e Allah Aeremtewef Ipic aranew, atakam umuton botawcan.” Inim aefesen. Aramat ipic nat, “Dor atakam car aotawcennew, car e atakam basicim opok aemcomokom.

⁶⁸Doram jonow car atowporcennew, caram atep bajit opokut aemcomokom.

⁶⁹E nat, wow jofay ajiwar, e Asmat Anakat Ajaworemef Ipic, e faknakut Allah ban bo jamam aemapcema.” Yesus inim aeefen.

⁷⁰E ow takas masirin, “Inimas ara, or Allah atiw aranew?” Inim aefesen. Aramat ipic masirin, “Caram, dor Allah atiw, atakam atawmokom, bare atakamnak ara.” Inim aeefen.

⁷¹E ow masirin, “Bare, dar atemen atakam jen boji arapok. Dar e aramat ipic atakam jen darma ajimom.” Inim aefesen.