Read Central Asmat LUKAS 23 Bible Online

LUKAS 23 - Central Asmat bible

LUKAS 23

¹Barewen. E ow takas asitfesen. Ar Yesus, Pilatus bipu atowomfesen.

²Aram Yesus asalah atakam aotawfesen. “Dar awamec ipic, pemerintah atakam bopow, atjen e dasamat aowforow aporfom. Aram ow, e pemerintah jirmec ajirimfes uang, Kaisar batetam, acuw aatef. Aram atakam aotawef, ‘Dor e Allah Aeremtewef Ipic ara. Inimas dor raja ipic ara.’ Inim aeef.” E ow inim aefesen.

³Pilatus masirin, jonow Yesus atowporefen. “Or e Yahudi ow araja ipic open?” Inim aeefen. Aramat ipic masirin, “Bare, oram inim atakam orma atawmem ara.” Inim aeefen.

⁴Pilatus masirin, atakam e Allah atakam mamtaw tugas ow awutam, e ow arkeam, aotawefen. “Awamec ipic salah opok apormin ara.” Inim aeefen.

⁵E ow nat, atakam fak aotawfesen. “Aramat ipic atakam a Yudea capinmi ow takas amememtamama. Inimas ar e ow, awutut aototomerma. Bap ara, ar Galilea capinmi ow aototomeref. Jepen ara masirin, arasan owam aototomeref.” Inim aefesen.

⁶Pilatus inim atakam jen ajief ara, ar jonow atowporefen. “Awamec ipic Galilea ipic open?” Inim aeefen.

⁷Bare, Yesus e Herodes omomef capinmi ipic arawen. Pilatusam inimas aporefen. Inimas aporef masirin, ar Yesus e Herodespu atewosomefen. E jofay Herodesam Yerusalem aemapef arawen.

⁸E Herodes e Yesus bi aporef ara, jak akatnakut aememefen. Ar e Yesus aemawirias, jen emcajiefen. Inimas ara, ar e Yesus bi bapor, jak tarey aseremomawirien. Aram e Yesus junum bweas bapor jak aseremomawirien.

⁹Inimas ara, aramat ipic Yesus jonow awutut atowporefen. Yesus nat, atep bajit opok cowok arawen.

¹⁰E Allah atakam mamtaw tugas ow awutam, e Allah Jirmec mamememtam owam, erasan aememfesen. Aram Yesus salah, atakam awutut aotawfesen.

¹¹E Herodesam, e atentara owam, e Yesus bifan afayomfesen. Aram aramat ipic uc aomocfesen. Aram raja baju, aramat ipic ajimomtamfesen. E Herodes masirin, e Yesus e Pilatuspu afasimosomefen.

¹²Bare, e jofay cowok Herodesam, Pilatusam, damos aamjiemfesen. Bap ara nat, ar bifan aamfayomfesen.

¹³Barewen. E Pilatus e Allah atakam mamtaw tugas ow awutam, e kepala owam, e mami owam, ajanimapomefen.

¹⁴Aram atakam e ow aotawefen. “Car awamec ipic dobipu atowotnawtamenokom. Caram atakam aotawenokom, ‘Awamec ipic ow aototomerma.’ Inim aeenokom. Doram aramat ipic e caratakam aotawenokom salah takas e ca bipu jonow atowporkurumey. Do nat, e ipic inim salah opok cowok aporey.

¹⁵Herodesam inim cowok aemor. Ar aramat ipic aofasimtamorow. Jakaperey. Aramat ipic damir baf siksa, inim salah bwem opok cowok.

¹⁶Dor ow aramat ipic desen omop baf jirmec ajirimcimin, wunam afimisimtamcimin.” Inim aeefen. [

¹⁷Barewen. E tahunin tahunin, e pokbwi jofay ara, ow, Pilatus, penjara cem aman bemap ipic cowok bafimisimtam, janim aanima ajimpesen. Aramat ipic masirin, e ipic cowok afimisimtama ajimepen.]

¹⁸E ow takas nat, atakam akac afakaytawfesen. “Awamec ipic bacatiwey. E Barabas bafimisimtamcarowey.” Inim aefesen.

¹⁹Bap ara, e kota ow e pemerintah owec aamofesen. Barabasam e owec akac aemefen. Aram ow acatiwefen. E pemerintah inimas aporfes, wunam e Barabas penjara cem aman afimimfesen.

²⁰Pilatus nat, e Yesus bafimisim, jak aseremomefen. Inimas ar atakam awut e ow aootawefen.

²¹E ow nat, atakam aofakaytawfesen. “E ipic salib os op bacatopomey! E ipic salib os op bacatopomey!” Inim aefesen.

²²Wunam e Pilatus atakam e ow aootawefen. “E ipic nat, ucim salah aemef? Dor e ipic damir baf siksa, inim salah bwem opok apormin ara. Inimas ara, dor ow aramat ipic omop desen baj jirmec ajirimcimin, wunam afimisimcimin.” Inim aeefen.

²³E ow nat, janim faknakut e Pilatus aanima aefesen. Aram atakam afakaytawfesen. “E ipic salib os op bacatopomey!” Inim aefesen. Bare, e Pilatusam e ow atakam ji aeefen.

²⁴Ar e ow janim fak aanimfesas bwemtam, atakam asakamtiwefen.

²⁵Ametnak ara, e Barabas e pemerintah owec aamoef, wunam ow acatiwefen. E pemerintah inimas aporfes, wunam e ipic penjara cem aman afimimfesen. Bare, e ow arke Pilatus e ipic bafimisimtam janim aanimfesen. Pilatus masirin, e janim aanimfes ipic afimisimtamefen. Aram e Yesus e ow aotasimemtamefen. Ar e ow e abi binip jipuas bwem, inim aotasimemtamefen.

²⁶E ow Yesus atowosfes ara, aram kota Kirene ipic juwas Simon ban akimomfesen. E ipic e kebun asan jepen aewenawefen. Ow e salib e ipic sop atatiwfesen. Aram jirmec ajirimfesen. “Or e salib batewey. E Yesus fa basatey.” Inim aefesen.

²⁷Owam arkenakut Yesus fa asatfesen. Cepesam arawen. E cepes, aramat ipic bwec awutut abwecfesen.

²⁸Yesus nat, e cepes bin aofiromefen. “Car Yerusalem cepes awamcokom ara. Caram dobwec babwec arapok. Ca nat, cadam bwec abwecey. E cajiwiam bwec abwecey.

²⁹Jakaperey. Aenawces jofay ara, ow inim atakam aotawcemes. ‘E ema cepes ara, e jiwi bapeap opok cowok cepes ara, e jiwi aw manam opok cowok cepes ara, bare asan akat!’ Inim aecemes.

³⁰E jofayam ow atakam sikon awut aotawcemes. ‘Basakayneyey. Bakamimopcarowey.’ Inim aecemes. Aram atakam sikon kanim aotawcemes. ‘Baneypwirimopcarowey.’ Inim aecemes.

³¹Bare, dor daci os inim awcawor ara. A owam inim ajurusumamenes. Ca nat, sa os inim awcawor ara. Inimas ow car bajurusum awutnakut aemceman.” Yesus inim aeefen.

³²Ow, wun ipic jamnuk, e Yesus cowkon bacatiw, atowomesfesen. E ipic jamnuk, salah awut ow arawen.

³³Barewen. Ar asan juwas Damir Kus Asan ajaremfes ara, aram Yesus salib os erasan apowtiwfesen. Aram e salah awut ow, salib os op atewtopomfesen. Ar wun ipic Yesus bopim jamam arop salib os op atewtopomfesen. Aram e wun ipic Yesus tamopim jamam atewtopomfesen.

³⁴Yesusam atakam aotawefen. “Diwi. A ow aemamesas amsom opok. Inimas e adosa bakokoromosomey.” Inim aeefen. Bare, e owam ek kanim aneyjiwitiwfesen. E ek kanim e aemcesas baporomtamas ara. Inimas ar aramat ipic apakaian, e ek kanim aporomtamefas jipu, sey aseyamatfesen.

³⁵Owam arke erasan aememfesen. Aram manmok atiwfesen. E kepala ow nat, Yesus pwicak atakam aotawfesen. “E ipic kawey ow ajortewef. Ar e Allah Aeremtewef Ipic aranew, bare aram arma bajoremerec.” Inim aefesen.

³⁶E tentara owam, aramat ipic uc aomocfesen. Ar Yesus aenawomfes, wunam asesak anggur bwi ajuromomtamfesen.

³⁷Aram atakam aotawfesen. “Or Yahudi ow araja ipic aranew, bare oram orma joremey.” Inim aefesen.

³⁸Owam atakam tulis aeapomfes, wunam e atakam Yesus kuspu atomettewapomfes. “A ipic Yahudi ow araja ipic arawen.” Inim atakam tulis aeapomfesen.

³⁹E ow salib os op atewtopomfes salah ipic cowok, pwicak atakam e Yesus aotawefen. “Or e Allah Aeremtewef Ipic aranew? Bare, oram orma joremey! Oram dar ajortewcarowey!” Inim aeefen.

⁴⁰E wun ipic nat, e ipic jiman aafefen. “Or Allah omar opoknew? Ow oram, aramat ipicam, siksa awcawor, atakam asakamtiweres.

⁴¹E dasiksa nat, akat ara. Ar e salah aemfomas pomatam aemamarowos. A ipic nat, salah bwem opok.” Inim aeefen.

⁴²E ipic masirin, “Yesus. Or raja ipic ememcem, wunam aoenawcem, do binip mampwimcan.” Innim aeefen.

⁴³Yesus masirin, “Atakamnak ara, or wow e jiwne batamemawar asan dor akac aemapcomom.” Inim aeefen.

⁴⁴Barewen. Jok ara, jam duabelasnew aememfesen. E capinmiam jiwic acamtiwefen. Jiwic acamtiwef, jam tiga ajiwar arawen.

⁴⁵E jopokam batewemapom opok arawen. E Allah cem jimasap kainam jeteren jamnuk akaytepefen.

⁴⁶Wunam Yesus atakam awut afakaytawefen. “Diwi. Dor e doranakat ipic or atetamamin.” Inim aeefen. Ar inim atakam aotawef masirin, damir aafefen.

⁴⁷E tentara komandan ipic eras aporef ara, ar Allah asicimefen. “A ipic, tarowat ipic araman!” Inim aeefen.

⁴⁸E eras bapor ajarewsiemfes ow arke, e aemfesas aporfesen. Aporfes masirin, jak pwicak awut epcom cem ajisostotorfesen.

⁴⁹Bap ara, Yesus, Galilea capinmi ewenawef ara, wun cepesam ajamkawifesen. Bare, e cepesam, e Yesus amsom ow takasam, eras takas manmok batiw damasan opok aememfesen.

⁵⁰Barewen. Jipic juwas Yusuf arawen. Aramat ipic, e Yahudi atakam mamsakam ow wun ipic cowok arawen. Ar jipic atakam, tarowatam, arawen.

⁵¹Ar e Yahudi atakam mamsakam ow e atakam aamsakamfesasam, e aemfesasam, pwicaken. Aramat ipic kota Arimatea ipic arawen. E kota, Yudea capinmi kota arawen. Aram e Allah Pemerintah aenawcowas, manmok afeawirien.

⁵²Aramat ipic e Pilatus bipu ameromefen. Ar e Yesus sumu ipic batew janim aanimefen.

⁵³Aram e sumu ipic asurumnemef, wunam kain akat biram ajiktiwefen. Ametnak ara, ar sikon ek jip awerem asiefen. Owam sumu ow e ek jip aman bajiwtatiwpor opoken. Bare, e Yusuf e Yesus sumu ipic e ek jip aman ajiwtatiwefen.

⁵⁴E jofay, e Ses Ban Jo pok bafafayapom jofay arawen. E Ses Ban Jo, bare sotopnakap arawen.

⁵⁵E Yesus e Galilea capinmi akac ewenawfes cepesam e Yusuf fa asoromfesen. Aram e awerem aporfesen. Aram Yusuf e sumu ipic ajiwtatiwefas aporfesen.

⁵⁶Ar masirin, e acem ajisosfesen. Cem ajisosfes masirin, pinim akat pokam, minyak wangiam, afafayapomfesen. Ses Ban Jo ara masirin, ar Allah Jirmec jipu ses aanfesen.