Read Central Asmat LUKAS 24 Bible Online

LUKAS 24 - Central Asmat bible

LUKAS 24

¹Barewen. Ar Hari Minggu aemapfesen. Tamnakap, ar e awerem asan ajisosfesen. Aram e afafayapomfes pinim akat pokam atowomosfesen.

²Ar ow e ek jip awerem jimasap ek emcapwepweremosomfes aporfesen.

³Ar e ek jip aman afiwfes ara, e Yesus sumu ipic erasan opok aporfesen.

⁴E cepes eras bi binip arke cowocceceremampesaw, jipic jamnuk abipu asarimememfesen. Apakaianam serenakut arawen.

⁵E cepes, bare omar aefesen. Aram jimas jiri aememfesen. E ipic jamnukam, atakam e cepes aotawfesen. “Car tetakay ipic a damir ow asan apowpormokom ucimaram?

⁶Aramat ipic arasan opok. Emcajaworsitor. Aramat ipic e Galilea aemapef ara, ar atakam car emcaotawfan. ‘Ow, e Asmat Anakat Ajaworemef Ipic, dosa ow aotasimemtamcemes araman. Ow, aramat ipic, salib os op acatopomcemes araman. Bar mamincop masirin, aojaworsitcema araman.’ Inim aefan. Caram eras bi binip bacomomey.” Inim aeefen.

⁷

⁸E cepes masirin, e Yesus atawef atakam, bi binip acomomfesen.

⁹Aram e awerem asan aewenawfesen. Ar masirin, eras takas atakam e mamkawi ow sebelas ajiwaram, e wun ow takasam, aotawfesen.

¹⁰E cepesam, e kota Magdala cowoc juwas Maria ara. Yohana ara. Yakobus arosowoc juwas Maria ara. Inima. E wun akac aemfes cepesam, eras atakam, e atakam botaw batewosom ow aotawfesen.

¹¹E atakam botaw batewosom ow nat, inim atakam suw atakam inim arawen. Ar e atakam basicim opoken.

¹²Petrus nat, asitefen. Aram e awerem asanpu je akukuosefen. Aram cenes apamineyef, wunam e awerem jimasap atasporefen. E picin cowokin aporefen. Ar masirin, ajisosefen. Aram e aemfesas takas bi binip arke aceceremefen.

¹³Barewen. E jofay cowok, Yesus mamkawi ipic jamnuk, samat juwas Emaus cemsanpu ajarfesen. E cemsan memem, wunam Yerusalem baysos, e bokotpu jirow kilometer sebelas ajiwar ara.

¹⁴Ar e ow aemfesas takas atakam aamtawfesen.

¹⁵Atakam cowocamtawmepesaw, Yesus e ow aenawomefen. Aram e ow akac ajarfesen.

¹⁶E ow nat, manmok jipir inim aememfesen. Inimas ar e ipic Yesus opok inim arawen.

¹⁷Yesusam atakam e ow aotawefen. “Car ucim atakam aamtawjarmokom?” Inim aeefen. E ow masirin, atukemfesen. Aram bi ciri aememfesen.

¹⁸E wun ipic juwas Kleopas masirin, atep ajitefen. “E toam, jowanam, Yerusalem aemfesas, or cowok omsom opoknew? E wun jaki ow takas nat, amsom ara.” Inim aeefen.

¹⁹Yesus masirin, jonow e ow atowporefen. “E aemfesas ucimasam?” Inim aeefen. E ow masirin, “Er e Nasaret ipic juwas Yesus atakam. Aramat ipic Allah atakam botaw ipic aememef. Ar e Allah bipuam, e ow takas bipuam, awutnakutas aemawiri. Atakam faknakutam aotawawiri.

²⁰E darAllah atakam mamtaw tugas ow awutam, e dakepala owam, e ipic e Roma pemerintah aotasimemtamfes. Ar masirin, aramat ipic bacatiw atakam aamsakamfes, Aram aramat ipic salib os op acatopomfes.

²¹Daram, e ipic e awamcom Israel samat bajortew, jirey aeawirum. Eras nat, jowon aemfes.

²²Wunam, e dajowow cepes mamincop atitimsumutumorowos. Tamnakap ar e awerem asan ajisoseres.

²³Aram e sumu ipic erasan opok aporeres. Ar masirin, aofasienaweres. Atakamam aotaworowos. ‘Dar pok desen apororom. Er malaikat ara. E malaikat atakam, “E Yesus tetakay awamec,” inim aeeres.’ E cepes inim aeorowos.

²⁴E wun akac aemapmom ow masirin, e awerem asan ajisoseres. Aram e cepes atakam, atakamnak aporeresen. E nat, ar aramat ipic bi bapor opoken.” E ipic jamnuk inim aefesen.

²⁵E Yesus masirin, “Car bi binip jen ow awamcokom ara! Ametnak ara, e Allah atakam botaw ow, e asep jofay emcowas, surat aeapomfes. Ca nat, e atakam kamornakut asicimamokom!

²⁶Allah e Aeremtewef Ipic bajurusem, wunam asan akatnakut bemap, inim atakam bap asakamtiwef araman.” Inim aeefen.

²⁷E Musa tulis aeef suratam, e Allah atakam botaw ow tulis aefes surat takasam, e Alkitab wun suratam, bare Yesus atakam ara. Aramat ipicam inim atakam e ow umuton aotawefen. Ar e Musa tulis aeef surat atakam bap aotawefen. E wun surat atakam masirin, asep aotawefen.

²⁸Barewen. Ar e bin ajiemfes cemsan sotop asisiatfesen. Yesus nat, akan bakenin aememefen.

²⁹E ipic jamnuk nat, e Yesus janim fak aanimfesen. “E dacem aamsesey. Bare, jiwic sotop. Jo basapineyma.” Inim aefesen.

³⁰Bare, aramat ipic amos memen e ow akac aemapfesen. Aram amos atewefen. Amos atewef masirin, terima kasih atakam Allah aotawefen. Aram e amos akokomef, wunam e ow sey aseyetamefen.

³¹E ow masirin, manmok atereyfesen. Aram e aramat ipic amsom aemapfesen. Aramat ipic masirin, aaniamesefen.

³²E ow masirin, atakam aamtawfesen. “E aramat ipic e bowsec, atakam dar aotaworow. Aram e Alkitab atakam umuton aotaworow. Bare, daram jak sara aeorom.” Inim aefesen.

³³E ow masirin, asarimsitfes, wunam Yerusalem aofasifesen. Aram e amamkawi ow sebelas ajiwaram, e akac aemfes owam, emcajarewsiapfes aporfesen.

³⁴E owam atakam e ipic jamnuk aotawfesen. “E Tuhan, bare emcajaworsitor araman! Aram e Simon bipu ajisomor!” Inim aefesen.

³⁵E ipic jamnuk masirin, e bowsec ajarfesas atakam aotawfesen. Ar e aramat ipic e amos akokomefasam, ar e aramat ipic amsom aemapfesasam, inim atakam aotawfesen.

³⁶E ow inim atakam cowocapanitawmepesaw, Yesus e ow aman asarimjiwtereyemefen. “Selamat.” Inim aeefen.

³⁷E ow masirin, juros ajiapfesen. Aram omar aefesen. Ar dat aporfes inim arawen.

³⁸Aramat ipic nat, atakam e ow aotawefen. “E ajurusemamokomam, e bi binip arke aceceremamokomam, ucimaram?

³⁹E dobanam, e dobweyam, baporcan. Dor Yesus awamcey ara. Bajejeremporcan. Car, dor dam das epcomam, emake epcomam, apormokom. Dat nat, inimas opok.” Inim aeefen.

⁴⁰Inim atakam aotawef masirin, ar e abanam, e abweyam, e ow asumporomefen.

⁴¹E owam jak akatnakut aememfesen. Aram junum awutnakut aefesen. Inimas ar e atakam basicimkurum opoken. Aramat ipic masirin, “Car arasan amos pok open?” Inim aeefen.

⁴²E ow masirin, enam das jisawnakap aramat ipic atetamfesen.

⁴³Aramat ipicam e enam das e ow bipu atewenefen.

⁴⁴Aramat ipic atakam e ow aotawefen. “Dor car akac aemapawirum, dor e jepen aemofas, atakam car emcaotawfin. Bare, e Musa surat aeapomef Jirmec wun atakamam, e Allah atakam botaw ow tulis aefes kitab wun atakamam, e Masmur kitab wun atakamam, bare doratakam ara. Doram e kitab doratakam atawmaras takas jipu aemamin araman.” Inim aeefen.

⁴⁵Aramat ipic masirin, e Alkitab atakam biyof bacomom, bi binip umuton e ow atetamefen.

⁴⁶Aram atakam e ow aotawefen. “E Alkitab atakam ara, ‘E Allah Aeremtewef Ipic ajurusemcema. Bar mamincop ara masirin, aojaworsitcema.

⁴⁷Owam inim atakam bacacapiomces: “E aramat ipic aemefas baporey. Inimas car dosa bak apayemcokom, Allah e cadosa, akokoromosomtamceman.” Inim baeces. Ar e atakam e Yerusalem bap a takam bacacapiomces. Wunam ar e atakam e samat takas baocacapiomces.’ E Alkitab inim aema.

⁴⁸Caram e apormokomas takas atemen mamatamey.

⁴⁹Jakaperey. Dor, e doricipic atayi aeefas, car atewnemtamcimin. Ca nat, a kota inim emapey— Allah e onam op fakas car atetamcan jofay ajiwara.” Yesus inim aeefen.

⁵⁰Aramat ipic masirin, e ow e kota cesen atowomisef— e Betania cemsan sotop ajiwar arawen. Aram e ban op atotopomefen. Ban op atotopomef masirin, ar Allah, e ow, asan akat bom, atakam aotawefen.

⁵¹Inim atakam aotawef masirin, ar e ow bakan ajiemefen. Ar onam op aaptometefen.

⁵²E owam, aramat ipic asicimfesen. Ar jak akat epcom Yerusalem aofasienfesen.

⁵³Aram e Allah cem aman, Allah akat, inim atakam atawawirisen.