Read Central Asmat LUKAS 3 Bible Online

LUKAS 3 - Central Asmat bible

LUKAS 3

¹Barewen. Kaisar Tiberius raja awut tahun lima belas ajiwar aememawirien. Pontius Pilatusam e Yudea capinmi gubernur ipic arawen. Herodesam e Galilea capinmi raja kanim arawen. Arewec Filipus masirin, e Ituria capinmiam, e Trakonitis capinmiam, raja kanim arawen. Lisaniasam, e Abilene capinmi raja kanim arawen.

²Hanasam, Kayafasam, Allah atakam mamtaw tugas ow awut arawen. E ow inim ememfes ara, Sakaria atiw juwas Yohanes, cem opok asan aemapefen. Allaham, e Yohanes, aratakam bacacapiomtam, jirmec ajirimefen.

³E Yohanes masirin, e Yordan jo capinmi takas ajarefen. Aram acacapiomefen. “Caram e cadosa takas bak bapayemtotorey. Ow masirin, bwi car babwimtotorcan. Inimas Allah e cadosa akokoromosomtamceman.” Inim aeefen.

⁴Eras, e Allah atakam botaw ipic juwas Yesaya tulis aeapomefas jipu cowok ara. Bare, aramat ipic inim tulis aeapomef: “Jipic cowok, cem opok asan atakam afakaytawcema. ‘E Tuhan ajarcow bokotpu mamkenemtiwey. E bokotpuam tarowata.

⁵E sikon asan fop takas akapiaptotorcema. E sikon awut takasam, e sikon kanim takasam, apacayneytotorcema. E fasi asan takas, tarowat aemamescema. E bwey asan junum takas, cawor aemamescema.

⁶Asmat takasam e Allah e ow ajortewcemaras aporcemes.’ E ipic inim aecema.” Yesaya inim tulis aeapomefen.

⁷Ow arkenakut e Yohanes bwi a babwim ajukusirenawfesen. Aramat ipic masirin, atakam e ow aotawefen. “Amer jiwinakasa. Car e Allah ajurusumcowas omar baysos atakam ca otawfan?

⁸Jakaperey. Car e dosaas bak apayemamokomnew, bare akatas mamemey. Caram, ‘Abraham darakut araman,’ inim bi binip bacecerem arapok. Jakaperey. Allah, awamses ek, Abraham urpis baworomem, inim fakas aomomamar araman.

⁹Bare, wow, seysi, os tamow sotopnakap aemapma. Jipic cowok e eke akat bape opok os amatiwcema. Aram e os jismak asapimapomcema.” Yohanes inim aeefen.

¹⁰E ow arke masirin, jonow Yohanes atowporfesen. “Da nat, ucim akatas emcom?” Inim aefesen.

¹¹Aramat ipic masirin, atep ajitefen. “E baju jamnuk epcom ow, baju opok ow sey baseyeces. Wunam e amos epcom ow, inimasam baemces.” Inim aeefen.

¹²Pemerintah uang batawanimtam kerja owam, Yohanes bwi a babwim aenawomfesen. Aram atakam, aramat ipic aotawfesen. “Guru. Dar ucim akatas emcom?” Inim aefesen.

¹³Aramat ipic masirin, “Car e pemerintah jirmec car ajirimfan uang cowok batawanimtamey. Bakakayim arapok.” Inim aeefen.

¹⁴Tentara owam jonow atowporfesen. “Da nat, ucim akatas emcom?” Inim aefesen. Aramat ipic masirin, “Kawey pok, ban bacajijimtaw arapok. Kawey pok batew, suw atakam botaw arapok. E cagajias takas jak akat inim mamomomatey.” Inim aeefen.

¹⁵Barewen. Ow arke e Yohanes jirey aefesen. “E Yohanes, e Allah aeremtewef ipic aranew.” Inim bi binip aceceremfesen.

¹⁶Yohanes masirin, atakam e ow takas aotawefen. “Dor bwi car abwimamin. E dofa asoromcan ipic nat, ow awut ara. Do kanim ara. Inimas dor e aramat ipic sandal bwemsurumtam asan opok. Aramat ipic, Roh Kudus e cajak afimimtamtotorceman. Aram e cajak aman pwicakas aurumtiwcema inim cimin ara.

¹⁷Aramat ipic e of e po aemapomama. Ar amosnakin bafomnemam, e amos cem batowoneyam, aememama. Ar masirin, e apem, jismak afamtiwcema. E jismak, bare bwemsapiames asan opok.” Inim aeefen.

¹⁸Inimas ara, aramat ipic wun atjen arke e ow aomefen. Aram e Atakam Akat e ow acacapiomefen.

¹⁹Yohanes, e raja kanim juwas Herodes, e Herodes e arepwec arem aemefas aporefen. Aram e Herodes aemawiri dosa arkeam aporefen. Inimas ar e Herodes jiman aafefen.

²⁰Herodes masirin, wun dosaam aokayimefen. E dosa ara, ar Yohanes e penjara cem aman ajiwtewapomefen.

²¹Bap ara nat, Yohanes, erasan aememfes ow takas, bwi abwimefen. E ow takas bwi abwimef masirin, ar Yesusam bwi abwimefen. Yesus, Allah janim aanimef ara, e onam op amuapefen.

²²Roh Kudus masirin, pari dam cimin, Yesus dam ton aneyapefen. Atakamam e onam op aewneyefen. “Or dotiw ara. Dor or damos ajiomamin. E aemamemas, bare akat ara.” Inim aeefen.

²³Barewen. Yesus e bapnak kerja aemef, aramat ipic arumur, tahun tiga puluh ajiwarnew aememefen. Ow, e Yesus, e Yusuf atiw inim arawen. E Yusuf masirin, Eli atiw arawen.

²⁴E Eli, Matat atiw arawen. E Matat, Lewi atiw arawen. E Lewi, Malki atiw arawen. E Malki, Yanai atiw arawen. E Yanai, Yusuf atiw arawen.

²⁵E Yusuf, Matica atiw arawen. E Matica, Amos atiw arawen. E Amos, Nahum atiw arawen. E Nahum, Hesli atiw arawen. E Hesli, Nagai atiw arawen.

²⁶E Nagai, Maat atiw arawen. E Maat, Matica atiw arawen. E Matica, Simei atiw arawen. E Simei, Yosek atiw arawen. E Yosek, Yoda atiw arawen.

²⁷E Yoda, Yohanan atiw arawen. E Yohanan, Resa atiw arawen. E Resa, Serubabel atiw arawen. E Serubabel, Sealtiel atiw arawen. E Sealtiel, Neri atiw arawen.

²⁸E Neri, Malki atiw arawen. E Malki, Adi atiw arawen. E Adi, Kosam atiw arawen. E Kosam, Elmadam atiw arawen. E Elmadam, Er atiw arawen.

²⁹E Er, Yesua atiw arawen. E Yesua, Elieser atiw arawen. E Elieser, Yorim atiw arawen. E Yorim, Matat atiw arawen. E Matat, Lewi atiw arawen.

³⁰E Lewi, Simeon atiw arawen. E Simeon, Yehuda atiw arawen. E Yehuda, Yusuf atiw arawen. E Yusuf, Yonan atiw arawen. E Yonan, Elyakim atiw arawen.

³¹E Elyakim, Melea atiw arawen. E Melea, Mina atiw arawen. E Mina, Matata atiw arawen. E Matata, Natan atiw arawen. E Natan, Daud atiw arawen.

³²E Daud, Isai atiw arawen. E Isai, Obed atiw arawen. E Obed, Boas atiw arawen. E Boas, Salmon atiw arawen. E Salmon, Nahason atiw arawen.

³³E Nahason, Aminadab atiw arawen. E Aminadab, Admin atiw arawen. E Admin, Arni atiw arawen. E Arni, Hesron atiw arewen. E Hesron, Peres atiw arawen. E Peres, Yehuda atiw arawen.

³⁴E Yehuda, Yakub atiw arawen. E Yakub, Ishak atiw arawen. E Ishak, Abraham atiw arawen. E Abraham, Terah atiw arawen. E Terah, Nahor atiw arawen.

³⁵E Nahor, Serug atiw arawen. E Serug, Rehu atiw arawen. E Rehu, Peleg atiw arawen. E Peleg, Eber atiw arawen. E Eber, Salmon atiw arawen.

³⁶E Salmon, Kenan atiw arawen. E Kenan, Arpaksad atiw arawen. E Arpaksad, Sem atiw arawen. E Sem, Nuh atiw arawen. E Nuh, Lamek atiw arawen.

³⁷E Lamek, Metusalah atiw arawen. E Metusalah, Henok atiw arawen. E Henok, Yared atiw arawen. E Yared, Mahalaleel atiw arawen. E Mahalaleel, Kenan atiw arawen.

³⁸E Kenan, Enos atis arawen. E Enos, Set atiw arawen. E Set, Adam atiw arawen. E Adam, Allah atiw arawen. Inima.