Read Central Asmat LUKAS 4 Bible Online

LUKAS 4 - Central Asmat bible

LUKAS 4

¹Barewen. Yesus, Yordan jo ewfasiefen. E Roh Kudusam, e Yesus aomomkurumef arawen. E Roh Kudus masirin, e Yesus, cem opok asan, isi empat puluh ajiwar ajisomosefen. Erasan, Iblis, Yesus, dosa bwem acajijimtawporefen. Erasan aememawiri, Yesus, amos pok amaseemawirien. E isi empat puluh ajiwar aememkurumef masirin, aramat ipic amosto aememefen.

³Iblisam atakam aramat ipic aotawefen. “Or Allah atiwnew, awames ek, amos baworom, jirmec ajirimey.” Inim aeefen.

⁴Yesus masirin, “E Alkitab atakam ara, ‘Asmat ow tetakay mememas, ar amos pok memen cowok arapok.’ Inim aema.” Yesus inim aeefen.

⁵Iblis masirin, aramat ipic op asan atowotometefen. Aram e capinmiin capinmiin takas asarimporomtamefen.

⁶Aram atakam Yesus aotawefen. “Dor a capinmi takasam, arakatnakutas takasam, aomomamin. Dor aras, ow batetam akat aemcey, bare atetamcimin araman. Bare, do aras or batetam ara.

⁷Or, dor asicimcenem, aras takas aomomcemem.” Inim aeefen.

⁸Yesus masirin, “E Alkitab atakam ara, ‘E Tuhan orAllah ara. Oram aramat ipic basicimey. Ar cowok kerja bwemtamey.’ E Alkitab inim aema.” Inim aeefen.

⁹Iblis masirin, Yesus, Yerusalem ajisomosef, wunam ar aramat ipic e Allah cem e opnakut onew pwinew atomettewapomefen. Aram atakam aotawefen. “Or Allah atiwnew, or e cenes juneyey.

¹⁰Bare, e Alkitab atakam, ‘Allah amalaikat, or manmok batiwem, jirmec ajirimcema.’

¹¹Wunam, ‘E malaikat, ban or atowomcemenes. E obwey, ek bapomotasin.’ E Alkitab inim atakam ara.” Iblis inim aeefen.

¹²Yesus masirin, “E Alkitab atakam ara, ‘E Tuhan or Allah ara. Oram aramat ipic bwempor arapok,’ Inim aema.” Yesus inim aeefen.

¹³Bare, e Iblis, Yesus dosa bwem acajijimtawkurumporef masirin, ar e Yesus bakan ajiosefen. Ar nat, asep jofay, asan akat aporcow, ar e Yesus dosa bwem bocajimtewporen.

¹⁴Barewen. Yesus, e Roh fakas epcom, Galilea capinmi aofasienefen. E capinmi ow takas, ar atakam atawfesen.

¹⁵Aramat ipicam, e ow asembahyang cem aman, atakam, ow amememtamefen. E ow takasam, aramat ipic, ow akat cowok, atakam atawfesen.

¹⁶Aramat ipic, kota Nasaret aenawefen. Bap ara, ar erasan sur aotemefen. Aramat ipic, e Ses Ban Jo, e sembahyang cem, ajiwapa ajimepen. Bare, e Ses Ban Joam, ar e cem aojiwapefen. Aram Alkitab baca bwemtam asitefen.

¹⁷E sembahyang cem manmok batiw ipic, e Allah atakam botaw ipic juwas Yesaya tulis aeef kitab, e Yesus atetamefen. Yesus masirin, e buku aparamomef, wunam atakam cowok apowtewefen. E atakam ara:

¹⁸“Tuhan Roh, dor akac aemaman. Aramat ipic, e Atakam Akat, e pok opok ow bacacapiom atewemfan. Aramat ipic, atakam botaw atewenamfan. ‘Ow car taw aatfan. E nat, aojisoscomokom. E ca manmok kapi ow, manmok atereycomokom. Tuhan e dar asan akat aomcemarow tahun, bare emeenawef.’ Tuhan inim atakam botaw dor atewemfan. Owam asan pwicak e wun ow aomomames. Tuhan nat, dor e asan pwicak ow, asan akat momom atewemfan.” Inim atakam baca aemtamefen.

²⁰Yesus masirin, e kitab akapimtiwef, wunam e sembahyang cem manmok batiw ipic aotetamefen. Aotetamef masirin, aneypwikapefen. E sembahyang cem aman emapfes ow takas, manmok, aramat ipic asirimapomfesen.

²¹Aramat ipicam atakam e ow aotawefen. “Dor wow e jen ajimokom Alkitab atakam jipu aemamin.” Inim aeefen.

²²E ow takas masirin, “Bare, aramat ipic atakamnak ara.” Inim aefesen. Aram e atakam akat cowok atawef, junum awut aefesen. “Aramat ipic nat, Yusuf atiw aranew?” Inim aefesen.

²³Yesus masirin, atakam, e ow aotawefen. “Caram inim atakam dor aotawcemenokom araman: ‘Dokter. Dam orma jaworemey. E Kapernaum aemfemas, atakam jen ajifom. Arasan nat, bare ocapinmi ara. Oram eras arasan emey.’ Inim aecemenokom.

²⁴Atakamnak ara, asamat ow, Allah atakam botaw ipic basicim opok aemcemes.

²⁵Dor atakamnak car aotawmin. Elia ememef ara, e Israel capinmi fwisma cepes arke aemapfesen. Tuhan tiga setengah ajiwar te opok arawen. E capinmi ow takasam amosto awutnakut aemapfesen.

²⁶Allah nat, e Elia, Sidon capinmi kota juwas Sarfat fwisma cowocpu atewosomefen. Ar, Elia, wun owpu batewosom opoken.

²⁷Wunam, e Elia ememef ara, penyakit kusta ow arke aememfesen. E dam akat aoemenfes ow nat, e Siria capinmi ipic juwas Naaman cowok arawen.” Inim aeefen.

²⁸E sembahyang cem aman aemapfes ow, inim atakam jen ajifes, ar jak amopnakut aemapfesen.

²⁹Aram awarimsitfes, wunam e Yesus e kota cesen aotpepemisimfesen. E kota bare, sikon op arawen. E ow e Yesus e sikon op fatarpu ajimocenfesen. Ar aramat ipic, erasan bajumnem aememfesen.

³⁰Aramat ipic nat, e ow wowoc atereyenef, wunam ajisosefen.

³¹Yesus masirin, Galilea capinmi kota juwas Kapernaum ajisosefen. Ses Ban Jo ara, ar atakam amememtamefen.

³²E owam, e amememtamef atakam, faknakut aporfesen. Inimas junum awut aefesen.

³³E sembahyang cem aman, dat jak aman emamesef ipic aemapefen. Aram atakam awut afakaytawefen.

³⁴“Yesus. Or Nasaret ipic ara. Or ucim pok emcarowem? Or da bafakamkurum arapen? Or nomsom. Or e Allah atewnemef tarowat ipic ara.” Inim aeefen.

³⁵Yesus nat, jirmec e dat ajirimefen. “Jokona. Oram e ipic jak aman ewfisey.” Inim aeefen. E dat masirin, e ipic e ow wowoc, cenes aneyjiwitiwefen. Aram e ipic jak aman ewfisefen. Aram e ipic bajurusumapom opok cowok arawen.

³⁶E ow takasam, junum awut aefesen. Aram atakam aamtawfesen. “Inim atakam ucim inimarama? Aramat ipic atakam faknakut ipic ara. Inimas ar jirmec e dat ajirimama. E dat masirin, afismes.” Inim aefesen.

³⁷Bare, e capinmi ara, e asanin asanin ow, aramat ipic atakam atawfesen.

³⁸Barewen. Aramat ipic asitef, wunam e sembahyang cem afisefen. Aram Simon cem afiwefen. E Simon anapwec dam awutnakut aemamesefen. E owam e Yesus e cowoc dam baworomtam janim aanimfesen.

³⁹Aramat ipic e cowoc ak akajiemef, wunam e dam amopas bakari jirmec ajirimefen. Bare, e cowoc dam ajufumapefen. Aram asarimsitef, wunam amos pok e ow atetamefen.

⁴⁰Barewen. Jo atief ara, ow, e ajowow dam ow, Yesuspu atowocenfesen. E ow cīncīn damas arawen. Aramat ipic masirin, ban e dam ow dam ton atatiwa inim aeefen. Ar e ow ajaworomtewa aeefen.

⁴¹Wunam, dat, ow arke jak aman aewwarimfisfesen. Aram atakam afakaytawfesen. “Or Allah atiw awamcem ara!” Inim aefesen. Aramat ipic nat, jiman e dat aafefen. “Car atakam arapok.” Inim aeefen. Aramat ipic, e dat, ar Allah atiw amsom aporefen.

⁴²Jo apuef ara, aramat ipic, e kota bakan ajiosefen. Aram cem opok asan ajisosefen. E ow arke nat, aramat ipic apowporfesen. Ar aramat ipicpu aenfesen. Aenfes masirin, akemomfesen. Aramat ipic wun asan baysosasin.

⁴³Aramat ipic nat, atakam e ow aotawefen. “Dor, e Allah Pemerintah Atakam Akat, e wun kota takas botaw aemin. Allah dor inimas bwem, atewenamfan.” Inim aeefen.

⁴⁴Bare, aramat ipic e Yudea capinmi sembahyang cem arke aman acacapioma aeefen.