Read Central Asmat LUKAS 5 Bible Online

LUKAS 5 - Central Asmat bible

LUKAS 5

¹Barewen. Yesus jopir aememefen. Jopir aememef ara, ow arke Allah atakam jen baji, aramat ipic dam akakajumamtawfesen. E jopir bwi juwas Genesaret arawen.

²Ci jamnukam e jo pim aemsefesen. Aramat ipicam e ci aporefen. Bap ara, jim bapi ow, bwi aneykoremfesen. Aram e ajim acicikimfesen.

³Aramat ipic e wun ci asawuefen. E Simon ci arawen. Yesus, ow, e ci, jicowoc inim botpem, janim aanimefen. Ar masirin, e ci aman aneypwikapef, wunam atakam e ow amememtamefen.

⁴Ar atakam e ow arke aotawefen. Ar masirin, atakamam e Simon aotawefen. “E kaku asan jirseey, wunam e jim, enam bapitew, batewpumey.” Inim aeefen.

⁵Simon masirin, atep ajitefen. “Guru. Iram jo jirow ara, aemporkurumesmom. Daram jim enam bojuwames opok cowok. E nat, or jirmec ajirimamenem. Inimas dor jim bwi atewpumamin.” Inim aeefen.

⁶E ow eras aemfes masirin, enam arkenakut apitewfesen. E ajimam bapwipwikiken arawen.

⁷Bare, ajowow wun ci aemsefesen. Ar, e ow, e jim akac bajimtew bwenaw, banwe aefesen. E ow masirin, aenawfesen. E ci jamnuk, enam apitimkurumfesen. E ci masirin, bwi basimompuken aemsefesen.

⁸E Simon Petrusam, e akac aemfes owam, eras takas aporfesen. Inimas junum awut aefesen. E Sebedeus atiperes jamnuk juwas Yakobusam, Yohanesam, junum awut aefesen. Ar e Petrus kerja akac ow arawen. Bare, e Simon Petrus, Yesus bipu jine onok aneyotapefen. Ar masirin, atakam aotawefen. “Tuhan. Dor dosa ipic ara. Inimas or a dobipu arapok. Orop asan jisosey.” Inim aeefen. Yesus masirin, atakam Simon aotawefen. “Omar arapok. Wow jofay ajiwar aemamesor ara, or asmat apowtewawarcemem.” Inim aeefen.

¹¹Bare, e ci wasan ajesjimtiwfesen. Aram e apok takas bakan ajifes, wunam Yesus ajamkawifesen.

¹²Barewen. Yesus, erasan kota cowok aememef, penyakit kusta ipic aenawefen. Aramat ipic e Yesus aporef, wunam abipu bi fop aneyjiapefen. Ar masirin, janim fak aanimefen. “Or faknakut ara. Or akat aporcem, or dam akat do batetam araman.” Inim aeefen.

¹³Yesus masirin, ban ajoromef, wunam e ipic dam ton atatiwefen. “Dor inimas akat ara. Or dam akat ememey.” Inim aeefen. Yesus inim atakam atawef masirin, e penyakit kusta, e ipic bakan asarimjiosefen.

¹⁴Yesusam jirmec ajirimefen. “Or aras atakam wun ow botaw arapok. O nat, e Allah atakam mamtaw tugas ipic akan akosey. Ar or baoworporcan. Or masirin, e Musa jirmec ajirimef pok, Allah tetamey. Eras or dam aememamem, inim baporomtamas ara.” Yesus inim aeefen.

¹⁵Bare, e asanin asanin, Yesus atakam an afufuosefen. Ow arkenakut, aratakam jen baji ajarewsia aefesen. Dam owam, aramat ipic, dam baworomtam ajarewsia aefesen.

¹⁶Aramat ipic nat, aotasiemef, wunam cem opok asan ajisosefen. Aram janim Allah aanimefen.

¹⁷Barewen. Jofay ara, Yesus atakam amememtamefen. Parisi owam, Allah Jirmec mamememtam owam, erasan aemapfesen. E ow, e Galilea ow samat takasam, e Yudea ow samat takasam, e kota Yerusalem aewenawfesen. Tuhan, e dam ow baworomtaw fakas, e Yesus atetamawirien.

¹⁸Ow masirin, japow ipic e atepen epcom atowocenfesen. Ar e ipic e cem aman bafomiw, wunam Yesus bipu baneytatiw aemporfesen.

¹⁹Erasan nat, ow arkenakut aememfesen. Inimas ar e ipic bwemfomiw asan opoken. Ar masirin, e ipic e cem onewmak op atowotometfesen. Aram e onew jof afimapomfesen. Aram e ipic tepen epcom, e ow arke aman, ateremnemfesen. E Yesus bipu aneytatiwfesen.

²⁰Yesus masirin, e ow a basicimnak aporef, wunam atakam aotawefen. “Dor e odosa akokoromosomtamamin.” Inim aeefen.

²¹E Allah Jirmec mamememtam owam, e Parisi owam, bi binip aceceremfesen. “E ipic cam? Ar Allah awcawor arawen. Inimas ar pwicak atakam awut atawma. Allah cowok dosa akokoromosomtamcema.” Inim bi binip aceceremfesen.

²²Yesus e ow bi binip aceceremfesas aporef, wunam atakam aotawefen. “Car e bi binip aceceremamokomas ucimaram?

²³E ton atakam, ucim atakamaramnew? ‘Dor e odosa akokoromosomtamamin,’ inim atakam aranew? ‘Basitey. Oram bajarey,’ inim atakam aranew?

²⁴E Asmat Anakat Ajaworemef Ipic, awames capinmi ow dosa bakokoromosomtam fakas aomomamar araman. Dor car inimas baporkurum akat ara.” Inim aeefen. Aramat ipic masirin, atakam e japow ipic aotawefen. “Jakaperey. Basitey! E otepen batewey! Oram cema!” Inim aeefen.

²⁵E ipic masirin, e ow bipu asarimsitefen. Ar e aemamesawiri tepen atewef, wunam acem ajisosefen. Aram Allah asicimefen.

²⁶E ow takas, bare, junum awutnakut aefesen. Aram Allah asicimfesen. Omaram aefesen. “Dar wow akatnakut pok manmok atiwmom ara.” Inim aefesen.

²⁷Barewen. Eras aemkurumef ara, Yesus ajisosefen. Aram pemerintah uang batawanimtam kerja ipic juwas Lewi e uang batawanimtam cem aman aemapef aporefen. Aramat ipic masirin, atakam e ipic aotawefen. “Mamkawican.” Inim aeefen.

²⁸Bare, e ipic asitef, wunam Yesus ajamkawiefen. Aram e apok takas bakan ajiosefen.

²⁹Wunam, e Lewi, e acem, pokbwi awut, e Yesus aemtamefen. Pemerintah uang batawanimtam kerja ow arkeam, wun ow arkeam, e ow amos akac aanfesen.

³⁰E Parisi owam, e arAllah Jirmec mamememtam owam, icim e Yesus mamkawi ow afesfesen. “Car, e pemerintah uang batawanimtam kerja owam, e dosa owam, amosam bwiam cowkon aanmokom ucimaram?” Inim aefesen.

³¹Yesus masirin, e ow atep ajitefen. “Dam akat ow, dokter janim manim opok aemcemes. E dam pwicak ow nat, dokter janim aanimcemes.

³²Dor, tarowat ow, dosa bak bapayem bapenaw opok. Do nat, fasi ow, ay bi binip bacecerem bayte aapenawof.” Inim aeefen.

³³Barewen. E ow, atakam, Yesus aotawfesen. “E Yohanes mamkawi ow, bar arke, amos pok amasecemes. Aram bar arke, janim Allah aanimcemes. E Parisi mamkawi owam inimas aemcemes. E omamkawi ow nat, amosam, bwiam, aancemes.” Inim aefesen.

³⁴Yesus masirin, atakam e ow aotawefen. “Ay petew ipic e ajowow cowkon aemapmesnew, ow e ajowow amos bamase jirmec bajirimji open?

³⁵Asep jofay nat, ow e ay petew ipic, e ajowow wasec aemtewcemes. E ajowow masirin, amos pok amasecemes.” Inim aeefen.

³⁶Yesus baposomtew atakam e ow aotawefen. “Ow, ay baju bip bakamtew, wunam e bip, tarey baju ton bakakamimapom, inimas bwemporji opok. Ar inimas aemcesnew, ar e ay baju akamtewcemes. E nat, e bip e tarey baju awcawor opok aemamescema.

³⁷Ow, ay anggur bwi, tarey picin bwi ese aman bowapomporji opok. Ow, ay anggur bwi, tarey picin bwi ese aman aowapomces, e ay anggur bwi, e picin ese ateremomiscema. E anggur bwiam aokoyameskurumcema. E picin eseam ananasiamescema.

³⁸E nat, ow ay anggur bwi ay picin ese aman aowapomcemes.

³⁹Ow tarey anggur bwi aances, ar ay anggur bwito opok aemcemes. ‘E tareyas akat ara.’ Inim aecemes.” Yesus inim aeefen.