Read Central Asmat LUKAS 6 Bible Online

LUKAS 6 - Central Asmat bible

LUKAS 6

¹Barewen. Ses Ban Jo ara, Yesusam, amamkawi owam, gandum kebun ajarfesen. E amamkawi ow ajarfes ara, aram e gandum eke, ametemkokomtawfesen. Aram e eke ban airirimfes, wunam e eke aemenfesen.

²Wun Parisi ow nat, atakam aotawfesen. “E Ses Ban Jo aemamokomas ara, bare Allah Jirmec aopowmokom, E aemamokomas ucimaram?” Inim aefesen.

³Yesus masirin, “Car, e Daud aemefas, baca bwem opoknew? Aram, e akac aemfes owam, amosto aememfesen.

⁴Aramat ipic e kota juwas Nob aememef ara, aram erasan Allah cem afiwemefen. Afiwemef masirin, ar e Allah bipu atatitamfes amos atewenefen. Wunam ar e wun amos e amamkawi ow sey aseyetamefen. E amos nat, e Allah atakam mamtaw tugas ow amemenas arawen. Mami ow, e amos memenji opoken. Daragama jirmec inim atakam ara.

⁵E Asmat Anakat ajaworemef Ipic, bare e Ses Ban Jo aramat ipic aememama.” Inim aeefen.

⁶Barewen. Wun Ses Ban Jo ara, Yesus sembahyang cem afiwemef, wunam atakam amememtamefen. Erasan ara, bo ban sipi ipic aemapefen.

⁷E Allah Jirmec mamememtam owam, e Parisi owam, Yesus, e ipic, e Ses Ban Jo, baworomtew epen, manmok asirimemfesen. Aram, “Yesus pwicakas aemama,” inim atakam botaw jak aserememfesen.

⁸Aramat ipic nat, e ow bi binip amsom arawen. Ar masirin, atakam e ban sipi ipic aotawefen. “Basitey. Or awamces ow takas bipu ememey.” Inim aeefen. Bare, e ipic asitef, wunam erasan aememefen.

⁹Yesusam atakam e ow aotawefen. “Dor jonow ca batowpor. Dar e Ses Ban Jo Jirmec ji aecom, dar ucimas emcom? Dar akatas bwem aranew? Pwicakas bwem aranew? Dar ow bajortew aranew? Ow bacatiw aranew?” Inim aeefen.

¹⁰Aramat ipic masirin, e fumi abwiricapfes ow, manmok a takas atiwefen. Ar masirin, atakam e ban sipi ipic aotawefen. “Ban bajoromey.” Inim aeefen. E ipic inimas aemef ara masirin, e ban ajaworemefen.

¹¹E ow nat, jak amopnakut apwiapfesen. Aram atakam aramaman aamtawfesen. “Dar a Yesus ucim pok emcom?” Inim aefesen.

¹²Barewen. Jofay ara, Yesus, Allah janim manim, sikon op aaptometefen. Ar, e iram jo jirow, janim Allah aanimesmepen.

¹³Jo apuamesef ara masirin, aramat ipic, e amamkawi ow ajateefen. Aram ow dua belas ajiwar aeremtewefen. Ar e ow juwas “atakam botaw batewosom ow” aamemefen.

¹⁴E ow dua belas ajiwar, Simon ara. (Yesus, wun juwas Petrus e ipic aamefen.) Simon arewec juwas Andreas ara. Yakobus ara. Yohanes ara. Filipus ara. Bartolomeus ara.

¹⁵Matius ara. Tomas ara. Alfeus atiw juwas Yakub ara. Simon ara. (Ow, e Simon, agama fak ipic ara, inim atakam aotawfesen.)

¹⁶Yakobus atiw juwas Yudas ara. Yudas Iskariot ara. Inima. (Asep jofay ara, e Yudas, Yesus, jokmen ow aotasimemtamef arawen.)

¹⁷Barewen. Yesus, e ow akac aneyfesen. Aneyfes masirin, cawor capinmi asan aememfesen. E amamkawi ow arkenakutam akac aememfesen. Wun ow arkenakut e Yudea capinmiam, e kota Yerusalemam, e kota jamnuk juwas Tirusin Sidon jopir capinmiam, ewenawfesen.

¹⁸E ow, aramat ipic atakam jen bajiam, aramat ipic e asan pwicak ow baworomtawam, aenawfesen. Aramat ipic e dat jak aman owam ajaworomtawefen.

¹⁹Dam baworom fakasam e Yesus dam aewfisa aeefen. Inimas ar e dam ow takas ajaworomtawa aeefen. E ow arke takas inimas aporfes, wunam aramat ipic dam ban bakurum aemporfesen.

²⁰Barewen. Yesus e amamkawi ow, manmok apemporef, wunam atakam aotawefen. “Ca pok opok ow, asan akat aemapcomokom. E caraja ipic, bare Allah ara.

²¹E ca wow amosto emapmokom ow, asan akat aemapcomokom. Asep jofay, bare, jak apitapcomokom. E ca wow bwec abwecmokom ow, asan akat aemapcomokom. Asep jofay, bare, uc aoccomokom.

²²Wun ow car e Asmat Anakat Ajaworemef Ipic mamkawi ow aporcan, aram bifan afayomceman. Aram car aotewerosomceman. Aram cemew aatceman. Aram cajuwas pwicak aemcemes. Inimas e cajuwas boji opok aememcemes. Inimas aemcannew, bare car asan akat aemapcomokom.

²³E ow arafasutmar, e Allah atakam botaw ow, inimas cowok aemfesen. Ca nat, jakaperey. Allah e onam op, asan akatnakut car atetamceman. Inimas ara, e ow inimas aemcan jofay, bare jak akat epcom mamsosopiey.”

²⁴“Ca pok awut ow nat, ajurusapcomokom. Car bare, e cajak akatas emcatewetfokom.

²⁵Ca wow jak apitapmokom ow, ajurusapcomokom. Asep jofay, amosto aememcomokom. Ca wow uc aocmokom ow, ajurusapcomokom. Asep jofay, jak pwicak aemapcomokom. Caram bwec abweccomokom.

²⁶Ow takas atakam akat car aotawcannew, caram ajurusapcomokom. E ow arafasutmaram, atakam akat, e Allah atakam botaw suw ow, aotawfesen.”

²⁷“E doratakam jen ajimokom owa. Jakaperey. E cajewew ow damos mamjiomey. E bifan afayomaman ow, asan akat mamomey.

²⁸E car bajurusum jirmec ajirimceman ow, asan akat mamomey. Caram Allah, asan akat, e cemew aatman ow batetam, janim mamanimtamey.

²⁹Ow, e poman ak apompocannew, or e poman akam mamofirimtamey. Ow, e obaju kemeja atewces, or e obaju kausam acuw bat arapok.

³⁰E janim aaniman ow takas, pok mamtatamey. Ow e opok atewces, e pok botetam janim manim arapok.

³¹Car, ow, asan akat car bom akat apormokomnew, caram asan akat e ow mamomey.”

³²“Car, damos e damos car ajiomaman ow cowok ajiomcokom, ow, car ow akat, inim atakam botaw arapen? Bare, dosa owam, e adamos ajiomames ow, damos ajiomames.

³³Wunam, car, e car asan akat aomaman ow, asan akat aomcokom, ow, car ow akat, inim atakam botaw arapen? E dosa owam inimas cowok aemames.

³⁴Wunam, car, pok, ow atetamcokom, wunam car e ow, pok, car botetam manmok atiwapcokom, ow, car ow akat atakam botaw arapen? Bare, dosa owam, pok, dosa ow atetamcemes, wunam e ow, inim awut pok botetam, manmok atiwapcemes.

³⁵Allah e terima kasih atakam botaw opok owam, e dosa owam, asan akat aomama. Inimas ara, caram e cajewew ow damos mamjiomey. E ow asan akat mamomomey. Pok, ow mamtetamey. Wunam e ow, pok, car botetam, manmok batiwap arapok. Inimas aemcokom, Allah asan akatnakut car atetamceman. Caram e opnakut Allah atiperes aememcomokom.

³⁶E caricipic, bare ow serow ipic ara. Caram ow serow, inim mamememey.”

³⁷“Caram, ow e asalah, atakam basakamtiw arapok. Allah masirin, e casalah atakam basakamtiw opok aemcema. Caram, ‘Or salah emeemfem,’ inim atakam wun ow botaw arapok. Allah masirin, ‘Or salah emeemfem,’ inim atakam car botawtotor opok aemceman. Ow salah car aemcannew, e salah, bi binip mamiwosomey. Allah masirin, e casalaham, bi binip ajiwosomcema.

³⁸Pok, ow mamtetamey. Allah masirin, pok car aotetamceman. Aram ese awut pok epcom inim cimin atetamceman. E ese aman pok aotasisimnemcema. Aram e ese pok epcom akokoromwimcema. Car pok awutnew, pok kanimnew, ow atetamcokom, Allah inim awut pok aotetamceman.” Inim aeefen.

³⁹Yesus baposomtew atakamam e ow aotawefen. “Manmok kapi ipic, wun manmok kapi ipic banfe bajimomatji open? Inimas aemces, e jamnuk takas jof akac aneyfifiapcemes araman.

⁴⁰Mamemem ipic awut ara, wunam e amamememtam ipic kanim ara, bare inimas opok. E nat, e mamemem ow takas amememkurumces, aram e amamememtam ipic, awcawor aememcemes.

⁴¹Car ponowas kanimnakap, e cajowow ipic manmok aman apormokom. E nat, e camanmok aman balok, bapor opok aemamokom. Ucim inimasaram?

⁴²Car e omanmok aman balok bapor opok aemamokom, wunam atakam e ojowow ipic aotawmokom, ‘Dor e omanmok ponowas bemosomtam.’ Car inim atakam botaw nat, ucimaram? Car pir bwe ow ara. E camanmok aman balok batakamemosomey. Wunam e cajowow ipic manmok ponowas kanimnakap bemosomtam, manmok akat atiwcomokom.”

⁴³“Os akat, eke pwicak bwempe asan opok. Wunam, os sakuwe, eke akat bwempe asan opok.

⁴⁴Ow, e os eke aporces, ar e os, akat osnew, pwicak osnew, inimas aporcemes. Ow, e os eke aporces, ar e os, akat osnew, pwicak osnew, inimas aporcemes. Ow, os eke juwas ‘arā,’ fa epcom os kari bwemkomtew asan opok. Aram anggur eke, awor fa os bwemkomtew asan opok.

⁴⁵Akat ow, e ajak aman momomas, bare akatas ara. Inimas ar akat pok aemames. Pwicak ow nat, e ajak aman momomas, bare pwicakas ara. Inimas pwicak pok aemames. Ow, e ajak aman omomamesas jipu atakam atawmes.”

⁴⁶“Car atakam dor aotawmenokom, ‘Tuhan, Tuhan.’ Inim aemenokom. E nat, car e atawmin atakam ji bwe opok aemamokom, ucimaram?

⁴⁷Wun ow dor aenawomamenes, wunam doratakam jen ajimes. Aram e atakam ji aemes. E ow awcawor cacinam? Bare, dor eras atakam umuton car aotawmin.

⁴⁸Ar cem bweapom ipic awcawor ara. Aramat ipic, e fasis amannakut ajirimakamnemefen. E fasis, e se komkom ajiwar aneyjirimapomefen. Wapu bwi awutnakut aemseefen. E bwi je awutam, e cem aapommenamefen. E nat, e ipic, e cem faknakut aeapomefen. Inimas e bwi je, e cem bwemwawarim asan opoken.

⁴⁹Wun ow, doratakam jen ajimes. E ow nat, e atakam ji bwe opok aemes. E ow wun cem bweapom ipic awcawor ara. E ipic, fasis opok ceme se desen aeapomefen. E bwi je awut e cem aapommenamefen. E cem masirin, asarimneyjuwseefen. Aram daniwisnakut aemamesefen.” Yesus inim aeefen.