Read Central Asmat LUKAS 7 Bible Online

LUKAS 7 - Central Asmat bible

LUKAS 7

¹Barewen. Yesus atakam e ow aotawkurumefen. Ar masirin, kota Kapernaum afiwefen.

²Erasan ara, tentara komandan ipic, kerja bwemtam ipic aomomefen. Ar e ipic damos ajiomefen. E ipic nat, dam ajowef, wunam damir bafken aemamesefen.

³E komandan ipicam Yesus atakam jen ajiefen. Yesus atakam jen ajief masirin, ar Yahudi ducur ow Yesuspu atewosomefen. “Car e Yesus arasan bwenaw, wunam e dokerja bwemtam ipic dam baworomtam, janim mamanimporey.” Inim aeefen.

⁴Bare, e ow Yesus aenawomfes, wunam janim fak aanimfesen. “E komandan ipic, bare, ow akat ara. Inimas or eras aramat ipic bwemtamji.

⁵Aramat ipic e dasamat damos ajiomama. Aram e dasembahyang cem aeapomtamforow.” Inim aefesen.

⁶Bare, Yesus e ow akac aenfesen. Ar e cem sotop inim ajaremef ara, e komandan ipic, ajowow, Yesuspu atewosomefen. E ow masirin, e komandan ipic aratakam Yesus ajomatfesen. “Tuan. Dor or boemcimtew opok. Dor or awcawor opok. Inimas or e docem bwemfiwomiw asan opok.

⁷Inimasam ara, dor e obipu bwemenaw asan opok. O nat, atakamin atawey. E dokerja bwemtam ipic masirin, ajaworsitcema.

⁸Doram ow jirmec ji aemin, wunam dor e dotentara ow jirmec ajirimamin. Dor wun tentara ipic, ‘Baysosey,’ inim aecey, aramat ipic ajisoscema. Doram wun ipic, ‘Bwenawey,’ inim aecey, aramat ipicam aenawcema. Doram e dokerja bwemtam ipic, ‘Inim pok pwemey,’ inim aecey, bare aramat ipic inim pok aemcema.” Inim aeefen.

⁹Yesus inim atakam jen ajief masirin, ar e ipic junum aeefen. Ar e fa asep asoromfes ow arke, bin afiromefen. Aram atakam e ow aotawefen. “Jakaperey. Awamec ipic Allah basicim fak ipic ara. Dor e Israel ow aman, awamec ipic awcawor ow, bi bapor opokut.” Inim aeefen.

¹⁰E komandan atewosomef ow, e cem aofasiosfesen. Cem aofasiosfes masirin, ar e kerja bwemtam ipic asan akat aporfesen.

¹¹Barewen. Ajofay ara, Yesus kota juwas Nain ajisosefen. Amamkawi owam, wun ow arkeam, akac ajisosfesen.

¹²Aramat ipic e kota fumi pagar jimasap sotop ajaref ara, ow damir ipic, cesen atowomisfesen. E ipic fwisma cowoc atiw cowokut arawen. E kota ow arkeam e cowoc akac ajarfesen.

¹³Tuhan e cowoc aporef, ar saw akat aoworporefen. Aram atakam e cowoc aotawefen. “Bwec arapok.” Inim aeefen.

¹⁴Aramat ipic masirin, e damir ipic koak amerkayiemefen. Aram e ko ban akurumefen. E ko atowomfes owam atukemfesen. Yesus masirin, atakam aotawefen. “Ata. Basitey.” Inim aeefen.

¹⁵E damir ipic masirin, asitapefen. Aram atakam aotawefen. Yesus masirin, e ipic, arosowoc aotetamefen.

¹⁶E ow takasam omar aefesen. Aram Allah asicimfesen. “Allah atakam botaw ipic awut, dawowoc emesitef. Ar Yesus ara.” Wunam, “Allah arow, akac aemama.” Inim aefesen.

¹⁷Barewen. Yesus an e Yudea capinmi samat takasam, e ak kayiapfes samat takasam, afufuosefen.

¹⁸Yohanes amamkawi ow, eras takas e Yohanes otawfesen.

¹⁹Aramat ipicam amamkawi ipic jamnuk ajateefen. Ar e ipic jamnuk Yesuspu atewosomefen. “‘Or e Allah atewenamamar ipic aranew? Dar wun ipic bwenaw manmok bofe aranew?’ Car Yesus inim jonow mamtowporey.” Inim aeefen.

²⁰Bare e ow Yesuspu ameremfesen. Ameremfes masirin, atakam aramat ipic aotawfesen. “Yohanes Bwi Babwim Ipic, dar jonow or batowpor, atewenamamarow. ‘Or e Allah atewenamamar ipicnew? Dar wun ipic bwenaw manmok bofenew?’ Inim jonow or batowpor atewenamamarow.” Inim aefesen.

²¹E jofayam ara, Yesus dam ow arkeam, ajurusemfes ow arkeam, dat jak aman aemapa aefes ow arkeam, ajaworomtawa aeefen. Aram manmok kapi ow arkeam, e manmok aterema aeefen.

²²Aramat ipic masirin, atakam e Yohanes atewenamef ipic jamnuk aotawefen. “Car baysosey, wunam e apormokomasam, e jen ajimokomasam, atakam Yohanes mamotawey.” “Manmok kapi ow, manmok atereymes. Bwey jini ow ajarmes. Penyakit kusta owam dam orom aememames. Jen biri ow jen ajimes. Damir ow ajaworsitmes. Ow e Atakam Akat e pok opok ow acacapiomames.” Inim mameey.

²³“Bare, e do mamkawi bakorompim opok ow, asan akat aemapmes.” Yesus inim aeefen.

²⁴E Yohanes atakam bajomattam ipic jamnuk ajisosfesen. Yesus masirin, e Yohanes atakam, e ow arke aotawefen. “Car e cem opok asan, ucim pok bapor ajisosfokom? Car fo firko bawawarim manmok batiw ajisosfokomnew?

²⁵Ca nat, ucim pok bapor ajisosfokom? Pakaian akat ajimomef ipic bapor ajisosfokomnew? Jakaperey. Wun ow pakaian akatnakut ajimomames. Aram pokin pokin aomomames. E ow, bare raja cem aman aemapmes.

²⁶Ca nat, ucim pok bapor ajisosfokom? Allah atakam botaw ipic bapor ajisosfokomnew? Owoman. Ca nat, jakaperey. Allah atakam botaw ow, kanim ara. E Yohanes nat, awut ara.

²⁷E Alkitab e Yohanes inim atakam atawmar ara: ‘Jakaperey. Dor e doratemen ipic bap atewosomcimin. Or masirin, asep ara. Aramat ipic, e obwey asan akenemcema.’ E Alkitab inim atakam ara.

²⁸Jakaperey. E Yohanes, bare awut ara. E wun cepes e jispetiwfes ow, kanim ara. E nat, e Allah Pemerintah Asan aemapmes kanimnakap ow, bare awut ara. E Yohanes masirin, kanim ara.” Yesus inim aeefen.

²⁹Bare, e mami ow takasam, e pemerintah uang batawanimtam kerja owam, inim atakam jen ajifesen. Aram atakam aotawfesen. “Allah, bare tarowat araman.” Inim aefesen. Bap ara, Yohanes e ow bwi emcabwimefen.

³⁰Bare, e Parisi owam, e Allah Jirmec mamememtam owam, e Yohanes bwi a babwim pwicaken. Allah nat, e ow bwi babwi, atakam emcasakamtiwefen. E ow nat, e atakam aopowfesen.

³¹Yesus, bare, atakam aotawefen. “Dor awaniemames ow awcawor inim, ucim atakam aotawcey? E ow ucimas awcaworaram?

³²A ow, pasar asan bemap jiwi awcawor ara. E jiwi atakam awut aamjirimcemes. ‘Dar em car emekurumtamfenom. Ca nat, di badi opokut. Daram awan bwec abwecfom. Ca nat, bwec opokut.’ E jiwi inim aecemes.

³³E Yohanes Bwi Babwim Ipic aenawef ara, ar amosam, anggur bwiam, ban opok. E nat, car atakam aotawmokom. ‘E ipic jak aman dat awap.’ Inim aemokom.

³⁴E Asmat Anakat Ajaworemef Ipic aenawef nat, ar amosam, bwiam, anawiri. E nat, car atakam aotawmokom. ‘Jakaperey. E ipic amos paknam ipic ara. Aram jokmen bwi jayic ipic ara. Ar, pemerintah uang batawanimtam kerja owam, dosa owam, ajowow ipic ara.’ Inim aemokom.

³⁵Allah bi binip nat, umuton cowok ara. E Allah atakam ji bwe ow, eras atakamnak apormes.” Yesus inim aeefen.

³⁶Barewen. Parisi ipic cowok janim Yesus aanimefen. “Oram dey. E docem amos akac memen.” Inim aeefen. Yesus masirin, e ipic cem afiwefen. Aram amos memen aneypwikapefen.

³⁷Bare, e kota ara, dosa cowoc aemapefen. E cowoc, Yesus, e Parisi ipic cem amos memen, atakam jen ajiefen. Ar masirin, ek botol minyak wangi epcom atowocenefen.

³⁸E cowoc masirin, aramat ipic bweypu jine onok aneyotapefen. Aram bwec abwecefen. E abwec manem, Yesus e bwey aneypwipwitimtiwefen. Inimas e bwey boco arawen. Aram e bwey boco, e akus fin aerewefen. Aram e bwey ak aafopefen. E minyak wangiam, e bwey bak ton aokomnemefen.

³⁹E Yesus janim aanimef Parisi ipic, eras aporef, ar bi binip aceceremefen. “A ipic, Allah atakam botaw ipic ayaw, ar e adam akurumaman cowoc amsom ara. Aram e cowoc aemawirias amsom ara. E cowoc, bare dosa cowoc ara.” Inim bi binip aceceremefen.

⁴⁰Yesus masirin, atakam aramat ipic aotawefen. “Simon. Dor atakam cowok or botawmin.” Inim aeefen. Aramat ipic masirin, “Guru. Batawey.” Inim aeefen.

⁴¹Yesus masirin, baposomtew atakam e ipic aotawefen. “Uang aramat ipic cowok, uang, batowoptam ipic jamnuk, atetamefen. Ar dinar lima ratus ajiwar e wun uang batowoptam ipic atetamefen. Aram dinar lima puluh ajiwar e wun ipic atetamefen.

⁴²Asep jofay nat, e ipic jamnuk takas, uang opoken. Inimas ar uang e uang aramat ipic bwemotetam asan opoken. E uang aramat ipic inimas aporef masirin, ‘Bare, car e uang inim tewetey.’ Inim aeefen. E uang aramat ipic damos awut bajiom ipic nat, ucim ipicam? E damos kanim inim ipic, ucim ipicam?” Inim aeefen.

⁴³Simon masirin, “Dobinip ara, e uang awut atewetef ipic, damos awut e ipic ajiomef ara.” Inim aeefen. “E atakamnak ara.” Yesus inim aeefen.

⁴⁴Yesus masirin, e cowoc bin afiriomefen. Aram atakam Simon aotawefen. “Or a cowoc apormemnew? Dor a ocem fiwemey. O nat, e dobwey bacicikim bwi, do batetam opokut. E cowoc nat, e abwec manem, e dobwey aneypwipwitimtiwan. Ar e dobwey boco, e afin, aerewan.

⁴⁵Oram ak do bafop opokut. Dor a cem jisapey nat, e cowoc, e dobwey, ak bafop bakari opok aemama.

⁴⁶Oram minyak e dokus bokomnem opokut. E cowoc nat, minyak wangi, e dobwey aokomneman.

⁴⁷Inimas ara, oram jakaperey. E cowoc adosa awut akokorosma. Inimas ar damos awut dor ajimaman. E dosa kanim bakokoros ow nat, damos kanim ajiomcemes. Yesus inim aeefen.

⁴⁸Aramat ipic masirin, atakam e cowoc aotawef. Dor e odosa akokoromosomtamamin.” Inim aeefen.

⁴⁹E amos akac aemenfes ow, bare, atakam aramaman aamtawfesen. “A ca ipicam? Ar dosaut akokoromosomtamama.” Inim aefesen.

⁵⁰Aramat ipic masirin, atakam, e cowoc aotawefen. “Or asicimamenem. Inimas or ajoremamem. Bare, oram asan akat baysosey.” Inim aeefen.