Read Central Asmat LUKAS 8 Bible Online

LUKAS 8 - Central Asmat bible

LUKAS 8

¹Yesus eras aemkurumef masirin, ar bafafay opoken. Ar e wun kota arkeam, e wun samat arkeam, fumi abwiritjarefen. Aramat ipic e Allah Pemerintah Atakam Akat acacapiomefen. E amamkawi ow dua belas ajiwaram akac aemfesen.

²Wun cepesam akac aemfesen. Bap ara, dat e cepes jak aman aemaptotorfesen. E cepesam dam aememfesen. Yesus nat, e cepes ajaworomtawefen. E wun cowoc juwas Maria arawen. Ar wun juwas Magdalena arawen. Bap ara, dat tujuh ajiwar e cowoc jak aman ewfisfesen.

³Wun cowoc masirin, juwas Yohanes arawen. Ar Kusa arem arawen. E Kusa, e Herodes pok manmok batiw ipic arawen. Wun cowoc masirin, juwas Susana arawen. Wun cepesam arke arawen. E cepes, e awun pok, e Yesusam, e amamkawi owam, atatamfesen.

⁴Ow, kota arke, aramat ipicpu ewenawfesen. E ow arkenakutam ajarewsiemfesen. E aramat ipicam baposomtew atakam e ow aotawefen.

⁵“Kebun kerja bwem ipic, eke bajijimirsam ajisefen. E eke ajijimiref ara, wun e bwey asanpu aneyjuamestotorefen. Ow e eke bwey acawuemfesen. Sok masirin, e eke anakurumfesen.

⁶Wun eke masirin, ek capinmi asanpu aneyjuamestotorefen. E capinmi nat, boco opoken. Inimas e eke ajittotoref, wunam sa asatotorefen.

⁷Wun eke masirin, fa epcom akan aman aneyjuamestotorefen. E eke akanam, e fa epcom akanam, akac awaniefen. E fa epcom akan nat, e eke akan apwirimopefen. Aram e eke akan asanamimapomefen.

⁸Wun eke masirin, capinmi akat asanpu aneyjuamestotorefen. Aram ajittotoref, wunam e eke aporsipor, wun eke seratus ajiwar apeteptotorefen.” Yesus inim aeefen. Yesus inim aeef masirin, atakam afakaytewefen. “Jen fo ow, a atakam jen bajices.” Inim aeefen.

⁹E amamkawi ow masirin, jonow, e aramat ipic atowporfesen. “A baposomtew atakam, ucimas awcaworaram?” Inim aefesen.

¹⁰Aramat ipic masirin, atakam aotawefen. “E Allah Pemerintah aenawcow jofay atakam, bare amannakut atakam ara. E amannakut atakam jen bajikurum, bare caras ara. Do nat, baposomtew atakamin, e wun ow aotawmin. E ow e atakam apormes. E nat, ar baporkurumasin. Aram atakam jen ajimes. E nat, ar jen bajikurumasin.”

¹¹“A baposomtew atakam inimas awcawor ara: E eke, bare e Allah atakam inim awcawor ara.

¹²E bwey asan aneyjuamestotoref eke, e atakam jen ajicemes ow inim awcawor ara. E ow e atakam jen ajices, e Iblis e owpu aenawomcema. Aram, e ow, e bi binip aceceremames atakam, atewcema. E ow, e Bajortew Ipic atakam basicimasin. Aram bajoremasin.

¹³E ek capinmi aneyjuamestotoref eke masirin, e atakam jen ajicemes wun ow inim awcawor ara. E ow e atakam jen ajices, aram jak akat aememcemes. Aram bimi batorow opok eke awcawor ara. Aram jipinnakap asicimcemes. E Iblis e ow dosa bwem acajijimtawporcema. E ow masirin, akoromcemes.

¹⁴E fa epcom akan aman aneyjuamestotoref eke masirin, e atakam jen ajices wun ow inim awcawor ara. Asep jofay e ow awames capinmi fa jakayas bi binip awut aceceremcemes. Aram pok arke batat jak aseremomcemes. Inimas ar e Allah atakam bi binip acawucemes. Aram Allah kerja bwemtamkurum opok aemcemes.

¹⁵E capinmi akat aneyjuamestotoref eke masirin, e atakam jen ajices wun ow inim awcawor ara. Ar ow tarowatam, ow akatam, aememcemes. Ar e atakam bi binip acowomopcemes. Aram bakorpi opok aecemes. Inimas ar jak jirow epcom Tuhan kerja akat aemtamcemes.”

¹⁶“Ow pelita ateremapomces, ar e pelita, ember aman bwemkapimapom asan opok. Aram e pelita, tempat tidur caman bwemjiwtewapom asan opok. E ow nat, e pelita, op asan atewapomcemes. Er e cem afiwces ow, pelita sereas baporas ara.

¹⁷E bacukumapomas takas, umuton atewapomcemes. E curuwas takasam, umuton aemapcemes. (E baposomtew atakam takas inim cowok ara.)

¹⁸Inimas ara, e jen ajimokomas pimicima. E atakam jen ajikurumces ow, wun atakamam jen aojicemes. E arakam jen bajikurum opok ow nat, ‘Dor e atakam jen kanim ajimin.’ Inim aetotorcemes. E nat, e jen ajifesasam binip aanimcemes.” Yesus inim aeefen.

¹⁹Barewen. Yesus arosowocam, arewcewesam, aramat ipic aomocenfesen. Erasan nat, ow arke aememfesen. Inimas ar, aramat ipic, mamemjiwkawiem asan opoken.

²⁰Ow masirin, atakam Yesus aotawfesen. “Orosowocam, orewcewesam, cesen awamces. Ar obi boworporen.” Inim aefesen.

²¹Aramat ipic nat, “Wun ow Allah atakam jen ajimes, wunam e atakam ji aemes. E ow, bare dorisepesam, dorewcewesam ara.” Inim aeefen.

²²Barewen. Jofay ara, aramat ipicam, amamkawi owam, ci asawufesen. Aramat ipic masirin, atakam e ow aotawefen. “E poman ajirmoc.” Inim aeefen. Bare, aram anajuwfesen.

²³E poman apijirfes ara, Yesus e ci aman isi apwitamesefen. Jon awutut masirin, awumenamefen. Waam e ci asawuefen. Inimas aram asan pwicakut aemsefesen.

²⁴E amamkawi ow masirin, Yesus ameromfes, wunam ajitimfesen. “Guru! Guru! Dar bwi damir aafcomom openow.” Inim aefesen. Bare, aramat ipic ajitefen. Ar jirmec e foam, e wa awutam, ajirimefen. Bare e foam, e waam, akarisefesen.

²⁵Aramat ipic masirin, atakam, e ow aotawefen. “Car dor basicim opok, ucimaram?” Inim aeefen. E ow masirin, omar aefesen. Aram junum aefesen. Aram atakam aramaman aamtawfesen. “A ca ipicam Ar e foam e bwiam, jirmec ajirimama, wunam ar aratakam ji aemes.” Inim aefesen.

²⁶Barewen. Yesusam, amamkawi owam, Gerasa capinmi ajirtayfesen. E Gerasa capinmi e Galilea capinmi awumin ara.

²⁷Aramat ipic asowkuefen. Asowkuef masirin, jipic cowok e Yesus biamnuk aemamtewefen. E ipic jak aman, bare dat arke arawen. Tarey bwiut e ipic dam fi aemapawirien. Aram cem aman bemap opoken. Ar awerem asan aemapawirien.

²⁸E ipic Yesus bi aporef, ar jen ajiefen. Aram Yesus bipu bi fop aneyjiapefen. Atakamam afakaytewefen. “Yesus. Or e opnakut Allah atiw ara. Or ucim pok emcenem? Dor janim or aanimamin. Or do bajurusum arapok.” Inim aeefen.

²⁹E datam, e Yesus, ar e ipic jak aman bafis, jirmec ajirimef aporefen. Inimas ar inim atakam afakaytawefen. (Ametnak ara, bar arke, e dat, e ipic aomoma aeefen. Inimas ara, owam, e ipic, manmok atiwapawirisen. Aram e ipic rantau manam ajikapomfesen. E ipic nat, a manam pok takas apwipwikimefen. E datam, e ipic cem opok asan acicirimocenefen.)

³⁰Bare, Yesus jonow e ipic atowporefen. “Or ucim ipic juwasam?” Inim aeefen. Bare, e ipic jak aman dat arke arawen. Inimas ar atep ajitefen. “Dojuwas ‘Arke’.” Inim aeefen.

³¹E dat masirin, janim fak Yesus aanimfesen. “Or dar e jursumec ow siksa asan baysos, jirmec bajirim arapok.” Inim aefesen.

³²Bare, e capinmi ara, o cesa arke, e sikon fop, pok aanfesen. E dat masirin, e o dam aman bafiwaptotor, janim Yesus aanimfesen. Yesus masirin, “Bare, inima.” Inim aeefen.

³³Bare, e dat arke, e ipic jak aman awarimwisfesen. Aram e o dam aman awarimfiwtotorfesen. E o arke masirin, e emtow inim sikon fop akukusayneyfesen. Aram bwi akan aakpua inim aefesen. Aram bwi damir aaffesen.

³⁴E o cesa manmok batiw ow inimas aporfesen. Inimas aporfes masirin, omar ajisosfesen. Aram eras e kota owam, e kampung aemapfes owam, atakam aotawfesen.

³⁵E ow masirin, eras bapor asayosfesen. Ar Yesuspu ameromfesen. Aram e dat e jak awarimwisfes ipic, Yesus bipu bemap aporfesen. E ipic pakaian epcomam, bi binip epcomam, aporfesen. E ow inimas aporfes, aram omar aefesen.

³⁶Yesus, e dat jak aman aemapawiris ipic, bare emcajortewefen. Eras manmok abwifes ow, e atakam, e aenawfes ow, aotawfesen.

³⁷E Gerasa capinmi ow takas omar awutnakut aefesen. Inimas ar Yesus bakan a bajiapom janim aanimfesen. Bare, Yesus ci asawuefen. Aram banajuw aememefen.

³⁸E dat e jak aman awarimwisfes ipicam, e Yesus bamuw, janim aanimefen. Yesus nat, e ipic baysos jirmec ajirimefen.

³⁹“Or e ocem jisosey. Allah awutnakutas or aemtamaman. Eras atakam mamotawey.” Inim aeefen. E ipic masirin, ajisosefen. Ar, e Yesus e awutnakut ar aemtamefas, atakam, e kota ow takas acacapiomefen.

⁴⁰Barewen. Yesus e poman aojirtayefen. Ow takasam aramat ipic manmok asirimapfesen. Inimas e ow arke e aramat ipic atewfesen.

⁴¹Sembahyang cem kepala ipicam juwas Yairus aenawefen. Aramat ipic, Yesus bipu jine onok aneyotapefen. Aram Yesus e acem bwenaw, janim fak aanimefen.

⁴²E ipic, cowoc jiwi cowoknakap arawen. E jiwi arumur tahun dua belas ajiwar arawen. Ar e jiwi damir badamirafken aporefen. E Yesus ajaref ara, e ow arke, e adam akakajumamtawfesen.

⁴³Wun cowocam cen es tahun dua belas ajiwar batayu opok aememefen. Owam e cowoc e dam bwemjaworomtew asan opok cowok arawen.

⁴⁴E cowoc, bare Yesus e bak ajammerkawiemefen. Ar masirin, e aramat ipic baju bip, ban akurumtewefen. Bare, e cowoc es asarimtayuefen.

⁴⁵E Yesusam atakam aotawefen. “Dor ban ca kurumtewman?” Inim aeefen. E ow takas nat, apacintotorfesen. Petrus masirin, “Guru. E ow arke ofumi abwiricimomamenes. Aram dam akakajumamtawmenes.” Inim aeefen.

⁴⁶Yesus masirin, “Ow cowok ban akurumtewman. Ow dam baworomtew fakas e dodam afisma. Dor inimas apormin ara.” Inim aeefen.

⁴⁷E cowoc masirin, Yesus e aemefas amsom aporefen. Aram omar dam tetete aeefen. Ar masirin, aenawefen. Aenawef, Yesus bipu bi fop aneyjiapefen. Aram ucimas Yesus ban akurumtewef, atakam, e ow takas bipu aotawefen. Aram e adam asarimjaworemefasam atakam aotawefen.

⁴⁸Aramat ipic masirin, atakam aotawefen. “Ata. Or asicimamenem. Inimas or dam ajaworemamem. Bare, or asan akat baysosey.” Inim aeefen.

⁴⁹Yesus atakam cowocemtawmepaw, e sembahyang cem kepala ipic cem cowkon aemapef ipic, aenawefen. “Opores, bare damir emcaafor. Oram e Guru bojurusum arapok.” Inim aeefen.

⁵⁰E Yesus nat, inim atakam jen ajief, wunam atakam aotawefen. “Oram omar arapok. Allah basicim cowoka. E jiwi aojaworsitcema.” Inim aeefen.

⁵¹Aramat ipic, Yairus e cem ajaremef ara, ar e wun ow, e cem bafiw acuw aatefen. Ar nat, e Petrusam, e Yohanesam, e Yakobusam, e jiwi aricipicam arosowocam, acuw bat opok arawen.

⁵²Erasan ow takas e jiwi bwec awut abwecfesen. Aramat ipic nat, atakam aotawefen. “Bwec arapok. E jiwi damir opok. Ar isi.” Inim aeefen.

⁵³E ow masirin, aramat ipic uc aomocfesen. Ar e jiwi damir emcaafef aporfes ara.

⁵⁴Aramat ipic nat, e jiwi ban acapimomefen. Aram atakam awut aotawefen. “Ata. Basitey.” Inim aeefen.

⁵⁵E jiwi masirin, aojaworsitefen. Aram asarimsitemefen. Yesus masirin, amos e jiwi batetam, jirmec ajirimefen.

⁵⁶E jiwi arisepes, bare junum aefesen. Aramat ipic nat, jirmec e ow ajirimefen. “Car eras atakam wun ow botaw arapok.” Inim aeefen.