Read Central Asmat LUKAS 9 Bible Online

LUKAS 9 - Central Asmat bible

LUKAS 9

¹Barewen. Yesus e amamkawi ow dua belas ajiwar ajateefen. Aram dat takas bakumimosom fakas e ow atetamefen. Aram dam ow baworomtaw fakas, e ow atetamefen.

²Ar e ow e Allah Pemerintah atakam bacacapiom atewosomefen. Aram e ow e dam ow baworomtaw atewosomefen.

³Aram atakam e ow aotawefen. “Ajisoscokom, pok atawcokom. Onokpoknew, esenew, uangnew, atawcokom. Baju jamnukam atewcokom.

⁴Car cem afiwemcokom, e cem inim mamememey— e capinmi bakan ajioscokom jofay ajiwara.

⁵Wun samat car batowomiw opok aporcokomnew, caram e samat bakan mamjiosey, wunam atakam e ow mamotawey. ‘Car da batowomiw opok aemamokom. Inimas salah aemamokom.’ Inim mameey.” Yesus inim aeefen.

⁶Bare, e ow ajisosfesen. Ar e samat arke fumi abwiritjarfesen. Ar e Atakam Akat e asan takas acacapiomfesen. Aram e asan takas dam ow ajaworomtawfesen.

⁷Barewen. E raja kanim juwas Herodes, Yesus aemawirias takas, atakam jen ajiefen. Wun ow atakam, “Yohanes emeojaworsitef.” Inim aefesen. Wun ow masirin, “Elia emeojisemef.” Inim aefesen. Wun ow masirin, “Ametnak Allah atakam botaw ipic emeojaworsitef.” Inim aefesen. Inimas ara, e Herodes bi binip arke aceceremefen.

⁸

⁹Aram atakam aotawefen. “Dor Yohanes kus emesakamtiwof. Awamec ipic nat, ca ipicam? Dor, ar e awut aemamaras, atakam jen ajia aemin.” Inim aeefen. Aram e Yesus bi bapor aemporefen.

¹⁰Barewen. E Yesus atakam botaw atewosomef ow aofasifesen. Aram e aemfesas, atakam aramat ipic aotawfesen. Aramat ipic masirin, e ow atewefen. Aram kota Betsaidapu arop ajisosfesen.

¹¹E ow arke nat, inimas aporfes, wunam aramat ipic fa asep asoromfesen. Aramat ipic masirin, e ow arke aotewefen. Aram e Allah Pemerintah atakam e ow aotawefen. Aram, e dam ow ajaworomtawefen.

¹²Bare, jo atiefen. E amamkawi ow dua belas ajiwar masirin, Yesuspu aapenfesen. “Arasan cem opok asan ara. Oram e ow e sotop cemsanam, e sotop kebun asanam, baysos jirmec ajirimey. Ar isi bwes asan bapowtetces. Aram amos pok bajitinces.” Inim aefesen.

¹³Aramat ipic nat, atakam e amamkawi ow aotawefen. “Car amos pok e ow tetamey.” Inim aeefen. E ow masirin, “Dar amos bokor lima ajiwaram, enam jamnukam, inimnakap awomcom. Da nat, a ow arkeut amos bajittameran baysos arapen?” Inim aefesen.

¹⁴Erasan aememfes ow nat, lima ribu ajiwarnew arawen. Aramat ipicam atakam e amamkawi ow aotawefen. “E ow asan cowok aniapa, asan cowok aniapa, inim baeces. Ar ow lima puluh ajiwarnew asan cowok aniapa, inim baeces. Caram inim jirmec ajirimey.” Inim aeefen.

¹⁵E amamkawi ow masirin, inimas cowok aemfesen. Aram e ow animapoma, animapoma, inim aefesen.

¹⁶Aramat ipic masirin, e amos bokor lima ajiwaram, e enam jamnukam, atewefen. Aram manmok onam op atiwefen. Aram terimah kasih atakam aotawefen. Terima kasih atakam aotawef masirin, e amos, e ow arke baseyamtam, e amamkawi ow atatamefen.

¹⁷Bare, e ow takas e pok aanfesen. Aram jak anapitaptotorfesen. Ar masirin, e daeremtiwfes pok, ese dua belas ajiwar aowapomfesen.

¹⁸Barewen. Jofay ara, Yesus janim Allah arop aanimefen. E amamkawi owam, aramat ipic akac aemapfesen. Aramat ipic masirin, jonow e ow atowefen. “Do ca ipicam? E ow arke ucim atakam atawmes?” Inim aeefen.

¹⁹E ow masirin, “Wun ow atakam, or Yohanes Bwi Babwim ipic ara. Wun ow masirin, or Elia ara. Wun ow masirin, ametnak Allah atakam botaw ipic emeojaworsitefen. Or e ipic araman.” Inim aefesen.

²⁰Aramat ipic masirin, atakam e ow aotawefen. “Ca nat, ucim bi binipam. Do ca jipicam?” Inim aeefen. Petrus masirin, “Or e Allah Aeremtewef Ipic ara.” Inim aeefen.

²¹Barewen. Yesus inim atakam wun ow botaw arapok, jirmec fak ajirimefen.

²²Inimas ar atakam aotawefen. “E Asmat Anakat Ajaworemef Ipic bajurusem awutut aemcema. E ducur owam, e Allah atakam mamtaw tugas ow awutam, e Allah Jirmec mamememtam owam, e ipic aotpemcemes. Owam e ipic acatiwcemes. Bar mamincop ara masirin, Allah e ipic aojaworomsumutumcema.” Inim aeefen.

²³Aramat ipic masirin, atakam e ow takas aotawefen. “Ow do mamkawi akat aecenes, ar aropas bi binip bacecerem arapok. Aram arop salib batawtotorces, wunam bajamkawicenes.

²⁴Ow, bajorem, jak aserememces, aram bajorem opokut aemcemes. Wun ow nat, kerja dor aemtamcemenes. E ow inim tugas aman damir aafces, aram ajoremcemes.

²⁵Ow, awames capinmi pok takas atatkurumcesnew, e nat aram bajorem opok aemcesnew, bare ar asan akat bwememap asan opok.

²⁶Dor e Asmat Anakat Ajaworemef Ipic awamcey ara. Ow do namke akayapcesam, ar e atawmin atakam namke akayapcesam, doram e ow namke aememcinim— e aofasineycey jofay ara. Doricipicam, e malaikat tarowatam, e arakatnakutas dor atatamcemenes. Aofasineycey, dor e akatnakutas epcom aneycimin.

²⁷Dor atakamnak car aotawmin. Wun awamces ow, e Allah Pemerintah aporcemes. Ar e jofay ajiwar damir baf opok aemcemes.” Inim aeefen.

²⁸Yesus inim atakam aotawef masirin, bar delapan ajiwarnew inim aemapefen. Bar delapan ajiwarnew aemapef, aram janim Allah manim, sikon op aaptometefen. Ar e Petrusam, e Yohanesam, e Yakobusam, atowotometefen.

²⁹Aramat ipic janim Allah aanimef ara, wun bi ajaworemefen. Apakaianam den fwesak cowok, tarawu aemefen.

³⁰Jipic jamnukam serenakutas aman ajisemfesen. Ar atakam e aramat ipic aamtawfesen. Er Musaam, Eliaam, arawen. Ar e Yesus e Yerusalem damir aafcowas, atakam aotawfesen. Allaham, e Yesus damir baf, atakam bap emcasakamtiwef arawen.

³¹

³²Bare, e Petrusam, e akac aemapfes owam, isi manmok awutnakut aemapfesen. Aojitfes nat, ar Yesus arakatnakutasam, e cowkon ememfes ipic jamnuk arakatnakutasam, aporfesen.

³³E ipic jamnuk, e Yesus bakan bajios ememfes ara, e Petrus, atakam aramat ipic aotawefen. “Guru. Dar arasan aememamom, bare akat cowok ara. Dar puk cem mamincop car bweapomtam akat ara. Wun cowok or. Wun cowok musa. E wun cowok masirin, Elia.” Inim aeefen. E atawef atakam nat, amsom opoken.

³⁴Inim atakam cowoctawmep jak fwesak aenawtepefen. Aram e ow apwirimomefen. E Musain Elia masirin, e jak fwesak afiwfesen. Bare, erasan aememfes ow, omar aefesen.

³⁵Atakamam e jak fwesak akoreyisimefen. “Awamec ipic dotiw ara. E ipic aeremtewof. Aratakam jen pajiey.” Inim atakam jen ajifesen.

³⁶Inim atakam jen ajifes masirin, ar Yesus arop aememef aporfesen. E amamkawi owam jokon ajiemfesen. E jofay ara, ar e aporfesas, atakam kawey ow botaw opok cowok arawen.

³⁷Barewen. To ara, ar e sikon akorneyfesen. Akorneyfes masirin, ow arke e Yesus bi jamnuk aemamtewfesen.

³⁸E ow arke aman, jipic cowok atakam awut aotawefen. “Guru. Dor janim or aanimamin. Or e dotiw baporey. E dojiwi cowok ara.

³⁹Jakaperey. Dat cowok e jiwi aomomcema. E datam jen asarimjicema, wunam ar e jiwi jis apimcema. Inimas e jiwi bwe besep aarsamwisimcema. E dat e jiwi bakan baji pwicaken. E nat, bakan ajicow, ar e jiwi bap ajurusumkurumcema.

⁴⁰Doram e omamkawi ow, e jiwi jak aman dat botewerisim, janim aanimof. E ow nat, e dat bwemotewerisim asan opok.” Inim aeefen.

⁴¹Yesus masirin, atakam aotawefen. “Car do basicim opok awaniemamokom ow ara. Caram ow fasi ara. Dor car akac ucim jofay ajiwar aoememcey. Dor jak jirow ca bom, ucim jofay ajiwararam? Bare, e otiw arasan towotnawey.” Inim aeefen.

⁴²E jiwi Yesuspu aenef ara, dat e jiwi cenes aneyjiwitiwefen. Aram e jiwi jis apimefen. Yesus masirin, jirmec fak e dat ajirimefen. Inimas Yesus e jiwi ajaworomtewefen. Aram e jiwi, aricipic atetamefen.

⁴³E ow takasam e Allah faknakutas junum aefesen. Barewen. E ow takas e Yesus aemawirias takas junum aefes ara, aramat ipic, atakam, a amamkawi ow aotawefen.

⁴⁴“E aotawmin atakam jen foa. Jipic cowok e Asmat Anakat Ajaworemef Ipic e jokmen ow aotasimemtamcema.” Inim aeefen.

⁴⁵Yesus nat, e atakam umutonnak botaw opok aemefen. E ow, e atakam jen bajiasin arawen. Inimas ara, e ow e atakam jen bajikurum opoken. Aram e atakam jonow batowpor omar aefesen.

⁴⁶Barewen. E Yesus amamkawi ow atakam aamtawfesen. “E awamcom ow, awutnak ca owaram?” Inim aefesen.

⁴⁷Yesus nat, e ow bi binip amsomen. Inimas ara, aramat ipic jiwi kanim atewefen. Ar e jiwi adampu atewemefen.

⁴⁸Ar masirin, atakam, e ow, aotawefen. “Ow damos dor ajiomcenes, wunam ar awamec jiwi dor atowomiwtamcemenes, bare, e ow doram atowomiwcemenes. E dor atowomiwcemenes ow, e dor atewenamfan ipicam atowomiwcemes.” Inim aeefen.

⁴⁹Barewen. Yohanes atakam aotawefen. “Guru. Dar jipic cowok aporfom. E ipic, e ojuwas ajitewef, wunam ow jak aman dat aotewerisimef. E ipic nat, dar mamkawi ipic opok aporfom. Inimas dar e ipic eras bwem bakari, jirmec ajirimfom.” Inim aeefen.

⁵⁰Yesus nat, atakam aramat ipic aotawefen. “E ipic, eras bakari, jirmec bajirim arapok. E owen ca bamo opok ow, bare cajowow ara.” Inim aeefen.

⁵¹Barewen. E Yesus onam op baptomet jofay sotop aenawefen. Yesus masirin, Yerusalem baysos atakam asakamtiwefen.

⁵²Aram atakam botawtam ow bap atewosomefen. E ow masirin, Yesus isi mamses asan janim manim, Samaria capinmi samat cowok ajisosfesen.

⁵³E samat nat, e aramat ipic Yerusalem bin jiemef aporfesen. Inimas ar aramat ipic batowomiw pwicaken.

⁵⁴E amamkawi ow jamnuk juwas Yakobusam, Yohanesam, inimas aporfes, wunam atakam aotawfesen. “Tuhan. Or, dar, jismak e onam op baney, wunam e ow bafamtiw, inim jirmec bajirim, akat open?” Inim aefesen.

⁵⁵Aramat ipic masirin, e ipic jamnuk bin afiromef, wunam jiman aafefen.

⁵⁶Bare, ar takas wun samat acemsan ajisosfesen.

⁵⁷Aramat ow ajarfes ara, jipic cowok atakam Yesus otawefen. “E asanin asanin jisoscem, doram or ajamkawiawarcimin araman.” Inim aeefen.

⁵⁸Yesus masirin, atakam, e ipic aotawefen. “E wasan juwur, co epcom. E sokam co epcom. E Asmat Anakat Ajaworemef Ipic nat, memames cem opok.” Inim aeefen.

⁵⁹Yesusam atakam wun ipic aotawefen. “Mamkawican.” Inim aeefen. E ipic masirin, “Dor e doricipic se batakamwuapom.” Inim aeefen.

⁶⁰Aramat ipic nat, “E damir ow, e wun damir ow se arma bawuapomces. O nat, baysosey. Or e Allah Pemerintah atakam bacacapiomey.” Inim aeefen.

⁶¹Wun ipicam atakam aotawefen. “Dor or ajamkawicimin. Do not, docem ow, do baysos, atakam batakamotaw.” Inim aeefen.

⁶²Yesus masirin, “Ow, cesa pok bataweapom ememces masirin, capinmi mananasim perkakas ban osomces, wunam asamanam ajiawarces, ar Allah Pemerintah kerja bwemtam, bare awcawor opok.” Inim aeefen.