Read Central Asmat YOHANES 1 Bible Online

YOHANES 1 - Central Asmat bible

YOHANES 1

¹Jipic juwas “Atakam” awamec. Ametnak ara, Allah a capinmi bakenemtiw opok ara, bare e jipic juwas “Atakam” emeememawirien. E “Atakam,” Allah cowkon aemapawirisen. E “Atakamam” Allah arawen.

²Ametnak ara, e “Atakam,” Allah cowkon aemapawirisen.

³E “Atakam,” e pokin pokin takas akenemapomefen. E pok ji arma bwerap opok cowok arawen.

⁴E “Atakam,” jiwnenakas, ow batatamtotor ipic arawen. E jiwnenakas aomomames ow, bi binip umuton aceceremames. Aram sereas aman ajarmes.

⁵E sereas e jiwic asan aseremtiwma. E jiwicas nat, e sereas bwemsapimapom asan opok.

⁶Bare, Allah jipic cowok atewosomef. E ipic juwas Yohanes ara.

⁷E ipic e sereas atakam botaw aapenawef. Ar ow takas e atakam jen baji, wunam e atakam basicim, inim aapenawef.

⁸E Yohanes, e sereas baseremapom ipic opok. E nat, ar e sereas baseremapom ipic atakam botaw aapenawef.

⁹E sereas baseremapom ipic, bare anakat ara. Aram awames capinmi aenawef. Aram ow takas aseremapomama.

¹⁰Aramat ipic awames capinmi aemapawiri. Aram a capinmi akenemtiwef. E nat, a capinmi ow e aramat ipic amsom opok aemapfes.

¹¹E aramat ipic e asamat ameromef. E nat, e ajowow e aramat ipic batewet opok aemfes.

¹²E wun ow nat, e aramat ipic atewetfes. Aram e aramat ipic asicimfes. Aramat ipic masirin, e ow, Allah atiperes atawemef.

¹³E ow Allah atiperes aememfes ara, ar asmat jiwi cimin bajisames opok. Aricipic, bare asmat ipic opok. Aricipic Allah ara.

¹⁴E “Atakam” asmat ipic ajaworemef. Aram dar akac aomomforow. Daram e arakatnakutas aporfom. E akatnakutas e aricipic e atiw cowokut atetamefas ara.

¹⁵Yohanesam e ipic atakam afakayotawef. “E atakam aotawawiru ipic awamec ara. E aotawawiru atakam, ‘Aramat ipic dofa asep aenawcema. E nat, do bajisames opok emof, aramat ipic bap a takam emcaememef. Inimas aramat ipic ow awut ara. Dor masirin ow kanim.’ Inim aeawiru.” Yohanes inim aeef.

¹⁶Bare, e “Atakam,” damos awutnakut dar ajiomawiruw. Aram asan akatnakut dar atatamawiruw.

¹⁷Bare, Allah e a Jirmec Musa atetamefen. Musa masirin, eJirmec e wun ow aotetamefen. E nat, Allah e Yesus Kristus atewnemef. E aramat ipic msirin, asan akat, asmat ow aomef. Aram atakamnak, e ow atatitamef.

¹⁸Owam Allah bi bwempor asan opok cowok. E atiw cowokut, bare Allah cowkon aemapma. Aramat ipicam Allah atakam aotawkurumforow.

¹⁹Bare, e Yerusalem Yahudi ow, Allah atakam mamtaw tugas owam, Lewi samat owam, e Yohanespu atewosomfes. “E Yohanes ca ipicamnew?” inim jonow batowpor atewosomfes. E Yohenas masirin, atakam umuton cowok aotawef. “Dor e Allah Aeremtewef Ipic opok.” Inim aeef.

²⁰

²¹E owam, jonow, aotowporfes. “O nat, ca ipicam? Ametnak ara, Allah atakam botaw ipic juwas Elia aememefen. Or e Elia aranew?” Inim aefes. Yohanes masirin, “Doram Elia opok.” Inim aeef. E owam, “Or e Allah atewenamcow atakam botaw ipicut aranew?” Inim aefes. E Yohanes nat, “Doram e ipic opok.” Inim aeef.

²²E ow masirin, “O nat, ca ipicamnew? Or ucimas aemamemnew? Dar e jirmec ajirimenamforow ow inim atakam botaw.” Inim aefes.

²³Aramat ipic masirin, “Dor cem opok asan atakam bafakaytaw ipic ara. ‘E Tuhan aenawcema. Car e aramat ipic ajarcow bokotpu tarowat mamkenemtiwey.’ Inim aemin.” Yohanes inim aeef. Bare, e atakam, e ametnak aemawiri Allah atakam botaw ipic juwas Yesaya, e atawef atakam jipu ara.

²⁴Bare, e Yohanes aenawomfes ow e Parisi ow jirmec ajirimenamfes ow ara.

²⁵Aram jonow aramat ipic aotowporfes. “Or e Allah Aeremtewef Ipic arapoknew, or e Eliam arapoknew, or e Allah atakam botaw ipicam arapoknew, or ow bwi abwimamem ucimaram?” Inim aefes.

²⁶E Yohanes masirin, “Dor ow bwi abwimamin. E nat, e awamcokom ow aman ara, jipic cowok awamec. Caram e ipic camsom opok.

²⁷Ar e dofa asoromcan ipic ara. Ar ow awut ara. Dor kanim. Inimas dor e asandal somen bwemsurumtam asan opok.” Inim aeef.

²⁸Bare, eras takas e Betania capinmi aemfes. E capinmi e Yordan jo poman ara. Er e Yohanes bwi abwimef asan ara.

²⁹Ajofay ara masirin, e Yesus e Yohanespu aapenef. E Yohanesam aramat ipic aporef. Ar masirin, “Jakaperey. E aapenawmar ipic, e Allah aDomba Jiwi ara. Aram asmat dosa bakokoromosomtam ipic ara.

³⁰E atakam aotawawiru ipic awamec ara. E aotawawiru atakam, ‘Aramat ipic dofa asep aenawcema. E nat, do bajisames opok emof, aramat ipic bap a takam emcaememef. Inimas e ipic ow awut ara. Dor masirin, ow kanim ara.’ Inim aeawiru.

³¹Doram e ipic nomsom opok aememof. Do nat, aenawof. Doram ow bwi abwimof. Eras e Israel ow e ipic amsom boporemapas ara.” Yohanes inim aeef.

³²Bare, e Yohanes atakam aotawef. “Dor e Allah Roh, e onam op ewneyef aporof. Ar pari cimin, e aramat ipic dam ton aneyapef. Aram inim aatamemapef.

³³Doram e ipic namsom opok aememof. E nat, e ow bwi babwim atewenamfan ipic, atakam dor aotawfan. ‘Or e Allah Roh, jipic cowok dam ton baneyap aporcemem. Bare, e ipic e Roh Kudus, asmat ow jak aman bafimimtam ipic ara.’ Inim aefan.

³⁴Bare, doram eras emcaporof. Doram atakam emcaotawof. ‘Aramat ipic Allah atiw ara.’ Inim aeof.” Yohanes inim aeef.

³⁵Bare. Ajofay ara, e Yohanesam, e amamkawi ipic jamnukam, aememfes.

³⁶Yohanes e Yesus erasan aokorsakayenef aporef, aram atakam aotawef. “Jakaperey. Ewamec ipic, Allah aDomba Jiwi ara.” Inim aeef.

³⁷E amamkawi ipic jamnuk e atawef atakam jen ajifes. Ar masirin, Yesus ajamkawifes.

³⁸Yesusam asep asamanam ajief, wunam e ow e a mamkawi aporef. Ar masirin, jonow atowef. “Car ucim pokam?” Inim aeef. E ow masirin, “Rabi! Or ca cem jamememamem?” Inim aefes. (“Rabi,” daratakam juw buwumtew “guru” ara.)

³⁹Aramat ipic masirin, “Deyo. Caram baporey.” Inim aeef. E ow masirin, akac aapenfes. Aram e aramat ipic aememef asan aporfes. Er porow jam empat aranew. Aram e jofay e aramat ipic akac aemapfes.

⁴⁰Bare. Jipic jamnuk e Yohanes atakam jen ajifes, wunam e Yesus ajamkawifes. E wun ipic cowok juwas Andreas ara. Ar Simon Petrus arewec ara.

⁴¹Aramat ipic e arepwec juwas Simon asarimpowtewef. “Dar e Allah Aeremtewef Ipic apowtewfom.” Inim aeef. “E Allah Aeremtewef Ipic,” Yunani atakam juw buwumtew, “Kristus” ara.

⁴²Aram e Simon, Yesuspu atowocenef. Yesus masirin, e Simon manmok apematamef, wunam. “O Simon, Yohanes atiw ara. E nat, o juwas Kefas aamamin.” Inim aeef. (E “Kefas,” Ibrani atakam ara. E Yunani atakam masirin, juwas “Petrus” ara. E daratakam juw buwumtew, juwas “Ek” ara.)

⁴³Bare. Ajofay ara, Yesus e Galilea capinmi baysos atakam asakamtiwef. Aram Filipus apowtewef, wunam atakam e aramat ipic aotawef. “Mamkawican.” Inim aeef.

⁴⁴E Filipus kota Betsaida ipic ara. E Andreasam, e Petrusam, kota Betsaida ow ara.

⁴⁵E Filipus masirin, Natanael apowtewef, wunam atakam e aramat ipic aotawef. “E musa, jipic cowok atakam, e Allah Jirmec surat aman aeapomefen. E Allah atakam botaw owam, e ipic atakam, surat aeapomfesen. Bare. Daram e ipic apowtewfom. Er e Nasaret ipic juwas Yusuf atiw ara. Ajuwas Yesus ara.” Inim aeef.

⁴⁶E Natanael nat, “Akatas e Nasaret aewenawcemare?” Inim aeef. E Filipus masirin, “Dey. Baporey.” Inim aeef.

⁴⁷Bare, Yesus e Natanael a bwenawom aporef, wunam atakam aotawef. “Jakaperey. A ipic Israel ipic anakat ara. Aram tarowatnak ipic ara.” Inim aeef.

⁴⁸E Natanael masirin, “E dor atakam omsom ucim emfem?” Inim aeef. E Yesusam, “E Filipus o bayte opok eman, doram or e os juwas ‘arā’ bopan emaperem aporey.” Inim aeef.

⁴⁹E Natanael masirin, “Guru! Or Allah atiw ara. Or e Israel ow aRaja Ipic ara.” Inim aeef.

⁵⁰E Yesus atakam, “Dor atakam or aotawey, ‘Dor or e arā os bopan emaperem aporey,’ inim aeey. Or inim atakam apormem, wunam asicimamenemnew? E atawey atakam nat, junum bweas, kanim inim ara. Asep jofay oram awutas aoporcemem.” Inim aeef.

⁵¹Yesus masirin, wun atakamam aotawef. “Atakamnak ara, car e onam op bamuap aporcomokom. Car masirin, Allah amalaikat, e Asmat Anakat Ajaworemef Ipic dampu, cenes juw uwuneya, op juw uwutometa, inim aeces aporcomokom.” Yesus inim aeef.