Read Central Asmat YOHANES 11 Bible Online

YOHANES 11 - Central Asmat bible

YOHANES 11

¹Bare. Jipic juwas Lasarus dam ajowef. Ar kota Betania ipic ara. E kota, Mariaam, arupic juwas Martaam, akota ara.

²Bap ara, e Maria, minyak wangi, e Tuhan bwey aokomnemef. Wunam aramat cowoc e afin, e Yesus bwey aerewef. E Maria, e dam ajowef ipic juwas Lasarus, atarsowoc ara.

³Bare, e atarsepes ow Yesuspu atewosomfes. “ ‘Tuhan. E damos ajiemamem ipic dam awutnakut awames,’ inim mameey.” Inim aefes.

⁴Bare, e Yesus inim atakam jen ajief ara, aram atakam aotawef. “E Lasarus dam awames, aram damiras opok. Er ow Allah akatnakut baporomtamas ara. Inimas, ow e Allah atiwam akatnakut aporcemes.” Inim aeef.

⁵Bare, e Yesus damos e Martaam, e aromwesam, e Lasarusam, ajiomef.

⁶E nat, aramat ipic e Lasarus dam awames atakam jen ajief, ar bar jamnuk aoememef.

⁷Bar jamnuk aoememef masirin, atakam e amamkawi ow aotawef. “Dey. E Yudea capinmi bajisosmoc.” Inim aeef.

⁸E amamkawi ow masirin, “Guru. Jowon cowok, e Yahudi ow, ek e odampu bajimirokopom aemfenes. Or masirin, erasan ucimas ajisoscemnew?” Inim aefes.

⁹E Yesusam, “Bar cowok aram jam dua belas ajiwar ara. Ow jok ajarcesnew, ar awames capinmi sereas aporcemes. Inimas pok, e abweybi bapomot opok aemcema.

¹⁰E nat, iram sereas opok ara. Inimas ow iram ajarcesnew, pok e bweybi aapomotcema.” Inim aeef.

¹¹Wunam Yesus wun atakam aotawef. “E dajowow ipic juwas Lasarus, bare isi emcapwitamesef. Do nat, aramat ipic bajitim ajisoscimin.” Inim aeef.

¹²E Yesus mamkawi ow masirin, “Tuhan. Aramat ipic isi apwitamesefnew, aram arma ajaworsitcema.” Inim aefes.

¹³Bare, Yesus, e Lasarus damir aafefas atakam atawef. E nat, aramat ow, e Yesus, e Lasarus desen isi pwitamesef atakam atawef inim ara.

¹⁴Yesus masirin, atakam umuton e ow aotawef. “E Lasarus, bare damir emcaafef.

¹⁵Dor erasan akan bakos opok aemof ara, eras car do basicimas ara. Inimas dor erasan memem opok ameof, jak akat aememamin. Dey. Dar Lasarus e asan jisosmoc.” Inim aeef.

¹⁶Tomas masirin, atakam e wun Yesus mamkawi ow aotawef. “Daram bajisosmoc. Daram e aramat ipic damir akac baf.” Inim aeef. (Bare, e Tomas e wun juwas Kapomipic ara.)

¹⁷Bare, e Yesus erasan ajaremef ara, e Lasarus sumu ipic, e kubur aman bar empat ajiwar emcaemamesef. Yesusam inimas aporef.

¹⁸Yerusalem capinmi memem, wunam Baitania capinmi ajiwar bajarem, aram kilometer tiga ajiwar ara.

¹⁹Yahudi ow arke e Martaam, Mariaam, ameromfes. Ar e arowtipic damir aafef atakam jen ajifes, wunam ar jak akat e cepes jamnuk bemapom ameromfes.

²⁰E Martaam e Yesus aenawef atakam jen ajief ara, ar aramat ipic biamnuk memamtew ajisef. E Maria nat, e cem aman aemapef.

²¹Bare, e Marta atakam Yesus aotawef. “Tuhan. Or arasan emem ayaw, e dorowtipic damir bwemaf asan opok.

²²E nat, Allah, e janim aanimcemas, or atetamceman apormin ara.” Inim aeef.

²³Yesusam atakam e cowoc aotawef. “E orowtipic aojaworsitcema.” Inim aeef.

²⁴E Marta masirin, “E Asepnak Jofay e damir ow takas aojaworsitces ara, e aramat ipicam aojaworsitcema. Dor inimas nomsom.” Inim aeef.

²⁵E Yesusam, “Dor ow bajaworomsumutumtam ipic awamcey ara. Doram jiwnenak batatam ipic awamcey ara. E dor asicimamenes ow damir aafces, aram jiwnenak aatamemawarcemes.

²⁶E dor asicimamenes tetakay ow, damir opok cowok aemcemes. Or a atakam basicim open?” Inim aeef.

²⁷E Marta masirin, “Tuhan. Or e Allah Aeremtewef Ipic araman. Or Allah atiw araman. Or awames capinmi baneyap manmok afeawirum ipic araman. Dor inim atakam asicimamin ara.” Inim aeef.

²⁸E aramat cowoc inim aeef masirin, ar e aromwes juwas Maria bayte ajisosef. Aram e Maria atakam arpuak asan aotawef. “E Guru awamec. Or ajateman.” Inim aeef.

²⁹E Maria inim atakam jen ajief, aram asarimsitef. Aram e Yesus bipu ameromef.

³⁰E Yesusam e cemsan bajarem opok. Ar e apem inim emapef. Aram Marta biamnuk aemamtewfes asan cowok ara.

³¹Bare, Yahudi owam e Maria e cem aman akac aemapfes. Ar jak akat e aramat cowoc bemapom aemapfes. Aram e Maria asarimsitef aporfes. Aram aramat cowoc a cem afisef aporfes. Ar masirin, e afa asoromfes. Ar e Maria e awerem asan bwec babwec ajisosef inim ara.

³²E aramat cowoc nat, e Yesus aemapef asan ajaremef. Aram Yesus bi aporef. Ar Yesus bi aporef masirin, e abipu bi fop aneyjiapef. “Tuhan. Or arasan emem ayaw, e dorowtipic damir bwemaf asan opok.” Inim aeef.

³³E aramat cowocam bwec abwecef. E ajamjarfes Yahudi owam bwec abwecfes. E Yesusam e ow e bwec abwecfes aporef. Inimas aram jak pwicak awutnakut aememef.

³⁴Atakamam aotawef. “Car e Lasarus sumu ipic onak asan jiwtatiwfokom.” Inim aeef. E ow masirin, “Tuhan. Oram dey, baporey.” Inim aefes.

³⁵Bare, Yesus bwec abwecef.

³⁶E Yahudi owam atakam atawfes. “Jakaperey. E aramat ipic e Lasarus damos awutnakut ajiomef.” Inim aefes.

³⁷E wun Yahudi ow nat, “Aramat ipic e manmok kapi ipic manmok ateremef. Bare, jowan e Lasarus dam awutnakut ajowef. A Yesus nat, Lasarus baworomtew fakas aomomef ara openow. Aram e Lasarus ajaworomtewef ayaw, e Lasarus damir baf opok.” Inim aefes.

³⁸Bare, Yesus jak pwicak awutnakut aoememef, wunam e awerem asanpu ameromef. E awerem, bare ek jip ara. Bap ara, ow, ek petam awut e jip imwi emcakapimapomfes.

³⁹Yesusam atakam aotawef. “E ek petam bapwepweremosomey.” Inim aeef. E damir aafef ipic atarsowoc juwas Marta nat, atakam Yesus aotawef. “Tuhan. E Lasarus nat, damir bar empat ajiwar aemamesef. Inimas aram pinim awutut ara.” Inim aeef.

⁴⁰E Yesus masirin, “Dor atakam or emcaotawey. ‘Or asicimcem, or e Allah akatnakutas aporcemem.’ ” Inim aeef.

⁴¹Inimas ara, e ow e ek petam apwepweremosomfes. Yesus masirin, manmok op atiwef, wunam atakam aotawef. “Diwi. Or e doratakam aotawminas jen ajimem. Terima kasih.

⁴²Or e doratakam takas jen ajiawarmem. Dor inimas nomsom. E nat, dor awamces ow arke apormin. Inimas dor a atakam or aotawmin. Eras a ow, or dor atewenamfenem baporomas ara. E ow inimas basicimces.” Inim aeef.

⁴³Ar inim atakam aotawef masirin, atakam awut afakaytawef. “Lasarus. Ajisey.” Inim aeef.

⁴⁴Bare, e damir aafef ipic ajisef. Bap ara, ow e sumu ipic banam, bweyam, biam, picin biram ajiktiwfes. Ajisef ara, ar e picin epcom ajisef. Yesus masirin, atakam erasan aememfes ow aotawef. “E picin biram basurumey. Aramat ipic asan akat e acem ajisoscow.” Inim aeef.

⁴⁵E Maria ameromfes Yahudi ow arke, e Yesus aemefas aporfes. Inimas ar aramat ipic asicimfes.

⁴⁶E wun Yahudi ow nat, e Parisi ow ameromfes, wunam e Yesus aemefas atakam e ow aotawfes.

⁴⁷Inimas ara, e Allah atakam mamtaw tugas ow awutam, e Parisi owam, e Yahudi capinmi kepala ow barewsiap, janim aanimfes. Aram atakam e ow aotawfes. “E Yesus junum bweas arke aemama. Da nat, ucimas aemcom?

⁴⁸Dar e ipic desen soromemcom, ow takas e ipic asicimcemes. E Roma samat owam aenawcemes. Ar e darAllah cem ajumporsomtiwkurumcemes. Aram, e dapemerintah ajumnemcemes.” Inim aefes.

⁴⁹E wun ipic cowok juwas Kayafas ara. E tahun ara, ar Allah atakam mamtaw ipic awut tugas aemef. Aramat ipic atakam e ow aotawef. “Caram camsom opok cowok.

⁵⁰Jipic cowok, a ow takas damir baftamnew, wunam e dasamat ow takas damir baf opoknew, bare akat ara. Eras, car asan akat bwemtamas ara. E nat, car inimas camsom opok.” Inim aeef.

⁵¹E atawef atakam, bare arop atakam opok. E nat, e tahun ara, ar Allah atakam mamtaw ipic awut tugas aemef. Inimas ar e Yesus, e Yahudi samat ow, damir aaftamcowas, atakam aotawef.

⁵²E Yesus damir aaftamcowas, e Yahudi samatas cowok opok. Allah, e samatin samatin ow, atiperes memem akat arawen. Aram e atiperes takas, ow samat cowok baramsimapom akat arawen. E Yesus damir aaftamcowasam, inim bwemas ara. Bare, e Kayafas eras atakamam aotawef.

⁵³Inimas ara, e jofay ajiwar, e Yahudi ow e Yesus bacatiw at aetiwfes.

⁵⁴Inimas ara, Yesus e Yahudi ow capinmi umuton bojar opok aemef. Ar e capinmi bakan ajiosef, wunam kota juwas Efraim ajaremef. Er e cem opok capinmi sotop ara. Erasan ara, aramat ipic e mamkawi ow akac aemapfes.

⁵⁵Bare, e Yahudi pokbwi juwas Bakamsow Pokbwi jofay sotop asisienawef. E samatin samatin ow arke, e pokbwi jofay sotop aporfes. Ar masirin, e pwicakas aemtotorfes bemosom, e Yerusalem ajisosfes. Eras e Yahudi agama tareyas jipu ara.

⁵⁶E owam e Yesus apowporfes. Ar e Allah cem aman ememfes, wunam atakam aamtawfes. “Car ucim bi binip aceceremamokom? E aramat ipic a pokbwi bwenaw opok openow.” Inim aefes.

⁵⁷Bap ara, e Allah atakam mamtaw tugas ow awutam, e Parisi owam, jirmec emejirimfes. “Ow, e Yesus asan aporces, atakam dar baotawcarowos. Dar e ipic ban bakimomji.” Inim aefes.