Read Central Asmat YOHANES 12 Bible Online

YOHANES 12 - Central Asmat bible

YOHANES 12

¹Bare, e Bakamsow Pokbwi bwem opok bar enam ajiwar aemamesef, Yesus e kota Baitani ajisosef. E Baitani, e Yesus e damir aafef ipic juwas Lasarus ajaworomsumutumef asan ara.

²Erasan ara, ow amos pok Yesus ajewtamfes. Lasarusam, wun owam, Yesusam, e amos pok memen akac aemapfes. Marta masirin, amos pok e ow atatamef.

³Mariaam, minyak wangi anakat juwas narwastu, setengah kilogramnew, atowomiwef. E minyak harga awutnakutas ara. Bare, e Maria e minyak e Yesus bwey bak ton aokomnemef, wunam e akus fin e bwey aerewef. E minyak pinimam e cem aman awutnakut aemtepef.

⁴E wun Yesus mamkawi ipic juwas Yudas Iskariot erasanam aemapef. Er e Yesus e jokmen ow aotasimemtamcow ipic ara. Aram atakam aotawef.

⁵“E minyak harga, uang dinar tiga ratus ajiwar ara. Ow, e minyak, kawey ow batetam, wunam e minyak uang batewet, inimas bwemji. Ar masirin, e uang e pok opok ow batetamji. Ar inimas bwem opok nat, ucim inimaram?” Inim aeef.

⁶Ar inim atakam atawef nat, ar e pok opok ow sawes akat boworpor opok. E nat, ar osom ipic ara. Ar Yesusam, amamkawi owam, e aruang ese manmok batiwtam ipic ara. Aram e uang osom aea ajimep.

⁷E Yesusam atakam aotawef. “Aramat cowoc inimas baemerec. E aemamanas, e do damir aafcey jofayas ara.

⁸E pok opok ow cadam sotop aatamemapawarcemes. Do nat, cadam sotop bwematamemapawar asan opok.” Inim aeef.

⁹Yahudi ow arkenakutam, “E Yesus Betani awamec,” inim atakam jen ajifes. Ar masirin, aramat ipic bi bapor ajisosfes. E nat, ar e Yesus bi bapor cowok baysos opok. Aram e Yesus ajaworomsumutumef ipic juwas Lasarus bi bapor ajisosfes.

¹⁰Yahudi ow arke e Lasarus aojaworsitef atakam, atakamnak aporfes. Inimas ar e Allah atakam mamtaw tugas ow awut atakam ji boe opok aemfes. E nat, ar Yesus asicimfes. E Allah atakam mamtaw kepala owam inimas aporfes, wunam e Lasarus bacatiw at aetiwfes.

¹¹

¹²Bare, ajofay ara, e pokbwi bwem aapenawfes ow arkenakut, atakam jen ajifes. “Yesus a Yerusalem apenawem.” Inim atakam jen ajifes.

¹³E ow masirin, jusun po inim awcaworas atowomtotorfes, wunam Yesus biamnuk memamtew aapenfes. Aram atakam afakaytawa aefes. “Dormomo! Tuhan asan akat e atewenamamar ipic baomcow! Aramat ipic e Israel raja ipic ara. Asan akat baemapcow!” Inim aefes.

¹⁴Yesusam ay keledai cowok apowtewef, wunam ar e keledai bak ton atometapef. Er e Alkitab atakam jipu ara:

¹⁵“Kota Sion aemapmokom owa. Caram omar arapok. Jakaperey. E caraja ipic enawem. Ar ay keledai bak ton aemapma.” E Alkitab atakam inim aema.

¹⁶Bap ara, e Yesus mamkawi ow, e Yesus aemefas amsomnak opok. E nat, asep jofay, Allah e Yesus onam op aotowotometef. E jofay ara, e Yesus mamkawi ow e Alkitab atakam, bi binip acomomfes. Ar masirin, e ow e Yesus aomfesas, e Alkitab atakam jipu aporfes.

¹⁷Bap ara, Yesus e Lasarus e awerem aman bafis jirmec ajirimef, wunam ar e Lasarus aojaworomsumutumef. E Yesus inimas aemef ara, wun owam akac aememfes. Asep ara masirin, e ow e Yesus aemefas, atakam kawey ow aotawfes.

¹⁸Ow arkeam, e Yesus e junum bweas aemef, atakam jen ajifes. Inimas e ow arke e Yesus biamnuk aemamtewfes.

¹⁹E Parisi owam aramaman atakam aamtawfes. “Jakaperey. Dar fak opok openow. Ow takas e aramat ipic ajamkawimes!” Inim aefes.

²⁰Bare, e Yerusalem pokbwi bwem aapenawfes ow, Allah basicim aapenawfes. E wun ow, bare Yunani samat ow ara.

²¹E Yunani ow, e kota Betsaida ipic juwas Filipus ameromfes. (E kota, Galilea capinmi kota ara.) E owam atakam Filipus aotawfes. “Dar e Yesus bi bapor.” Inim aefes.

²²E Filipus masirin, e atakam Andreas aotawef. E Andreasin Filipus masirin, e Yesus ameromfes, wunam e atakam Yesus aotawfes.

²³E Yesusam atakam e ow aotawef. “Allah e Asmat Anakat Ajaworemef Ipic, e onam op asan akatnakut batowotomet jofay, bare sotop ara.

²⁴Atakamnak ara, ow gandum eke se aman aapomcemes. E eke masirin, junuw aemapcema. E eke inimas bwem opok aemcow, ar aporsipor, eke cowoknakap aemapawarcema. E nat, e eke junuw aemapcow, ar akan ajitcema. Wunam eke arke apecema.

²⁵Asmat owam tetakay batamemawar bi binip awut aceceremces, ar jiwne opok aemcemes. E nat, ow awames capinmi tetakay batamemawar bi binip opok aemces, ar e onam op jiwnenak aatamemapawarcemes.

²⁶Ow kerja do bwemtam akat aeces, aram do bajamkawicenes. Inimas e ow, e aememcey asan, dor akac aememcomom. Doricipicam e do kerja bwemtam ow, ow akat atakam atawcema.”

²⁷“Bare, dor jak pwicak aemapmin. Do nat, ucim atakam atawcey? ‘Diwi. Dor Bajurusum arapok,’ Inim atakam atawceynew? Do nat, inim atakam bataw opokut aemcimin. Doram bajurusum aenawof araman.

²⁸Diwi. Ow, ‘Tuhan Allah akatnakut ara,’ inim atakam baotawcenes.” Yesus inim aeef. Allah masirin, e onam op, atakam aotawnemef. “Dor akatnakutas aemof. Inimas ow, dor akatnakut, atakam aotawfenes. Doram inimas aoemcimin.” Inim aeef.

²⁹E erasan aememfes ow arke, e atakam jen ajifes. Ar masirin, “E wir ara,” inim aefes. E wun ow masirin, “Malaikat atakam a aramat ipic aotawma.” Inim aefes.

³⁰E Yesusam, “E Allah e tawnemamar atakam, doras opok. E caras ara.

³¹Allah, a asmat ow e dosa aemfesas jipu siksa bwem, inim atakam basakamtiw jofay, bare emcaenawef. Aram awames capinmi aomomamar ipic akumimosomcema.

³²Ow dor e salib os op atewtopomcenes, dor ow takas do bwenawom ajatecimin.” Inim aeef.

³³Yesus inim atakam atawef ara, ar e salib os op damir aafcowas, atakam e ow aotawef ara.

³⁴E ow arkeam atakam e Yesus aotawfes. “Dar e daragama Jirmec surat atakam jen ajifom ara, ‘E Allah Aeremtewef Ipic jiwne aatamemawarcema.’ Inim atakam jen ajifom. E atawmem atakam nat, ‘Ow e Asmat Anakat Ajaworemef Ipic salib os op atewtopomcemes,’ inim aemem. E Asmat Anakat Ajaworemef Ipic nat, ca ipicam?” Inim aefes.

³⁵E Yesus masirin, “E sereas e cadampu aemapawirin. E nat, ar bar arke opok cadampu aemapceman. Car e sereas e carasan apormokom, caram bajarey. Car e bowsec jiwic aman mememasin. E Jiwic aman ajarmes ow, e ajarmes asan bwempor asan opok.

³⁶Wow e sereas e cadampu aemapman. E nat, ar ajisoscema. Inimas caram wow e sereas basicimey. Car masirin, jiwic aman boemap opok ow aemapcomokom.” Inim aeef. Yesus inim atakam atawef masirin, ajisosef. Aram acukapef.

³⁷Ametnak ara, aramat ipic junum bweas arke e ow bipu aemef. E nat, e ow e aramat ipic basicim opokut aemfes.

³⁸Er e Allah atakam botaw ipic juwas Yesaya e atawef atakam jipu ara: “Tuhan. Ow e atemen aatamfomas basicim opokut aemames. Aram e ofakas bapor opokut aemames.” Yesaya inim aeefen.

³⁹E Yesayaam wun atakam atawefen: “E Allah atakam, ‘Dor ow manmok kapi inim cimin aemapomof. Doram bi binip jiwic e ow atetamof. E ow e amanmok, anakatas baporasin. Aram bi binip umuton baceceremasin. Aram e pwicakas bak bapayemasin. Doram e ow bajortawasin.’ Allah inim aeef.” E Yesaya inim atakam atawefen. Inimas e ow e Yesus bwemsicim asan opok.

⁴⁰

⁴¹E Yesaya e Yesus akatnakut aporefen. Inimas ar inim atakam atawefen. Bare, ar e Yesus atakam atawefen.

⁴²Bare, e wun Yahudi kepala ow arkeam e Yesus asicimfes. Aramat ow nat, e Parisi ow aporfes. Inimas ar e Yesus asicimfesas, atakam kawey ow botaw opok aemfes. E Parisi ow, ar sembahyang cem bafiw, acuw batasin.

⁴³Bare, e Yahudi kepala ow, asmat ow, a basicim, bi binip awutut aceceremfes. E nat, ar Allah a basicim, bi binip kanim inim aceceremfes.

⁴⁴Bare, Yesus atakam awut afakaytawef. “E dor asicimamenes ow, dor cowok basicim opok aemames. Aram e atewenamfan ipic asicimames.

⁴⁵E dobi apormenes ow, e dor atewenamfan ipic biam apormes.

⁴⁶Dor sereas anakat ara. Dor awames capinmi aneyofas, aram e dor asicimamenes ow jiwic aman boemapasin.

⁴⁷Wun ow e doratakam jen ajimes, wunam ar e doratakam ji bwe opok aemes. Do nat, e ow adosa atakam basakatiw opok. Dor asmat dosa, atakam basakamtiw baney opok. Do nat, asmat ow bajortew aneyof.

⁴⁸Wun ow dor aotpemamenes. Ar doratakam ji bwe opok aemes. E nat, e atawof atakam, e Asepnak Jofay, e ow adosa umuton aporomtamcema.

⁴⁹E atawof atakam dorop atakam opok. E nat, doricipic atewenamfan. Aramat ipic e atakam atawofasam, e afasimofasam, jirmec dor ajirimfan.

⁵⁰Ow e doricipic jirmec ajirimfan atakam ji aeces, aram jiwnenak aatamemawarcemes. Dor inimas nomsom. Inimas ara, dor e doricipic aotawfan atakam cowok aootawcimin.” Yesus inim aeef.