Read Central Asmat YOHANES 13 Bible Online

YOHANES 13 - Central Asmat bible

YOHANES 13

¹Bare, e Bakamsow Pokbwi jofay sotopnakap asisienawef. Yesusam awames capinmi bakan bajios, wunam e aricipic asan bafasitomet, sotopnakap aporef. E wun awames capinmi ow, Yesus ajamkawiawiris. Yesusam damos e ow ajiomawiri. Ar e damir aafef jofay ajiwar damos e ow ajiomawiri.

²Bare. Yesusam, e wun owam, iram amos aanesmepes. Bap ara, e Iblis, bi binip e Yudas atetamef. E Yudas masirin, Yesus e jokmen ow botasimemtam bi binip aceceremef. (E Yudas, e Simon Iskariot atiw ara.)

³Bap ara, Allah, pok takas, e Yesus ban ton momomkurum emcatetamef. Yesusam, inimas amsom. Ametnak ara, ar Allah bipu ewneyef. Wunam, ar aramat ipic bipu aofasitometcema. Aram inimas amsom.

⁴Inimas ara, aramat ipic e amos aanesmepes asan asitemef. Ar masirin, e abaju afortiwef, wunam handuk e usin bip ajikapomef.

⁵Aram, bwi, loyang, aokomsemef, wunam ar e amamkawi ow bwey bwi acicikimtotoref. Ar masirin, e usin bip ajikapomef handuk, e bwey aerewtotoref.

⁶E Yesusam, e Simon Petrus bipu aememef. E Petrus masirin, “Tuhan. Oram dobwey bwi bacicikim aranew?” Inim aeef.

⁷E Yesusam, “Or wow aemaminas omsom opok. Asep jofay nat, or inimas omsom aememcemem.” Inim aeef.

⁸E Petrus, “Or e dobwey bwi bacicikim arapok!” Inim aeef. E Yesus masirin, “Dor e obwey bwi bacicikim opok aemcey, bare or domamkawi ipic opok ara.” Inim aeef.

⁹E Simon Petrusam, “Tuhan. Or e dobwey cowok bwi bacicikim arapok. E dobanam e dokusam bwi takas bacicikimkurumcan.” Inim aeef.

¹⁰Yesus masirin, atakam e aramat ipic aotawef. “E bwi abwieres ow, e adam takas bwi bobwim arapok. E adam anakat takas, bare orom ara. Ar e abwey cowok bwi bacicikimces. Bare, car akat ara. Car ponow opok. E nat, e ca wun ipic cowok, aram akat opok.” Inim aeef.

¹¹(E wun ipic, Yesus e jokmen ow botasimemtam aememef. Yesusam inimas amsom. Inimas Yesus atakam, “Car akat ara. E nat, e ca wun ipic cowok, aram akat opok.” Inim aeef.)

¹²Bare, e Yesus e ow bwey bwi acicikimef masirin, ar e abaju aotamwief. Wunam ar e amos aanesmepes asan aoneypwikapef. Aram atakam e ow aotawef. “E dor car aemaminas camsom open?

¹³Caram atakam dor aotawmenokom, ‘Guru,’ inim aemenokom. Caram, ‘Tuhan,’ inim aemenokom. E atakam atawmenokomas, bare atakamnak ara. Dor inimas awamcey ara.

¹⁴Dor e caTuhan awamcey ara. Doram e caGuru awamcey ara. Bare, dor e cabwey bwi acicikimamin. Inimas caram e cabwey caramaman mamcicikimawarey.

¹⁵Dor car inimas acowomtamamin. Caram e car aemaminas jipu cowok mamcowoyawarey.

¹⁶Atakamnak ara, kerja bwemtam ipic awut ara, wunam e kerja aramat ipic kanim ara, bare inimas opok. Er masirin, e baysos ipic awut ara, wunam e ipic batewosom ipic kanim ara, bare inimasam opok.

¹⁷Car eras camsom ara. Bare, car e atakam ji aecokom, asan akat aemapcomokom.”

¹⁸“E atawmin atakam, car takas opok. Dor e aereremtawof ow nomsom. E nat, e Alkitab atakam ara, ‘E amos akac aemena ajimpan ipic ajurusumfan.’ Inim aema. Bare, ow e Alkitab atakam jipu acowoycemes.

¹⁹Dor a atakam bap car aotawmin. Wunam asep jofay, e ipic eras aemcan, caram dor e Allah Aeremtewef Ipic ara, inim atakam asicimcomokom.

²⁰Atakamnak ara, ow e dor atewosomof ow atowomiwces, aram dor atowomiwcemenes. Wunam, e dor atowomiwcenes ow, e do tewosomfan ipic atowomiwcemes.” Yesus inim aeef.

²¹Yesus inim atakam atawef masirin, jak pwicak awutnakut aememef. Aram, “Atakamnak ara, ca wun ipic cowok dor e jokmen ow aotasimemtamceman.” Inim aeef.

²²E Yesus mamkawi ow, e aramat ipic atakam otawef ipic amsom opok. Inimas ar manmok aamtiwtotorfes.

²³Bare, Yesus, e wun mamkawi ipic cowok damos awut ajiomawiri. E jofayam, e ipic, Yesus cowkon aemapfes.

²⁴Simon Petrusam bi waci e ipic aemef. Eras e ipic, “E ca ipicam?” inim jonow Yesus boportowporas ara.

²⁵E ipic masirin, Yesus sotop asisiapef, wunam jonow atowef. “Tuhan. E or jokmen ow aotasimemtamcan ipic cam?” Inim aeef.

²⁶E Yesusam, “Dor a roti a piring bwi asotewcimin, wunam e ipic atetamcimin.” Inim aeef. Bare, Yesus, roti kanim atawef, wunam e roti e piring bwi asotewef. Ar masirin, e roti, Yudas atetamef. (E Yudas, Simon Iskariot atiw ara.)

²⁷Bare, e Yudas e amos aemenef. E amos aemenef, masirin, Iblis e Yudas jak aman afiwapef. Yesusam atakam e Yudas aotawef. “E aemcemas sarimnakap mamemey.” Inim aeef.

²⁸E nat, erasan aemapfes ow takas, e Yesus atakam Yudas aotawefas, bi binip arke aceceremfes. Yesus inim atakam jopom atawefnew? Bare, e ow amsom opok.

²⁹E Yudas e ow aruang ese manmok batiw ipic ara. Inimas e wun ow bi binip aceceremfes. “Yesus e Yudas e pokbwi amos pok bajitnew, uang e pok opok ow batetamnew, inim atakam atawmar ara openow.” Inim bi binip aceceremfes.

³⁰Bare, e Yudas e Yesus atetamef amos atewenef. Atewenef masirin, cesen afisef. Er iram ara.

³¹E Yudas afisef masirin, Yesus atakam atawef. “Wow, Allah, e Asmat Anakat Ajaworemef Ipic akatnakut ara, inimas aporomtamcema. E Asmat Anakat Ajaworemef Ipic aemcowas, e Allaham akatnakut ara, inimas aporomtamcema.

³²E aramat ipic aemcowas, e Allah akatnakut ara, inimas aporomtamcow, bare Allaham e aramat ipic akatnakut ara, inimas aporomtamcema. Allaham eras sarimnakap aemcema.

³³Tiperesa. Dor arasan, bar arke opoknakap car cowkon aememcimin. Car masirin, dor apowporcemenokom. E nat, dor atakam e Yahudi ow aotawofas, wowam car aotawmin. ‘Car e ajisoscey asan, bwemjisos asan opok.’ Inim aeof.

³⁴Bare, doram wow ay jirmec car ajirimamin. Car damos caramaman mamamey. E dor damos car ajiomaminas inim cimin mamamey.

³⁵Ow, car damos aamjiamamokomas aporces, aram car domamkawi ow aporcenes.” Yesus inim aeef.

³⁶Bare, e Simon Petrus atakam Yesus aotawef. “Tuhan. Or ocenak asan jisoscem?” Inim aeef. E Yesus masirin, “Or wow e ajisoscey asan, bwemjamjisos asan opok. E nat, asep jofay oram erasan ajisoscemem.” Inim aeef.

³⁷E Petrusam, “Tuhan. Dor wow or bwemjamjisos asan opok nat, ucimaram? Ow dor omamkawi ipic aporcenes, wunam dor acatiwcenes, bare akat ara.” Inim aeef.

³⁸E Yesus, “Ow or domamkawi ipic aporcenes, wunam or acatiwcenes, or inimas akat aranew? Atakamnak ara, or atakam bar mamincop aotawcem, ‘Dor e Yesus nomsom opok,’ inim aecem, bare ayam jipic akoreycema.” Inim aeef.