Read Central Asmat YOHANES 15 Bible Online

YOHANES 15 - Central Asmat bible

YOHANES 15

¹“Dor eke akat apecemar os inim awcawor ara. Doricipic masirin, e kebun kerja ipic inim awcawor ara.

²E dor ajamkawimenes ow, e os ef inim awcawor ara. Doricipic, e ef, eke bape opok aporcow, aram asakamosomcema. Aram e ef, eke bape aporcow, aram e pwicak ef kanimnakap arke asesakamosomcema. Eras e ef awut, eke arke bopeas ara.

³Car e dor atakam car aotawfinas ji aefokom. Inimas car akat aememfokom.

⁴Caram dor cowkon mamatamemapawarcan. Dor masirin, car cowkon aatamemapawarcimin. Os ef, o batap opok aatamemapawarcow, ar eke bwempeap asan opok. Caram dor cowkon batamemapawar opok aemcokom, car akatas bwemem asan opok.”

⁵“Dor e os o awcawor ara. Car masirin, e os ef inim awcawor ara. Ow dor cowkon aatamemapawarcenes, wunam dor e ow cowkon aatamemapawarcey, e ow, akatas arke aemcemes. Car dor cowkon bemap opok aemcokom, car akatas bwemem asan opok cowok.

⁶Ow dor cowkon batamemapawar opok aemcenes, ar pwicak ef inim cimin ara. Owam e ef asesakamosomcemes. E ef mairin, sa asacema. Owam e ef atawcemes, wunam jis asapimapomcemes. E ef masirin, jis afaycema.

⁷Car dor cowkon aatamemapawarcenokom, wunam car doratakam ji aecokom, bare e akat aporcokomas janim Allah manimey. Aramat ipic masirin, eras car aemtamceman.

⁸Car akatas arke aemcokomam, do mamkawinak ow aememcokomam, bare, ow, e doricipic akatnakut ara, inimas aporcemes.”

⁹“Doricipic damos dor ajiomaman. Doram inimas cowok damos car ajiomamin. Caram doratakam ji mamatameawarey. Inimas dor damos car aatamjiomawarcimin.

¹⁰Dor e doricipic jirmec ji aatameawarmin. Inimas doricipic damos dor aatamjiomawarman. Caram e dojirmec ji aatameawarcokom, doram damos car aatamjiomawarcimin.

¹¹Do jak akat ca batetamtotor, bare akat ara. Caram jak akatnakut memem, akat ara. Inimas ara, dor a atakam car aotawmin.

¹²Doram, jirmec car ajirimamin. Car damos caramaman mamamey. E dor damos car ajiomaminas inim cimin mamamey.

¹³Jipic cowok, e ajowow bajortew, inim damir aafcow, ar e ow damos awutnakut ajiomama. Inimas bwem, bare damos bajiomas awutnakut ara. E wun damos bajiomas, bare kanim ara.

¹⁴Caram e jirmec car ajirimaminas ji aecokom, bare car dojowow ara.

¹⁵Kerja bwemtam ow, e kerja aramat ipic aemamaras amsom opok. Inimas dor, ‘Car dokerja bwemtam ow ara,’ inim baji opok. E nat, dor e doricipic atakam jen ajiofas takas, atakam car aotawfin. Inimas dor, ‘Car dojowow ara,’ inim aemin.

¹⁶Car do bweremtew opok. E nat, car do mamkawi ow memem aereremtawtotorfin. Doram car akatas bwem atewosomtotorfin. E aemcokom akatas, e bakari opokas ara. Bare, car do mamkawi ow awapokom ara. Inimas car janim e doricipic aanimcokom, aramat ipic e janim aanimcokomas takas atatamceman.

¹⁷Bare, caram damos caramaman mamamey. Dor inim jirmec car ajirimamin.”

¹⁸“Awames capinmi ow bifan car afayomaman epenow. E nat, ow bifan bap dor afayomfenes, wunam bifan asep car afayomfan. Caram inimas binip manim arapok.

¹⁹Awames capinmi ow, damos aramaman aamjiomames. Car awames capinmias ajamkawifokom ayaw, a owam damos car ajiomfan. E nat, car awames capinmias mamkawi opok. Inimas a ow bifan car afayomaman. Bare, dor car awames capinmias bakan bajios aereremtawtotorfin.

²⁰E aotawfin atakam binip mamcomomey. ‘Kerja bwemtam ipic awut ara, wunam kerja aramat ipic kanim ara, bare inimas opok.’ Inim aefin. E wun ow dor ajurusumfan. Inimas e owam car ajurusumceman. E wun ow masirin, e doratakam ji aefes. Inimas e owam caratakam ji aecemes.

²¹Bare, e wun ow e dor atewenamfan ipic amsom opok. E nat, car dor ajamkawimenokom ow ara. E owam inimas aporces, aram car ajurusumceman.

²²Dor atakam e ow botaw bwenaw opok ayaw, e owam dosa opok aemapfes. E nat, dor atakam e ow emcaotawof. Inimas ar e dosa aemamesas, bwempacin asan opok.

²³E bifan dor afayomamenes ow, bifan e doricipicam afayomames.

²⁴Dor junum bweas e ow bipu aemof. Wun owam e junum bweas bwemem asan opok. Dor e junum bweas bwem opok ayaw, e ow dosa opok aemapfes. E nat, e ow e junum bweas aporfes, wunam bifan doram, doricipicam, afayomfarowos.

²⁵E aemfenesas nat, e ow atowomfes Jirmec surat atakam jipu ara. E atakam ara, ‘Dor pwicakas bwem opok. E nat, ar bifan dor afayomfenes.’ ” Inim aema.

²⁶“Bare e jak fak bemapomtam ipic, e doricipic cowkon awapes. E ipic Roh Kudus ara. Doram e Roh Kudus e cadampu atewnemcimin. Ar doricipic asan ewneycema. E Roh Kudus e atakamnak car amememtamceman. Aramat ipicam doratakam car aotawtamceman.

²⁷Bapnak car dor akac aememfom. Wow ajiwaram car dor akac aememamom. Inimas caram doratakam kawey ow aotawtamcemonokom.”