Read Central Asmat YOHANES 16 Bible Online

YOHANES 16 - Central Asmat bible

YOHANES 16

¹“Dor a atakam car aotawmin, car do mamkawi bakorompimasin.

²Owam car sembahyang cem bafiw acuw aatceman. Aenawcow jofay, aram car acajimirceman. E car acajimircan ow masirin, inim bi binip aceceremcemes. ‘Allah e aemamomas kata aporma.’ Inim aecemes.

³E ow nat, doricipic amsom opok. Aram dor amsom opok. Inimas ar eras aemcemes.

⁴Bare, dor a atakam car aotawmin. Wunam asep jofay, ow eras car aemcan, caram bi binip acowomcomokom. ‘Bare, e Yesus inim atakam dar emeotawforow.’ Inim bi binip acowomcomokom. Bap ara nat, dor car akac aemapfom. Inimas dor a atakam car botaw opok aemof.”

⁵“Bare, dor e atewenamfan ipic asan sarim pwiciri aojisoscimin. E nat, caram, ‘Ocenak asan jisoscem?’ baji opok cowok ara.

⁶E nat, car jak pwicaknakut aemapmokom. Car dos baysos atakam apormokom ara.

⁷Atakamnak ara, e dor ajisosceyas, car asan akat bwemtamas ara. Dor baysos opok emcey, e jak fak bemapomtam ipic bwenaw opok aemcema. E nat, ajisoscey, dor e aramat ipic e cadampu atewenamcimin.

⁸Awames capinmi ow atakam atawmes, ‘Dosa ow ucim owaram? Bare daram eras namsom. Tarowat ow ucim ow aram? Daram eras namsom. Allah, ow siksa aemcowas, inim atakamam namsom.’ Inim aemes. E nat, aram amsom opok. E jak fak bemapomtam ipic aneycow, ar inimas umuton cowok e ow aporomtamcema.

⁹E ow do basicim opok. Inimas ar dosa ow ara.

¹⁰Dor masirin, tarowat ipic ara. Inimas dor doricipic asan aojisoscimin. Ajisoscey, car e dobi bapor opok aemcemenokom.

¹¹Allaham, awames capinmi aomomamar ipic siksa bwem atakam emcasakamtiwef. Inimas Allah e fasi ow takasam siksa aemcema. Bare, e jak fak bemapomtam ipic eras takas, awames capinmi ow, umuton aporomtamcema.”

¹²“Doram wun atakam arke car botaw, akat aemamin. Ca nat, wow e atakam jen bwemji asan opok.

¹³E nat, e Roh Kudus, atakamnak mamememtam ipic ara. Aramat ipic aneycow, ar e atakamnak takas umuton car aporomtamceman. Aramat ipicam arop atakam botaw opok aemcema. E nat, e jen ajicow atakam, aotawcema. Aram e asep jofay aenawcesas, atakam car aotawcema.

¹⁴Aramat ipic e dor atakam aotawminas, atakam umuton car aotawceman. Ar masirin, dor akatnakut ara, inimas car aporomtamceman.

¹⁵Dor e doricipic atakam takas aotawcimin. Inimas dor atakam car aotawmin, ‘E Roh Kudus, e aotawmin atakam, car amememtamceman.’ ” Inim aemin.

¹⁶“Bare, bar arke opok, car e dobi bopor opok aemcemenokom. Wunam wun bar arke opok, car e dobi aoporcemenokom.” Yesus inim aeef.

¹⁷E wun aramat ipic mamkawi ow masirin, “Aramat ipic e atakam dar aotawmarowas ucimasam? Aratakam, ‘Bar arke opok car e dobi bopor opok aemcemenokom. Wunam wun bar arke opok, car e dobi aoporcemenokom.’ Wunam, ‘Doricipic asan ajisoscimin.’ Inim aema.

¹⁸E atakam, ‘Bar arke opok,’ nat, ucimasam? Dar e atawmar atakam namsom opok.” Inim aefes.

¹⁹Yesusam e ow jonow a batowpor aememfes aporef. Ar masirin, “E caramaman jonow aamtowmokom ucimasaram? E atawmin atakam, ‘Bar arke opok, car e dobi bopor opok aemcemenokom. Wunam, wun bar arke opok, car e dobi aoporcemenokom,’ inim atakam jonow aamtowmokom aranew?

²⁰Atakamnak ara, caram bwec abweccomokom. Awames capinmi ow masirin, jak akat aememcemes. Car jak pwicak aememcomokom. E nat, asep ara, car jak akat aoememcomokom.

²¹Cowoc ju ajitimapomcow, aram jak pwicak ara. Ar e ajuruscowas, sotopnakap aporcema. E nat, ar e jiwi ajispetiwcow, aram e bajurusas bi binip aanimcema. Ar jiwi ajisamescow aporcema, wunam jak akat aoemapcema.

²²Caram inim cimin ara. Car wow jak pwicak aemapmokom. E nat, dor e cabi aoporcimin. Car masirin, jak akat aoemapcomokom. Kawey owam e cajak akatas bwemkoromosom asan opok.

²³E jofayam ara, car jonow do botowpor opok aemcemenokom. Atakamnak ara, car do mamkawi ow awamcokom ara. Inimas car janim e doricipic aanimcokom, aramat ipic e janim aanimcokomas takas aemtamceman.

²⁴Car do mamkawi ow awamcokom ara. E nat, wow ajiwaram, car eras bapor, wunam janim Allah manim, bare inimas opokut aemamokom. Janim Allah mamanimawarey. Allah masirin, e janim aanimcokomas car aemtamceman. Inimas caram jak akatnakut aememcomokom.”

²⁵“Bare, dor a atakam, baposomtew atakam, car aotawawirin. E aenawcow jofay nat, dor baposomtew atakam car bootaw opok aemcimin. Dor masirin, e doricipic atakam, umuton cowok, car aotawcimin.

²⁶E jofay aenawcow, dor janim e doricipic car boanimtam opok aemcimin. Caram do mamkawi ow awamcokom ara. Car eras bapor, wunam janim e doricipic carma aanimcomokom.

²⁷Bare, car damos dor ajiomamenokom. Doram e Allah dampu ewenawof. Caram inim atakam asicimfokom. Inimas ara, doricipicam damos car ajiomaman.

²⁸Dor e doricipic dampu ewenawof, wunam awames capinmi aneyof. Dor masirin, awames capinmi bakan ajioscimin. Doram e doricipic dampu aojisoscimin.” Yesus inim aeef.

²⁹E Yesus mamkawi owam atakam aotawfes. “Bare. Or wow atakam umuton aotawmem. Or baposomtew atakam bataw opok aemamem.

³⁰Oram omsom takas. Owam jonow o batowpor aememces, oram e abi binip omsom. Inimas ow jonow o botowpor arapok. Dar inimas apormom, wunam or e Allah dampu ewenawfemas atakam asicimamom.” Inim aefes.

³¹E Yesus masirin, “Car wow do basicim anakat aranew?

³²Aenawcow jofay, ow car awumtiwceman. Caram aporsipor cem apacayoscomokom. Car dor bakan ajiemcemenokom. Bare, e jofayam sotopnakap asisienawma. Do nat, dorop bemap opok. Doricipic dor akac aemapmom.

³³A atawmin atakam, car jak akat boporemas ara. Car dor ajamkawifenokom. Inimas omar arapok. Car awames capinmi aemapmokom ara, ow car ajurusumceman. Do nat, awames capinmias emcakumimosomof. Inimas jak fak ememey.” Yesus inim aeef.