Read Central Asmat YOHANES 18 Bible Online

YOHANES 18 - Central Asmat bible

YOHANES 18

¹Yesus inim atakam atawef masirin, aram, amamkawi owam, e jo kanim juwas Kidron poman aokorjirfes. Erasan eke epcom os kebun asan ara. Aramat ipicam, amamkawi owam, e kebun asan aapjesfes.

²Bap ara, Yesusam, amamkawi owam, bar arke erasan akac ajara aefes. Inimas e Yesus e jokmen ow aotasimemtamcow ipic juwas Yudas, e asan amsom ara.

³E Allah atakam mamtaw tugas ow awutam, e Parisi owam, Allah cem manmok batiw ow, jirmec ajirimfes. E Yudas masirin, e manmok batiw owam, tentara ow arkeam, e kebun asan bap ajaromatef. E ow, lentera arkeam, sos pok arkeam, foro pok arkeam, inimas atowomtotorfes.

⁴Yesusam e ow ar aemcesas takas amsom. Inimas Yesus ajisef, wunam atakam e ow aotawef. “Car ca ipic apowmokom?” Inim aeef.

⁵E ow masirin, “Dar e Nasaret ipic juwas Yesus apowmom.” Inim aefes. E Yesus masirin, “Dor awamcey ara,” inim aeef. Bare, e Yesus e jokmen ow aotasimemtamcow ipic juwas Yudas, e ow cowkon aememef.

⁶E Yesus, “Dor awamcey ara,” inim aeef ara, bare, e ow aotasifes, wunam cenes aneyjuamesfes. Inimas aramat ipic jonow e ow aotowporef. “Car ca ipic apowmokom?” Inim aeef. E ow masirin, “Dar e Nasaret ipic juwas Yesus apowmom.” Inim aefes.

⁸E Yesusam, “Dor atakam emcaotawey. Dor awamcey ara. Car dor apowmenokomnew, a dor ajamkawimenes ow, inim bajisosces.” Inim aeef.

⁹Bap ara, Yesus atakam Allah aotawef, “E atatamfenem ow bapakapios opok cowok aemfes,” inim aeef. Inimas e atakam, “A dor ajamkawimenes ow bajisosces,” bare, e bap atakam atawefas jipu ara.

¹⁰E Simon Petrusam owec parang atowomef. Ar e parang asumtewef, wunam ar e Allah atakam mamtaw tugas ipic awut akerja bwemtam ipic e bo jenmak asakamnemef. E kerja bwemtam ipic juwas Malkus ara.

¹¹Yesusam atakam e Petrus aotawef. “E parang e ese aman bocumnemey. Doricipic, dor inim bajurusem, atakam asakamtiwef. Obi binip nat, ‘E Yesus inim bajurusum pwicak ara,’ inim bi binip aceceremamemnew?” Yesus inim aeef.

¹²Bare, e tentara owam, e akepala ipicam, e Allah cem manmok batiw owam, Yesus ban akimomfes. Aram Yesus ban manam ajikapomfes.

¹³Aram e Yesus, e Hanas bipu atowomosfes. Ar e Hanas, e Kayafas anapwec aporfes ara. E tahun ara, e Kayafas, e Allah atakam mamtaw ipic awut tugas aemef.

¹⁴E Kayafasam ametnak atakam atawef, “Jipic cowok, a ow takas damir aaftamcow, wunam e dasamat ow takas damir baf opok, bare akat ara.” Inim atakam atawef.

¹⁵Simon Petrusam, wun Yesus mamkawi ipic cowokam, e Yesus fa asatfes. Bare, e Allah atakam mamtaw tugas ipic awut, e wun Yesus mamkawi ipic amsom ara. Inimas e ipic, e Yesus e Allah atakam mamtaw tugas ipic awut cemsan pagar aman, akac afiwemef.

¹⁶E Petrus nat, e cesen aememef. Ar e jimasappu aememef. E Allah atakam mamtaw tugas ipic awut e wun Yesus mamkawi ipic amsom. E Yesus mamkawi ipic e cesen afisef. Aram atakam e jimasap manmok batiw cowoc aotawef. Ar masirin, e Petrus atowomiwef.

¹⁷E jimasap manmok batiw cowoc masirin, atakam Petrus aotawef. “Oram e ipic amamkawi ipic ara openow.” Inim aeef. E Petrus nat, “Ba! Dor inimas opok.” Inim aeef.

¹⁸E cem kerja bwemtam owam, e Allah cem manmok batiw owam, dam jufu aememfes. Inimas ar jis atowokomfes. Aram jisis jisanam ajifes. E Petrusam e ow jisanam akac ajifes.

¹⁹Bare, E Allah atakam mamtaw tugas ipic awut, jonow Yesus atowef. Ar e amamkawi owam, e amememtamef atakamam, jonow Yesus atowef.

²⁰E Yesus masirin, atep ajitef. “Dor atakam ow bipu umuton atawawiru. Doram a jo afafayawiri, e sembahyang cem amanam, e Allah cem amanam, atakam atawawiru. Erasan e Yahudi ow takas barewsiap asan ara. Doram curuw atakam botaw opok cowok.

²¹Or jonow dor atowmenem nat, ucim inimaram? Jonow e doratakam jen ajiawiris ow mamtowporey. E ow e atakam atawawiruas amsom.” Yesus inim aeef.

²²Yesus inim atakam atawef masirin, erasan aememef Allah cem manmok batiw ipic, Yesus e ak aempoef. E ipicam, “Or Allah atakam mamtaw tugas ipic awut inim atep ajitmemnew?” Inim aeef.

²³E Yesus masirin, “Dor pwicak atakam atawminnew, oram e pwicak atakam umuton otawcan. E nat, dor akat atakam atawminnew, or a dorak ucimas empowmenem?” Inim aeef.

²⁴Bare, e Hanas, ow e Yesus e ban manam epcom, e Kayafaspu batowocen, jirmec ajirimef. E Kayafas, e Allah atakam mamtaw tugas ipic awut ara.

²⁵Bare. Simon Petrus, e jisis jisanam cowocjimepaw, e wun owam jonow aramat ipic atowporfes. “Oram awamec ipic mamkawi ipic ara openow.” Inim aefes. E Petrus nat, apacinef. “Dor inimas opok.” Inim aeef.

²⁶E Allah atakam mamtaw tugas ipic awut akerja bwemtam ipic cowok, erasan aememef. Ar e Petrus jenmak asakamnemef ipic ajowow ipic ara. Aram atakam atawef. “E kebun asan ara, dor or e Yesus cowkon aememesmem aporesmin ara openow.” Inim aeef.

²⁷E Petrus nat, aopacinef. Aopacinef masirin, e ayam jipic atakam akokoreyef.

²⁸Bare, e Yahudi ow, e Yesus, e Kayafas cem atowomisfes. Wunam ar aramat ipic e gubernur cem atowocenfes. Er tam iram fak ara. E Yahudi ow nat, e cem bafiw opok. Ar e Bakamsow Pokbwi memen akat aefes. Inimas ar e aragama karowas bwem pwicak arawen.

²⁹E Pilatusam inimas aporef. Aramat ipic masirin, e cesen afisef, wunam atakam e ow aotawef. “Awamec ipic ucim pwicakas aemef? Car ucim atakam atawmokom?” Inim aeef.

³⁰E ow masirin, “A ipic pwicakas bwem opok ayaw, dar ar or bwemotasimemtam asan opok.” Inim aefes.

³¹E Pilatus masirin, “Caram e ipic batewey. Wunam e asalah, e cajirmec jipu, atakam carma aamsakamey.” Inim aeef. E Yahudi ow nat, atakam e Pilatus aotawfes. “E da Yahudi ow, ow bacatiw atakam mamsakam, bare karow ara.” Inim aefes.

³²Bapam ara, Yesus atakam atawef, “Dor inim damir aafcimin,” inim aeef. E ow aemfesas masirin, e Yesus atawefas jipu ara.

³³Bare, e Pilatus e acem aofiwef. Ar masirin, e Yesus ajateef. Aram jonow e aramat ipic atowef. “Or e Yahudi ow araja ipic aranew?” Inim aeef.

³⁴E Yesus masirin, “E jonow atowpormenemas nat, orop bi binipas aranew? Kawey ow doratakam or aotawfenesnew?” Inim aeef.

³⁵E Pilatus, “Dor Yahudi ipic opok. E osamat owam, e Allah atakam mamtaw tugas ow awutam, or aotasimemtamenes. Or ucimas emfem?” Inim aeef.

³⁶E Yesusam, “Dor awames capinmi raja ipic opok. Dor awames capinmi raja ipic aememof ayaw, e dokerja bwemtam ow owen emcaamoeres. Ow dor e Yahudi ow botasimemtamasin. Do nat, awames capinmi raja ow inim cimin opok.” Inim aeef.

³⁷E Pilatus masirin, “O nat, raja ipic aranew?” Inim aeef. E Yesusam, “Or dor raja ipic atakam aotawmenem, bare atakamnak ara. Dor, atakamnak, ow botaw, awames capinmi aneyof. Dor atakamnak, ow botaw ajisamesof. E atakamnakto aememames ow doratakam jen ajimes.” Inim aeef.

³⁸E Pilatus nat, “Atakamnak nat, ucim inimaram?” Inim aeef. E Pilatus inim atakam atawef masirin, ar e cesen aofisef. Aram atakam e Yahudi ow aotawef. “Dor awamec ipic salah opok apormin ara.

³⁹Tahunin tahunin ara, e Bakamsow Pokbwi jofay, dor penjara cem aman bemap ipic cowok, car afimisimtama ajimop. Er e catareyas jipu ara. Car nat, dor a Yahudi ow araja ipic car bafimisimtam akat open?” Inim aeef.

⁴⁰E ow masirin atakam afakaytawfes. “Or awamec ipic bafimisimtam arapok. E Barabas bafimisimtamey.” Inim aefes. E Barabas nat, pok ces bwetaw ipic ara.