Read Central Asmat YOHANES 19 Bible Online

YOHANES 19 - Central Asmat bible

YOHANES 19

¹Bare. E Pilatus, ow, Yesus omop baf jirmec ajirimef. E ow masirin, e Yesus atewfes, wunam omop aaffes.

²E tentara owam fa epcom sinim atewfes, wunam kus bamapom biwnam asiapomfes. Ar masirin, e biwnam Yesus kus ajimapomfes. Aram esakam baju jirow Yesus atamwimemfes.

³E ow masirin, aramat ipic bipu ameroma aefes, wunam atakam atawa aefes. “Yahudi ow araja ipic akatenem! Selamato!” Inim aea aefes. Aram Yesus ak aempoa aefes.

⁴E Pilatusam e cesen aofisef, wunam atakam e Yahudi ow aotawef. “Jakaperey. Dor awamec ipic e cabipu aofimisimcimin. Car, dor e ipic salah opok apormin, inimas aporcomokom.” Inim aeef.

⁵Bare, e Yesus e cesen afisef. Ar e fa epcom kus bamapom biwnam e akus ajumwisef. Aram e esakam baju jirow ametemtamwijisef. E Pilatusam atakam e ow aotawef. “Jakaperey. Aramat ipic ar ara.” Inim aeef.

⁶E Allah atakam mamtaw tugas ow awutam, e Allah cem manmok batiw owam, e aramat ipic aporfes. Ar masirin, atakam afakaytawfes. “E ipic salib os op bacatopomey! E ipic salib os op bacatopomey!” Inim aea aefes. E Pilatus masirin, atakam e ow aotawef. “Dor a ipic salah opok apormin. Inimas caram ar salib os op carma bacatopomey.” Inim aeef.

⁷E Yahudi owam, “Awamec ipic atakam atawef. ‘Dor Allah atiw ara.’ Inim aeef. Da nat, jirmec awompom. E jirmec, inim atakam botaw ipic bacatiw, atakam atawma.” Inim aefes.

⁸E Pilatusam inim atakam jen ajief ara, omar awut aeef.

⁹Aramat ipic masirin, e Gubernur cem aofiwef, wunam jonow Yesus aotowporef. “Or ocenak asan ewenawfem?” Inim aeef. E Yesus nat, atep bajit opokut.

¹⁰E Pilatus masirin, “Or atep do bajit opok aranew? Dor o bafimisimtam fakas awomcey. Doram o salib os op bacatopom fakas awomcey. Or inimas omsom opoknew?” Inim aeef.

¹¹E Yesusam, “Allah or do bwem fakas or batetam opok ayaw, or inim fakas momom opok cowok aemamem. Inimas ara, e dor or aotasimemtaman ipic, bare salah awut inim. Or ara masirin, salah kanim inim.” Inim aeef.

¹²Pilatus inim atakam jen ajief ara, ar Yesus bafimisimtam den emporef. E Yahudi ow nat, atakam afakaytawfes. “Awamec ipic atakam, ‘Do raja ipic ara,’ inim aeef. Inim atakam botaw ow, e raja Kaisar ajewew ow ara. Or awamec ipic afimisimtamcem or e Kaisar ajowow ipic opok ara.” Inim aefes.

¹³Pilatus inim atakam jen ajief ara, ar Yesus e cesen atowomisef. E Pilatus masirin, e ow atakam basakamtiw asan afiwapef. E asan juwas “Ek aturumtiwfes cemsan.” Ibrani atakam, e asan juwas “Gabata.”

¹⁴Eras aemfes, bare jopok emtow tometapef. Ajofay afayamescow, aram Bakamsow Pokbwi jofay ara. E Pilatusam atakam e Yahudi ow aotawef. “Jakaperey. E caraja ipic awamec ara!” Inim aeef.

¹⁵E ow masirin, “A ipic batewey. A ipic batewey. E salib os op bacatopomey!” Inim aefes. E Pilatusam, “Dor e caraja ipic salib os op bacatopom aranew?” Inim aeef. E Allah atakam mamtaw tugas ow awut masirin, “Kaisar cowok daraja ipic ara. Da wun raja opok.” Inim aefes.

¹⁶Bare, Pilatus, e Yesus salib os op bacatopom e ow aotasimemtamef. E ow masirin, e Yesus atewfes.

¹⁷Yesusam e salib os sop atatiwef, wunam asan juwas “Damir Kus Asan” atowocenef. Ibrani atakam masirin, e asan juwas “Golgota.”

¹⁸Erasan ara, e ow wun ipic jamnuk salib os op atewtopomfes. Ar e wun ipic e Yesus bopim jamam arop salib os op atewtopomfes. Aram e wun ipic e Yesus tamopim jamam arop salib os op atewtopomfes. Yesus masirin, e ipic jamnuk wowoc aemtepefen.

¹⁹Pilatusam tulis aeapomef, wunam ar ow e tulis aeapomefas e salib os op batewtopom jirmec ajirimef. E tulis aeapomefas atakam, “A ipic e Nasaret samat ipic juwas Yesus ara. Ar e Yahudi ow araja ipic ara,” inim atakam tulis aeapomef.

²⁰E Yesus salib os op atewtopomfes asan e kota sotop ara. E tulis aeefas, Ibrani atakamam, Latin atakamam, Yunani atakamam, ara. Inimas Yahudi ow arke e atakam baca aemfes.

²¹Inimas ara, e Yahudi Allah atakam mamtaw tugas ow awut, atakam e Pilatus aotawfes. “Or, ‘Ar a Yahudi ow araja ipic ara,’ inim atakam tulis bweapom arapok. E nat, ‘A ipic atakam, “Dor Yahudi ow araja ipic ara,” inim aeef.’ Inim atakam tulis eapomey.” Inim aefes.

²²E Pilatus nat, “E tulis aeapomey atakam inim baemaperec.” Inim aeef.

²³Bare, e tentara ow, e Yesus, salib os op atewtopomfes ara, ar e apakaian atawfes. Ar masirin, e pakaian, empat ajiwar aseyamtiwfes. E tentara aporsipor, cowok teweta, cowok teweta, inim aefes. Aram e aman baju jirow atewfes. Ametnak ara, e baju asifes ow, kain bini cowokut asifes. Inimas e baju bip jamnuk cowkon bakopom opok baju ara.

²⁴E tentara owam inimas aporfes, wunam atakam aramaman aamtawfes. “Dar e baju bakakam arapok. E nat, ek kanim baneyjiwitiwtotormoc. Er e baju atewetcow ipic baporomtamas ara.” Inim aefes. Erasam e Alkitab atakam jipu ara: “Ar e dopakaian sey aseyamatfes. Aram e dobaju batewet, ek kanim aneyjiwitiwtotorfes.” E Alkitab inim aema. Bare, e tentara owam inimas cowok aemfes.

²⁵Yesus arosowocam, arosowoc aromwesam, Klopas arem juwas Mariaam, Maria Magdalenaam, e Yesus salib os sotop aememfes.

²⁶Yesus, e arosowoc erasan aememef aporef. Bare, aramat ipic damos awut e amamkawi ipic cowok ajiomawiri. Ar e ipic e arosowoc sotop aememef aporef. Ar masirin, “Enew. Jakaperey. A ipic otiw baememcow.” Inim aeef.

²⁷Yesus masirin, atakam e mamkawi ipic aotawef. “Jakaperey. A cowoc orosowoc baememcow.” Inim aeef. Bare, e jofay ajiwar, e mamkawi ipic e cowoc e acem atowomiwef.

²⁸Bare. Yesus, e Allah jirmec ajirimefas takas, afafaykurumef aporef. Ar masirin, “Do bwito.” Inim aeef. Eras e Alkitab atakam jipu ara.

²⁹Erasan, bwi bowapomas cowok aemapef. E bwi bowapomas aman asesak anggur bwi ara. Owam bwi basirijiw pok atewfes, wunam e pok e anggur bwi asotewfes. Ar masirin, e pok wakan inim cimin pok juwas hisop bip aatamsimapomfes, wunam e pok Yesus bweyofpu ajoromtomettemtamfes.

³⁰Yesusam, e anggur bwi so so aomokopef. Ar masirin, “Dor e Allah jirmec ajirimfinas emefafaykurumey.” Inim aeef. Aramat ipic masirin, jimas ajiritepef, wunam damir aafef.

³¹E jofay, bare Hari Jumat ara. Er e Ses Ban Jo pok bafafaytiw jofay ara. E to aenawcow Ses Ban Jo, e Bakamsow Pokbwi jofayam ara. Inimas ar hari awut ara. E Yahudi owam, e jofay, awut hari aporfes. Inimas ar e sumu ow, e salib os op bwemtep pwicaken. Ar masirin, Pilatus, ow, e salib os op aemtepfes ow kamtar bajakamtopomtotor jirmec bajirimtam, janim aanimfes. (Eras e ow basarimdamirafas ara.) Aram Pilatus, ow, e sumu ow bataw jirmec bajirimtam, janim aanimfes.

³²Inimas e tentara ow aenawfes, wunam ar e Yesus salib os op akac aemtepef ipic cowok akamtar jamnuk takas ajakamtopomfes. Ar masirin, e wun ipicam akamtar ajakamtopomfes.

³³Aram Yesuspu ameromfes. E nat, ar e Yesus damir emcaafef aporfes, wunam ar e akamtar bajakamtopom opok.

³⁴E wun tentara ipic cowok nat, urin e Yesus asporpu amittopomef. Amittopomef masirin, esam, bwiam, juw auwuomisef.

³⁵E eras manmok atiwef ipic, inim atemen aatamef. E atemenam, bare atakamnak ara. Aramat ipicam e atemen aatamefas, atakamnak apormar ara. Aram car e atemen atakam basicim akat aemama. Inimas ar eras atemen car aatamaman.

³⁶Bare, e Alkitab atakam, “Ar e dam emake bajakamtopom opok cowok, aemcemes.” Wunam, “Ar e urin amittopomces ipic manmok atiwemcemes.” E Alkitab inim aema. E ow aemfesasam e Alkitab atakam jipu cowok ara.

³⁷

³⁸Bare, kota Arimatea ipic juwas Yusuf e Pilatus ameromef. Ar e Yesus sumu ipic batew, janim e aramat ipic aanimef. (E Yusuf, Yesus mamkawi ipic ara. E nat, ar e Yahudi ow omar aeef. Inimas ar curuw ajamkawief.) Bare, e Pilatus e Yusuf janim aanimefas atetamef. Inimas e Yusuf e Yesus salib asanpu aapenef, wunam e sumu ipic atewef.

³⁹Nikodemusam erasan ajamjamenef. Bap ara, aramat ipic, os capi pok juwas muram, wun pinim akat pok juwas gaharuam, aartamef. Ar e pokam erasan atowomosef. E pok, kilogram tiga puluh ajiwar aranew. (E Nikodemus, e bapnak Yesuspu iram ameromesmep ipic ara.)

⁴⁰Bare, e ipic jamnukam e Yesus sumu ipic atewfes. Ar masirin, kain akat e sumu ipicam, e pinim akat pokam, cowkon, biram ajiktiwfes.

⁴¹E Yesus salib os op acatopomfes asan, bare eke epcom os kebun asan ara. E kebun asan, jepen asifes ek jip aemapef. E ek jip, sumu ow bajiwtatiw asan ara. E nat, er ayas ara. Oram sumu ow e ek jip aman bajiwtatiw opok aemfes.

⁴²E Yusufam, Nikodemusam, e Yahudi ow Ses Ban Jo sotopnakap aporfes. Aram e ek jip sotop aporfes. Inimas ar Yesus sumu ipic erasan ajiwtatiwfes.