Read Central Asmat YOHANES 2 Bible Online

YOHANES 2 - Central Asmat bible

YOHANES 2

¹Bare. Jowon ara, ow, e Galilea capinmi kota juwas Kana, owersey pokbwi aemfes. Yesus arosowoc erasanam ajamememef.

²Ow, e Yesusam, e amamkawi owam, e pokbwi akac memen ajatefes.

³E pokbwi owam, e anggur bwi anakurumfes. Yesus arosowoc inimas aporef ara, aram atakam Yesus aotawef. “Awapes ow anggur bwi emcanakurumeres.” Inim aeef.

⁴Yesus masirin, “Enew. Jirmec je bajirim arapok. E do junum bweas bwem, ema.” Inim aeef.

⁵Bare, e arosowoc, atakam e kerja bwemtam ow aotawef. “E aramat ipic jirmec car ajirimcannew, inim mamemey.” Inim aeef.

⁶Erasan, bwi asan enam ajiwar awapes. Bare, e agama Yahudi ow, banam, bweyam, pokam, bwi bacicikim aturan arke ara. E bwi asan e agama Yahudi, inim bwi bacicikimas ara. E bwi asan, ek akenemapomfes. E bwi asan aporsipor, bwi liter delapan puluh ajiwarnew, inim bowapomtotor ara.

⁷Yesusam atakam e kerja bwemtam ow aotawef. “E bwi asan takas bwi bajurapomtotorey.” Inim aeef. Bare, ar bwi imwinakap ajurapomtotorfes.

⁸Aramat ipic masirin, “Bare, e bwi asan aman bwi bajurtewey.” Inim aeef. E ow masirin, e bwi e pokbwi aramat ipic towocentamfes.

⁹Bare, e bwinak anggur bwi ajaworseef. E pokbwi aramat ipicam e anggur bwi anaporef. E bwi ocenak ewtowotnawfesnew, aram bapor opok. E nat, e bwi ajitewfes kerja bwemtam ow amsom ara. Bare, e pokbwi aramat ipic, e petew ajiwef ipic ajateef.

¹⁰Aram atakam e ipic aotawef. “Ow takas e akat anggur bwi bap a takam atatamcemes. Wunam ow anggur bwi awut inim aances, ar e pwicak inim anggur bwi atatamcemes. Or ara nat, e akat anggur bwi acukumapomerem, wunam jepen ajistewapomamem.” Inim aeef.

¹¹Yesus eras e Galilea capinmi kota juwas Kana aemef. Er e bapnak aemef junum bweas ara. E junum bweas e arakatnakutas baporomtamas ara. Bare, amamkawi owam, e aramat ipic asicimfes.

¹²Bare. Yesusam, arosowocam, amamkawi owam, Kapernaum ajisosfes. Aram isi arke opoknakap aesfes.

¹³Bare, E Yahudi Bakamsow Pokbwi jofay sotop asisienawef. Yesus masirin, Yerusalem ajisosef.

¹⁴Aram pok juw buwumamtaw ow, e Allah cem aman aporef. E ow sapiam, dombaam, pariam, juw auwumamtawa aefes. Yesusam, uang juw buwumcicirimtaw ow e amejapu aemaptotorfes aporef.

¹⁵Aramat ipic masirin, somen omop pok akenemapomef. Ar e ow takasam, e adombaam, e asapiam, e Allah cem aman aotewerisimef. Aram e uang juw buwumcicirimtaw ow e uang den apacamnemef. Aram e ameja takas bipar ajimirsasamef.

¹⁶Aram atakam e pari juw buwumamtaw ow aotawef. “A pok takas batawey. Car e doricipic cem, pok bajit cem batatiw arapok.” Inim aeef.

¹⁷E mamkawi owam e Alkitab atakam binip acomomfes. “Dor e doricipic cem damos awutnakut ajiomamin. Inimas doram ajurusemcimin.” E Alkitab inim aema.

¹⁸Bare, e Yahudi ow jonow e aramat ipic atowfes. “Allah or inimas bwem jirmec or jirimfannew, or ucim junum bweas aporomtamcarowem?” Inim aefes.

¹⁹E Yesus masirin, “A Allah cem bajumtiwey. Dor masirin, bar mamincop ajiwar a cem aoeapomcimin.” Inim aeef.

²⁰E Yahudi owam, “Ow, tahun empat puluh enam ajiwar a cem aeapomawiris. Or ara masirin, a cem bar mamincop ajiwar boeapom arawe?” Inim aefes.

²¹E aramat ipic nat, e Allah cem atakam atawef ara, ar e sembahyang cem awut atakam opok. E nat, aram e adam atakam atawef.

²²Asep jofay masirin, e Yesus aojaworsitef ara, e amamkawi ow, e Yesus atawef atakam, bi binip acomomfes. E ow masirin, e Alkitab atakam asicimfes. Aram e Yesus atawef atakam asicimfes.

²³Bare. Yesus e Bakamsow Pokbwi jofay e Yerusalem aememef. Aram erasan junum bweas arke aemef. Owam arke e junum bweas aporfes, wunam aramat ipic asicimfes.

²⁴Yesus nat, asmat ow takas amsom. Inimas ar e ow basicim opok.

²⁵Aram e asmat ow jak amanas takas amsom. Inimas ar ow e asmat ow aemcemesas, atakam a botaw, janim manim opok.