Read Central Asmat YOHANES 21 Bible Online

YOHANES 21 - Central Asmat bible

YOHANES 21

¹Bare. Asep ara masirin, Yesus, e amamkawi ow bipu aoememef. Ar e bwi juwas Tiberias e jopir aememef. Ar masirin, inimas aemef:

²Simon Petrusam, Tomasam, Natanaelam, Sebedeus atiperes jamnukam, wun Yesus mamkawi ipic jamnukam, inim ow cowkon aemapfes. (E Tomas wun juwas “Kapomipic” ara. E Natanael, Galilea capinmi kota juwas Kana ipic ara.)

³Bare, Simon Petrusam atakam e ow aotawef. “Dor jim bapi.” Inim aeef. E wun ow masirin, “Daram daram ara.” Inim aefes. Bare, aram ci anajuwfes. Aram e iram jo ajorowesmep, enam bopitiw opok cowok.

⁴E jo bapuameskurum opok ara, Yesus e fwikin aememef. E amamkawi ow nat, ar kawey ipic inim ara.

⁵Yesusam atakam e ow aotawef. “Tiperesa. Car enam opok openow?” Inim aeef. E ow masirin, “Bare, dar enam opok cowok.” Inim aefes.

⁶Yesusam, “E jim e bo jamampu jiwipumey. Caram enam atawcomokom.” Inim aeef. Bare, e ow e jim atewsemfes, wunam enam arkenakut atawfes. Inimas ar e jim bwemjijimtaw asan opok.

⁷Bare, Yesus e awun mamkawi ipic cowok damos awut ajiomawiri. E ipicam atakam Petrus aotawef. “E Tuhan ara.” Inim aeef. E Simon Petrusam dam fi aememef. Inimas ar, “E Tuhan ara” inim atakam jen ajief, aram pakaian ajimomef, wunam bwi ajupuef. (Ar masirin, e fwikin acucujiref.)

⁸E wun Yesus mamkawi ow, e ci e fwikin sotop inim emsefes. E ci bwemse, e fwikin bajirtay, aram meter seratusnew ajiwar ara. E owam po ajifes, wunam e jim enam arkenakut epcom ametemjijimtawfes. Bare, aram fwikin ajirtayfes.

⁹E owam asowkufes ara, ar jismak atereyapef aporfes. Aram enam e jis aemapef aporfes. Erasanam amos aemamesef aporfes.

¹⁰Yesusam atakam e ow aotawef. “Dey, e jepen ateworokom enam, wun batowomkunawey.” Inim aeef.

¹¹Simon Petrusam e ci aosowtometef. Aram e jim enam epcom wasan ajijimomesef. Enam awut seratus lima puluh ajiwar e jim aman ajukuseef. Er enam arkenakut ara. E nat, e jim basasam opokut.

¹²Yesusam atakam e ow aotawef. “Caram dey. Amos memen.” Inim aeef. E Yesus mamkawi owam, e aememef ipic, Tuhan aporfes. Inimas ar, “O ca ipicam?” inimas jonow bwemtow asan opok.

¹³Bare, Yesus e owpu ameremef. Ar masirin, e amos atewef, wunam e ow atatamtotoref. E enamam inim cimin aemef.

¹⁴Bare, bap ara, Yesus damir aafef, wunam Allah e Yesus aojaworomsumutumef. Ar masirin, e amamkawi ow bipu umuton aoemema aeef. E jofay, ar e jopir aememef ara, er e ow bipu umuton aememefas ketiga ara.

¹⁵Bare, e ow amos aanfes. Amos aanfes masirin, Yesus jonow e Simon Petrus atowef. “Simon. Or Yohanes atiw ara. Or damos do bajiom awut inim, wunam awapes ow damos do bajiom kanim inim, inimas aranew?” Inim aeef. E Petrus masirin, “Owo, Tuhan, oram omsom. Dor damos or ajiomamin.” Inim aeef. E Yesusam, “Bare, oram e dodomba jiwi mamjumtamawarcan.” Inim aeef.

¹⁶Yesus masirin, atakam Petrus aootawef. “Simon. Or Yohanes atiw ara. Or damos do bajiom open?” Inim aeef. E Petrus masirin, “Owo. Tuhan, oram omsom. Dor damos or ajiomamin.” Inim aeef. E Yesusam, “Bare, e dodomba mamjumtamawarcan.” Inim aeef.

¹⁷Yesus masirin, jonow Petrus bar ketiga atowef. “Simon. Or Yohanes atiw ara. Or damos do bajiom open?” Inim aeef. Bare, Petrus, e Yesus jonow bar mamincop ajiwar ar atowporef aporef. Inimas jak pwicak aememef. Aramat ipicam, “Tuhan. Oram omsom takas. Dor damos or ajiomamin. Or inimas omsom.” Inim aeef. E Yesusam, “Bare, e dodomba mamjumtamawarcan.

¹⁸Atakamnak ara, or ay ipic aememfem, or pakaian orma ajimoma aefem. Wunam, e akat aporfem asanpu ajara aefem. E nat, or akmat ememcem, oram sop bes aemamescemem. Kawey owam, or manam ajiktiwcemenes. Aram e pwicak aporcem asan atowomoscemenes.” Inim aeef.

¹⁹Yesus inim atakam atawef ara, ar e Petrus damir aafcowas atakam atawef. E Petrus damir aafcowas, Allah akatnakut ara, inim baporomtamas ara. Bare, Yesusam atakam e aramat ipic aootawef. “Mamatamjamkawiawarcan.” Inim aeef.

²⁰Petrusam, bin afirief. Ar wun Yesus mamkawi ipic, e afa asoromomef aporef. Ar e Yesus damos awut ajiomawiri ipic ara. (Bap ara, Yesusam, e amamkawi owam, amos akac aanfes. E ipicam Yesus sotop asisiapef, wunam jonow e aramat ipic atowporef. “Tuhan. E or jokmen ow otasimemtamcan ipic cam?” Inim aeef.)

²¹Bare, Petrus e ipic aporef ara, aram atakam Yesus aotawef. “Tuhan. Awamec ipic ucimaram?” Inim aeef.

²²E Yesus masirin, “Asep jofay dor aofasicimin. Dor awamec ipic e jofay ajiwar tetakay memem akat aporceynew, er oras opok. Er doras ara. Or ara nat, mamatamjamkawiawarcan.” Inim aeef.

²³Inim atakam jen ajifes ow, e atakam wun owam aotawfes. Inimas Yesus mamkawi ow arke atakam jen ajifes. “E Yesus mamkawi ipic damir baf opok aemcema.” Inim atakam jen ajifes. Yesus nat, e ipic damir baf opok atakam opok. Aratakam, “Asep jofay dor aofasicimin. Dor awamec ipic e jofay ajiwar tetakay memem akat aporceynew, er oras opok. Er doras ara.” Inim cowok aeef.

²⁴E Yesus mamkawi ipic, e eras takas atemen aatamamar ipic ara. Aram eras takas surat aeapomamar ipic ara. Bare, daram e atemen, atakamnak apormom ara.

²⁵Bare. Yesus wunas arkenakut aemawiri. Ow, e Yesus aemawirias takas tulis aemcesnew, buku arkenakut tulis aemcemes. Dobi binip ara, awames capinmi kanim inim ara. Inimas awames capinmi inim buku arkenakut batawapom, bare asan opok.