Read Central Asmat YOHANES 3 Bible Online

YOHANES 3 - Central Asmat bible

YOHANES 3

¹Bare. Parisi ipic juwas Nikodemus ara. Ar Yahudi ow kepala ipic ara.

²E ipic iram Yesuspu aapenef. Aram atakam Yesus aotawef. “Guru! Or Allah jirmec ajirimenamfan guru apormom ara. Allaham or akac aomomaman apormom ara. Allah or akac momom opok ayaw, or e aemfem junum bweas bwemem asan opok.” Inim aeef.

³Yesusam atakam e ipic aotawef. “Atakamnak ara, ow bar jamnuk bajisames opok aemces, ar Allah Pemerintah Asan bwempor asan opok.” Inim aeef.

⁴Nikodemus masirin, “Ownucur ipic bar jamnuk bajisames nat, ucimaram? Ar e arosowoc jak aman bojiwames, wunam bojisames aranew?” Inim aeef.

⁵Yesus masirin, “Atakamnak ara, ow bar jamnuk bajisames opok aemces, aram Allah Pemerintah Asan bwemfiw asan opok. E bar jamnuk bajisamesas, aram bwi epcomas ara. Eram Allah Roh epcomas ara.

⁶Asmat ow asmat jiwiin ajispetiwcemes. E nat, Allah Roh, ay jak, e bar jamnuk bajisames ow atatamtotorma.

⁷Bare, ow bar jamnuk bajisamestotorces. Oram e atawmin atakam junum bwe arapok.

⁸Fo e asanin asanin afufuomosma. Car e fo awumamar, jen ajimokom. E nat, e fo ocenak asan ewenawmarnew, wunam ocenak asan jisosmarnew, caram camsom opok. Bare, Allah Roh, ay jak, e bar jamnuk bajisames ow atatamtotorcow, aram inim cowok ara. Caram eras manmok bwemtiwkurum asan opok.” Yesus inim aeef.

⁹E Nikodemus masirin, “Eras nat, ucim inimaram?” Inim aeef.

¹⁰E Yesusam, “Or Israel ow aguru ara. E nat, or eras omsom opoknew?

¹¹Atakamnak ara, dar e namsomas atakam atawmom. Dar e manmok atiwmomas atemen aatamamom. E nat, car e atemen aatamamom atakam basicim opok.

¹²Dor awames capinmias atakam car aotawmin. Ca nat, e atakam basicim opok. Dor masirin, e onam opas atakam car aotawceynew, car e atakam basicim ucim inimaram?

¹³E onam op aaptometfes ow, bare opok cowok. E nat, e Asmat Anakat Ajaworemef Ipic, e onam op ewneyef.”

¹⁴“Bare, ametnak ara, Musa, amer e cem opok asan os op afirtimtopomef. Owam e Asmat Anakat Ajaworemef Ipic inim cowok op atomettewtopomcemes.

¹⁵Inimas e aramat ipic asicimces ow takas, jiwnenak aatamemawarcemes.

¹⁶Allah Asmat damos awutnakut ajiemef. Inimas aram atiw cowokut atetamef. Bare, e atiw asicimames ow daniwis bemap opok aemcemes. Aram jiwnenak aatamemawarcemes.

¹⁷Allah, e atiw awames capinmi atewnemef ara, er ‘Asmat ow fasi ara,’ inim atakam basakamtiwas opok. Er e atiw asmat bajortewas ara.

¹⁸Allah e atiw asicimames ow, ‘Car ow fasi ara,’ inim atakam basakamtiw opok aemcema. E nat, wun ow, e Allah atiw cowokut basicim opok ara. Inimas Allah, ‘E ow, ow fasi ara,’ inim atakam emcasakamtiwef.

¹⁹Bare, sereas awames capinmi emcaneyef. E nat, ow e aemamesas, bare jursumec ara. Inimas ar e jiwicas damos ajiomames. Aram e sereas damos bajiom opok aemames. Inimas Allah, ‘E ow, ow fasi ara,’ inim atakam asakamtiwef.

²⁰E pwicakas aemames ow takas, e sereas bifan afayomames. Aram e sereaspu bwenawom opok aemames. E pwicak aemamesas umuton bwemasin.

²¹E nat, e atakamnak jipu aemames ow e aemamesas, bare Allah atakam ji bweas ara. Ar e aemamesas umuton baporomtam akat aemames. Inimas ar e sereaspu aenawomames.” Yesus inim aeef.

²²Bare, Yesusam, e amamkawi owam, e Yudea capinmi ajisosfes. Aram tarey pwiciri erasan akac aememfes. Erasan, Yesus, ow, bwi abwima aeef.

²³E jofayam, ow e Yohanes e penjara cem aman bajiwtewapom opok aemfes ara. E Yohanesam, e asan juwas Ainon, bwi awut aporfes. Inimas ar ow bwi abwima aeef. Erasan Salim sotop ara. Owam e Yohanespu aapena aefes. Aramat ipic masirin, e ow bwi abwima aeef.

²⁵Bare. E wun Yohanes mamkawi ow mamincopam, Yahudi ipic cowokam, atakam aamtawfes. Ar e agama Yahudi, pok, bwi bacicikim aturan atakam aamtawfes.

²⁶E owam Yohanespu aapenfes, wunam atakam aotawfes. “Guru! E Yordan poman capinmi akac aememfem ipic, ow bwi abwimama. Er e atemen aatamfem ipic ara. Bare, ow takas aramat ipicpu aapenmes.” Inim aefes.

²⁷E Yohanes masirin, “Allah, fakas, asmat ow batetam opok aecow, asmat ow e fakas bwemomom asan opok.

²⁸Doram atakam emcaotawof. ‘Dor e Allah Aeremtewef Ipic arapok. Allah nat, dor bap atewenamfan. E aramat ipic masirin asep ara.’ Inim aeof. Caram e atakam jen emcajifokom.

²⁹Jipic cepes atewetcow, ar e cowoc armipic aememcema. Wunam e ipic ajowow ipic, e ipic atakam jen ajicow, aram jak akatnakut aememcema. Doram inim ara. Dor wow jak akatnakut aememamin.

³⁰Bare, e Yesus, ow awut baememcow. Dor masirin, ow kanim memem.” Yohanes inim aeef.

³¹E op aewneyef ipic awut ara. Wun ow takas masirin, kanim ara. Asmat ow nat, awames capinmi ow ara. Aram awames capinmi atakam atawmes. E onam op aewneyef ipic nat, awut ara. Wun ow takas kanim ara.

³²Aramat ipic, e aporefasam, e jen ajiefasam, atemen aatamama. Ow nat, e atemen atakam basicim opokut aemames.

³³E aratemen atakam asicimames ow nat, atakam atawmes. “E Allah, bare anakat ara.” Inim aemes.

³⁴Bare, Allah, e aRoh, epcom, e atewnemef ipic atetamama. Inimas e ipic, e Allah atakam atawma.

³⁵E aricipic e atiw damos ajiomama. Aram pok takas e atiw ban ton momomkurum atetamef.

³⁶E atiw asicimames ow, jiwnenak aatamemawarcemes. E nat, e atiw atakam ji bwe opok ow, e jiwnenak batowom opokut aemcemes. Allaham e ow jokmen aomomcema.