Read Central Asmat YOHANES 4 Bible Online

YOHANES 4 - Central Asmat bible

YOHANES 4

¹Bare. E Parisi ow inim atakam jen ajifes. “Ow arke e Yesus ajamkawimes. Aramat ipicam ow arke bwi abwimama. E nat, ow arke opok inim, e Yohanes ajamkawimes. E Yohanesam ow arke opok inim, bwi abwimama.” Inim atakam jen ajifes.

²(Yesus aramat ipic nat, ow bwi babwim opok aemef. E amamkawi ow, ow bwi arop abwimfes.)

³Yesusam e Parisi ow inim atakam jen ajifes aporef. Inimas ar e Yudea capinmi bakan ajiosef, wunam Galilea capinmi aofasief.

⁴E bowsec ajaref ara, ar Samaria capinmi aokorsakayenef.

⁵Yesus e Samaria capinmi ajaref ara, aram kota juwas Sikar ajarapef. Ametnak ara, Yakub, capinmi, e atiw juwas Yusuf atetamefen. Bare, Sikar e capinmi sotop ara.

⁶Ametnakam, Yakub bwi afwisemefen. E bwiam erasan awse. Bare, Yesus e capinmi jirow ajaref, aram namjipi aememef. Inimas ar e bwi ak aneyapef. Eras jok jam dua belasnew aemef.

⁷Samaria cowocam bwi bajur aapenawef. Yesus masirin, atakam e cowoc aotawef. “Bwi seya.” Inim aeef.

⁸(Bap ara, e Yesus mamkawi ow, amos baytin, e kota ajisosfes.)

⁹E Samaria cowoc masirin, “Or Yahudi ipic ara. Dor masirin Samaria cowoc ara. Inimas bwi janim do manim ucimaram?” Inim aeef. (Bare, Yahudi ow, Samaria ow atakam mamtawji opok.)

¹⁰E Yesus masirin, “Or e Allah mami atetamamaras omsom opok. Oram e bwi janim aanimamar ipic omsom opok. Or eras omsom ayaw, or e ipic janim aanimcemem. E ipic masirin, jiwne bwi or atetamceman.” Inim aeef.

¹¹E cowocam, “Tuan. Or ember opok. E bwi fopnakut ara. Or e jiwne bwi ocenak asan jurtewcem?

¹²E dawicut juwas Yakub a bwi atewsemtamforowen. Ametnak ara, aramat ipic a bwi ajurtewenefen. E atiperesam, e abinatangam, a bwi aanfesen. E nat, or ow awut ara. E dawicut Yakub ow kanim ara. Inim arawe?” Inim aeef.

¹³E Yesus masirin, “A bwi aances ow takas, bwito aoememcemes.

¹⁴E nat, e atetamamin bwi aances ow, bwito boem opok cowok aememcemes. E atetamamin bwi, e ow jak aman basarse opok bwi cimin aemsecema. Inimas e owam jiwnenak aatamemawarcemes.” Yesus inim aeef.

¹⁵E cowocam, “Tuan. E bwi dor pajurtetamcan. Do bwito boemasin. Doram bwi bar arasan bafafasi arapok.” Inim aeef.

¹⁶E Yesusam, “Bare, oram e ormipic bayte, wunam arasan mamofasiey.” Inim aeef.

¹⁷E cowoc atakam, “Dor ower opok.” Inim aeef. Yesus masirin, “‘Dor ower opok,’ emem, bare atakamnak ara.

¹⁸Or owerow lima ajiwar ajuwuta aefem. Wunam awomcem ipic, ormipic arapok. Bare, e atakam atawmemas, atakamnak ara.” Inim aeef.

¹⁹E cowoc, “Tuan. Or Allah atakam botaw ipic apormin ara.

²⁰E darafasut, a sikon op, Allah asicimawiris. E nat, ca Yahudi ow atakam, ‘E Allah basicim asan, e Yerusalem cowok ara,’ inim aemokom.” E cowoc inim aeef.

²¹E Yesus masirin, “A atawmin atakam basicimey. Asep jofay, e Allah asicimcokom asan, a sikon op arapok. E Yerusalemam arapok.

²²Ca Samaria ow e asicimamokomas camsom opok. E nat, e asmat bajortew ipic Yahudi samat ipic ara. Inimas da Yahudi ow e asicimamomas namsom ara.

²³Asep jofay, Allah Roh, e afakas, ow atetamcema. Inimas e ow Allah basicimnak aemcemes. E owam e atakamnak jipu, Allah asicimcemes. Allaham inim ow a basicim jumec ajumama.

²⁴Bare, Allah jipir ara. Inimas e Allah basicim ow, jak amanam basicimces. Aram atakamnak jipu, Allah basicimces.” Yesus inim aeef.

²⁵E cowoc masirin, “E Allah Aeremtewef Ipic aenawcema. Bare, dor inimas nomsom. E ipic juwas ‘Kristus’ ara. Aenawcow ara, e atakam takas aotawcemarow.” Inim aeef.

²⁶E Yesusam, “E orcin atakam aamtawmem ipic, e ipic ara. Dor e Allah Aeremtewef Ipic awapey ara.” Inim aeef.

²⁷Bare, e Yesus mamkawi ow asarimfasifes. Aram Yesus cowoc cowok atakam aamtawfes aporfes, wunam junum aefes. E nat, ar, “Or ucimasam?” inim jonow e cowoc batowpor opok aememfes. Aram, “Or a cowoc atakam aamtawmem ucimaram?” inim jonow Yesus batowpor opokam aememfes.

²⁸Bare, e cowoc e abwias bakan ajiosef, wunam e kota ajisosef. Aram atakam e kota ow aotawef.

²⁹“Jipic cowok, e aemawiruas, atakam dor aotawan. Caram dey! E ipic baporey. Ar e Allah Aeremtewef Ipic arapenow.” Inim aeef.

³⁰Bare, e owam e kota bakan ajiosfes, wunam e aramat ipicpu awarimenfes.

³¹E ow e bowsec ajarfes, e Yesus mamkawi owam, atakam fak e aramat ipic aotawfes. “Guru. Amos memeney!” Inim aefes.

³²E aramat ipic nat, “Dor amos pok awompey. E nat, car e amos pok camsom opok.” Inim aeef.

³³E mamkawi ow masirin, jonow aramaman aamtowfes. “Ow, amos pok, e aramat ipic atowotnawtameresnew?” Inim aefes.

³⁴E Yesus masirin, “Dor e atewenamfan ipic akat apormaras jipu aemcey, wunam e jirmec ajirimfan kerja afafakurumtiwcey, jak akat aememcimin. Er ow amos jak banapitem jak akat aememcemes cimin ara.

³⁵Caram atakam atawmokom, ‘Pir empat ajiwar emapcom, e cesa pok anakat piwi asereytepcema. Ow masirin, e cesa pok anakat piwi akokomtawcemes.’ Inim aemokom. Do nat, atakam car aotawmin. E cesa pok anakat manmok atiwey. Bare, piwi emesesereytepef. E bakokomtaw jofay, bare emeenawef.

³⁶Allah gaji e anakatas bakokomtaw ow atatamcema. E akokomtawcesas, bare jiwnenak batamemawaras ara. Inimas e eke atawapomces owam, e anakatas akokomtawces owam, jak akat akac aememcemes.”

³⁷Ow atakam atawcemes, “Wun ow cesa pok eke atawapomcemes. Wun ow masirin, e anakat akokomtawcemes.” Inim aecemes. E atakam, bare atakamnak ara.

³⁸“Dor car cesa pok anakat bakokomtaw inim cimin atawosomfin. Ca nat, e cesa pok eke batawapom opok aemfokom. Kawey ow e eke batawapom kerja awut aemfes. Inimas car asan akat aememamokom.” Yesus inim aeef.

³⁹Bare, e cowoc, atakam e kota ow aotawef ara, “Jipic cowok e aemawiruas, atakam dor aotawan.” Inim aeef. Samaria ow arke masirin, e atakam aporfes, wunam Yesus asicimfes.

⁴⁰E Samaria owam e aramat ipicpu aapenfes ara, ar aramat ipic ar akac memem janim aanimfes. Aramat ipicam bar jamnuk e ow akac aomomef.

⁴¹Wun ow arkeam e Yesus atakam jen ajifes, wunam aramat ipic asicimfes.

⁴²Aram atakam e cowoc aotawfes. “Bap ara, or e aramat ipic atakam dar aotawforowem. Inimas dar aramat ipic asicimfom. Wow nat, dar aramat ipic atakam jen darma ajimom. Daram e aramat ipic asmat bajortew ipic anakat apormom ara.” Inim aefes.

⁴³Bare. Yesus atakam atawef. “Asamat ow, Allah atakam botaw ipic basicim opok aemcemes.” Inim aeef. Inimas Yesus bar jamnuk erasan aemapef, wunam Galilea capinmi aojisosef.

⁴⁴

⁴⁵Bap ara, e wun Galilea ow e Bakamsow Pokbwi e Yerusalem ajamemfes. Aram e Yesus aemefas takas aporfes. Inimas aramat ipic e Galilea ajaremef, e ow asan akat aramat ipic aomomfes.

⁴⁶Bare, aramat ipic Galilea capinmi kota juwas Kana aofasief. Bap ara, erasan, bwinak, e anggur bwi ajaworomsemef. Erasan ara, raja kerja bwemtam ipic cowok aememef. E atiwam kota Kapernaum dam aemamesef.

⁴⁷E ipic, Yesus e Yudea capinmi ewenawef, wunam Galilea capinmi ajaremef, inim atakam jen ajief. Ar masirin, Yesuspu aapenef. Aram aramat ipic e atiw aemamesef asan bwenaw, wunam e atiw dam baworomtew, janim aanimef. E atiw bare damir bafken aemamesef.

⁴⁸Yesusam atakam e ipic aotawef. “Car junum bweas awut bapor opok emcokom, caram do basicim opokut aemcemenokom.” Inim aeef.

⁴⁹E raja kerja bwemtam ipic nat, “Tuhan. Basarimenawey. E dojiwi damir bafasin.” Inim aeef.

⁵⁰E Yesus masirin, “Cey, bare, baysosey. E otiw ajaworsitma.” Inim aeef. Bare, e ipic, Yesus e atawef atakam asicimef. Ar masirin, ajisosef.

⁵¹Aram e bowsec ajaref ara, a akerja bwemtam ow, biamnuk aemamtewfes. “Bare, e otiw asan akat awap.” Inim aefes.

⁵²E aramat ipic masirin, “E jiwi asan akat aoemapef, ucim jamaram?” Inim aeef. E ow masirin, “To jok jam satu, e dam amop ajufamef.” Inim aefes.

⁵³Bare, to ara, e jam cowokam, e Yesus, “E otiw ajaworsitma,” inim atakam aotawef. E jiwi aricipicam inimas aporef. Inimas aram, e acem ow takasam, e Yesus asicimfes.

⁵⁴Yesus e Yudea capinmi ewenawef, wunam e Galilea capinmi ajaremef, ar eras aemef. Er e aemef junum bweas kedua ara.