Read Central Asmat YOHANES 5 Bible Online

YOHANES 5 - Central Asmat bible

YOHANES 5

¹Bare. E Yahudi ow pokbwi aemfes. Yesusam Yerusalem ajisosef.

²E Yerusalem ara, e jimasap juwas “Domba” sotop, bwi asan awut aemseef. Ibrani atakam ara, e bwi asan juwas Betesda. E bwi asan fumiam puk cem awut lima ajiwar aemaptotoref.

³E cem aman, ow arke apakayamesfes. Er dam owam, manmok kapi owam, jine kamwis owam, japow owam, inima. [Ar malaikat, e bwi bawu bafafasim, manmok afefes.

⁴Tuhan malaikat, e bwi bawu bafafasim, aneya ajimep. Aram bar cowok apneya, inim aea ajimep. Ar e bwi bawu afafasima ajimep ara, e bwi bap a takam neysea ajimep jipicnew, cowocnew, e damas takas ajaworema ajimep.]

⁵Bare, erasan aemamesef ipic cowok, tahun tiga puluh delapan ajiwar asan pwicak aemamesawiri.

⁶Yesusam e ipic erasan aemamesef aporef. Aram erasan tareynakut aemamesawiri aporef. Aramat ipic masirin, “Or dam bakokoyem akat open?” Inim aeef.

⁷E dam ipic masirin, “Tuan. E bwi bawu afafasicow ara, bwi, do baneytewsem ow opok. Dor e bwi baneyse aemapcey, wun ow e bwi atakamneysecemes.” Inim aeef.

⁸Yesus masirin, “Basitey. E otepenam batewey, wunam bajareney.” Inim aeef.

⁹Bare, e ipic dam asarimjaworemef. Aram e atepen atewef, wunam ajarenef. Bare, e aemfesas, Ses Ban Jo afayamesef ara.

¹⁰Inimas ara, e Yahudi ow atakam e dam ajaworemef ipic aotawfes. “Wow Ses Ban Jo fayamesor. Inimas or e otepen batew arapok. Or daragama jirmec aopowmem.” Inim aefes.

¹¹E ipic masirin, “E dodam ajaworoman ipic atakam dor aotawan. ‘E otepen batewey, wunam bajareney.’ Inim aean.” E ipic inim aeef.

¹²E ow masirin, jonow e ipic atowfes. “E otepen batew wunam bajaren jirmec or ajiriman ipic cam?” Inim aefes.

¹³E Yesus nat, erasan ow arke aporef, wunam aotasiemef. Inimas e dam ajaworemef ipic inim jirmec ajirimef ipic amsom opok.

¹⁴Bare. Yesus e ipic e Allah cem aman, biamnuk aemamtewef. Aram atakam e ipic aotawef. “Bare, or dam akokoyemamem. Inimas or e dosa bakoremey. Or asan pwicaknakut bemapasin.” Inim aeef.

¹⁵E ipicam e Yahudi owpu aapenef, wunam atakam e ow aotawef. “E dam ajaworomtewan ipic, bare Yesus ara.” Inim aeef.

¹⁶Inimas ara, e Yahudi ow e Yesus ajurusumfes. Ar Yesus eras e Ses Ban Jo aemef aporfes.

¹⁷E Yesus nat, atep e ow ajitef. “Wow ajiwaram e doricipic kerja aatamemawarma. Inimas doram kerja aemamin.” Inim aeef.

¹⁸Bare, e Yahudi ow, e aramat ipic, e Yahudi agama Ses Ban Jo jirmec aopowef aporfes. Wunam, aramat ipic atakam, “Allah doricipic ara.” Inim aeef. Inim atakam, ar Allah awcawor aememef atakam ara. Inimas e Yahudi ow, e aramat ipic bacatiw, jec awutnakut awufes.

¹⁹Yesus atakam e ow aotawef. “Atakamnak ara, e Allah atiw pok arma bwemem asan opok. Atiw e aricipic aemamaras aporma, wunam aram inimas cowok aemama. E atiw e aricipic aemamaras jipu aemama.

²⁰E aricipic e atiw damos ajiomama. Aram e aemamaras takas e atiw aporomtamama. E nat, e wow aporomtamamaras kanim inim. Asep jofay ar awutnakutas e atiw aporomtamcema. Eras car junum bweas ara.

²¹Aricipic, damir ow ajaworomsumutumama, wunam jiwneas e ow atetamama. Inimasam ara, atiw jiwnenakas, e aereremtawmar ow atatamtotorma.

²²Aricipicam ow e adosa atakam basakamtiw opok cowok aemama. E nat, ar, ow e adosa atakam basakamtiw fakas, e atiw atetamef.

²³Ar ow takas e atiw basicim akat ara— e ow e aricipic asicimames inim cimina. Inimas ar e fakas e atiw atetamef. E atiw basicim opok ow, e aricipicam basicim opok aemames. E aricipic, bare e atiw atewenamef ipic ara.”

²⁴“Atakamnak ara, ow e doratakam jen ajices, wunam ar e dor atewenamfan ipic asicimces, aram jiwnenak aatamemawarcemes. Doram e ow e aemfes dosa siksa bwem opok aemcimin. E owam damir baf opok aemcemes. E nat, ar jiwnenak ow aememcemes.

²⁵Atakamnak ara, e aenawcow jofay, damir aaffes ow, e Allah atiw e atakam atawcowas, jen ajicemes. E atakam jen ajices ow, jiwnenak ow aememcemes. E jofayam, bare emcaenawef.

²⁶Aricipic, bare jiwnenak batatamawar ipic ara. Inimas ar e jiwnenak batatam fakas e atiw atetamef.

²⁷E atiw, bare e Asmat Anakat Ajaworemef Ipic ara. Aricipicam, dosa atakam basakamtiw fakas, e atiw atetamef.

²⁸Car a atakam junum bwe arapok. E aenawcow jofay e awerem ow takas, e atiw atakam atawcowas, jen ajicemes.

²⁹Wunam e ow e awerem ajisemtotorcemes. E akatas aemfes ow, aojaworsitcemes, wunam jiwnenak ow aememcemes. E pwicakas aemfes owam aojaworsitcemes. Ar masirin, e siksa asan aemapcemes.”

³⁰“Doram pok dorma bwemem asan opok. E nat, dor ow e adosa atakam asakamtiwcey, dor e doricipic atakam jen ajiceyas jipu atakam asakamtiwcimin. Dor e akat aporceyas jipu bwem opok. E nat, dor e atewenamfan ipic akat apormaras jipu aemcimin. Inimas e atakam asakamtiwceyas bare, akatas ara.”

³¹“Dor e aemaminas, atemen dorma aatamcey, ow e atemen aatamceyas jen bwemji asan opok.

³²E nat, wun ipic doratemen aatamomatma. E ipic, e doratemen aatamomatmaras, bare atakamnak ara. Inimas nomsom.

³³Car ow e Yohanespu atewosomfokom. E Yohanes masirin, atemennak aatamef.

³⁴Bare, dor asmat atemen batamas janim manim opok. E nat, dor e Yohanes atemen aatamefas, atakam car aotawmin. Eras, car do basicimas ara. Caram dor asicimcenokom, ajoremcomokom.

³⁵E Yohanes, atereyapef lampu cimin atereyapef. E atawef atakam, lampu cimin ara. E aratakam jen baji, jak akat bemapomas ara. Caram jirow opok inim, e aratakam jen baji akat aefokom.

³⁶E Yohanes e doratemen aatamefas, bare fak opoknakap inim. E atemen aatamaminas nat, faknakut ara. Doricipic, dor junum bweas bwem, atewenamfan. Doram e junum bweas aemamin. E junum bweas ara, doricipic dor atewenamfan, inimas aporomtamama. Inimas ara, ow doricipic dor atewenamfan apormes.

³⁷E doricipic atewenamfan. Aramat ipicam doratemen aatamef. Ca nat, e aratakam jen baji opok cowok. Caram abi bapor opok cowok.

³⁸Car e aramat ipic atewenamef ipic basicim opok. Inimas e doricipic atakamam e cajak aman batamemapawar opok.

³⁹Cabi binip ara, ‘E Alkitab, jiwnenak batamemawaras atakam ara,’ inim aemokom. Inimas car e Alkitab aoworporawarmokom. Bare, e Alkitabam doratakamut atawmar araman.

⁴⁰Car dor ajamkawicenokom, car jiwnenak aatamemawarcomokom. E nat, car do mamkawi pwicak aemokom.”

⁴¹“Doram asmat ow, ‘E Yesus akat ara,’ inim baji, jak baseremem opok.

⁴²E nat, e cajak aman, car Allah damos bajiom opokut apormin ara.

⁴³Doricipic atewenamfan. E nat, car do basicim opokut. Wun ipic nat, mami aenawcow, car e ipic asicimcomokom.

⁴⁴Car caramaman, ‘A ow akat ara,’ inim mamji, jak aserememamokom. Allah, bare cowokut ara. E nat, car Allah, ‘A ow akat ara,’ inim baji, jak baseremem opokut. Inimas car do bwemsicim asan opok.

⁴⁵Dor car doricipic bipu batewatam, inim bi binip bacecerem arapok. Dor inimas bwem opok. Ca nat, e Musa jirey aeawirukum. Bare, aramat ipic car atewatamaman.

⁴⁶E Musa, doratakam, surat aeapomef. Inimas car e Musa surat aeapomef atakam basicim ayaw, caram dor asicimamenokom.

⁴⁷Ca nat, e Musa atakam basicim opok aemokomnew, caram e atawmin atakam bwemsicim asan opok.” Yesus inim aeef.