Read Central Asmat YOHANES 6 Bible Online

YOHANES 6 - Central Asmat bible

YOHANES 6

¹Bare, Yesus e bwi juwas Galilea aokorsakayjiref. E bwiam wun juwas Tiberias ara.

²Owam e aramat ipic e dam ow ajaworomtawa aeef aporfes. Inimas ow arke e aramat ipic fa asoromomatfes.

³Yesusam sikon op aaptometef, wunam erasan ar e mamkawi ow akac aemapfes.

⁴E jofayam e Yahudi ow pokbwi juwas Bakamsow Pokbwi sotop asisienawef.

⁵Yesusam manmok apepemef. Ar ow arkenakut awarimenawfes aporef. Inimas ar jonow Filipus atowef. “Dar awamces ow arkenakut amos pok ocenak asan jittamcom?” Inim aeef.

⁶Bare, Yesus e Filipus bwempor aemef. Inimas ar eras jonow atowef. E nat, Yesus e amos pok aemcowas, atakam bap emcasakamtiwef.

⁷E Filipus atep ajitef, “Jipic cowok kerja bar dua ratus ajiwar aemamarnew, e tewetmar gaji takas, awamces ow amos pok aporsipor kanimnakas bajittam, bare cukup opok.” Inim aeef.

⁸E wun Yesus mamkawi ipic juwas Andreas, Simon Petrus arewec ara. Aram atakam aotawef.

⁹“Jipic jiwi cowok arasan awamec. Ar amos bokor lima ajiwaram, enam jamnukam, awomec. E pok nat, kanimnakap ara. Arasanam ow arkenakut awamces.” Inim aeef.

¹⁰E Yesus masirin, “E ow baneypwikaptotorces.” Inim aeef. Bare, erasan fumin ajukapef. Inimas e ow takas e fumin ton aneypwikaptotorfes. E owerow lima ribunew ajiwar ara. (Cepesam, jiwiam, bajicucumir opok.)

¹¹E Yesusam e amos atewef, wunam terima kasih atakam Allah aotawef. Ar masirin, e amos e aneypwikapfes ow aseyetamef. E enamam inim aemtamef. Bare, e ow takas jak anapitaptotorfes.

¹²E ow jak anapitaptotorfes ara, Yesus atakam e mamkawi ow aotawef. “E anatiwmes amos pok baramsimey. Ow e amos pok biwosomasin.” Inim aeef.

¹³Bare, e ow e anatiwfes amos pok aaramsimfes. Aram ese dua belas ajiwar aowapomfes. Er e ow amos bokor ban cowok takas ajiwar anatiwfes amos ara.

¹⁴E owam e Yesus aemef junum bweas aporfes ara, aram atakam atawfes. “Dar Allah atakam botaw ipicut awames capinmi bwenaw, manmok afeawirum. Atakamnak ara. Awamec ipic, bare e ipic ara.” Inim aefes.

¹⁵E owam e Yesus araja ipic memem atakam fak akekemtawfes. Aramat ipicam inimas aporef. Ar masirin, e sikon capinmi arawun aojisosef.

¹⁶Porow, jo atief ara, e mamkawi ow e jopir aapneyfes.

¹⁷Aram ci anajuwfes, wunam e kota Kapernaum bajir bin ajisefes. Iram, Yesusam e owpu bapen opok.

¹⁸Fo awutam aemef. Waam awut aemseef.

¹⁹E ow, kilometer empat ajiwarnew, lima ajiwarnew, po jicowoc inim ajirsefes. Ar masirin, e Yesus bwi ton ajarenawef aporfes. Yesus e emsefes cipu aapenawef. E owam omar awutnakut aefes.

²⁰Aramat ipic nat, “Omar arapok. Do Yesus ara.” Inim aeef.

²¹E owam jak akat aememfes, wunam Yesus ci basawu atakam atawfes. Bare, ar e at efes asan asarimsetayfes.

²²Ajofay tam ara, e poman aememfes ow arke bi binip aceceremfes. “To ara, arasan ci cowoknakap aemseef. Yesus e amamkawi ow bamuw opok aemef. E ow arop anajuwfes.” Inim bi binip aceceremfes.

²³Bare, wun Tiberias ewinawfes ci erasan asetayfes. E asetayfes asan, e Yesus terima kasih atakam Allah aotawef, wunam ow arke, amos aanfes asan sotop ara.

²⁴Bare, e asetayfes ow arke, Yesusnew, amamkawi ownew, erasan opok aporfes. Inimas ar e ci aonajuwfes, wunam Kapernaum ajirtayfes. Aram Yesus apowfes.

²⁵Bare, e ow Yesus e poman biamnuk aemamtewfes. Ar masirin, atakam e aramat ipic aotawfes. “Guru. Or arasan ucim jofay jinawemfem?” Inim aefes.

²⁶E Yesus masirin, “Atakamnak ara, car e aemof junum bweas aporfokom, wunam dor apowmenokom— bare, inimas opok. Ca nat, e amos awut aanfokom, wunam jak anapitaptotorfokom. Inimas car dor apowmenokom.

²⁷Car e of aofcemar amos pok batewen, jec bawu awutnakut arapok. E nat, e of bofa opokas jec bawuey. Er ca jiwnenak batamemawaras ara. Erasam, e Asmat Anakat Ajaworemef Ipic, car atetamcemanas ara. E doricipic Allah, inimas bwem, dor atewenamfan.” Inim aeef.

²⁸E owam jonow e aramat ipic atowfes. “Dar e Allah akat apormaras bwem, ucim pok emcom?” Inim aefes.

²⁹Yesus masirin, “Car e Allah atewenamef ipic basicimey. Allah eras akat aporma.” Inim aeef.

³⁰E ow atakam, “Ucim junum bweas aemamemnew? Dar or junum bweas aporcomnew, dar asicimcemenom. Ucimas aemcemnew?

³¹E darafasutmar e amos pok juwas manna e cem opok asan aanfesen. Er e Alkitab atakam jipu ara. ‘Allah, onam op amos pok, e ow atewnemef.’ E Alkitab inim atakam ara.” Inim aefes.

³²E Yesus masirin, “Atakamnak ara, e onam op aewneyef amos pok atetamef ipic, bare Musa opok. Doricipic e onam op ewneyef amos pok anakat car atetamaman. Inim aeef.

³³E Allah atetamamar amos pok, bare e onam op aewneyef ipic ara. E ipic, jiwnenak, asmat ow atatamama.” Inim aeef.

³⁴E owam, “Tuan! E amos pok mamtatamawarcarowey.” Inim aefes.

³⁵E Yesus masirin, “E jiwnenak atatamamar amos pok, bare dor ara. E dor aapenawcenes ow, amosto opok cowok aememawarcemes. E dor asicimcenes ow bwito opok cowokam aememawarcemes.

³⁶Eras e dor atakam car aotawan jipu ara. Caram manmok dor atiwfenokom. E nat, car do basicim opokut aemamokom.

³⁷E doricipic atatamcan ow dor aapenawcemenes. Doram e atewenamfan ipic e akat apormaras jipu bwem, e onam op aewneyof. Dor, dorop akat aporminas jipu bwem baney opok. Inimas e dor aapenawcenes ow botpem opok cowok aemcimin.

³⁸

³⁹E dor atewenamfan ipic, e atetamfan ow cowoknakapam bapakapios pwicaken. Ar dor e ow takas e Asepnak Jofay bojaworomsumutum akat arawen.

⁴⁰Wun ow, dor Allah atiw ara, inimas aporcemenes. Aram dor asicimcemenes. Doricipicam inim ow takas jiwnenak batamemawar akat arawen. Doram e ow e asepnak jofay aojaworomsumutumcimin.” Yesus inim aeef.

⁴¹Bap ara, e Yesus atakam atawef. “E onam op aewneyef amos pok, bare dor ara.” Inim aeef. Inimas e Yahudi ow, Yesus atakam pwicak anunukumamtawfes.

⁴²E owam, “Awamec ipic Yesus ara. Aram Yusuf atiw ara. Dar e aricipicam, arosowocam, namsom. Inimas aratakam, ‘Dor e onam op aewneyof,’ ucimaram?” Inim aefes.

⁴³Yesus masirin, “Caram atakam pwicak banunukumamtaw arapok.

⁴⁴Doricipic dor atewenamfan. Aramat ipic, ow do bwenawom binip batetam opok aemcow, ow do bwemenawom asan opok aemcemes. E nat, dor e aenawomcenes ow, e Asepnak Jofay aojaworomsumutumcimin.

⁴⁵E Allah atakam botaw ow e wun surat aeapomfes atakam, ‘Allah e ow atakam amememtamcema,’ inim atakam aeapomfes. Bare, wun ow doricipic atakam jen ajimes. Aram aratakam atewetmes. E ow takasam dor aenawomcemenes.

⁴⁶E nat, ow Allah bi bapor opok. E Allah atewenamef ipic cowok, Allah bi arop aporef.

⁴⁷Atakamnak ara, e dor asicimamenes ow jiwnenak aatamemawarcemes.

⁴⁸E jiwnenak atetamamar amos pok, bare dor ara.

⁴⁹E carafasutmar e amos pok juwas manna e ow opok asan aemenfes. E nat, e ow damir aaffes.

⁵⁰A atakam atawmin amos pok nat, e onam op aewneyef amos pok ara. Ow e amos pok aances, ar damir baf opok cowok aemcemes.

⁵¹E onam op aewneyef amos pok, jiwnenak atatamama. E amos pok, bare dor ara. Ow e amos pok aances, aram jiwnenak aatamemawarcemes. Bare, e atetamcimin amos pok, e dodam das ara. Dor e dodam das atetamcimin. Er asmat ow jiwne bweawaras ara.” Inim aeef.

⁵²Bare, e Yahudi ow atakam awutnakut aramaman aamtawfes. “Awamec ipic e dam das da batetam wunam dar e das memen, ucimaram?” Inim aefes.

⁵³Yesusam atakam e ow aotawef. “Atakamnak ara, car e Asmat Anakat Ajaworemef Ipic dam das memen opok aemcokom, wunam ares ban opok aemcokom, bare car jiwnenak bwemomom asan opok.

⁵⁴Ow e dodam das aemencesam, e dores aancesam, aram jiwnenak aatamemawarcemes. Doram e ow e Asepnak Jofay aojaworomsumutumcimin.

⁵⁵Bare, e dodam das, e amos pok anakatnak ara. E doresam, e ban bwi anakatnak ara.

⁵⁶Ow e dodam das aemencesam, e dores aancesam, aram dor cowkon aatamememawarcemenes. Doram e ow cowkon aatamememawarcimin.

⁵⁷Doricipic jiwne ipic ara. Ar dor atewenamfan. Aram jiwneas dor atetamaman. Inimas ara, doram jiwneas e dodam das aanmes ow atatamamin.

⁵⁸Dor e onam op aewneyef amos pok ara. E amos pok e darafasutmar aanfes amos pok inim awcawor opok. Darafasutmar amos pok aanfes, e nat, asep jofay aram damir aaffes. E nat, awamec amos pok aances ow, jiwnenak aatamemawarcemes.” Inim aeef.

⁵⁹Yesus e Kapernaum sembahyang cem aman atakam amememtamef ara, ar inim atakam aotawef.

⁶⁰E wun Yesus mamkawi ow arke, inim atakam jen ajifes ara, aram atakam aotawfes. “Inim atakam amannakut ara. Ow e atakam jen baji ucimaram?” Inim aefes.

⁶¹Ar e aramaman aamtawfes atakam, Yesus botaw opokut aemfes. E nat, aramat ipic e amamkawi ow, eras atakam pwicak anunukumamtawfes amsom. Ar masirin, “Car e atawey atakam pwicak apormokomnew?

⁶²Ca nat, e Asmat Anakat Ajaworemef Ipic e bap aemapawiri asan boaptomet aporcokom ucimaram?

⁶³Allah Roh, jiwnenak batamemawaras, ow atatamama. Asmat ow nat, inimas bwemtetam asan opok. Car e dor atakam car aotaweyas ji aecokom, e jiwnenak atatamamar Roh car aenawomceman.

⁶⁴E nat, ca wun ow do basicim opok.” Inim aeef. Bare, bap ara, Yesusam e a basicim opok aemces ow amsom aememef. Aram e jokmen ow aotasimemtamcow ipic amsom aememef.

⁶⁵E Yesusam, “Inimas ara, dor atakam car aotawey. ‘Allah, ow, dor bwenawom bi binip batetam opok aemcow, e ow dor bwemenawom asan opok,’ inim aeey.” Yesus inim aeef.

⁶⁶E wun Yesus mamkawi ow arke inim atakam aporfes, wunam akoromemfes. Aram Yesus bojamkawi opok aemfes.

⁶⁷E Yesusam atakam e mamkawi ow dua belas ajiwar aotawef. “Caram do bakoromem aranew?” Inim aeef.

⁶⁸E Simon Petrus masirin, “Tuhan. Dar ca ipic jamkawicom? Ow e oratakam cowok ji aeces, jiwnenak aatamemawarcemes.

⁶⁹Dar or asicimfenom. Or e Allah atewenamfan tarowat ipic aporfom.” Inim aeef.

⁷⁰E Yesusam, “Dor awamcokom ow dua belas ajiwar aereremtawfin. E nat, ca wun ipic cowok, bare Iblis inim awcawor ara.” Inim aeef.

⁷¹Ar e Simon Iskariot atiw juwas Yudas atakam atawef. E ipic, e Yesus aereremtawef ow dua belas ajiwar wun ipic cowok ara. E nat, asep jofay, e Yudas, Yesus, jokmen ow aotasimemtamef.