Read Central Asmat YOHANES 7 Bible Online

YOHANES 7 - Central Asmat bible

YOHANES 7

¹Bare. Yesus e Galilea capinmi asanin asanin ajaref. Aramat ipic e Yahudi ow a bacatiw at asakamtiwfes aporef. Inimas ar e Yudea capinmi baysos pwicak aememef.

²E nat, e Yahudi ow pokbwi juwas Puk Cem Pokbwi jofay asisienawef.

³Inimas Yesus arewcewes, atakam aramat ipic aotawfes. “Or arasan bakajirap arapok. E Yudea capinmi jisosey. E omamkawi owam e aemamem awutnakutas baporces.

⁴Bare, jipic cowok an bafufuos akat aporcow, ar e aemamaras bacukumtiw opok aemcema. Oram awutnakutas aemamemnew, asmat ow takasam baporkurumces.” Inim aefes.

⁵E arewcewesam Yesus basicim opok aemfes. Inimas ar inim atakam aotawfes.

⁶E Yesusam atakam e arewcewes aotawef. “Do baysos jofay bwenaw opok. Ca nat, wow baysosnew, asep jofay baysosnew, bare cabi binip ara.

⁷Awames capinmi ow bifan ca bwemfayom asan opok. E nat, dor awames capinmi ow e aemames jursumecas, atakam aotawcimin. Inimas ar bifan dor afayomamenes.

⁸Bare, car e pokbwi carop jisosey. E nat, do baysos jofay bwenaw opok. Inimas do wow a pokbwi baysos opok.” Inim aeef.

⁹Bare, Yesus e Galilea capinmi inim akamiapef.

¹⁰Bare, Yesus arewcewes e pokbwi arop ajisosfes. Aramat ipic masirin, e pokbwi asep ajisosef. E nat, ar aropnakap curuw ajisosef.

¹¹E pokbwi aman jo jirow, Yahudi ow, aramat ipic apowfes. Aram Yesus jonow atowfes. “Aramat ipic onakaram?” Inim aefes.

¹²Bare, e ow arkenakutam curuw atakam aamtawfes. Ar e aramat ipic atakam atawfes. E wun ow atawfes, “Aramat ipic akat ara,” inim aefes. Wun ow nat, “Inimas opok. Ar e ow arke tot aotma.” Inim aefes.

¹³E nat, ow, e Yahudi ow omar aefes. Inimas ar e aramat ipic atakam, umuton bataw, opok cowok aemfes.

¹⁴E pokbwi aman, Yesus e Allah cem aapenef, wunam atakam amememtamef.

¹⁵Inimas e Yahudi ow junum awutnakut aefes. “Aramat ipic sekolah bwe opokut. E nat, aram amsom takas. Ucim inimaram?” Inim aefes.

¹⁶Yesusam atakam e ow aotawef. “E amememtamamin atakam, dobinip opok. Dor e atewenamfan ipic aratakam binip amememtamamin.

¹⁷Ow Allah anakatas jipu bwem akat aporces, aram e amememtamamin atakam, e Allah atetamfan atakam aranew, dorop atakam aranew, inimas aporcemes.

¹⁸Ow, arop atakam atawcesnew, ar kawey ow, a basicim, jak aserememames. E nat, ow, kawey ow, e ar atewenamef ipic basicim jak aserememces, ar atakamnak botaw ow ara. Aram tot bot opok cowok ara.

¹⁹Musa, e Allah Jirmec car atatitamfan. E nat, ca awamcokom ow takas e Jirmec aopowmokom. Caram do bacatiw at asakamtiwfokom, ucimaram?” Yesus inim aeef.

²⁰E ow arke masirin, “E ojak aman dat awap. E o bacatiw at asakamtiwfes ow ucim owam?” Inim aefes.

²¹E Yesusam, “Dor Ses Ban Jo junum bweas cowoknakap aemof. E nat, car takas junum awutnakut aefokom.

²²Bare, Musa e sunat aturan car atatitamfan. (E nat, Musa e aturan car batatitam opok. E carafasutmar e aturan car atatitamfan.) Inimas ca jiwi Ses Ban Joam, sunat aemcomokom.

²³Ow, jiwi, Ses Ban Jo, sunat aemcemes. Eras e Musa Jirmec bopowasinas ara. E nat, dor jipic cowok, Ses Ban Jo, dam ajaworomtewof ara, car jokmen atakam aotawfenokom, ucimaram?

²⁴Caram ow salah atakam basakamtiw, sarim arapok. Ow salah epen batakamoworporkurumey.” Inim aeef.

²⁵E wun Yerusalem owam atakam atawfes. “Awamec ipic, e bacatiw at aetiwmes ipic aranew?

²⁶Jakaperey. Aramat ipic, atakam, ow bipu umuton cowok aotawma. Ow nat, aramat ipic biamnuk atakam mamtaw opok aemes. E darownucur ow e aramat ipic e Allah Aeremtewef Ipic apormes ara openow.

²⁷Dar awamec ipic acapinmi namsom. E nat, e Allah Aeremtewef Ipic aenawcow, ow acapinmi amsom opok aemcemes.” Inim aefes.

²⁸Bare, Yesus e Allah cem aman atakam amememtamef ara, aram atakam afakaytawef. “Awamcokom ow, dor camsom aranew? Caram docapinmi camson aranew. Dor aapenawof, dorma bwemapenaw asan opok. E atewenamfan ipic, bare atakamnak ipic ara. Ca nat, e ipic camsom opok.

²⁹Dor aramat ipic akac aemapawirum. Aram dor arasan atewenamfan. Inimas dor aramat ipic nomsom.” Inim aeef.

³⁰E owam, e Yesus, ban bakimom aemporfes. E nat, e ban a bakimom jofay bwenaw opok. Inimas e ow aramat ipic ban bwemkimom asan opok.

³¹E nat, e wun ememfes ow arke e Yesus asicimfes. Aram atakam atawfes. “Awamec ipic e Allah Aeremtewef Ipic araman. Ar junum bweas arkenakut aemama. Mami ipic inim junum bweas bwemem asan opok.” Inim aefes.

³²E ow arke e Yesus atakam curuw atawfes. E Parisi owam inim atakam jen ajifes. Wunam, e Allah atakam mamtaw tugas ow awutam, e Parisi owam, jirmec e Allah cem manmok batiw ow ajirimfes. Ar e ow Yesus ban bakimom jirmec ajirimfes.

³³E Yesus masirin, “Doram bar arke opoknakap car ajamemapcimin. Dor masirin, e atewenamfan ipicpu aojisoscimin.

³⁴Caram dor apowcemenokom. E nat, car do bapowtew opok aemcemenokom. Caram e ajisoscey asan bwemjisos asan opok.” Inim aeef.

³⁵E Yahudi ow masirin, aramaman atakam aamtawfes. “Aramat ipic, ‘Car dor bapowtew aemcemenokom,’ inim aema. E nat, ar ocenak asan ajisoscownew? E wun Yahudi ow, e Yunani samat aemapmes capinmi, apacayosfes. Aramat ipic e Yahudi ow asan ajisoscemar aranew? Aram atakam e Yunani ow amememtamcemar aranew?

³⁶Aramat ipicam atakam, ‘Car dor apowcemenokom. E nat, car do bapowtew opok aemcemenokom. Caram e ajisoscey asan bwemjisos asan opok.’ Inim aema. Inim atakam nat, ucimaram?” E Yahudi ow inim aefes.

³⁷Bare. E pokbwi baci jofay aenawef. Er e pokbwi e awut jofay ara. Yesusam asitef, wunam atakam afakaytawef. “Ow bwito aememces, ar dor baenawomcenes. Ar masirin, bwi baances.

³⁸Aram e Alkitab atakam jipu ara. ‘Jiwne atetamamar bwi e dor asicimamenes ow jak aman afiscema inim cimin ara.’ E Alkitab inim atakam atawma.” Yesus inim aeef.

³⁹E Yesus atawef atakam, bare e Roh Kudus atakam ara. Bare, e Yesus basicim ow e Roh Kudus atewettotorcemes. E nat, e jofay, Yesus e onam op asan akatnakut baptomet opok emef ara. Inimasam e jofay, Allah, e Roh Kudus, e ow batetam opok ara.

⁴⁰E ow arke, aram e atakam jen ajifes. E wun ow masirin, atakam atawfes. “Atakamnak ara. Awamec ipic e Allah atakam botaw ipicut ara.” Inim aefes.

⁴¹Wun ow masirin, “Awamec ipic e Allah Aeremtewef Ipic ara.” Inim aefes. Wun ow nat, “E Allah Aeremtewef Ipic e Galilea capinmi ipic opok.

⁴²E Alkitab atakam, e Allah Aeremtewef Ipic Daud urpis ara. Aram kota Betlehem capinmi ajisamescema. Er Daud aemapawiri kota ara. E Alkitab inim atakam ara.” Inim aeefes.

⁴³Bare, e ow arke aman, wun ow Yesus atakam akat aotawfes. Wun ow nat, Yesus atakam pwicak aotawfes. Inimas aram atakam aamtawfes.

⁴⁴Wun ow, aramat ipic ban bakimom aememfes. E nat, e ow e aramat ipic ban bwemkimom asan opok.

⁴⁵Bare. E Allah cem manmok batiw ow, e Allah atakam mamtaw tugas ow awutpuam, e Parisi owpuam, aofasifes. E ow masirin, jonow e manmok batiw ow atowporfes. “Car e ipic batowotnaw opok, ucimaram?” Inim aefes.

⁴⁶E manmok batiw ow masirin, “E wun ow atakam atawmesasam, e ipic atakam atawmarasam, bare awcawor opokut. E ipic atakam, bare akatnakut ara.” Inim aefes.

⁴⁷E Parisi ow masirin, jonow e ow atowporfes. “E ipic tot caram aotannew?

⁴⁸E darownucur owam, e Parisi owam, e ipic basicim opokut aemames.

⁴⁹Awamces ow arke nat, e Musa surat aeapomef Jirmec amsom opok. Allah e ow asan pwicak baemapomcow.” Inim aefes.

⁵⁰Bare, e wun Parisi ipic juwas Nikodemus ara. Ametnak ara, aramat ipic Yesus ameromef. E Nikodemusam atakam e ow aotawef.

⁵¹“Dar ow asalah atakam mami basakamtiw arapok. Dar e ow atakam jen batakamji. Daram e aemamesas batakamoworporji. Inimas bwem, e aomomamom Jirmec atakam jipu ara.” Inim aeef.

⁵²E ow masirin, “Oram Galilea capinmi ipic aranew? Oram e Alkitab atakam orma boworporey. Inimas or e Allah atakam botaw ipicut, Galilea capinmi ipic opok aporcemem.” Inim aefes. [

⁵³Bare. E ow takasam acema acema ajisostotorfes.