Read Central Asmat YOHANES 8 Bible Online

YOHANES 8 - Central Asmat bible

YOHANES 8

¹Yesus nat, e sikon juwas Saitun ajisosef.

²Ajofay tamnakap masirin, aramat ipic e Allah cem aojisosef. Ow takasan fumi aamwiciromfes. Aramat ipic masirin, aneypwikapef, wunam atakam e ow amememtamef.

³E Allah Jirmec mamememtam owam, e Parisi owam, cowoc cowok atowomiwfes. Ar e cowoc kawey cemen aanef aporfesen. Bare, ar e cowoc e ow bipu memem jirmec ajirimfes.

⁴Ar, masirin atakam Yesus aotawfes. “Guru. Ow, a cowoc, kawey cemen aanor, manmok arma atiweresen.

⁵Bare, Musa, Allah Jirmec, surat aeapomef. Daram e Jirmec ajamkawimom. E Jirmec atakam, ‘Car, ek, kawey cemen aanor cowoc dampu bajimirokopomey.’ E Jirmec inim aema. O nat, ucim atakam atawmem?” Inim aefes.

⁶E ow, Yesus salah bwem, akat aemfes. Inimas ar inim jonow e aramat ipic atowporfes. Ar e Yesus salah atakam botaw epen baporen. E Yesus nat, jimas ajirapef, wunam banek asuk wow e capinmi aemapomef.

⁷E ow nat, e aramat ipic jonow atowpora aefes. Yesus inimas aporef, wunam jimas aosuef. Aram atakam aotawef. “E caramaman dosa opok ipicnew, aram ek e cowoc dampu bap a takam bajiwicow.” Inim aeef.

⁸Aramat ipicam jimas aojirapef, wunam asuk wow e capinmi aoemapomef.

⁹E ow inim atakam jen ajifes, aram jipic cowok aramtakayosa aramtakayosa, inim aefes. E akmat inim ow bap a takam jisosfes. E ay ow masirin, asep ajisosfes. Inimas Yesusam, e cowocam, e wun ow arke bipu arop aememfes.

¹⁰Yesus masirin, asitef. Aram atakam e cowoc aotawef. “E ow wace? E osalah atakam botaw ow opok cowok aranew?” Inim aeef.

¹¹E cowoc masirin, “Bare. E dosalah atakam botaw ow opok cowok araman.” Inim aeef. E Yesus masirin, “Doram e osalah atakam botaw opok ara. Oram, cey. Oram dosa boem arapok.” Yesus inim aeef.]

¹²Bare. Yesus atakam e ow aootawef. “Dor ow atakam amememtamcimin. Inimas dor awames capinmi sereas anakat awapey ara. Dor sereas e dor ajamkawimenes ow atetamamin. Inimas e ow jiwic aman bojar opok aemcemes. Doram jiwnenak e ow atetamamin.” Inim aeef.

¹³E Parisi owam atakam e aramat ipic aotawfes. “Oram or atakam atawmem. Inimas e atakam, atakamnak opok ara.” Inim aefes.

¹⁴E Yesus masirin, “Dor e ewenawof asan nomsom. Doram e ajisoscey asan nomsom. Inimas doram dor atakam atawcey, e atakamam atakamnak ara. E nat, car e ewenawof asan camson opok. Caram e ajisoscey asan camson opok.

¹⁵E kawey ow dosa atakam asakamtiwmokomas, bare asmat bi binip cowok ara. Do nat, ow dosa atakam basakamtiw opok ara.

¹⁶Doram dorop opok. Doricipic atewenamfan. Aramat ipicam dodam sotop awamec. Inimas dor ow adosa atakam asakamtiwceynew, e atakam asakamtiwceyas, bare atakamnak ara.

¹⁷E caragama Jirmec Surat inim atakam ara: ‘Ow jamnuk atakam awcawor aotawces, aratakam atakamnak ara.’ E surat inim aema.

¹⁸Bare, doram dor atakam atawmin. Doricipic dor atewenamfan. Aram dor atakam atawma.” Inim aeef.

¹⁹E ow masirin, “E oricipic onakaram?” inim aefes. E Yesusam, “Car dor camsom opok. Caram doricipic camsom opok. Car dor camsom ayaw, e doricipicam camsom.” Inim aeef.

²⁰Yesus a atakam takas e Allah cem aman atawef. Ar e derma uang batewapom asanpu aememef. Ow aramat ipic ban bakimom jofay bwenaw opok. Inimas ow e aramat ipic ban bwemkimom asan opok.

²¹Yesus atakam e ow aootawef. “Dor ajisoscimin. Caram dor apowporcemenokom. E nat, car e cadosa epcom damir aafcomokom. Caram e ajisoscey asan bwemjisos asan opok.” Inim aeef.

²²E Yahudi ow masirin, “E aramat ipic atakam, ‘Caram e ajisoscey asan bwemjisos asan opok,’ ucimaram? Aram sanaw arma bweames arapenow.” Inim aefes.

²³Yesusam, “Car awames capinmi ow ara. Dor masirin, e onam op ipic ara. Caram awames capinmias ara. Do nat, awames capinmias opok.

²⁴Doram atakam car aotawey, ‘Car e cadosa epcom damir aafcomokom,’ inim aeey. Dor e Allah Aeremtewef Ipic awamcey ara. Ca nat, inim atakam basicim opok aemcokom, caram e cadosa epcom damir aafcomokom.” Inim aeef.

²⁵E ow masirin, “O nat, ca ipicam?” Inim aefes. E Yesusam, “Bare, dor eras atakam tareynakut car aotawawirin.

²⁶Doram e aemamokomas, wun atakam arke awompey. Dor e dosa arke aemamokomas, atakam basakamtiw. E nat, e atewenamfan ipic, bare atakamnak ipic ara. Dor e aramat ipic atakam atawefas jen ajiof. Dor masirin, e atakam cowok, awames capinmi ow aotawmin.” Inim aeef.

²⁷Bare, Yesus e aricipic atakam atawef. E nat, e ow e atakam amsom opok.

²⁸E Yesusam, “Car e Asmat Anakat Ajaworemef Ipic e salib os op atewtopomcokom, caram dor e Allah Aeremtewef Ipic ara, inim aporcomonokom. Caram e atakam atawminas dorop atakam opok aporcomokom. E nat, dor e doricipic amememtamfan atakam cowok atawmin. Caram inimas aporcomokom.

²⁹Doram e atewenamfan ipic akat apormaras jipu cowok acowomamin. Inimas e aramat ipic dodam sotop awamec. Aram dor bakan bajiem opok ara.” Inim aeef.

³⁰E aramat ipic inim atakam atawef, ow arkenakut e aramat ipic asicimfes.

³¹Bare, e wun Yahudi ow e Yesus asicimfes. Aramat ipicam atakam e ow aotawef. “Car e doratakam ji aatameawarcokom, bare car domamkawi ow anakat aememcomokom.

³²Caram e atakamnak jen ajikurumcomokom. E atakamnak jen ajikurumcokom, kawey ow car bwemoomom asan opok.” Yesus inim aeef.

³³E ow masirin, “Dar Abraham urpis araman. Kawey owam dar momom opok cowok araman. Inimas e atakam atawmemas, ‘Kawey ow car bwemoomom asan opok,’ ucim inimaram?” Inim aefes.

³⁴E Yesusam, “Atakamnak ara, ow dosa aemawarces, e dosaas e ow aomomama.

³⁵Kawey ipic, wun ow aomomcow, e ow, e kawey ipic atiperes inim batamemapawar opok aemcemes. E nat, e ipic atiwnak, e aricipic atiw, inim aatamemapawarcema.

³⁶E nat, Allah atiw car asurumtamcannew, bare wunas car bwemomom asan opok cowok.

³⁷Car Abraham urpis araman. Dor inimas nomsom. E nat, car e doratakam ji bwe opok. Inimas car do bacatiw aememamokom ara.

³⁸Dor e doricipic aporomtamfanas, atakam car aotawmin. Ca nat, e caricipic atakam jen ajifokomas jipu acowoymokom.” Yesus inim aeef.

³⁹E ow masirin, “Abraham darafasut araman.” Inim aefes. E Yesus masirin, “Car Abraham urpis anakat aememamokom ayaw, car Abraham aemawirias jipu acowoymokom. (E nat, car inimas opok.)

⁴⁰E Allah atakam aotawfanas, bare atakamnak ara. Doram e atakam car aotawmin. E nat, car dor bacatiw aememamokom ara. Bare, Abraham inimas bwem opokut.

⁴¹Car e caricipic aemamaras jipu acowoymokom ara.” Inim aeef. E owam, “Darisorow arke opok. Allah cowok daricipic araman.” Inim aefes.

⁴²E Yesus masirin, “Allah caricipic aememamar ayaw, car dor damos jiemamenokom. Bare, dor arasan dorma bwemney asan opok. Allah dor atewenamfan.

⁴³Caram e atawmin atakam jen baji pwicak aemamokom. Inimas car a atakam camsom opok ara.

⁴⁴Caricipic, bare e Iblis ara. Caram e caricipic akatas jipu, inimas acowoymokom. Ametnak ar ow sanaw bwetiw ipic aememawiri. Wow ajiwaram, sanaw bwetiw ipic aememama. Aram atakamnak botaw amsom opok. Inimas ar e atakamnak bifan afayomama. Aram e suw atakam ipic anakatnakut ara. Inimas ar suw atakam atawma. Eras e ajak aman jipuas ara.

⁴⁵Do nat, atakamnak aotawmin. Inimas car doratakam basicim opok ara.

⁴⁶Caram, ‘E Yesus dosa ipic ara,’ inim atakam bwemotaw asan opok. Bare, dor atakamnak aotawmin. Ca nat, e doratakam basicim opok ucim inimaram?

⁴⁷E Allah arow, e Allah atakam jen ajimes. E nat, car Allah arow opok ara. Inimas car Allah atakam jen baji opok ara.” Yesus inim aeef.

⁴⁸E Yahudi ow masirin, “E atawmom atakam, atakamnak ara. Or Samaria samat ipic araman. E ojak aman, bare dat awap.” Inim aefes.

⁴⁹E Yesusam, “E dojak aman dat opok. Dor doricipic asicimamin. Ca nat, bifan dor afayomamenokom.

⁵⁰Dor ow do basicim janim manim opok. E nat, jipic cowok ow do basicim janim aanimama. E ipicam, ow adosa atakam basakamtiw ipic ara.

⁵¹Atakamnak ara, ow doratakam ji aeces, aram darim baf opok aemcemes.” Yesus inim aeef.

⁵²E Yahudi ow masirin, “Bare, e ojak aman dat araman. E Abraham damir aafef. E Allah atakam botaw owam damir aaffes. E nat, oratakam, ‘Ow doratakam ji aeces, aram damir baf opok aemcemes,’ inim aemem.

⁵³Bare, e Allah atakam botaw ow damir aaffes. E Abrahamam damir aafef. E nat, e Abraham, ow kanim arawe? Or masirin, ow awut arawe? O nat, ca ipicutam?” Inim aefes.

⁵⁴E Yesus masirin, “Dor dorma asicimceynew, inimas pwicak ara. E nat, e doricipic dor asicimaman. Ar e atakam atawmokom ipic ara. ‘Aramat ipic darAllah ara.’ Inim aemokom.

⁵⁵Car aramat ipic camsom opokut. Do nat, aramat ipic nomsom. Doram atakam atawceynew, ‘Dor e aramat ipic nomsom opok,’ inim aeceynew, bare dor suw ipic car cimin aememcimin. E nat, dor aramat ipic nomsom. Doram aratakamji aemin.

⁵⁶E carafasut juwas Abraham, dor a cenes capinmi baneyap, atakam jen ajief. Inimas jak akat aemapef. Ar e atakam atakamnak aporef, wunam jak akat aemapef.” Yesus inim aeef.

⁵⁷E Yahudi ow masirin, “E orumur, tahun lima puluh ajiwar opok. E nat, or Abraham bi aporfem arawe?” Inim aefes.

⁵⁸E Yesus masirin, “Atakamnak ara, e Abraham bajisames opok aemef, dor aememof.” Inim aeef.

⁵⁹Bare, e ow ek arke atawfes. Aram e ek e Yesus dampu bajimir aememfes. E nat, e aramat ipic acukemef. Wunam ar e Allah cem afisef.