Read Central Asmat YOHANES 9 Bible Online

YOHANES 9 - Central Asmat bible

YOHANES 9

¹Bare. Yesus aojaref. Aojaref, aram manmok kapi ipic aporef. E ipic manmok kapi, jak aman ewomisef.

²E Yesus mamkawi owam jonow atowporfes. “Guru. Awap ipic manmok kapi jak aman ewomisefas, dosa ca emef? Awap ipic aranew? Aricipicin arosowoc aranew?” Inim aefes.

³E Yesus masirin, “E ipic manmok kapi jak aman ewomisefas arop dosa opok. Aram aricipicin arosowoc dosaas opok. E nat, Allah, e afakas baporomtam aemef. Ar e ipic manmok bateremtam aemef. Inimas ara, e ipic manmok kapi jak aman ewomisef.

⁴Dar e dor atewenamfan ipic akerjaas jok bwemtamji. Aram jo aticema. Ow jiwic aman kerja bwemem asan opok. Inim aeef.

⁵Dor awames capinmi aemapmin ara, dor a capinmi ow sere aseremtamamin.” Inim aeef.

⁶Inim aeef masirin, bese, capinmi ajinemef. Aram e bese se aartamef. Wunam ar e se e ipic manmok aaramapomef.

⁷Yesus masirin, atakam e ipic aotawef. “Or e bwi asan juwas Siloam jisosey. (‘Siloam’ daratakam juw buwumtew, ‘batewnemas’ ara.) Oram e omanmok bwi bacicikimey.” Inim aeef. Bare, aramat ipic ajisosef, wunam e amanmok bwi acicikimef. E amanmok masirin, atereyef. Aram manmok akatipic ateremenawef.

⁸E ipic acem sotop owam, e ipic ametnak uang janim aanimawiri aporfes owam, jonow atowporfes. “Awap ipic e uang janim manim aemapawiri ipic aranew?” Inim aefes.

⁹E wun ow atakam, “Ar e ipic araman,” inim aefes. E wun ow masirin, “Ar e ipic opok. E nat, ar e ipic bi awcawor ara.” Inim aefes. E manmok kapi aemapawiri ipic nat, “Dor e ipic araman.” Inim aeef.

¹⁰E ow masirin, jonow e ipic atowporfes. “E omanmok atereyor nat, ucim inimaram?” Inim aefes.

¹¹E ipicam, “Jipic juwas Yesus beseam, seam, aartamor, wunam e se e domanmok aaramapoman. Aram atakam aotawan, ‘E Siloam jisosey. Oram e omanmok bwi bacicikimey.’ Inim aean. Dor masirin ajisosey, wunam e domanmok bwi acicikimey. Wunam e domanmok atereyor.” Inim aeef.

¹²E ow masirin, “E Yesus onakaram?” Inim aefes. E ipicam, “Doram nomsom opok.” Inim aeef.

¹³Bare, e ow e manmok kapi aemapawiri ipic e Parisi owpu atowocenfes.

¹⁴E Yesus e beseam, seam, aartamef, wunam e ipic manmok ateremtamef jofay, bare Ses Ban Jo ara.

¹⁵E Parisi owam jonow e ipic aotowporfes. “E omanmok atereyor nat, ucim inimaram?” Inim aefes. E ipic masirin, “E Yesus se e domanmok aaramapoman. Dor masirin, e domanmok bwi acicikimey. Doram wow manmok atiwmin.” Inim aeef.

¹⁶E wun Parisi ow masirin, “E inimas aemor ipic a Ses Ban Jo jirmec ji bwe opok ara. Inimas Allah e ipic batewenam opok apormom ara.” Inim aefes. E wun ow nat, “Dosa ipic, inim junum bweas bwem nat, ucimaram?” Inim aefes. Bare, e ow e aramat ipic aemefas, atakam aamtawfes.

¹⁷E owam atakam e manmok kapi ipic aotawfes. “Or e ipic e omanmok ateremtaman atakam atawmem. E ipic nat, ca ipicam? Or ucim atakam atawmem?” Inim aefes. E ipic masirin, “Bare, e ipic Allah atakam botaw ipicut araman.” Inim aeef.

¹⁸E Yahudi ow, e ipic manmok kapi jak aman ewomisef, wunam e manmok aotereyef, inim atakam jen ajifes. E nat, ar inim atakam basicim opokut. Inimas ar e ipic arisepes ajatefes.

¹⁹Aram jonow e arisepes atowporfes. “Awamec ipic catiw aranew? Caratakam, ‘E datiw manmok kapi jak aman ewomisef,’ inim aefokom. Ar awamec ipic aranew? E ipic nat, wow manmok atiwma. Ucim inimaram?” Inim aefes.

²⁰E arisepes masirin, “Aramat ipic e datiw araman. Aram manmok kapi jak aman ewomisef araman.

²¹E nat, wow ajiwar manmok atiwma. Ucim inimaramnew? Daram e amanmok ateremor ipicam damsom opok. Caram jonow e aramat ipic carma towporey. Ar esepen jiwi opok. Aram atakam arma atawcema.” Inim aefes.

²²Bap ara, e Yahudi ow atakam aamsakamfes. “Ow atakam atawces, ‘E Yesus, e Allah Aeremtewef Ipic ara,’ inim aeces, dar e ow e sembahyang cem bafimisimamoc.” Inim aefes. E ipic arisepesam inim atakam aporfes. Inimas ar e atakam e Yahudi ow aotawfes.

²³E atakam ara, “Ar esepen jiwi opok. Jonow aramat ipic carma towporey.” Inim aefes.

²⁴Bare, e Yahudi ow e manmok kapi aemapawiri ipic aojatefes. “Allah manmok tiwap. Inimas atakamnak otawcarowey. Dar e Yesus dosa ipic apormom ara.” Inim aefes.

²⁵E manmok kapi aemapawiri ipic masirin, “E Yesus dosa ipic aranew, dosa ipic opoknew, doram nomsom opok. E nat, dor manmok kapi aemapawiru. Wow masirin, dor manmok atiwmin. Dor inimas nomsom anakat ara.” Inim aeef.

²⁶E owam, “E ipic or ucimas aeman? Ar e omanmok atereman, ucimas emor?” Inim aefes.

²⁷E ipic masirin, “Bare, dor atakam car emcaotawey. Ca nat, e atakam jen baji opok. Car e atakam jen boji ucim inimaram? Caram e ipic mamkawi akat aranew?” Inim aeef.

²⁸E ow masirin, cemew atakam e manmok kapi aemapawiri ipic aotawfes. “Or e ipic ajamkawimem ara. Da nat, Musa atakam ajamkawimom ow ara.

²⁹Allah, atakam, Musa aotawef araman. Daram inimas namsom. E nat, e ipic aewenawef asan namsom opok.” Inim aefes.

³⁰E manmok kapi aemapawiri ipicam atakam e ow aootawef. “E ipic domanmok atereman. E nat, car e ipic e aewenawef asan camsom opok. Bare, dor e atawmokom atakam junum awut aemin.

³¹Allah, dosa ow janim aanimcesas, jen baji opok aemcema. E nat, ow Allah asicimcesam, aratakam ji aecesam, bare Allah e ow janim aanimcesas jen ajicema. Dar inimas namsom.

³²Ametnak ara, ow manmok kapi jak aman ewomisef ipic amanmok baterem, bare opok cowok. A ipic nat, inimas cowok aemor.

³³Allah a ipic batewenam opok ayaw, ar inimas bwemem asan opok.” Inim aeef.

³⁴E ow masirin, “Ajisamesfem ara, oram dosa ipic anakat aemamesfem. Or masirin, atakam dar mamememtamut arawe?” Inim aefes. Bare, ar e manmok kapi aemapawiri ipic, e Allah cem aotewerisimfes.

³⁵Bare, Yesus, e ow, e manmok kapi aemapawiri ipic aotewerisimfes, atakam jen ajief. Ar masirin, e ipic apowtewef. Apowtewef masirin, ar jonow e aramat ipic atowporef. “Or e Asmat Anakat Ajaworemef Ipic basicim open?” Inim aeef.

³⁶E ipic masirin, “Tuan. E Asmat Anakat Ajaworemef Ipic ca ipicam?” Dor e ipic basicim akat ara. Inim aeef.

³⁷E Yesusam, “Or e ipic bi emcaporerem. Ar e atakam or aotawman ipic ara.” Inim aeef.

³⁸E ipic masirin, “Tuhan. Dor or asicimamin.” Inim aeef. Ar masirin, e Yesus bipu jine onok aneyotapef.

³⁹E Yesus atakam, “Dor, ow e adosa umuton baporomtam, awames capinmi aneyof. Dor e manmok kapi inim cimin ow, e amanmok baterem inim cimin, aneyof. Doram e manmok atiwmes inim cimin ow, manmok kapi bemapom inim cimin, aneyof.” Inim aeef.

⁴⁰Bare, wun Parisi ow e Yesus cowkon aememfes. Aram e atakam jen ajifes. Ar masirin, atakam e aramat ipic aotawfes. “Daram manmok kapi ow inim cimin arawe?” Inim aefes.

⁴¹E Yesus masirin, “Car manmok kapi inim cimin aememamokom ayaw, dor e cadosa, atakam basakamtiw opok. E nat, car atakam, ‘Dar manmok atiwmom ara,’ inim aemokom. Inimas car dosa awompokom ara.” Inim aeef.