Read Central Asmat AEMAWIRISAS 10 Bible Online

AEMAWIRISAS 10 - Central Asmat bible

AEMAWIRISAS 10

¹Barewen. Kota Kaisarea ara, jipic juwas Kornelius aemapefen. Aramat ipic tentara komandan ipic arawen. E tentara ow, juwas “Italia Tentara Ow” arawen.

²Aramat ipic agama mamkawi fak ipic arawen. Aram, acem ow takasam, Allah asicimawirisen. Aram uang awut, e Yahudi pok opok ow, atatamawirien. Aram janim Allah aanimawirien.

³Bare, jofay ara, jam tiga porow inim, aramat ipic, Allah malaikat desen aporefen. E malaikat abipu umuton cowok afomisef aporefen. E malaikatam atakam aotawefen. “Kornelius.” Inim aeefen.

⁴Aramat ipic masirin, e malaikat manmok aoromsimopef wunam, “Tuhan. Or ucimasam?” Inim aeefen. E malaikat masirin, “Allah e janim aanimawarmemas jen ajima. Aram e uang e pok opok ow atetamawarmem aporma. Ar or bi binip acomomama.

⁵Bare, oram ow kota Yope mamtewosomey. Jipic juwas Simon mamjateey. Ar wun juwas Petrus ara.

⁶Aramat ipic binatang picin kerja ipic juwas Simon acem awap. E cem e jopir awames.” E malaikat inim aeefen.

⁷Barewen. E Kornelius atakam aamtawef malaikat, ajisosefen. Ajisosef masirin, Kornelius, akerja bwemtam ipic jamnukam, tentara ipic cowokam, ajateefen. E tentara ipic agama mamkawi fak ipic arawen. Aram Kornelius kerja bwemtamawar ipic arawen.

⁸Bare, Kornelius e atakam takas e ow aotawefen. Aotawef masirin, ar e ow Yope atewosomefen.

⁹Ajofay masirin, e ow e wasec ajarfesen. Aram Yope sotop ajarfes ara, e Petrusam e cem onewmak op, Allah janim manim atometemefen. Er jok ara, jam dua belas arawen.

¹⁰Barewen. Petrus amosto arawen. Ar amos memem akaten. E wun ow amos a bajewtam aememfes ara, aramat ipic pok desen aporefen.

¹¹Ar e onam op amuwapef aporefen. Wunam co pok cenes aneyef aporefen. E pok, picin awut inim cimin arawen. Aram jep tete empat ajiwar banitep aneyefen.

¹²Bwey empat ajiwar epcom binatang jukpiriam, capinmi fafasijarmes pok jukpiriam, onam op apipimes sok jukpiriam, e co pok aman arawen.

¹³Petrusam atakam jen ajiefen. “Basitey. E pok bacatiwey. E das memeney.” Inim atakam jen ajiefen.

¹⁴Petrus masirin, “Tuhan. Inimas arapok. Dor e karow poknew, e ponow poknew, memen nomsom opok.” Inim aeefen.

¹⁵Bare, Petrus e atakam jen aojiefen. “Or e Allah memen pok akenemapomefas, karowas baji arapok.” Inim atakam jen ajiefen.

¹⁶Eras bar mamincop aemef, wunam e co pok onam op aosarimtometefen.

¹⁷Barewen. Petrus e desen aporefas bi binip arke aceceremefen. “E ucim pokam?” Inim bi binip aceceremefen. Inim bi binip cowocceceremamepaw, e Kornelius atewosomef ow e cem aporfesen. Ar masirin, e cem pagar jimasappu aememfesen. Bap ara, e wo kawey ow jonow atowporfesen. “Simon cem onakaram?” Inim aefesen.

¹⁸Bare, e ow e cem pagar jimasappu aememfes, ar atakam awut aotawfesen. “A cem, jipic juwas Simon Petrus awap open?” Inim aefesen.

¹⁹Petrus nat, e desen aporefas bi binip cowocceceremamepaw, e Roh Kudus, atakam aramat ipic aotawefen. “Jakaperey. Jipic mamincop or apowmenes.

²⁰Oram basitey. Bakorneyey. E ow jamkawiey. Oram omar arapok Dor e ow dorma atewenamof.” E Roh inim aeefen.

²¹Bare, Petrus e ow bipu cenes aneyemefen. Atakamam aotawefen. “Caram jakapor. Dor e apowmenokom ipic awamcey ara. Arasan aenawmokom ucimasam?” Inim aeefen.

²²E ow masirin, atakam aotawfesen. “Kornelius tentara komandan ipic ara. Aram tarowat ipic ara. Aram Allah omar ipic ara. E Yahudi samat ow takas e ipic asicimames. Malaikat tarowatam atakam aramat ipic aotawefen. ‘Or Petrus mamjateey. Aram e ocem baenawcow. Or masirin, aratakam jen pajiey.’ E malaikat inim aeefen.” Inim aefesen.

²³Bare, Petrus, e ow, e cem atowomiwefen. Ajofay masirin, Petrus asitefen. Ar e ow ajamjisosefen. Wun Yope Yesus mamkawi owam ajamjisosfesen.

²⁴Petrusam, e owam, e bowsec isi cowok aememfes, wunam kota Kaisarea ajaremfesen. Korneliusam, e ow manmok afeefen. Bap ara, Kornelius arowcamweyam, ajowowam, aaramsisimefen.

²⁵Petrus e cem bafiw aememef ara, e Kornelius, aramat ipic biamnuk aemamtewefen. Kornelius masirin, Petrus bweypu fop aneyjiapefen. Aram Petrus asicimefen.

²⁶Petrus nat, e Kornelius asumutumefen. “Basitey. Doram asmat ipicman.” Petrus inim aeefen.

²⁷Aram e Kornelius atakam aoamtawef, wunam e cemam afiwefen. Ar e ajarewsiapfes ow arke aporefen.

²⁸Aram atakam e ow aotawefen. “Caram camsom ara. Yahudi samat ipic, Yahudi opok samat ow, mamkawiap karow ara. Aram e Yahudi opok samat ow acem jaki karow ara. Allah nat, dor kawey ow, karowam, pwicakam, baji arapok, inim aporomtamfan.

²⁹Inimas ara, car ajatefenokom, dor bi binip arke opok aemof. Do nat, jonow ca batowpor. Car ucim pok jatefenokom?” Petrus inim aeefen.

³⁰E Kornelius masirin, “Atowmar ara, jam tiga jok inim dor e docem aman, janim Allah aanimof. Er inim inim jam ara. Jipic cowok pakaian sereas epcomam a dobipu asarimememef.

³¹Aramat ipicam atakam aotawfan. ‘Kornelius. Allah e janim aanimawarmemas jen ajima. Aram e uang e pok opok ow atetamawarmem, inim bi binip acomomama.

³²Oram ow Yope mamtewosomey. Oram ipic juwas Simon Petrus mamjateey. Aramat ipic binatang picin kerja ipic juwas Simon acem aemapma. E cem e jopir awames.’ E ipic inim atakam aotawfan.

³³Dor ara masirin, or akan ajatefin. Oram jak akat aememfem. Inimas or arasan aenawfem. Bare, dar takas, e Tuhan jirmec or ajirimfanas takas jen baji, Allah bipu aemapmom ara.” Kornelius inim aeefen.

³⁴Barewen. Petrus atakam e ow aotawefen. “Allah, ‘inim ow akat, inim ow pwicak,’ baji opok. Aram damos takas ajiomama. Dor inimas apormin ara.

³⁵Allaham e samatin samatin aromar owam, e akatas bwem owam, akat aporma.

³⁶Allaham ow aratakam e Israel ow botaw atewosomef. E Atakam Akat, inim ara: ‘E Yesus Kristus aemefas, Allaham, Asmatam, damos mamjiomas ara. E Yesus Kristus, bare ow takas aTuhan ara.’ Ar ow inim atakam e Israel botaw atewosomef. Caram e atakam camsom.

³⁷Bap ara, Yohanes bwi babwim atakam acacapiomef. Asep ara masirin, Yesus, awutnakutas, e Galilea capinmi aemef. Wunam ar eras e wun Yudea capinmi takas aemef. Caram inimas camsom.

³⁸Bare, Yesus e Nasaret ipic ara. Allaham, Roh Kudus, aramat ipic atetamef. Aram fakas aramat ipic atetamef. Aram aramat ipic akac aemawiri. Inimas aramat ipicam e asanin asanin ajisosawiri. Aram akatas aemawiri. Bare, Iblis e wun ow aomoma aeef. Yesus nat, e ow ajaworomtawa aeef. Caram inimas camsom ara.

³⁹Bare, dar Yesus e Yahudi ow capinmi aemefas takasam, e Yerusalem aemefas takasam, darma aporfom. Owam, aramat ipic salib os op atewtopomfes. Inimas ar aramat ipic acatiwfes.

⁴⁰Bar mamincop nat, Allah, aramat ipic aojaworomsumutumef. Aram aramat ipic umuton aporomef.

⁴¹Wun ow nat, Yesus bi bopor opok. E Allah bap aereremtawforow ow cowok, Yesus bi aporfom. Allah, aramat ipic aojaworomsumutumef masirin, dar amosam, bwiam, aramat ipic cowkon aanfom.

⁴²Aramat ipicam e Atakam Akat bacacapiom, jirmec ajirimforow. Allah, aramat ipic, e tetakay owam, e damir owam, adosa, atakam basakamtiw ipic atewemef. Ar inimas atemen bwe jirmec ajirimforow.

⁴³Ametnak ara, Allah atakam botaw ow takas, aramat ipic atakam aotawfes. ‘Allah e aramat ipic aemcowas aporcemar. Inimas ar e aramat ipic asicimces ow takas, adosa akokoromosomcema.’ Inim aefes.” Petrus inim aeefen.

⁴⁴Petrus atakam basakaypi opok ara, e Roh Kudus, e atakam jen ajifes ow takas jak aman afiwaptotorefen.

⁴⁵E ow masirin, kawey samatin samatin atakam jukpiri atawtotorfesen. Aram e Allah awutnakut aporfes, wunam aramat ipic asicimfesen. Bap ara, wun Yahudi samat Yesus mamkawi ow, e Petrus e Yope akac ewenawfesen. Aram e Yahudi opok samat ow atakam atawfesas jen ajifesen. Inimas ar Allah e Roh Kudus, e Yahudi opok samatam atetamef aporfesen. Ar masirin, junum awut aefesen. Bare, e Petrusam atakam aotawefen.

⁴⁶

⁴⁷“A ow, Roh Kudus ateweteres. Aram dar cimin aemeres. Inimas a ow bwi babwim, acuw bat ow open?” Inim aeefen.

⁴⁸Petrus masirin, ow Yesus juwas bajiem, wunam e ow bwi babwim, jirmec ajirimefen. E ow masirin, e Petrus, bar mamincop erasan akac bemap, janim aanimfesen.