Read Central Asmat AEMAWIRISAS 11 Bible Online

AEMAWIRISAS 11 - Central Asmat bible

AEMAWIRISAS 11

¹E atakam botaw batewosom owam, e Yudea capinmi takas Yesus mamkawi owam, atakam jen ajifesen. “E Yahudi opok samatam, Allah atakam jen emejifes.” Inim atakam jen ajifesen.

²Bare, Petrusam Yerusalem ajisosefen. E sunat bwem akat ow nat, e Petrus atakam aamtawfesen.

³“Or sunat opok ow cem jaki ajitfem, wunam amos e ow akac aemenfokom.” Inim aefesen.

⁴Petrus nat, e aemefas takas, atakam e ow aotawkurumefen.

⁵“E Yope aemapof, doram janim Allah aanimof. Dor masirin, pok cowok desen aporof. Pok picin awut cimin, onam op ewneyef. E picin, jep tete empat ajiwar aanitepef. E pok e dobipu cowok aneyef.

⁶Doram e pok manmok aoromsimopof. Dor masirin, binatang bwey empat ajiwar epcomam, wasan binatangam, fafasijarmes pokam, sokam, aporof.

⁷Doram atakam jen ajiof. ‘Petrus. Basitey. E pok bacatiwey. E das memeney.’ Inim aefan.

⁸Dor masirin, ‘Tuhan. Inimas arapok. E karow poknew, e ponow poknew, e dobweyof batowokop nomsom opok cowok.’ Inim aeof.

⁹Bare, e onam op atakam jen aojiof. ‘Or, Allah e memenas akenemef pok, karowas baji arapok.’ Inim atakam aotawfan.

¹⁰Inimas takas bar mamincop aemef, wunam e pok takas onam op aotometfes.

¹¹Bare, inimas aemfes cowok masirin, Kaisarea ipic mamincopam e cem jimasappu asarimememfes. Ow e ow do bayte atewenamfes.

¹²E Roh Kudusam atakam aotawfan. ‘E ow mamkawiey. Oram omar arapok.’ Inim aefan. A Yesus mamkawi ipic enam ajiwaram, ajamjisosfenes. Daram e Kornelius cem afiwfom.

¹³Aramat ipic masirin, atakam aotawforow. ‘Dor malaikat, e docem aman aememef aporof. E malaikatam atakam aotawfan. “Ow, Yope mamtewosomey. Erasan jipic juwas Simon Petrus awap. E ipic mamjateey.

¹⁴Aramat ipic oram, ocem ow takasam, e ajoremcokom bokotpu, atakam aotawceman.” E malaikat inim aefan.’ E Kornelius inim atakam aotawforow.

¹⁵Dor atakam inimnakap atawof masirin, e Roh Kudus, e ow jak aman afiwaptotoref. Ar e bap aemforowas inim cowok ara.

¹⁶Dor masirin, e Tuhan atawef atakam bi binip acomomof. ‘Yohanes, ow, bwi abwimef. Roh Kudus nat, e cajak aman afiwaptotorceman.’ Tuhan inim aeef.

¹⁷Daram Tuhan Yesus Kristus asicimfom ara, Allah, Roh Kudus dar atetamforow. Allaham inimas cowok e ow atetamef. Dor inimas aporof masirin, dor Allah bwemcakekem asan opok.” Petrus inim aeefen.

¹⁸E ow inim atakam jen ajifes masirin, aram jokon ajiapfesen. Aram Allah asicimfesen. “Bare, Allah, dosa bak bapayemtotor, inim bi binip, e Yahudi opok samat emetetamef. E owam jiwnenak aatamemawarcemes.” Inim aefesen.

¹⁹Bap ara, ow Stefanus acatiwfesen. Wun owam e Yesus mamkawi ow takas ajurusumfesen. Inimas e Yesus mamkawi ow, Fenisia capinmiam, wow juwas Siprusam, kota Antiokiam, apacayosfesen. E ow nat, e Yesus atakam, Yahudi samat ow cowok, aotawfesen.

²⁰E wun Yesus mamkawi ow, bare Siprus ow ara. Wun masirin, kota Kirene ow ara. Bare, e ow Antiokia ajarapfes, ar Tuhan Yesus Atakam Akat, e Yunani samat owam, acacapiomporfesen.

²¹Tuhanam, e ow akac aemefen. Inimas ow arkenakut e atakam asicimfesen. Aram bin afiremfes, wunam Tuhan ajamkawifesen.

²²Bare, e Yerusalem Yesus basicim barewsi ow, inim atakam jen ajifesen. Ar masirin, Barnabas, Antiokia atewosomfesen.

²³Aramat ipic erasan ajarapef ara, ar, Allah, asan akat e ow emcatetamef aporefen. Ar masirin, jak akat aememefen. Wunam ar e ow takas Tuhan mamkawiawar fak atjen aowefen.

²⁴E Barnabas, bare jipic akat ara. Roh Kudusam, aramat ipic aomomkurumef arawen. Aramat ipicam, Tuhan basicim fak ipic arawen. Bare, e Tuhan asicimfes ow, arke kayimin akakayiemfesen.

²⁵Barewen. Barnabas, Saulus bapowpor Tarsus ajisosefen.

²⁶Ar Saulus atewef masirin, Antiokia ajisomosefen. Bare, tahun cowokut ara, Barnabasam, Saulusam, e Yesus basicim barewsi ow akac ajarewsifesen. Aram atakam ow arke amememtamfesen. Bare, e Antiokia ara, ow, e Yesus mamkawi ow “Kristen Ow,” inim juwas bap a takam ajiapomfesen.

²⁷Bare, e jofay ara, Allah atakam botaw ow, Yerusalem ewsitfes, wunam Antiokia aenawfesen.

²⁸E wun ipic juwas Agabus arawen. Bare, Roh Kudus, atakam bi binip, aramat ipic atetamefen. Aramat ipic masirin, asitef, wunam atakam aotawefen. “Asep jofay ara, e capinmiin capinmiin ow takas amosto awutnakut aemapcemes.” Inim aeefen. Asep ara masirin, Klaudius raja ipic aememef ara, ow amosto awutnakut aemapfesen.

²⁹Inimas e Yesus mamkawi ow, uang, e Yudea capinmi Yesus mamkawi ow batiwirim, atakam aamsakamfesen. Uang awut ow, uang awut batiwirim, wunam uang kanim ow, uang kanim batiwirim, inim atakam aamsakamfesen.

³⁰Bare, inimas cowok aemfesen. Ar e Barnabasam, Saulusam, e pok, e ketua ow batowocentam, atakam aotawfesen. Bare, e Barnabasam, e Saulusam, e uang atowocenfes, wunam e ketua ow atetamfesen.